Read Navajo JEREMIAH 50 Bible Online

JEREMIAH 50 - Navajo bible

JEREMIAH 50

¹Kót'éego Diyin God yá halne'ii Jeremáíyah binahjį' Bóhólníihii éí Bábilan dine'é índa Kaldíya dine'é bikéyah yik'ijį' haadzíí'.

²Bábilan dine'é éí bi'disnááh; Bel diyin bidi'níinii t'óó baa yáhásinígi ábi'diilyaa, Mérodak diyin bidi'níinii éí nibi'diisti'; bi'eda'alyaii t'óó baa yáhásinígi ádabi'diilyaago nidabi'diisti'go ał'ąą dine'é bee bił dahołne'go dah na'at'a'go ádaohłééh. Baa dahołne'go hane' bitaadaoh'a'go t'áadoo nidanoł'iní.

³Háálá náhookǫsdę́ę'go ła' dine'é hak'ijį' nídidoonéełgo hakéyah doo naagháhígóó ádahodoolíiłgo ákwii doo ła' kééhat'íní da doo; diné éí naaldlooshii t'áá ałtso yił ch'íheezná.

⁴Éí hoolzhishdi índa éí yoołkáałdi Ízrel dine'é índa Júdah dine'é daachago biDiyin God hádaat'į́įgo nídeíkáah doo, ní Bóhólníihii.

⁵Záíyanjigo dadéez'į́į'go atiin yínda'ídíłkidgo kódaaníi doo, Sołtį', bee aha'deet'áanii doo baa hodiyoo'nahii hool'áágóó bee Bóhólníihii bididiikah.

⁶Shidine'é éí dibé yóó'aheeskaígíí nidahalin; baa ádahalyáanii yóó'adabiizh'eezhgo dziłghą́ą'di t'óó bida'asnii'; dziłghą́ą́'dóó dah daask'idgóó nidaakaigo háádahalyįhgi yaa dayooznah.

⁷Bik'ídahaaskaígíí t'áá ałtso dabooldéél áádóó bi'ana'í ádaaní, Nihí doo ádidahodiilt'i' da, háálá Bóhólníihii éí t'áá ákogi é'ét'éii bee hólónígíí, t'áá éí Bóhólníihii bee dahazhé'é yę́ę bił chodahoo'íinii bich'į' ádił nida'jiisíí'.

⁸Bábilan dine'é áádóó Kaldíya dine'é bitahdóó nahjį' haohnéehgo tł'ízíchǫǫh éí tł'ízí yilą́ąjį' yikahígíí nidahonohłin.

⁹Háálá náhookǫsdę́ę'go Bábilan dine'é biniyé ał'ąą dine'é ayóó ádaat'éii ahiih dadoonéełgo yich'į' nídidoonééł; yich'į' ałkéé' ni'ahidoo'niłgo dahodoołnééł; diné doo na'asi'ii bik'aa' nidahalingo doo ła' ch'ééh nidadoobah da.

¹⁰Kaldíya dine'é łíbidi'doocháásh áádóó diné łídahodoocháashii hwiih dadooleeł, ní Bóhólníihii.

¹¹Shíí' dooleełii atídaohłaaígíí danohłíinii, baa nihił dahózhǫ́ǫgo áádóó baa nihił nidahoozhǫǫhgo biniinaa índa béégashii yáázh hootsogóó naalgeedígíí índa łį́į́'chogi áníinii nidahonohłingo biniinaa

¹²nihimá t'óó nihaa yádínóozįįł; nihishchíinii t'áá íiyisí ádaa yádínóozįįł, háálá ał'ąą dine'é bitahdóó a'ohgo dine'é jílį́į doo, hoł haz'ánígi honoojítah dooleeł índa t'óó dzígaigo doo naagháhí da dooleeł, jó'akon.

¹³Bóhólníihii t'óó báhádzidgo hashké niidzį́'ígíí biniinaa ákwii diné doo ła' kééhat'į́į da doo áádóó t'áá át'é doo naagháhí da doo. Bábilan dine'é yą́ą́h nídadikahii t'áá ałtso bik'ee t'óó bił adahayói doo áádóó, Tłehee yéii', daaníi doo.

¹⁴Ałtį́į́' nídaołtasii t'áá ánółtso Bábilan dine'é bináłzhíísh; k'aa' t'áadoo áádaohsįįhí deínółt'óóh, háálá Bóhólníihii yich'į' ádił asiih.

¹⁵Anaa'jį' hódadołwoshgo honáłzhíísh; ááhoost'įįdgo yadidiilchid, yee niłdzilii naa'ahineezdee'; binaa ahééda'astł'inii naa'aheeskaad, háálá kót'éego Bóhólníihii k'éédiidzaa. K'éédadohdlééh; ła' ádayííł'įįdígi át'éego t'áá ákónídaohdlééh.

¹⁶Bábilan kéyahdóó k'éé'dídléehii áádóó da'agizhgo bee iikaałí neich'idii naniłtseed; diltłish bik'ee bił yéé' dahazlį́į'go t'áá bí bidine'é yich'į' nidahididoolwoł áádóó t'áá bí bikédaayahgóó anídahidínóochééł.

¹⁷Dibé nahalingo Ízrel dine'é tabidi'nooskaad; náshdóítsoh bitsiijį' daditł'ooígíí yóó'abinííłkaad; t'óó ch'óóshdą́ądi Asíriya dine'é aláahgo binanit'a'í ałtso booldéél, áádóó akée'di Bábilan dine'é aláahgo binanit'a'í Nébukadnézzar bitahwiizti'.

¹⁸Éí bąą Ízrel dine'é biDiyin God t'áá ałtsoní bee Bóhólníihii kóní, T'áá Asíriya dine'é aláahgo binanit'a'í atéshłaaígi át'éego Bábilan dine'é aláahgo binanit'a'í áádóó bikéyah atídeeshłííł, jó'akon.

¹⁹Áádóó índa Ízrel dine'é kééhat'į́į́ nít'éé' yę́ęgi ninádeesh'nił áádóó Dził Kármel áádóó Béíshan kéyahdi nááda'ayą́ą doo, áádóó Íífreiyim kéyahdi índa Gíliyad kéyahdi daadziłígóó bii' sizíinii hwiih nilį́į doo.

²⁰Éí yoołkáałdi índa éí hoolzhishdi Ízrel dine'é yee ádił asiihii há'déest'į́į' doo, nidi ádin doo, áádóó Júdah dine'é yee ádił asiihii ch'ééh hádazhdídóo'įįł, háálá áádasísįįdii ádił nida'iisí'ígíí bá k'ééda'deeshchxǫǫł, ní Bóhólníihii.

²¹Merathéíyim kéyahgóó áádóó Pííkad dine'é bich'į' doohnéełgo nidadoołtsiłgo ts'ídá ałtso ádadoołdįįł, áádóó bee nihich'į' haasdzíi'ii bida'ohłééh, ní Bóhólníihii.

²²Ayóó át'éego atí'oolníiłgo kéyahdi anaa' hólǫ́ǫgo hodiits'a'.

²³Dooládó' nahasdzáán bikáá'góó bee na' alne'ígíí ahááltǫ' áádóó nibi'diisti' da! Dooládó' ał'ąą dine'é bitahgóó Bábilan dine'é yę́ę t'óó bik'ee ił ahayóí silį́į' da!

²⁴Bábilan nílíinii, Bóhólníihii hoo'áłígíí doo nínízingóó biniinaa łoh ná niiní'ą́ągo biih yíníyá; doo baa ákonínízingóó nééhoozingo ni'diiltsood.

²⁵Bóhólníihii éí bibee anahat'íinii ąą áyiilaago doo bił hózhǫ́ǫ́jí bee anahat'íinii ch'íinínil, háálá díí Kaldíya dine'é bikéyahdi t'áá ałtsoní bee Bóhólníihii binaanish át'é.

²⁶Agháá' ádanízáádę́ę́' bik'ijį' dadohnééh; binoo' bá hooghan ąą ádaohłééh; t'áadoo ła' ch'íneełnéhí tł'oh naadą́ą́' nahalingo yáádaohtséehgo ałtso ádaołdįįh.

²⁷Na'atseedjį' bidóola dahidikáahgo t'áá ałtso nidaołtseed. Doo hojooba' ájíníi da, háálá beiníłką́ atídabidi'doolníiłjį' ahoolzhiizh.

²⁸Bóhólníihii nihiDiyin God éí bikin bii' sohodizin yá k'éédiidzaaígíí éí Dził Záíyangi yaa dahodoolnih biniyé Bábilan kéyahdóó yisdádahaaskaii dah díníidzoodgo biinéé' diists'ą́ą́'.

²⁹Bábilan kin haal'áii yik'ijį' ałtį́į́' yee nidaabaahii áłah ánílééh, ałtį́į́' nídaołtasii bik'i dinaago bináłzhíísh; t'ááká ła' nihił ch'óoya' lágo; yaa nidaaskaígíí bik'ehgo k'éédadohłééh; yaa naayáhígíí t'áá át'é bik'ehgo ákónídadoohdlííł, háálá Bóhólníihii éí Ízrel dine'é biDiyin nilíinii bich'į' hwee áshohódli' nít'éé'.

³⁰Éí bąą hatsíłkéí kintah da'nítiingóó nidadootsił áádóó éí bijį́įdi diné nidaabaahii ałtso nidootsił, ní Bóhólníihii.

³¹T'áá ałtsoní bee Bóhólníihii Diyin God ání, Ayóo ádaa hó'niihii nílíinii, nik'ijį' nishłį́; beidoołkáałgo atínídeeshłíłígíí baa hodoolzhish, jó'akon.

³²Agháago ádaa ha'niihii didoogoh áádóó naa'adoogoh áádóó doo ła' nábididoodzį́įs da; bikin hadaas'áhígíí bohodideesh'niłgo binaagóó ałtso hodidoolił.

³³T'áá ałtsoní bee Bóhólníihii kóní, Ízrel dine'é áádóó Júdah dine'é t'áá áłah bide áhólzin nít'éé'; dabisnánígíí t'áá ałtso yéego dabótą'go doo béédeidóchííd át'ée da nít'éé'.

³⁴Bik'é niná'doodléełgo háábidoo'niłii ayóó ábóodziil; éí t'áá ałtsoní bee Bóhólníihii wolyé. Nahasdzáán bikáá'góó k'é náhodoołeeł áádóó Bábilan kéyahgi naho'digháahgo íidoolííł biniyé t'áá niná'deet'įįdjį' bidine'é yá na'ak'íyádoołtih.

³⁵Kaldíya dine'é áádóó Bábilan kéyahgi kéédahat'íinii áádóó binanit'a'í danilíinii índa bahastóí dahóyáanii bich'į' diltłish deez'á, ní Bóhólníihii.

³⁶Ádaa dadzódlíii bich'į' diltłish deez'á, áko doo ádahodoolyąął da; bidine'é dahayóii bich'į' diltłish deez'á, áádóó nitsidadookah.

³⁷Dabilį́į́' bee nida'abaahii índa bitsindaabąąs bijáád naakiígíí bich'į' diltłish deez'á áádóó bitahgi dé' éyóní danilíinii t'áá ałtso bich'į' diltłish deez'áhígíí biniinaa asdzání nidahalin doo; biyódí bich'į' diltłish deez'á silį́į'go ałtso bighadoogééł.

³⁸Tó ádadoodįįłgo nídahodooltsih, háálá éí kéyahgi e'elyaii t'éiyá dahólǫ́ áádóó bi'eda'alyaii yiniinaa tsi'deeskai.

³⁹Éí bąą halbátahdę́ę́' naaldlooshii da'ałchinii índa mą'ii dootł'izhí ákwii dabighan doo áádóó né'éshjaa' ákwii hólǫ́ǫ doo, áádóó hool'áágóó doo ła' diné kénááhát'į́į da doo, índa náás oochííłgóó doo ła' diné ákwii kééhát'į́į da doo.

⁴⁰Diyin God t'áá Sádam áádóó Gomárah kin haal'áii índa binaagóó kin dah naazhjaa'ígíí atíyiilaa yę́ęgi át'éego t'áá ákót'éego diné doo ła' ákwe'é kééhat'į́į da doo, ní Bóhólníihii.

⁴¹Náhookǫsdę́ę́' ła' dine'é ayóó át'éii danilį́įgo doonééł áádóó nahasdzáán nidahonees'ą́ą́dę́ę́' aláahgo naat'áanii t'óó ahayóí bił hadahodínóolchał.

⁴²Bik'aayééł índa bitsiidétáán deíjáah doo; doo daats'íídgóó doo aa a'ááh danízin da doo. Biinéé' éí tónteel diits'a'ígi íits'a' doo, Bábilan bich'é'é nílíinii, diné éí łį́į́' bił deezt'i'ígi át'éego nik'ijį' ałt'ááh doojah.

⁴³Bábilan dine'é aláahgo binanit'a'í yaa hodiizts'ą́ą'go bąąh nahókaadgo bigaan bąąh naníídee'; nitseedzá áádóó asdzání awéé' bídii'na'ígi át'éego bił honiigaii.

⁴⁴Jó, bidziilgo kééhat'íinii bich'į' Jórdan tooh nílínígi hodíłch'iltahdę́ę́' náshdóítsoh bitsiijį' daditł'ooígíí nahalingo hach'į' nídidoodááł, háálá t'áadoo hooyání hats'ą́ąjį' yóó'adoojahgo ádeeshłííł áádóó nídiiltínígíí honiyé nideeshtééł. Háishą' shígi át'é? Háishą' aa hwiinít'į́įjį' ách'ą́ą́h hadeesdzih biniyé shiidoosįįł, áádóó háí éí dibé yaa áhályą́ągo shíníłdzil doo?

⁴⁵Éí bąą Bóhólníihii éí Bábilan dine'é yinahaz'ánígíí índa Kaldíya dine'é bikéyahdi yinahaz'ánígíí deísółts'ą́ą́': t'áá aaníí, hó áádóó ha'áłchíní t'áá hoł adahodínóołkał; t'áá aaníí, kéédahojit'ínígi doo naagháhígóó áhodoolííł.

⁴⁶Bábilan dine'é bi'disnááh ha'níigo hodiists'ą́ą'go nahasdzáán hideesnáá' áádóó hacha éí ał'ąą dine'é bitahgóó diists'ą́ą́'.