Read Navajo JEREMIAH 48 Bible Online

JEREMIAH 48 - Navajo bible

JEREMIAH 48

¹Ízrel dine'é biDiyin God t'áá ałtsoní bee Bóhólníihii éí Mó'ab dine'é yik'ijį' haadzíi'go kóní, Nííbo kin haal'áii doo hojooba' ájíníi da! Ni'doolchxǫ' Kíriyathéíyim t'óó baa yáhásinígi ábi'diilyaago bidis'nááh; Mísgab kin haal'á éí t'óó baa yáhásinígi ábi'diilyaago dahodeeshzhago áhoolyaa.

²Mó'ab dine'é doo baa nááhá'niih da doo, Héshban kin haal'áagi doo yá'áshóonii yee yindahazgiz; sołtį', dine'é doo náádajídlį́į́góó ádahodiilnííł. Nihí ałdó', diné tsihaohkaii nohłíinii, ánihidi'dooldįįł; diltłish nanihidínóołchééł.

³Ayóó át'éego atídoolníiłgo hodoolchǫǫłgo Horanéíyimdę́ę́' chaał hahóó'áago hodiits'a'.

⁴Mó'ab dine'é atílyaa; ha'áłchíní yázhí daacha áádóó nitséédaaltłi'go diists'ą́ą́'.

⁵Lóhith kin haal'áágóó niinah yikahgo doo ádahodiilzééhgóó daachago deíkáah doo; Horanéíyim hoolyéé góyaa abi'disdįįdii t'áá íiyisí yaa daachaaígíí éí ana'í deidiizts'ą́ą́'.

⁶Dah dadinóohchééh; yisdá'ádóh'níiłgo honoojíidi k'ai' łichíí' íí'áhígíí nidahonohłin le'.

⁷Baa nidasoohkaígíí índa nihiyódí baa dadzíínóhłíhígíí bąą nihí ałdó' nihidi'doolnééł; Kíímash diyin bidi'níinii éí bich'į' nááda'iiłniihii áádóó binanit'a'í danilíinii t'áá bił doolnééł.

⁸Ni'iiłchxǫǫhii éí kin hadaas'áii t'áá át'é yaatįįh doogáałgo kin hadaas'áii doo ła' yisdádoo'nił da; Bóhólníihii t'áá haadzíí' yę́ęgi át'éego honíts'aa' yę́ęgóó hodoołchǫǫł áádóó honíteel yę́ęgóó dahodeeshzhago ádahodoolííł.

⁹Mó'ab bit'a' áhóhłééh, áko yóó'adoot'a, háálá kin hadaas'áii naa'adahaaskaadgo ákwii t'áadoo kééhat'íní da doo.

¹⁰Hona'adlo'go Bóhólníihii binaanish baa nijigháii éí hóyée'go há ha'oodzíí'; hadiltłish bee hwe'ana'í bidił t'áadoo jideesasgóó t'áadoo nidi dziisxíinii éí Bóhólníihii hóyée'go há haadzíí'.

¹¹Mó'ab éí t'áá tsíłkéí nilį́į́dą́ą́' t'óó ałk'i dahisłáago hoolzhiizh; t'áá hasht'edíít'e' nít'éé' t'áadoo nahaasghan da, índa t'áadoo yisnááhgóó naayáa da; éí bąą t'ahdii t'áá ákóhálniih, t'ahdii t'áá ákóhálchin.

¹²Bóhólníihii kóní, Éí bąą tóshjeeh nídeidiyeinilígíí bich'į' deesh'aałígíí bich'į' yoołkááł, jó'akon; éí naa'adahodoołmasgo hatóshjeeh ałtso yadeidiyooniłgo nideidoołtsił.

¹³Ízrel dine'é éí Béthel kin haal'á yaa dzólíii yaa yániizį́'ígi át'éego Mó'ab dine'é éí Kíímash diyin bidi'níinii yaa yádínóozįįł.

¹⁴Haash yit'éego, Diné dahayóii anaa' yiniyé hasht'edadiidzaii daniidlį́, dadohní?

¹⁵Mó'ab kéyahgi hóóchxǫ'go bikin hadaas'áádóó nahjį' hahaaskai; hatsíłkéí bitah haasdláa'ii nidadootsił góyaa adahaaskai, ní t'áá ałtsoní bee Bóhólníihii Aláahgo Naat'áanii nilíinii.

¹⁶Mó'ab dine'é ałtso atídoolníłígíí k'adę́ę baa hoolzhíísh; hach'į' nahodiyo'nałígíí tsį́įłgo bich'į' hoolzhish.

¹⁷Binaagóó kéédahoht'ínígíí baa yínííł danohłį́. T'áá ánółtso hwéédahonohsinígíí, Dooládó' gish bidziil yę́ę índa tsihał ayóó ánoolnin yę́ę k'é'éltǫ' da! dadohní.

¹⁸Ach'é'é nílíinii Dáíbangi kééhót'íinii, naa ha'niih yę́ędóó hadanináahgo dibáá' nílį́įgo sínídá; Mó'ab kéyahgi hóółchǫ'ígíí níyáago nik'iilwodgo bee dandziil yę́ęgóó atídayiilaa.

¹⁹Aró'er kin shijaa'di kééhót'íinii, atiin bąąhdóó sínízį́įgo ha'ísíidgo diné noochéełii índa asdzání yisdágháahii, Haa hóót'įįd, diníigo nidabídíłkid.

²⁰Mó'ab dahóółchxǫ'go t'óó baa yáhásinígi ábi'diilyaa; dílwoshgo nicha. Mó'ab hóóchxǫ', diníigo tooh Árnandi baa hólne'.

²¹Bee até'él'íinii éí halgaidi Hólan kin haal'áadi, Jahéízah índa Méfeiyath kin shijaa'ídi,

²²Dáíban kin haal'áadi, Nííbodi índa Beth-díblathéíyim kin shijaa'ídi,

²³áádóó díí kin hadaas'áii: Kíriyathéíyimdi, Beth-géímaldi, Beth-míyondi,

²⁴Kííriyathdi, Bázradi índa Mó'ab kéyahdi nízaadi kin hadaas'áii áádóó t'áá áyídígóó kin hadaas'áii éí t'áá ałtso bik'i dahwiizle'.

²⁵Bóhólníihii ání, Mó'ab dine'é yee bidziilii k'élne' índa bigaan k'é'éltǫ'.

²⁶Bóhólníihii bik'ijį' jílį́įgo ayóó át'éii ízh'diilyaaígíí bąą Mó'ab bi'iiyíłdlą́ągo bił honiiłdóóh; Mó'ab ałdó' bikwiígíí yii' tádí'néeh doo áádóó diné hándahałt'i' doo.

²⁷Ízrel dine'é ts'ídá t'óó bá nahółt'i' nít'éé'. Ízrel dine'éésh da'ni'įįhii bitahgi bi'diiltsą́? T'óó bá nahółt'i'go hodeeshzhiizh yę́ędą́ą́' áádóó wóshdę́ę́' dah na'ílzhiishgo hoolzhiizh.

²⁸Mó'ab kéyahgi kéédahoht'íinii kin hadaas'áádóó hah wohkáahgo tséníí'góó kéédahoht'į́ áádóó hasbídí a'áándáa'gi bit'oh áyiił'įįhígi át'éego ída'dołnééh.

²⁹Mó'ab be'ashohódli', t'áá íiyisí ádaa ha'niihgo, bee ádaa hodzódli'go, ádoot'į́įgo índa, Shí lą́ą, nízingo deii'nii' ni.

³⁰Bóhólníihii kóní, Hashké nídzingo bił náhochxihígíí shił bééhózin, nidi biyooch'íidgo yee ádaa dzódlíii yee doo ła' yidoolíił da.

³¹Éí bąą Mó'ab dine'é baa yínííł nishłį́įgo t'áá aaníí Mó'ab dine'é t'áá ałtso yéego baa yishcha doo; Ker-hííres kin haal'áádóó diné baa yínííł nishłį́įgo dish'níi doo.

³²Síbmah kin shijaa'dóó ch'il na'atł'o'ii nílíinii, Jéízer kin haal'á bilááh át'éego naa atínídinishdleeh doo; nits'áoz'a' tónteel wónaanígóó adahineesą́ągo Jéízer bitónteel bibąąhjį' nidi nidahineesą́; shį́įgo nineest'ą'ígíí índa ch'il na'atł'o'ii bitoo' bąąh hahas'nii'ígíí éí ni'iiłchxǫǫhii yaatįįh híná.

³³Mó'ab kéyahgi dáda'ak'ehgóó t'óó ahayóí nida'nt'ą' yę́ędóó bee ił hózhóonii índa baa hózhóonii dah diilyá; ch'il na'atł'o'ii habí'iil'ésígi wáin ádingo áshłaa, áko doo habí'iil'ées da doo índa doo ił hózhónígíí bee hodiwosh doo.

³⁴Héshban kin haal'áádóó Iiliyéíleh kin shijaa'jį' t'áá Jéíhaz kin haal'áajį' Nímrim haz'ánígi tó danílíinii nídááltseígíí biniinaa Zó'er kin haal'áádóó Hóranéíyim haz'áníjį' áádóó Égla-shelíshiya haz'áníjį' ayóó át'éego cha hahóół'áa doo.

³⁵Áádóó Bóhólníihii ání, Ninádahałaah doo biniyé wódah nahaz'ą́ągo ádaalyaagóó nááda'jiiłniihii índa tsin bijeeh dilidgo łikání halchinii hadiyin dabidi'níinii bich'į' dazhdiłidii éí Mó'ab kéyahgi ádajídingo ádeeshłííł.

³⁶Éí bąą tsin bee ída'dilzoołí dadiits'a' nahalingo Mó'ab dine'é bąą shijéí yicha; tsin bee ída'dilzoołí dadiits'a' nahalingo Ker-hííres dine'é bąą shijéí yicha, háálá jit'íinii nishójiyoost'e'ii ásdįįd.

³⁷Jó, atsiits'iin t'áá ałtso dadiwolgo ádadoolnííł, dághá t'áá ałtso dahidoogish, yílá t'áá ałtso dadoogish, áádóó aníí' gónaa tł'oh yishbizh bik'i daasti' doo.

³⁸Mó'ab kéyahgi kin dabighą́ą́'góó t'áá át'é índa kintaa da'aztiingóó diné yínííł danilį́įgo daacha doo, háálá łeets'aa' doo jiniizį́į́'góó nidziizti'ígi át'éego Mó'ab nehéti', ní Bóhólníihii.

³⁹Dooládó' Mó'ab nehestǫ' da; dooládó' ák'idadiit'aah da; dooládó' yániizį́į'go t'ą́ąjigo názbaal da, áko Mó'ab t'óó bá nahat'i' doo índa hanaagóó kéédahat'íinii hak'ee bił adahayói doo.

⁴⁰Jó, Bóhólníihii kóní, Ła' éí atsá nahalingo naat'a' doo áádóó Mó'ab yik'ijį' nilį́įgo bit'a' yidoołbał, jó'akon.

⁴¹Kííriyath kin haal'á éí bi'disnááh áádóó bohoníłdzilgo nahaz'ą́ yę́ęgóó daasná índa éí bijį́įdi Mó'ab dine'é dahayóii dabijéí éí asdzání awéé' bídii'na'go bijéí át'éhígi át'éego bił daayée' doo.

⁴²Bóhólníihii bik'ijį' dajílį́įgo Mó'ab dine'é ayóó ádajít'éego ídazh'diilyaaígíí biniinaa doo dine'é dajílį́į da dooleeł biniyé áhodi'dooldįįł.

⁴³Mó'ab kéyahgi kééhót'íinii, yéé' áádóó a'áán índa łoh nihik'i dahwiidooleeł, ní Bóhólníihii.

⁴⁴Yéé' bits'ą́ąjį' dashdíníichą́ą'ii éí a'áán góyaa azhdoogoh, áádóó a'áándę́ę́' háájoo'na'ii éí łoh bii' dahizhdidoogááł, háálá Mó'ab dine'é atíhodeeshłíłígíí baa hoolzhiizhgo ádeeshłííł, ní Bóhólníihii.

⁴⁵Dah dadíníichą́ą'ii éí Héshban kin haal'á bichaha'oh biyaagi doo bitah dahwiináágóó naazį́, háálá Héshbandóó kǫ' hadíínóód áádóó Sáíhan kin haal'áádóó kǫ' hadíínóodgo Mó'ab booshk'iizh ałtso yąąh yidííłid áádóó dabitsii' ałtso yiyíízeez.

⁴⁶Mó'ab nílíinii, doo hojooba' ájíníi da. Kíímash diyin bidi'níinii yich'į' nidahałáii ałtso ásdįįd, háálá niye'ké índa nitsi'ké dabi'disná.

⁴⁷Nidi akée'di yoołkáałdi Mó'ab yisnááh danilíinii nahjį' kódeeshłíiłgo daabíí' yę́ę bíí' nídadoodleełgo ádeeshłííł, ní Bóhólníihii. Kónízahjį' Mó'ab dine'é baa hwiidínóot'įįł.