Read Navajo LAMENTATIONS 2 Bible Online

LAMENTATIONS 2 - Navajo bible

LAMENTATIONS 2

¹Dooládó' Bóhólníihii báhóóchįįdígíí k'osgi át'éego Záíyan bich'é'é bik'i diilkǫ' da áádóó Ízrel dine'é yee baa dzólníí nít'éé' yę́ę yá'ąąshdę́ę́' hadah ahoolghan da índa Bóhólníihii báhóóchįįdígíí biniinaa bibik'i dah adées'eezii doo yénáálnii' da!

²Bóhólníihii éí doo aa a'ááh niizį́į́'góó Jéíkab dine'é kéédahat'į́į́ nít'éé' yę́ęgi ałtso é'ésdįįd, índa báhóóchįįdgo Júdah bitsi' yine' naadzi' yę́ę ałtso naa'ayiistł'ííd, áádóó óhólníihgo haz'ą́ą́ nít'éé' yę́ę índa binanit' a'í danilį́į́ nít'éé' yę́ę ałtso yiyííłchxǫ'.

³Báhóóchįįdígíí bee bił halchxíi'go Ízrel dine'é yee bidziil yę́ę ałtso yiyííłchxǫ' índa bíla' nish'náájí yee doo ana'í yich'ą́ą́h nideelnii' da áádóó Jéíkab bikéyahgi kǫ' ó'oołdįįłii nahalingo t'áá ałtsogóó t'áá ał tsoní íísdįįd.

⁴Ana'í nahalingo be'ełtį́į́' yiyiiłtaaz; ana'í nahalingo bíla' nish'náájí yidineeshjołgo yiizį'go dabíiyisii daníl'íinii t'áá ałtso yiyííghą́ą́'; Záíyan bich'é'é biníbaal bii' kǫ' nahalingo t'óó báhádzidgo bibee atí'él'íinii hadíínáád.

⁵Bóhólníihii éí ana'ígi át'é; Ízrel dine'é ałtso íísdįįd áádóó binanit'a'í dabikin ałtso íísdįįd áádóó bine' na'adzi'go bił nahaz'áanii yę́ę ałtso íísdįįd índa Júdah bitsi' atínídadindleehgo daachaígíí k'ee'ąą yilzhishgo áyiilaa.

⁶Dá'ák'eh hojiłdééh nahalingo bikin bii' sohodizinę́ę t'áá na'níle'dii íísdįįd; Bóhólníihii éí Záíyangi hodílzingo áłah ná'ádleeh yę́ę áádóó háá'áyį́į́h jį́ yę́ę doo béédajilniihgóó áhoolaa índa yéego báhóóchįįdígíí bee aláahgo naat'áanii áádóó nááda'iiłniihii danilį́į́ nít'éé' yę́ę yá nihwiiz'ą́.

⁷Bóhólníihii bidiyingo haz'ą́ yę́ę yaa iih niizį́į'go bibikáá' náá'iiniih yę́ę yóó'iidíí'ą́. Aláahgo naat'áanii bikin biná'ástł'inii ana'í yeidiní'ą́; hodílzingo áłah ná'ádleeh yę́ęgi át'éego Bóhólníihii bikin bii' sohodizin biyi' hahóó'á.

⁸Bóhólníihii éí Záíyan bich'é'é ditą́ągo binaa ahéé'ítł'inii íidoołdįįłgo yinahaz'ą́. Yída'nééł'ąądígíí bik'ehgo bíla' yee í'doołdįįłgo t'áadoo ánéísįįdígíí bąą bine' na'adzi'ii áádóó tsé ahénátł'inii yichago yínííł nilį́įgo áyiilaa.

⁹Hadáń'da'dítį́į́h yę́ę łeeh daaskai; bich'ą́ą́h dáń'da'dilkał yę́ę niyiizti'go niyiishchxǫ'; aláahgo hananit'a'í nilíinii áádóó binaat'áanii danilíinii ał'ąą dine'é bitahgóó dabi'disná; bee haz'áanii doo nááhódlǫ́ǫ da áádóó áhodooníiłii yaa dahalne'ii éí Bóhólníihii bits'ą́ą́dóó doo bił ádahat'į́į da.

¹⁰Záíyan bich'é'é bił haz'ánídóó hastóí danilínígíí ni'góó t'áadoo íits'a'í nidaháaztą́; tł'oh yishbizh dabi'ée'go łeezh bitsii'jį' yik'ídayiiskaad áádóó Jerúsalem kin haal'áádóó ch'ikéí danilíinii ni'jį' yaa adanees'ą́.

¹¹Yishchaígíí bik'ee shináá' ch'ééh deezh'áázh; shiyi'di t'áá íiyisí bich'į' nahwii'náago yínííł nishłínígíí tó nahalingo ni'jį' náálį́, háálá shidine'é bich'é'é ábi'disdįįd áádóó kin haal'áagi áłchíní yázhí índa awéé' nidahoneeł'ąąh.

¹²Kin haal'áagi nida'aztiingóó diné atídabi'diilyaii nahalingo bimá dah dabíjáahgo nidahoneeł'ąąhgo bimá ádeiłní, Háadiyee' tł'oh naadą́ą́' índa wáin ła' hólǫ́?

¹³Jerúsalem bich'é'é nílíinii, ha'át'íí lá bił aheníłt'éego naa ch'íhodeesh'ááł? Záíyan bich'ikę́ę́h nílíinii, ha'át'íí lá bił ahąąh nindeeshniłgo handi'yeeshnih lá? Tónteel áníłtélígi át'éego nich'į' ayééchǫ'go háísh hadaałt'é ánándoodlííł?

¹⁴Áhodooníiłii yaa dahalne'ígíí doo t'áá aaníígóó bił ádaadzaii índa t'áá ádzaaí át'éego nił ch'ídahaz'ą́; doo ákwii ádaot'įįdii t'áadoo yááda'dééłtsoozgóó ni'disnánígíí bits'ą́ąjį' t'áadoo kódaniilaa da, nidi yee nił dahoolne'ígíí éí doo t'áá aaníígóó bił ádaadzaii át'é.

¹⁵T'áá ałtso ną́ą́h nídadikahígíí t'óó ná nidahałt'i'go nich'į' ahídaakad, áádóó bitsiits'iin deiłne'go Jerúsalem bich'é'é yich'į' ída'diłts'ǫǫs kódaaníigo, Kin haal'áii ayóó ánóolninii hadaałt'éii áádóó, Nahasdzáán t'áá si'ą́ą́ nít'éé' dadine'é yaa bił dahózhóní wolyéii, da' díísh éí át'é?

¹⁶Ni'ana'í t'áá ałtso nich'į' nidahidilgháashgo biwoo' ahídeidiłk'ashgo nich'į' ída'diłts'ǫǫs kódaaníigo, Ádahosiildįįd; t'áá aaníí, díí baa hodoolzhishígíí bíká dadíníit'į́į́' nít'éé'; k'ad baa honíyáago danéel'į́į́'.

¹⁷Bóhólníihii yinahaz'áanii yi'iilaa; áhodoolíłígíí ałk'idą́ą́' yee haadzíi'ii áyiilaa; doo nik'édí nilį́į́góó ánísdįįd; ni'ana'í danilíinii naa bił dahózhǫ́ǫgo áyiilaa índa nits'ą́ą́jí nilíinii bidziil yee ádaa daha'niihgo áyiilaa.

¹⁸Bóhólníihii yich'į' diné bijéí yéego daachago ádaaní, Záíyan bich'é'é ditą́ągo binaa ahéé'ítł'inii nílíinii, bíni'dii ninák'eeshto' tooh nahalingo shá bíighah áádóó tł'éé' bíighah náálį́į le', doo háánílyį́į́hgóó ánósin le' índa ninák'eeshto' doo áhodiilzéeh da le'.

¹⁹Nídiidáahgo tł'ée'go yéego hááníchah; hiłiijį́įhgo Bóhólníihii bidáahjį' tó háálį́ nahalingo nijéí biyi'dóó ádił háánídzoł; kintah hada'iiztiin t'áá ałtsogóó na'áłchíní yázhí dichin yik'ee nidahoneeł'ąąhígíí bá Bóhólníihii bich'į' dah didiilnííh.

²⁰Shoo, Bóhólníihii nílíinii, díí kwíinilaaígíí baa nitsíníkees. Da' sáanii ba'áłchíní dah deíjáhígíísh nídeidoolghał? Da' Bóhólníihii bikin bii' hodiyin góne'ésh nááda'iiłniihii índa áhodooníiłii yaa dahalne'ii nidadooltsxił?

²¹Kintah da'nítiingóó ániid nidaakaígíí índa hadaastihii naazhjéé'; nich'eekę'í índa nitsíłkéí éí diltłish bee nidabi'diztseed; náhóóchįįd yę́ędą́ą́' yíníghą́ą'go doo bik'édí nílį́į́góó nidasíníłtseed.

²²Hodílzingo áłah ná'ádleehjį' diné bida'asnii'ígi át'éego t'áá ałtsodę́ę́' báádahadzidii shik'ijį' bi'iyíníłnii', áko Bóhólníihii báhóóchįįd bijíní góne' doo ła' yóó'anííchą́ą' da, doo nidi ła' yidzíi' da; bił nída'iisdis yę́ę índa danísą́ yę́ę shi'ana'í ałtso ádabisdįįd.