Read Navajo LAMENTATIONS 4 Bible Online

LAMENTATIONS 4 - Navajo bible

LAMENTATIONS 4

¹Dooládó' óola doo bik'izdiidíin da silį́į́' índa óola bąąh hadoolyį́į'ii łahgo ádzaa! Diyingo haz'ánídóó tséhígíí kintahgi dah da'diitiingóó nidadeeztąąd.

²Záíyan biyáázhké ílíinii, óola ąąh hadoolyį́į'ii bíighahgo da'jílíinii dooládó' k'ad hashtł'ish ásaa' ádeił'íinii ádabiilaago baa nitsáhákees da!

³Mą'ii nidi biyázhí yida'iiłt'o', nidi shidine'é bich'é'é éí honoojíidi tsídii ástrich wolyéii doo ts'ííd át'éégóó atí'éł'ínígi át'éego atí'éł'į́ silį́į́'.

⁴Awéé' da'ałt'o'ii dibáá' bi'niighánígíí biniinaa bitsoo' bizaat'áajį' bídaashjah; áłchíní éí bááh dayókeed nidi, doo ba'íłtsódí da.

⁵Ałtaaskąądí deiyą́ą́ nít'éé' yę́ę kintah da'nítiingóó dichin bi'niighą́ą́'; éé' tsídídééh nahalingo łichí'ígíí dabi'ée'go dabidi'neesą́ yę́ę ts'iilzéí nehegeehígi naazhjéé'.

⁶Shidine'é bich'é'é éí Sádam kin haal'áagi diné kéédahat'į́į́ nít'éé' yę́ę yiláahgo ádił asiih. Éí diné yę́ę jishgishígíí nahalingo t'áadoo hodeelnii'ígóó áho'disdįįd.

⁷Ízrel bitahdóó Názarait wolyéii éí yas bilááh át'éego doo bąąh daachiní da índa abe' biláahgo daalgai nít'éé'; dabits'íís éí tséłchí'í biláahgo t'óó daalchíí' nít'éé'; tsé sáfair wolyéii nahalingo bídazdilid.

⁸K'ad dabinii' éí jeełid ts'ídá biláahgo dadiłhił áádóó kintaa da'aztiingóó nidaakaigo doo béédahózin da; dabikágí éí ahandaayáago bits'in bídadiiłgango tsin nidahalin.

⁹Dichin nidabistseedígíí biláahgo diltłish bee nidabi'diztseedjígo yá'át'ééh, háálá éí dá'ák'ehdi nidant'ą'ii yíká dichin dabííghą́ą́'.

¹⁰Sáanii aa a'ááh danízinii éí t'áá bí bada'áłchíní deishbéézh, áko shidine'é bich'é'é atíbi'diilyaa yę́ędą́ą́' éí bich'iyą' daazlį́į́'.

¹¹Bóhólníihii báhóóchįįdgo yee atí'éł'íinii yee ła'hoolaa; t'óó báhádzidgo báhóóchįįdígíí yee atíhoolaago Záíyan kin haal'áagi deidííłjée'go atł'ááh nástł'inii yę́ę iidííłk'ą́ą́'.

¹²Jerúsalem bił yah ada'iiztiindę́ę́' Ízrel dine'é yik'ijį' nilíinii áádóó bi'ana'í nilíinii yah adahidoonéłígíí éí nihokáá'góó aláahgo naat'áanii danilíinii índa nihokáá' dine'é t'áá ałtso ákóhodooníiłgo ts'ídá doo dayoodlą́ą da nít'éé'.

¹³Ákondi ákódzaa, háálá áhodooníiłii yaa dahalne'ii índa nááda'iiłniihii éí hatahgóó t'áá ákogi ádaat'éii nideistseedgo bidił dadeezna'go éí yee ádił nida'iisíí' áádóó doo ákwii ádáát'įįd da.

¹⁴Bi'éé' dił bee dááchǫ'go diné bidadidoolchiłgi béédaaldzidgo kintahgi da'nítiingóó doo da'oo'į́į da nidahalingo tádadookai.

¹⁵Éí diné ádei łní, T'óó nihadaa'ih; yówehdi nidaohkai; nihidadoołchííd lágo; yówehdi nidaohkai, áko yóó'aheezhjée'go ał'ąą dine'é yitahgóó tádadikáahgo diné ádaaní, Kǫ́ǫ́ doo nináádajikai da doo.

¹⁶Bóhólníihii báhóóchįįdgo tahonooskaadgo doo haa ná'áhodílt'į́į da; dadine' é éí nááda'iiłniihii índa hastóí á naazíinii doo bił dáálįįd da.

¹⁷Nihíká a'doolwoł biniyé ch'ééh dadíit'į́į'go nihináá' ch'ééh dadeeskai. Hada'iilzíidgo dine'é ła' yisdádanihidooniłgo yídaneel'áanii ádin.

¹⁸Nihikintaa da'aztiingóó dadiikah yę́ęgóó doo nihá yá'át'éeh da, háálá nihaa héeshjéé'. Nihá nidahwiizt'i'jį' áhą́dí hadziih; beiníłką́ lą́ą, háálá nihá nidahwiizt'i'jį' ahoolzhiizh.

¹⁹Nidanihiniłchéii éí wót'áahdi yá biyi' atsá nidaat'a'ii biláahgo doo nidadilna'góó dziłghą́ą'di nidanihiniłché, índa honoojíidi nihaa dahéeshjéé'.

²⁰Bóhólníihii ak'ah yik'i yayiiziidgo yiyíísį́į'ii biniit'aa dahinii'náá nít'éé' yę́ę éí atídanihił'íinii bida'a'áán góyaa íítłizh. Éí bee ał'ąą dine'é bitahgóó dahinii'náa doo, dadii'níí nít'éé'.

²¹Nił nihoozhǫǫh áádóó nił hózhǫ́, Íídam bich'é'é nílíinii, Uz kéyahgi kééhót'íinii; ni ałdó' bee adlání naa hodoołeełgo nídí'níídlį́į́ł áádóó ni'éé' t'áágééd nanináago ídi'díílnííł.

²²Záíyan bich'é'é nílíinii, nibąąhági át'éii biniinaa atíni'dil'ínígíí ła'yidzaa; doo as'ahgóó yisnááh nílį́į da doo. Nidi ni, Íídam bich'é'é nílíinii, doo yá'áshǫ́ǫ́góó ááníłígíí biniinaa atíndi'doolníiłgo doo ákwii íínít'įįdii bééhodoozįįł.