Read Navajo JEREMIAH 49 Bible Online

JEREMIAH 49 - Navajo bible

JEREMIAH 49

¹Bóhólníihii éí Áman dine'é kwííłní, Ízrel dine'éésh biye'ké doo dahólǫ́ǫ da? Bíí' dadooleełiísh doo ła' hólǫ́ǫ da? Ákoshą' ha'át'íí biniyé Málkam wolyéii Géed kéyah bíí' áyiilaago bidine'é éí kin hadaas'áágóó kéédahat'į́?

²Bóhólníihii ání, Éí bąą Áman dine'é bikin haal'á Rábahdi anaa' haleehgo dilní didoots'į́į́ł áádóó éí ahiih nídahineezkaadgo yanáa'áa doo; bikin naazhjaa'ígíí adahididoolk'ą́ą́ł, jó'akon, áko índa Ízrel dine'é bíí' yę́ę bíí' nídoodleeł, ní Bóhólníihii.

³Héshban yinílyéii, Rábah nichago ák'idiit'aah, háálá Éí'ai kin haal'á hoolchxǫ'go ályaa. Rábahdóó atsi'ké danohłíinii, yéego daohcha; tł'oh yishbizh bee áká daołzisgo atínídadinohdleehgo kin haal'á binaa ahééda'astł'inígíí bine'dę́ę́' ałnááhohjah, háálá Málkam wolyéii áádóó binááda'iiłniihii índa bá nidaal'a'í naat'áanii danilíinii t'áá yił bi'disnáágóó dadooleeł.

⁴Háishą' shik'iidoojah? níigo binaalye'é yaa dzólíii, ach'é'é yóó'anáádzáii nílíinii, ha'át'íísh biniyé nihoníts'aa'góó bee áda'azįįdígíí bee ádaa hó'niih?

⁵T'áá ałtsoní bee Bóhólníihii ání, Jó, t'áá ałtso ninaagóó kéédahat'ínígíí bééníldzidgo ándeeshłííł, áádóó t'áá ałtso t'áadoo ła' t'ą́ą́' nídéest'į́'í ts'ídá tsį́įłgo ch'ídínóolkał índa áłah ánábidoodlíiłii t'áá ádin doo.

⁶Áádóó bik'ijį' Áman dine'é yisnááh danilíinii nahjį' kódeeshłíiłgo daabíí' yę́ę bíí' nídadoodleełgo ádeeshłííł, ní Bóhólníihii.

⁷T'áá ałtsoní bee Bóhólníihii éí Íídam dine'é yaa haadzíi'go kóní, Tííman kéyahdiísh hódzą́ ásdįįd? Diné akék'eh hoo'į́įgo bił ééhózinii kót'éego nínígíísh bits'ą́ą́' ásdįįd? Bibee dahódzánígíísh bee ádaasdįįd?

⁸Díídan kéyahgi kéédahoht'íinii, naanáhkáahgo dah dínóohdzoodgo hazhó'ó nídadoht'įįh, háálá Íídam atéshłéehgo Íísa bee atéshłaa yę́ę bee atíhodeeshłííł.

⁹Ch'il na'atł'o'ii dayóbéii naa yíkaigo ła' t'áá bąąh dah naaznilgo ádeidoolííł; ani'įįhii tł'ée'go yíkaigo hwiih daazlį́į'jį' atída'doolííł.

¹⁰Íísa éí t'áá łichí'ígo naagháago áshłaa; nínádít'į́į́h yę́ęgóó bááda'díłtsooz, áko doo nídót'į́łígi ádzaa da. Ba'áłchíní índa bik'isóó danilíinii áádóó yił kéédahat'íinii atídaalyaa áádóó hó ałdó' ájídin.

¹¹Áłchíní bizhé'é bąąh ádaasdįįdígíí bíni' t'áá ákǫ́ǫ́ nidaakaigo shí baa áháshyą́ą doo, áádóó asdzání bąąh ádahasdįįdii nii' kéédahat'íinii háni'dii shaa dadzólí.

¹²Háálá Bóhólníihii kóní, Jó, doodlį́įłii doo deidoodlį́į́łgóó bá hada'iisdzíi'ii éí t'áá aaníí deidoodlį́į́ł, áko ni daats'í doo atíndi'doolníił da; t'áá atíndi'doolnííł; doodlį́įłii ts'ídá díídlį́į́ł,

¹³háálá t'áá shí ádee hadeesdzíí', ní Bóhólníihii, Bázra kin haal'á t'óó bik'ee ił ahayói doo; t'óó bá nahat'i' doo, kints'iil t'éí hadaas'áa doo, hóyée'go bá ha'oodzíi'go haz'ą́ą doo áádóó kin hadaas'áhígóó t'áá áłahjį' kints'iil t'éí dah naazhjaa'go ahóyéel'áa doo.

¹⁴Bóhólníihii éí hane' shich'į' áyiilaago diséts'ą́ą́' áádóó ał'ąą dine'é bitahgóó hane' nei'áii eel'a'go kóní, Ahí'áhoohjáahgo bich'į' dohnéehgo bik'iohjeeh.

¹⁵Jó, ał'ąą dine'é bitahgóó t'áá díkwíigo áádóó dadine'é dani'į́įgo ándeeshłííł.

¹⁶Tséghą́ą'di tsé binída'astséélgóó kéédahoht'íinii, bee nihádahadzidii índa bee ádaa dadzíínóhdlíii nihina'azlo'; azhą́ atsá bit'oh ííł'ínígi ánízáadi nihit'oh ádaohłaa nidi, áádę́ę́' adanihidiyeeshtł'ił, ní Bóhólníihii.

¹⁷Íídam kéyah ałdó' t'óó bik'ee ił ahayói doo; ákǫ́ǫ́ yą́ą́h nídadikahii t'áá ałtso bik'ee t'óó bił adahayóigo, Tłehee yéi', daaníigo doo yá'áshónígi áál'įįdii nídeiníl'įįh doo.

¹⁸Bóhólníihii ání, Sádam áádóó Gomárah kin haal'áii índa binaagóó kin dah naazhjaa'ígíí atélyaa yę́ęgi át'éego diné ła' índa ba'áłchínída doo ła' ákwii kééhat'į́į da doo.

¹⁹Jó, bidziilgo kééhat'ínígíí bich'į' Jórdan tooh nílínígi hodíłch'iltahdę́ę́' náshdóítsoh bitsiijį' daditł'ooígíí nahalingo hach'į' nídidoodááł, háálá t'áadoo hooyání hats'ą́ąjį' yóó'adoojahgo ádeeshłííł áádóó nídiiltínígíí honiyé nideeshtééł. Háishą' shígi át'é? Háishą' aa hwiinít'į́įjį' ách'ą́ą́h hadeesdzih biniyé shiidoosįįł áádóó háí éí dibé yaa áhályą́ągo shíníłdzil doo?

²⁰Éí bąą Bóhólníihii éí Íídam dine'é yinahaz'ánígíí áádóó Tííman kin haal'áagi kéédahat'íinii yinahaz'ánígíí deísółts'ą́ą́': t'áá aaníí, hó áádóó ha'áłchíní t'áá hoł adahodínóołkał; t'áá aaníí kéédahojit'ínígi doo naagháhígóó áhodoolííł.

²¹Hak'eh hodeesdlį́į'go ni' nahaasnáá'; dajichaígíí Tónteel Łichíí'góó nidi hodiists'ą́ą́'.

²²Jó, atsá nahalingo ch'ídoot'ahgo Bázra kin haal'áii yik'ijį' nilį́įgo bit'a' yidoołbał áádóó éí bijį́įdi Íídam dine'é dahayóii dabijéí éí asdzání awéé' bídii'nahgo bijéí át'éhígi át'éego bił daayée' doo.

²³Damáskas kin haal'á éí kót'ée doo; Héímath kin haal'á áádóó Ákpad kin shijaa' doo yá'áshónígi át'éégóó dayíínii'ígíí bąą t'óó baa yáhásinígi áho'diilyaa, áko bąąh nidahazkaad. Tónteel doo hasht'edit'eehii nahalingo doo hasht'edadit'eeh da.

²⁴Damáskas éí yee ák'idooldziłii bee ásdįįd; yóó'adoolwoł yiniyé náhaayáago neesyiz. Asdzání i'niiłchínígi át'éego bił hodiniihgo yínííł nilį́.

²⁵Dooládó' kin haal'áago baa shił hózhónígíí éí t'áadoo bik'i honoodzood da.

²⁶Éí bąą hakin haal'áagi kintah da'nítiingóó hadine'é ániid nidaakaii daninéego naa'ahidínóodah. Áádóó éí jínígíí biyi' diné nidaabaahii t'áá ałtso nidadootsił, ní t'áá ałtsoní bee Bóhólníihii.

²⁷Áádóó Damáskas ditą́ągo binaa ahéé'ítł'inii bohodideeshniłgo Ben-héídad wolyéii bibine' na'adzi'ii adidook'ą́ą́ł.

²⁸Kíídar dine'é índa Héízar dine'é bee bóhólníihgo nahaz'áanii éí Bábilan dine'é aláahgo binanit'a'í Nébukadnézzar yik'eh deesdlį́į'ii íídą́ą́' Bóhólníihii haa halne'go kóní, Hasht'e'ádadołnéehgo ha'a'aahjigo Kíídar dine'é kéédahat'íinii atínílééh.

²⁹Dahaníbaal adeidiyoojih áádóó nidazhniłkaadii adeidínóołkał índa dáń'dazhdiłbałii áádóó dahaleets'aa' áádóó dahaghą́ą́'ask'idii ałtso ádá shódeidoołt'eeł, áádóó haatįįh yínáago, T'áá ałtsodę́ę'go yéé' hólǫ́! dahałníi doo.

³⁰Héízargi kéédahoht'íinii, yóó'anoohdzoodgo nízaadgóó yóó'adahołyeed; tsédaaníí'góó nídadoht'įįh, háálá Bábilan dine'é aláahgo binanit'a'í Nébukadnézzar nihinahaz'ą́ áádóó nihinahazgiz, ní Bóhólníihii.

³¹Hasht'e'ádílnéehgo diné da'at'íinii t'áadoo bida'diił'áhígóó kéédahat'íinii bich'į' dínééh; t'áá sahdii kéédahat'į́įgo doo dáń'daditį́įh da índa doo bich'ą́ą́h dáń'dadilkał da, ní Bóhólníihii.

³²Dabighą́ą́'ask'idii éí bąąh nida' aztseedii dadooleeł índa dabibéégashii éí bąąh da'oogą́ą́' dooleeł áádóó dabitsii' bibąąhgóó nídeishihii tadahwiidínéeshkał áádóó atídahodoolíiłii t'áá ałtsodę́ę́' haatįįh dadookahgo ádeeshłííł, ní Bóhólníihii.

³³Héízargi éí mą'ii dabi'áan doo áádóó hool'áágóó doo naagháhí da doo. Diné doo ła' ákwe'é índa ba'áłchíní doo ła' ákwii kééhat'į́į da doo.

³⁴Júdah dine'é aláahgo binanit'a'í Zedekáíyah t'óó hodeesáá' yę́ędą́ą́' Bóhólníihii éí Íílam dine'é, Kót'ée dooleeł, níigo Diyin God yá halne'ii Jeremáíyah yich'į' haadzíi'go kóní,

³⁵T'áá ałtsoní bee Bóhólníihii kóní, Íílam dine'é be'ałtį́į́' éí agháago bee bidziilii k'ídeeshtih, jó'akon.

³⁶Áádóó Íílam dine'é éí t'áá dį́į́'dę́ę́' hach'į' daníyolgo ádeeshłíiłgo t'áá dį́į́'góó hoł taidooyoł. Áádóó Íílam dine'é ch'íneelkaadii éí ał'ąą dine'é t'áá ałtso bitahgóó tadzooswod doo.

³⁷Íílam dine'é éí bida'ana'í dabinááł índa dabidooghą́ąłii dabinááł nitsidaakaigo ádeeshłííł áádóó t'óó báhádzidgo sháhóóchįįdígíí bee doo yá'áshónígi áhodeeshłííł. Ałtso áhoséłdįįdjį' diltłish hakéé' deesh'aał, ní Bóhólníihii.

³⁸Áádóó Íílam kéyahgi shibikáá'dóó nahat'áii nideesh'ááł, áko áádóó aláahgo naat'áanii índa naat'ánii danilíinii áhodeeshdįįł, ní Bóhólníihii.

³⁹Nidi akée'di yoołkáałdi díí baa hodoolzhish: Íílam dine'é yisnááh danilíinii nahjį' kódeeshłíiłgo daabíí' yę́ę bíí' nídadoodleełgo ádeeshłííł, ní Bóhólníihii.