Read Navajo LAMENTATIONS 5 Bible Online

LAMENTATIONS 5 - Navajo bible

LAMENTATIONS 5

¹Bóhólníihii nílíinii, ánihi'dool'įįdígíí béénílniihgo baa nitsíníkees, áádóó bee nihá nahat'i'ígíí níníł'į́.

²Nihíi'ii éí dé'éyóní bich'į' kólyaa, índa danihikin éí nízaadę́ę́' nidaakaii bíí' daazlį́į́'.

³Áłchíní bizhé'é ádaadinii dasiidlį́į'go nihizhé'é ádaadin, danihimá éí bąąh ádahasdįįdii nidahalin.

⁴Tó deiidlánígíí béeso bik'é nidahiilyé, índa chizh nihich'į' nidahaniih.

⁵Nidanihiniłchéii nihik'os k'adę́ę dayiisił; ch'ééh deekaigo doo háádeiilyį́įh da.

⁶Ch'iyáán bee hwiih daniidlį́į doo biniyé Ííjip dine'é áádóó Asíriya dine'é biyaajį' ni'ádadee'nil.

⁷Danihizhé'é yę́ę ádił nida'iiszíí', áádóó bikéé' ádahasdįįdgo éí bik'ee ti'dahwii'nííh.

⁸Naalte' danilíinii nihindant'áago doo ła' bílák'eedóó háánihó'níłí da.

⁹Honoojíidi diltłish báhádzidígíí biniinaa ch'iyáán shódeidiilt'eełjį' nihe'iina' ninádahidiit'aah.

¹⁰T'óó báhádzidgo hodííchįįdígíí biniinaa at'ees biniyé haz'ání góne' hodiłhiłígi át'éego danihikágí dadiłhił.

¹¹Záíyan kin haal'áádóó sáanii áádóó Júdah dine'é bikin hadaas'áádóó ch'ikéí bił nida'diisdéél.

¹²Naat'áanii danilíinii bíla' bee dah dabi'diidlo', áádóó hastóí danilíinii doo bił dáálįįd da.

¹³Tsíłkéí éí da'jik'áago ádaho'diilyaa áádóó ashiiké yázhí éí chizh bił nidazhnit'igo nidajiiłjiid.

¹⁴Hastóí danilíinii yah ada'iiztiingóó aa dahwiinít'į́įjį' ałnáádaakah yę́ę ni' kódaadzaa índa tsíłkéí nida'di'a' yę́ę doo nida'di'a' da daazlį́į́'.

¹⁵Nihijéí bił dahózhóonii doo át'ée da silį́į́' índa da'azhish yę́ę t'óó cha násdlį́į́'.

¹⁶Naat'á ch'ah nihik'eelts'id; dooládó' hojooba' ániit'ée da; ádił da'siilziih lą́ą!

¹⁷Díí bąą nihijéí bąąh nidahwiizkaadgo nihiná'oh nídahoobah.

¹⁸Háálá Dził Záíyan bąąh doo naagháhígóó biniinaa mą'ii t'éí yąąh nidaakai.

¹⁹Ni, Bóhólníihii nílíinii, hool'áágóó nanít'á índa bikáá'dóó nahó'áii hool'áádę́ę́' áádóó ahóyéel'áágóó hólǫ́.

²⁰Ha'át'íísh biniyé hool'áágóó nihaidiyíínahgo as'ahgóó nahjį' ninihididíí'ááł?

²¹Ách'į' kónanihídlééh, Bóhólníihii nílíinii, áko nich'į' dah nídidiikah; ałk'idą́ą́' nihídayééłkaah yę́ęgi át'éego ániidí ánánihídlééh.

²²T'ahdiísh t'áá íiyisí doo nihinínízin da? T'ahdiísh t'óó báhádzidgo nihich'į' náháchį'?