Read Navajo JEREMIAH 8 Bible Online

JEREMIAH 8 - Navajo bible

JEREMIAH 8

¹Éí hoolzhishdi aláahgo naat'áanii yę́ę dabits'in índa naat'áanii danilį́į́ nít'éé' yę́ę dabits'in áádóó nááda'iiłniihii yę́ę dabits'in índa áhodoonííł yaa dahalne'ii danilį́į́ nít'éé' yę́ę dabits'in áádóó Jerúsalemgi kéédahat'į́į́ nít'éé' yę́ę dabits'in yóó'ádaalyaadę́ę́' háádeidiyoo'nił, ní Bóhólníihii.

²Áádóó jį́honaa'éí índa ooljéé' áádóó wót'ááh hiníláii ayóó'ádayó'níí nít'éé' yę́ę índa yich'į' nidahałáago yik'ehgo deíkai yę́ę áádóó deidósin yę́ę índa yich'į' nidahasá yę́ę yich'į' nídeididoonił. Doo áłah ádoolníił da áádóó doo yóó'adadoolníił da índa nihokáá'góó chąą' nahalingo nihidíl'áa doo.

³Díí doo yá'át'ééhgóó dah oonéełii daadziihígíí da'níłts'ą́ą'gi adahonííłkaad yę́ęgóó áadi nidajiltł'éego t'áá dajiináa dooleełígíí doo daznízin da doo, nidi dazhdínóonéłígíí éí nidahizhdi'aah doo, ní t'áá ał tsoní bee Bóhólníihii.

⁴Áádóó anáábididíí'niił, Bóhólníihii kóní, Naa'aníídee'go ts'ídá náádidoojah. Atiin ts'áníyáago ts'ídá nídoodááł.

⁵Áko lá ha'át'íí biniyé díí Jerúsalemgi kéédahat'ínígíí t'áá t'ą́ą́' anáákai nít'éé'? T'áá bizááká na'adlo' yąąh dah shijéé'; nídookahígíí doo ádeinízin da.

⁶Íínísts'ą́ą'go doo yá'át'ééhgóó yádaałti'go diséts'ą́ą́'. Ła'da, Haaléít'įįd? doo níigo doo yá'áshóonii yaa naayáii t'áadoo łahgo át'éego yaa nitsíńdeezkéez da. Łį́į́' nihidíníil' ą́ągo da'ahijigą́ąjį' iilwo'ígi át'éego t'áá bí yaa nidaakaígíí t'éiyá yaa deíkááh.

⁷T'áá aaníí, hoz wót'áahdi naat'a'ii, ákohgo nídoot'ahígíí bił bééhózin, áádóó hasbídí índa hoz nahalinii tsídii índa táshjizhii, ákohgo nát'ą́ą́' ninádahidoot'ahígíí bił béédahózin, nidi shidine'é éí Bóhólníihii yee nihodii'aahii doo bił béédahózin da.

⁸Áko ha'át'íí biniyé ádadohní, Dahoniidzą́ągo Bóhólníihii bibee haz'áanii nihił hólǫ́? Nidi shoo, naaltsoos ííł'íní tó bee ak'e'alchíhí doo ákót'éégóó yee ak'e'ashchį́įgo wooch'ííd áyiilaa.

⁹Diné dahóyáanii t'óó ádaa yádadínóodzįįł; bił dahodooląąłgo dabidi'doolnééł. Shoo, Bóhólníihii bizaad doo deiniizį́į' da, ákoshą' ha'át'íí hódzą́ shį́į́ bii' dahólǫ́?

¹⁰T'áá a'oh át'éédóó níléí aláahgo át'éii nilį́įjį' adáhonooní yaa ádadeest'ą́ągo adádanoolní, áádóó áhodoonííł yaa dahalne'ii danilį́į́dóó hodees'áago náá'iiłniihii danilį́įjį' binda'adlo'.

¹¹Hasht'ehodít'é, t'áá ałtsogóó hasht'ehodít'é, daaníigo shidine'é adadeeznihii t'óó t'įįhdígo nídayííłdzíí'. Nidi doo hasht'ehodít'ée da.

¹²Doo daaldinígi ádaadzaa yę́ędą́ą́'ásh yaa yádaniizį́į́'? Nidaga', t'áadoo nidi yaa yádaniizį́į' da. Yik'ee yaa dadínóot'áłígíí nidi, t'áadoo bił béédahózin da. Éí bąą atíhásh'į́įjį' ahoolzhiizhgo hak'eh hodidoodleełgo t'áá íídą́ą́' nidaaztseedii bitahgóó nidahodidootsił, ní Bóhólníihii.

¹³T'áá aaníí, áhodeeshdįįł, ní Bóhólníihii. Ch'il na'atł'o'ii bineest'ą' bąąh ádin doo, índa fig sikaadii bineest'ą' bąąh ádin doo. Bit'ąą' daniiłna' doo. Haa hidí'áanii hats'ą́ąjį' bił yóó'ahóóyá.

¹⁴Ha'át'íí lá biniyé t'óó niháatą́? Haa'íyee' ahíidiikahgo kin hadaas'á ditą́ągo binaa ahéé'ítł'inígóó dadiikahgo áadi ádiidįįł, háálá Bóhólníihii bich'į' ádił nida'ayeelzí'ígíí biniinaa k'aasda' tó dadiidlį́įłgo nihainíką́ągo Bóhólníihii nihiDiyin God ádiidįįłgo yee nihá nihoní'ą́.

¹⁵Bee ach'į' hózhóonii nideíníidlíí nít'éé', t'áadoo nihaa yílyáa da. Ní'dooldzihígíí baa hodoolzhish daniidzin nít'éé', ach'į' nahwii'ná nihaa honíle'!

¹⁶Dan dine'é bikéyahdę́ę́' ana'í dabilį́į́' ída'dééłtł'iidgo hodiits'a'. Bilį́į́chogi ádaanínígíí bee kéyah t'áá náhwiist'ą́ą́ nít'éé' ni' hoditłid; łį́į́' yee nidaabaahii nánísą́ągo kin hadaas'áii áádóó ákǫ́ǫ́ diné kéédahat'íinii índa kéyah áádóó bii' dahólóonii éí t'áá ałtso yaa nahodeeskai.

¹⁷Tł'iish éí tł'iish báhádzidii doo yizhǫǫhii nihitahgóó adahideesh'aał, jó'akon. Éí adanihidiyoołhash, ní Bóhólníihii.

¹⁸Yínííł nishłínígíí doo nídoodzihígi ádzaa da; shiyi'di shijéí doo bitah hóóts'íid da.

¹⁹Ge', shoo, shidine'é ahoolchíiłii doo deeghánídi kéédahat'ínígíí biniinaa daachago ádaaní, Bóhólníihiísh Záíyandi doo hólǫ́ǫ da? índa, Bitahgiísh aláahgo binanit'a'í doo sidáa da? daaní. Ha'át'íí lá biniyé naask'ęę'go bi'eda'alyaii índa bi'eda'alyaii t'áadoo nídandlíinii yee shádahóółchįįd?

²⁰Ałtso da'oogizh, ałtso ííshį́, áádóó t'áadoo yisdánihi'doo'nil da.

²¹Háálá shidine'é ahoolchíiłii ádadideeznihígíí bik'ee shijéí nitsináltłi'. Yínííł shiiłhé áádóó tsídineesyiz.

²²Gíliyad kéyahdiísh bee ní'doodzihii ádin? Ákwe'ésh azee' ííł'íní ádin? Ákoshą', ha'át'íí biniinaa shidine'é ahoolchíiłii doo bąąh tééh ánábi'dilnéeh da?