Read Navajo LAMENTATIONS 3 Bible Online

LAMENTATIONS 3 - Navajo bible

LAMENTATIONS 3

¹Shíyee' t'óó báhádzidgo báhóóchįįdgo bigish yee atí'éł'ínígíí yiiłtsą́.

²Chahałheeł bii' yisháałgo áshiilaa, adinídíinjį' éí dooda.

³T'áá aaníí shik'ijį' silį́į́'; shá bíighah bíla' yee atínáshiil'įįhgo e'e'ááh.

⁴Shitsį' áádóó shikágí haastihgo áyiilaa; shits'in niyiizti'.

⁵Shik'ijį' aztł'in áádóó yínííł índa adiniihgo ach'į' nahwii'ná shináhaazlá.

⁶Ałk'idą́ą́' daneeznánígi át'éego chahałheełgi nishiníłtį́.

⁷Shiná'áz'áago béésh da'ahólzha'í nidaazii shąąh niinínilgo biniinaa doo haosha' át'ée da.

⁸Áádóó ałdó' yishcha índa dishwoshgo shisodizin doo shá yidiits'a' da.

⁹Yishááłgóó tsé hasht'edaalyaaígíí yich'ą́ą́h yiztł'in; she'atiin yę́ęgóó nahoneeshtł'iizhgo áyiilaa.

¹⁰Shash aa héestį́ nahalingo, doodaii' náshdóítsoh nahont'ingi aa héestį́įgo sitínígi át'éego shik'ijį' nilį́.

¹¹T'áá ádzaagóó yisháałgo áshiilaago nishiizhnizh índa shinaagi doo naagháhígóó áshiilaa.

¹²Be'ełtį́į́' yiyiiłtaazgo k'aa' bee doolkahii nishłį́įgo áshiilaa.

¹³K'aayééł biyi'dóó bik'aa' yee shiyi' siláii yiskah.

¹⁴Ał'ąą dine'é t'áá ałtso shá bíighah shaa daadloh áádóó shída'díł'a'go i'ii'aah.

¹⁵Shił nihoołch'iihgo áshiilaa áádóó ch'il dích'íi'ii bitoo' shiiyííłdlą́ą'go éí yee tsi'shidiisáá'.

¹⁶Tsézéí yee shiwoo' niyiizti' índa łeeshch'iih bii' shishjoolgo áshiilaa.

¹⁷Shii' sizíinii hasht'ehodít'é t'áá íiyisí bee ádingo ályaago yá'át'éehgo iinánígíí baa yisénah.

¹⁸Áko ádíshní, Shidziil yę́ę áádóó Bóhólníihii bits'ą́ą́dę́ę́' shił chohoo'į́ yę́ę ásdįįd.

¹⁹Shich'į' nahwii'nánígíí índa shíni' łánígíí, ch'il dích'íi'ii áádóó bitoo' béénílniih.

²⁰Shii' sizíinii ééjiilníihgo t'áá íiyisí ádaa hojooshbá'ígo ánáshiil'įįh.

²¹Nidi díí bénáshniihgo bee shił chohoo'į́:

²²Bóhólníihii bibee ajooba' doo ádįįh da; yee aa a'ááh nízinii doo nineełnéeh da.

²³Éí t'áá ákwíí bíní ániidí náádleeł; na'ahódlíhígíí ayóó át'é.

²⁴Shii' sizíinii ání, Bóhólníihii éí shíí'; éí bąą hwee shił chohoo'į́.

²⁵Bóhólníihii yiba' nidaakaii índa hahontáhígíí baa jijooba'.

²⁶Bóhólníihii yee yisdá'iiníiłii yíká diné bił chohoo'į́įgo áádóó hazhó'ógo yiba' hasht'edít'éego yá'át'ééh.

²⁷Diné ániid naagháago bee bich'į' nahwii'nánígíí yits'ą́ą́dóó íhwiidooł'áłígíí bá yá'át'ééh.

²⁸Hach'į' nahwii'náago áho'diilyaaígíí biniinaa bíni'dii dzidéesxéelgo t'áá sáhí dzizdáa doo.

²⁹Áádóó há chohoo'į́į dooleełgo bíni'dii łeezh dibahí biishnool'ą́.

³⁰Haniitsį' néididoołts'į́łígíí háni'dii bá dashdíníit'aah; t'óó hánahat'i'go bíni' hade ánééh.

³¹Jó, Bóhólníihii doo hool'áágóó yóó'i'didoo'áał da;

³²azhą́ yínííł yee ti'ayoołníih nidi, yee aa a'ááh nízinii t'óó ahayóígíí bik'ehgo aa a'áhí nízin doo.

³³Háálá doo íinízin da, nidi ach'į' nahwiiłná índa diné ahoolchíiłii yínííł yee ti'yiyoołnííh.

³⁴Nahasdzáán bikáá'dóó awáalyaaí danilíinii t'áá ałtso bik'i na'aldeehgo,

³⁵áádóó Aláahgo Ayóó'át'éii binááł diné bee bá haz'áanii bits'ą́ą́' nahjį' kólyaago,

³⁶índa diné doo ákót'éégóó baa hwiiníst'įįdgo éí Bóhólníihii doo bił yá'át'éeh da.

³⁷Bóhólníihii doo yee haadzíi'iishą' háí yee hadoodzihgo áádóó bohodoolníiłgo yíneel'ą́?

³⁸Aláahgo Ayóó'át'éii haadzihgo ts'ídá yá'át'éehii índa doo yá'át'éehii bohoolnííł.

³⁹Diné ádił ni'dziihsíhígíí biniinaa atího'dil'į́įgo ha'át'íísh biniyé saad hojíłǫ́ǫ doo.

⁴⁰Haa'íyee' baa nideiikaígíí hazhó'ó hanáádadiilziłgo bínáádadíníitah áádóó Bóhólníihii baa nínáádiikah.

⁴¹Haa'íyee' Diyin God yá'ąąshdi hólóonii bich'į' yadadidiilnihgo nihijéí bee bich'į' atsídadiikos.

⁴²Bee haz'áanii dahiiti'go nich'į' nidasiiltee'go doo nihá yóó'adííní'ą́ą da.

⁴³Náháchį'ígíí ák'ísíníłti'; nanihiníłchéego t'áadoo nihik'édí sínílį́į́'góó nanihisíníłtseed.

⁴⁴Nihisodizin doo didoots'į́įł da biniyé k'os ách'ą́ą́h diniłkǫ'.

⁴⁵Ał'ąą dine'é bitahgi doo niidzį́į'ii áádóó yóó'aheestł'íidii daniidlį́įgo ánihiinilaa.

⁴⁶Nihi'ana'í danilíinii t'áá ałtso nihik'ijį' yéego hadaasdzíí'.

⁴⁷Náhádzidii áádóó a'áán díníidahii índa yíchǫ'ii áádóó á'doodįįłii nihik'iit'i'.

⁴⁸Shidine'é bich'é'é ábi'disdįįdígíí biniinaa shinák'eeshto' náálį́.

⁴⁹Shinák'eeshto' doo bita' hoo'aahgóó doo áhodiilzééhgóó náálį́.

⁵⁰Bóhólníihii yá'ąąshdę́ę́' nihinééł'į́į'jį' ákónísht'ée doo.

⁵¹Shikin haal'áádóó bich'é'éké ábi'dil'ínígíí yish'į́įgo biniinaa shijéí yineesgai.

⁵²Shi'ana'í danilíinii t'áadoo biniinaanígóó tsídii nanché nahalingo nidashineeshchą́ą́'.

⁵³T'áá hinishnáago a'áán góyaa adashiisxango tsé shidadeideez'ą́.

⁵⁴Shitsiits'iin biláahgo tó néés'ąądgo ádíshní, K'ad lą́ą, shá nahonít'i' ni'.

⁵⁵Bóhólníihii nílíinii, a'áán góyaadę́ę́' nííníshíigo nich'į' sodeeszin.

⁵⁶Nich'į' sodiszingo shiinéé' disíníts'ą́ą́': nich'į' yishchago t'áadoo jé'áhodílkałí.

⁵⁷Nich'į' ádííniid yę́ę bijį́ áháníjį' shich'į' nihwííníle'go áshidííníniid, T'áadoo nił yé'í.

⁵⁸Bóhólníihii nílíinii, shich'į' nahwii'náago shá baa nísínít'įįdgo shik'é niná'íínídlá.

⁵⁹Bóhólníihii nílíinii, doo ákǫ́ǫ́ áshi'diilyaaígíí yiniłtsą́; éí bąą shá baa nánít'įįh.

⁶⁰K'éédahodidiilnííł danízinii índa doo yá'áshǫ́ǫ́góó shindaha'áii t'áá ałtso yiniłtsą́.

⁶¹Bóhólníihii nílíinii, shándahałt'i'go áádóó doo yá'áshǫ́ǫ́góó shindaha'áago t'áá ałtso disíníts'ą́ą́';

⁶²shich'į' nídiikaii shik'ijį' yádaałti'ígíí áádóó shá bíighah doo yá'áshǫ́ǫ́góó shindaha'áii disíníts'ą́ą́'.

⁶³Naazdáago, doodaii' naazį́įgo níníł'į́; shída'dił'a'.

⁶⁴Bóhólníihii nílíinii, yaa nidaaskaii bik'é k'éédabidídle'.

⁶⁵Bijéí doo binídahaz'áágóó ádanile' índa hóyée'go bá handziih.

⁶⁶Náhóóchįįdígíí bee atíníléehgo Bóhólníihii biyót'ááh hiníláii biyaagi áníłdįįh.