Read Navajo EZEKIEL 10 Bible Online

EZEKIEL 10 - Navajo bible

EZEKIEL 10

¹Déé'į́į́' nít'éé', shoo, diyingo naal'a'í bida'alyaii chérabim daolyéii bikáa'di yádiłhiłígíí éí náábikáa'di tsé sáfairgi át'éii bikáá'dóó hoot'áałii nahalingo si'ą́ągo yiiłtsą́.

²Áko Bóhólníihii éí diné áłts'óózígo yisdizígíí bee na'at'ą́hí łigaii dits'idgo ályaii yee hadít'éii yich'į' haadzíi'go yidííniid, Nílááh, chérab biyaagi bąąs yimasii bita' góne' anináahgo chérabim bita'dę́ę́' níla' t'áá áłah bii' tsííd hadiłbingo kin haal'á bik'ijį' aniłkaad. Áko t'áá shinááł yah ííyá.

³Diné yah ííyáago kin binish'náájí chérabim naazį́; nít'éé' binaagóó haz'ání góne' k'os hadéébįįd.

⁴Ákohgo Bóhólníihii bee bits'ádi'nílíidii chérab bits'ą́ą́dóó dah diildohgo ch'é'étiinjį' eeldoh, áko kin bii' sohodizin góne' k'os hadéébįįdgo hodílzingo haz'ą́ą́ góne' éí Bóhólníihii bee bi'oh adidilyéehii bits'ádi'nílíidii hadéébįįd.

⁵Áko nít'éé' Diyin God Aláahgo Ayóó'ábóodziilii biinéé' diits'a'ígi át'éego chérabim bit'a' deiłbalgo t'áá tł'óo'di haz'ą́ąjį' nidi hodiists'ą́ą́'.

⁶Ákohgo kóníigo diné éí áłts'óózígo yisdizígíí bee na'at'ą́hí łigaii dits'idgo ályaii yee hadít'éii yich'į' haadzíí', Chérabim bita'gi bąąs yimasii bita'dóó kǫ' nídiiłt'ááh, áko yah ajííyáago bąąs ła' bíighahdóó dziizį'.

⁷Nít'éé' chérab éí chérabim daolyéii yita'dę́ę́' ch'ídeelnii'go chérabim bita'gi kǫ'ígíí ła' néidiit'ąągo éí diné áłts'óózígo yisdizígíí bee na'at'ą́hí łigaii dits'idgo ályaii yee hadít'éii yílák'ee yidííłt'ą́; éí yiyiiłtsoodgo ch'íníyá.

⁸Chérabim bit'a' biyaagi éí diné bíla' nahalingo yit'į́ silį́į́'.

⁹Náádéésht'į́į́' nít'éé', shoo, chérabim bíighahgóó bąąs dį́į́' naazį́; bąąs t'ááłá'í ní'ánígo chérabim yíighahgóó si'ą́; bąąs éí tsé béril wolyéii nahalingo bik'i nidazdiłtooł.

¹⁰Bąąs éí t'áá dį́į'go ahidiníłnáago ahii' sinilígíí t'áá ahidaałt'é.

¹¹Dah diijahgo éí t'áá dį́į́'góó deíjeeh łeh; deíjeehgo doo naanájeeh da, nidi t'áá háajigo shį́į́ deezhjéé'góó doo naanájeehgóó t'áá ádeinízingóó deíjeeh łeh.

¹²Bąąs t'áá si'ą́ą́ nít'éé', dabíígháán t'áá bił dabíla'da, dabit'a' ałdó', bąąs t'áá dį́į'go t'áá bił bináá' t'áá át'é t'áadoo bita' haz'ání bee binidadeeswoł.

¹³Diists'a'go bąąsígíí éí bąąs yimasii, deiłní.

¹⁴Chérabim éí t'áá dį́į'go dį́į́' dabinii': áłtséhígíí chérab yilnii', t'áá éí naaki góne' diné yilnii', t'áá nááná éí náshdóítsoh bitsiijį' ditł'ooígíí yilnii', dį́į́' góne'é éí atsá yilnii'.

¹⁵Ákohgo chérabim wót'ááhgóó dah dadiit'a'. Díí éí dahináanii Kííbar tooh bibąąhdi yiiłtsánígíí ádaat'į́.

¹⁶Chérabim dah diijahgo bąąs t'áá bíighahgóó deílyeed; chérabim nídadiit'ááh biniyé dabit'a' de ádayiił'įįhgo bąąs doo bits'áhályeed da.

¹⁷Hasht'e'naazį́įgo bąąs ałdó' hasht'e' naazį́; nídadiit'ahgo bąąs ałdó' t'áá bíighah dego nídiijah, háálá dahináanii ádeinízinígíí éí bii' dahólǫ́.

¹⁸Ákohgo Bóhólníihii bibi'oh adidilyéehii ch'é'étiingi dah yildohii dah diildogo chérabim bikáa'jį' niildoh.

¹⁹Áádóó shinááł chérabim dabit'a' deideesbaalgo bąąs t'áá bíighahgóó deílyeedgo nídadiit'a' áádóó náás dadeest'a'; nít'éé' Bóhólníihii bikin bii' sohodizin si'ánígíí ha'a'aahjígo dáń'dítį́hígíí ch'é'étiingi nidahaastłahgo Ízrel dine'é biDiyin God bibi'oh adidilyéehii bik'ijį' eeldoh.

²⁰Díí lą́ą Kííbar tooh bibąąhdi Ízrel dine'é biDiyin God biyaadóó dahináanii yiiłtsánígíí éí ádaat'į́, áko chérabim ádaat'į́įgo shił bééhózin.

²¹T'ááłá'í nítínígo dį́į́' dabinii' áádóó t'ááłá'í nítínígo dį́į́' dabit'a'; dabit'a' biyaadi éí diné bíla' nahalingo dahólǫ́.

²²Dabinii' éí Kííbar tooh bibąąhdi yiiłtsánígíí t'áá éí dabinii'; t'ááłá'í nítínígo t'áá k'éhézdon náásee naaldeeh.