Read Navajo EZEKIEL 11 Bible Online

EZEKIEL 11 - Navajo bible

EZEKIEL 11

¹Áádóó ałdó' Níłch'i Diyinii náshidiiłtį́įgo Bóhólníihii bikin bii' sohodizin ha'a'aahjigo dáń'dítį́įhjį' nishiníłtį́; nít'éé' shoo, éí dáń'dítį́įhgi diné naadiin ashdla' naazį́, áko nít'éé' éí bitahgi Ázer biye' Jeiyazanáíyah áádóó Biinéíyah biye' Pelatáíyah diné binanit'a'í yiiłtsą́.

²Áko Bóhólníihii áshidííniid, Diné nílíinii, díí diné doo ákwii é'ét'éii yinahagizgo díí kin haal'áagi t'áá íiyisí doo yá'áshǫ́ǫ́góó kót'éego níigo áhoonííł;

³éí ání, Kin ádadoolníłígíí doo nízaad hadziih da; díí kin haal'áhígíí éí ásaa' bii' abézhí át'é; nihí éí atsį' niidlį́.

⁴Éí bąą bik'ijį' nílį́įgo handziih; bik'ijį' handziih, diné nílíinii.

⁵Áádóó Bóhólníihii biNíłch'i shik'i hoole'go áshidííniid, Kódíní, Bóhólníihii kóní, Ízrel dine'é nohłíinii, kót'éego nitsídaohkeesgo shił bééhózin, háálá bik'ítsídahidołkeesii shił bééhózin.

⁶Díí kin haal'áagi diné t'óó ahayóí daoghą́ą'go kintaa da'aztiingóó ats'íís ałk'i dadeesk'idgo ádaohłaa.

⁷Éí bąą Bóhólníihii Diyin God ání, Díí kin haal'áhígíí éí ásaa' bii' abézhí át'é, áko daoghą́ą'ii ałníi'gi yáádaotsiígíí éí atsį' ádaat'é, nidi nihí éí bitahdóó hanihideeshjih.

⁸Diltłish béédasoołdzííd, nidi diltłish nihik'ijį' kódeeshłííł, ní Bóhólníihii Diyin God.

⁹Kintahdóó hanihideeshjihgo dé'éyóní baa nihidideesh'ááł índa bee nihá nihoot'ánígíí bohodoolnííł.

¹⁰Diltłish bee nidanihidi'dootsiłgo Ízrel dine'é bikéyah bibąąhdi atídanihideeshłííł, áko Bóhólníihii nishłį́įgo nihił béédahodoozįįł.

¹¹Díí kin haal'áhígíí éí doo ásaa' bii' abézhí nihá át'ée da doo, doo nidi biníi'gi atsį' doohłeeł da; Ízrel dine'é bikéyah bibąąhdi atídanihideeshłíiłgo

¹²Bóhólníihii nishłį́įgo nihił béédahodoozįįł, háálá bee nihoyí'áanii doo bik'ehgo danohkai da índa shibik'ehgo hoogáałii t'áadoo bida'oohłaa da, nidi ał'ąą dine'é nihinaagóó kéédahat'ínígíí bibik'ehgo dahwéegháahii, jó, éida bida'oohłaa.

¹³Áko yáshti'go Biinéíyah biye' Pelatáíyah daaztsą́. Áadi tsé'yaa íígo'go ayóó íits'a'go haasdzíi'go ádííniid, Ha'át'íí lá ahayóí lá, Bóhólníihii Diyin God nílíinii! Ízrel dine'é daadziihígíísh ałtso ádííłdįįł?

¹⁴Áádóó Bóhólníihii ánááshidoo'niidgo ání,

¹⁵Diné nílíinii, Jerúsalemdi kéédahat'ínígíí, éí nik'isóó danilíinii, nik'isóó danilíinii lą́ą, diné nik'éí danilíinii, Ízrel dine'é t'ááłá'í nítínígo ts'ídá t'áá ałtso kódeiłníigo yá hadaasdzíí', Eii lą́ą Bóhólníihii nízaadgóó bits'ájíkai ni; díí kéyah éí nihí dooleełgo nihaa deet'ą́, daaní.

¹⁶Éí bąą kódíní, Bóhólníihii Diyin God kóní, Azhą́ nízaadgóó ał'ąą dine'é bitahgóó tahwiishíjaa' nidi, kédaayahgóó adahonííłkaad nidi, áadi éí kédaayahgóó t'óó kónígháníjį' bine' a'niichéehii há nishłį́į́ nít'éé'.

¹⁷Éí bąą kódíní, Bóhólníihii Diyin God kóní, Dadine'é bitahdę́ę́' áłah ánáhodeeshłííł; kédaayahgóó tahodi'nooskaadii áádę́ę́' áłah áhodeeshłíiłgo Ízrel dine'é bikéyah haa dideesh'ááł.

¹⁸Áko áajį' níjí'náago éí kéyahdi danchxǫ́'ígíí t'áá ałtso índa doo daaldinii t'áá ałtso nahjį' kódeidoolííł.

¹⁹Ajéí t'ááłá'í haa dideesh'áałgo nitsáhákees ániidíii hwiih dadeeshłééł, áko hayi'dę́ę́' hajéí daatséhígíí hadahideeshniłgo hajéí dahináago haa dadideesh'ááł,

²⁰áko bee nihoyí'áanii índa shibik'ehgo hoogáałii bida'jił'į́ áádóó bik'ehgo dajíkáah doo, áko shidine'é dajílį́į doo áádóó haDiyin God nishłį́į doo.

²¹Nidi danchxǫ́'ígíí índa doo daaldinígíí dabijéí yídin danilį́įgo yee hádaat'íinii éí ádajíít'įįdii hak'i yáádeideestsihgo k'éédahodideeshdlííł, ní Bóhólníihii Diyin God.

²²Ákohgo chérabim éí bąąs bíighahgóó naazį́įgo dabit'a' de ádayiilaa áádóó Ízrel dine'é biDiyin God bibi'oh adidilyéehii bikáa'gi dah yildoh.

²³Áádóó Bóhólníihii bibi'oh adidilyéehii kintahdóó dego dah diildohgo kin haal'áádóó ha'a'aahjígo dził si'ánígíí bikáá' niildoh.

²⁴Áko Diyin God biNíłch'i Diyinii bee shił áhát'į́įgo áshiilaago dashidiiłtį́įgo Kaldííya kéyahdi diné daasnáanii nidaakaijį' nishiníłtį́. Nít'éé' shił áhát'íinii shits'ą́ą́' de dah diildoh.

²⁵Áko Bóhólníihii shił ííshją́ą́ áyiilaaígíí t'áá ałtso yisnááh danilíinii bee bił hweeshne'.