Read Navajo EZEKIEL 1 Bible Online

EZEKIEL 1 - Navajo bible

EZEKIEL 1

¹Íídą́ą́' tádiin náhááh góne' dį́į́' nídízííd binih ashdla'góó yoołkáałgo Kííbar tooh bibąąhgóó dabi'disnáanii bitah honishłǫ́ǫgo yá'ąąshii ąą ádzaago Diyin God bits'ą́ą́dóó shił áhát'į́įgo yiiłtsą́.

²Aláahgo naat'áanii Jehóíyakin yisnááh nilį́įgo ashdla' nááhaidóó bik'ijį' nídízíídóó ashdla'a jį́į́ góne',

³Búzai biye' Iizííkiyel náá'iiłniihii nishłíinii Bóhólníihii áníinii t'áadoo bahat'aadí diséts'ą́ą́'. Kííbar tooh bąąhgi Kaldíya dine'é bikéyahdi kééhasht'į́įgo Bóhólníihii shideelchid.

⁴Ákohgo náhookǫsdę́ę'go t'áá íiyisí deeyolgo k'os diłhił dah shizhóód, éí biyi' atsiniltł'ish ahidíníłná anídahata' áádóó t'áá íiyisí bits'ádi'nílííd silį́į́' índa ałníi'gi éí béésh łitsoii bits'ádi'nílííd nahalingo bi'oh adidilyééh silį́į' go, díí t'áá ałtso yiiłtsą́.

⁵Éí k'os biníí'dóó ha'át'íí shį́į́ dahináanii nahalingo dį́lt'éego ałdó' haakai. Kódanoolnih; diné nidahalin.

⁶T'ááłá'í nítínígo dį́į́' dabinii' áádóó t'ááłá'í nítínígo dį́į́' dabit'a'.

⁷Bijáád éí k'édaazdon áádóó béégashii yáázh daalkee'go béésh łitsoii bits'ádi'nílídígíí nidahalin.

⁸Áádóó t'ááłá'í nítínígo bit'a' daadį́'ígíí éí biyaadóó bíla' dahólǫ́, índa t'áá dį́lt'éego binii' áádóó bit'a' dahólǫ́.

⁹Dabit'a' éí ahidadii'áago nee'nijį' deít'áahgo doo nídaayées da; t' ááłá'í nítínígo éí nee'nijį' k'éhézdon yikah.

¹⁰Dabinii' éí díí nidahalin: bidááhdóó éí diné daalnii', nish'náajigo dabinii'ígíí éí náshdóítsoh bitsiijį' ditł'ooígíí daalnii', nishtł'ahjigo dabinii'ígíí éí béégashii daalnii', bikée'jigo dabinii'ígíí éí atsá daalnii'.

¹¹Áko dabinii' kódaat'é. Bit'a' dego dadeez'á; bit'a' naaki ahidadii'á áádóó bit'a' naakigo bitééldę́ę́' bik'ídaasti'.

¹²T'ááłá'í nítínígo náásee t'áá k'éhézdon t'áá deesht'ah danízingóó t'áadoo nídaayésí deít'ááh.

¹³Dahináanii ádanóolninígíí tsííd dadiltłi' nidahalin, honooyééł dadéenood nahalingo ałnáádadina'; kǫ' éí hózhǫ́ dadiiltłahgo éí bits'ą́ą́dóó hadajilgish.

¹⁴Atsiniltł'ish anáháta' nidahalingo dahináanii náásee náádiijah áádóó t'ą́ą́' anáhájeeh.

¹⁵Dahináanii nísh'į́į́ nít'éé', dahináanii t'ááłá'í nítínígo bíighahgóó ni'gi bąąs t'ááłá'í ní'ánígo si'ą́.

¹⁶Bąąs ánoolninígíí índa ádaalyaaígíí éí ahidiníłnáago ahii' sinilgo tsé ílíinii béril wolyéii nahalingo bik'i nizdiłtoołgo éí t'áá dį́į'go ahidaałt'é.

¹⁷T'áá azlį́į'jigo t'áá ahąąh t'áadoo nídaayésí dah dadiibą́ą́z.

¹⁸Binídaaz'áhígíí éí wódahdi ahéédaaz'áago t'óó báádahadzid, áko nísh'į́į́ nít'éé', t'áá dį́į'go bináá' binídadeeswoł.

¹⁹Dahináanii dah diijahgo bąąs ałdó' t'áá bíighah deíjeeh łeh áádóó índa dah dadiildohgo éí bąąs ałdó' t'áá bíighah de kót'įįh.

²⁰T'áá deesht'ah danízinígóó bąąs t'áá bíighah dah dadiildoh, háálá dahináanii íinízinígíí yee bąąs nayiiłná.

²¹Dahináanii dah dadiildohgo bąąs t'áá bíighah dah dadiildoh; t'áá ákǫ́ǫ́ niildogo bąąs ałdó' t'áá ákǫ́ǫ́ niildo; dah dadiildohgo bąąs ałdó' t'áá bíighah dah dadiildoh, dahináanii íinízinígíí bąąsígíí nayiiłná.

²²Dahináanii bikáa'di éí ha'át'íí shį́į́ yá nahalingo dah sikaad; tin nahalingo niłtólígo t'óó bik'ee ił yée'go bik'i nizdidlaad,

²³yá nahalinígíí biyaagi éí dahináanii t'ááłá'í nítínígo bit'a' deiníłbaalgo ahidadii'á; bit'a' naakigo bitééldę́ę́' bik'ídaasti'.

²⁴Deít'áahgo dabit'a' éí tó t'óó ahayóí ch'ílkaal nahalingo dadiits'a'; Aláahgo Ayóó'ábóodziilii biinéé' nahalingo diits'a'; siláo t'óó ahayóí hahóół'á nahalingo diits'a'; dahináanii hasht'e'deizį'go bit'a' yaa ádayiilaa.

²⁵Dahináanii hasht'e'deizį'go bit'a' yaa ádayiilaago bikáa'di yádiłhił biyi'dę́ę́' iinéé' diséts'ą́ą́'.

²⁶Yáhígíí éí náábíkáa'di ha'át'íí shį́į́ bikáá'dóó nahat'áii si'ą́ nahalingo yiiłtsą́; tsé ílíinii sáfair wolyéii yá nahalingo dootł'izh; níléí wódahdi bikáá'dóó nahat'áii bikáa'gi éí diné nahalingo dah sidáago yiiłtsą́.

²⁷Biníí'dóó dego éí t'áadoo le'é bits'áhojilgishii nahalingo yiiłtsą́; biníí'dóó yaago éí kǫ' binídoonałgo bits'ádi'nídínígíí nahalingo yiiłtsą́, áko binaagóó binídeezlííd.

²⁸Éí binídeezlídígíí nahałtį́įhgo nááts'íílid k'os biyi'jį' niidiłígíí nahalin. Díí éí Bóhólníihii bibi'oh adidilyéehii kónoolningo yiiłtsą́ągo ni'jį' tsé'yaa níshjool, áko ła' hadzoodzíi'go hwiinéé' diséts'ą́ą́'.