Read Navajo EZEKIEL 13 Bible Online

EZEKIEL 13 - Navajo bible

EZEKIEL 13

¹Áádóó Bóhólníihii kóníigo náádiséts'ą́ą́',

²Diné nílíinii, Ízrel dine'é bitahgóó náás áhodoonííł yaa dahalne'ii t'áá bí ádeinízingo dahalne'ígíí bik'ijį' nílį́įgo kót'éego bich'į' handziih, Bóhólníihii bizaad dadoohts'į́į́h;

³Bóhólníihii Diyin God kóní, Nihí doo dahonohsą́ą́góó dahołne'ígíí, t'áadoo nihił ádahoodzaagóó t'áá nihí nihíni' danilíinii baa dahołne'ígíí doo hojooba' ájíníi da!

⁴Ízrel dine'é nohłíinii, nihitahdóó dahalne'ii éí honoojíigi mą'ii dootł'izhí nidaajeehígíí nidahalin.

⁵Tsé ahénátł'ingo ní'áhígíí nidahaasdáázgóó doo dadohkáah da, índa Bóhólníihii beiníłką́ądi anaa' hazlį́į'go Ízrel dine'é yídaníłdzil doo biniyé ahéé'ítł'inígíí t'áadoo nídasoohtł'in da.

⁶Bóhólníihii doo dabííł'aadgóó t'áadoo biniyéhígóó bił ádahoodzaago índa t'áá bóhólníhígíí nayídanilyęęshgo yaa dahalne'go, Bóhólníihii ání, daaní, ákondi yaa dahalne'ígíí bohodoolnííł danízin.

⁷T'áadoo biniyéhígóó nihił ádahoodzaa índa t'áá bóhólníhígíí nabídanoołyęęzh. Azhą́ t'áadoo bee haasdzíi' da nidi, ádadohní, Bóhólníihii kóní.

⁸Éí bąą Bóhólníihii Diyin God kóní, T'áadoo biniyéhígóó nihił ádaadzaii baa nidahosoołne' índa doo t'áá aaníinii nabídanoołyęęzhgo daołtsą́; éí bąą nihik'ijį' nishłį́, jó'akon, ní Bóhólníihii Diyin God.

⁹Nihá dahalne'ii t'áadoo biniyéhígóó ił áhát'į́ dayiiłtse'ii áádóó t'óó nayídaneeshyęęzhii yaa dahalne'ii éí shidine'é doo bitah dahojílǫ́ǫ da doo, áádóó Ízrel dine'é bitahgi doo házhi' atah daasdzoh da doo, índa Ízrel dine'é bikéyah doo biih dazhdookah da, áko Bóhólníihii Diyin God nishłį́įgo nihił béédahodoozįįł.

¹⁰Háálá doo k'é náhásdlį́į́'góó, K'é náhásdlį́į́', daaníigo shidine'é ts'ídá t'áá ádzaagóó adeizh'eezh áádóó shidine'é tsé yítł'ingo ní'áhígíí ádayiił'įįhgo yits'ą́ą́' bikáá'dę́ę́' łeezh łigaií yee deidlish;

¹¹łeezh łigaií yee da'azhdlézhígíí ábidiní, Éí nidoołdas; tó yajiiłį́ nahalingo nahodoołtį́į́ł, nílótsoh nidoołtį́į́ł áádóó ayóó át'éego dooyoł.

¹²Shoo, tsé yítł'inii nááłdáazgo ła' ádanihididooniił, Dashoodlézhígíí éí k'ad háadi?

¹³Éí bąą Bóhólníihii Diyin God kóní, T'óó báhádzidgo bich'į' sháhóóchįįdgo t'áá íiyisí dooyoł; hach'į' sháhóóchįįdgo tó yajiiłį́ nahalingo nahodoołtį́į́ł; t'óó báhádzidgo sháháchį'go nílótsoh nááłtánígíí bee ádooldįįł.

¹⁴Tsé yítł'ingo ní'áii łeezh łigaií bee dashoodlézhígíí ni'jį' naa'ahideeshkałgo nihidíl'áa doo; bee niłdzilgo biyaadi ahéé'ní'áhígíí t'áadoo bikáá' siláhí da doo. Éí tsé nááłdáazgo nihí t'áá ákwii dadínóohnééł, áko Bóhólníihii nishłį́įgo nihił béédahodoozįįł.

¹⁵Ákót'éego tsé yítł'ingo ní'áhígíí índa łeezh łigaií bee da'jizhdlézhígíí t'áá bił t'óó báhádzidgo shibee atí'él'íinii bee atíhodeeshłííł, áádóó ádahodideeshniił, Tsé yítł'ingo ní'áhígíí doo ní'áa da índa da'jizhdlézhígíí ádadzisdįįd;

¹⁶éí ááhdishnínígíí, Ízrel dine'é yá dahalne'ii éí k'é náhásdlį́į'go dayoo'į́į nidi, Jerúsalem bá doo k'é náhásdlį́į' da, ní Bóhólníihii Diyin God.

¹⁷Áádóó diné nílíinii, nidine'é bitsi'ké danilíinii t'áá bí yaa nitsídaakeesgo yaa dahalne'ii bits'ą́ąjį' díní'į́į'go áádóó bik'ijį' nílį́įgo hólne'go

¹⁸kódíní, Bóhólníihii Diyin God kóní, Doo t'áá aaníinii biniyé diné hadanohtáii tsii'ááł yázhí nídaołkadgo diné t'áá ałtso bílátsíín gónaa bąąh nidahohníiłii índa t'áá ałtso tsii' bik'ínáltihí bá ádaoł'íinii, éí sáanii danohłíinii doo hojooba' ájíníi da! Shidine'éésh bii' naazíinii ádadoodįįł biniyé hadadínóohtaałgo éí bee nihí nihii' naazíinii dadoodzih?

¹⁹Shidine'é bitahgóó doo anishłį́į́góó ádashoohłaago tł'oh naadą́ą́' bidee'í díkwíidida yílá bee haajaa' bíighahgo índa bááh bizéí bik'é diné doo dadínóonéeł da yę́ę nidasoołtseed índa shidine'é wooch'ííd dayíists'ą́ą'ii danóh'áahgo dadinóonééł yę́ę yisdádahisoonil.

²⁰Éí bąą Bóhólníihii Diyin God kóní, Tsii'ááł yázhí bee diné éí tsídii nidahalingo hadanootą́ą'ii bik'ijį' nishłį́įgo nihílátsį́į́dóó nahjį' ahideeshdlał, áko diné éí tsídii nidahalingo hadanootą́ą'ii béédadideeshchił.

²¹Tsii' bik'ínáltihí nidaohjahii ałdó' nidahideesǫ́ǫsgo shidine'é nihigháádeeshnił, áko shidine'é doo t'áá dayínóhtą' da doo, áko Bóhólníihii nishłį́įgo nihił béédahodoozįįł.

²²T'áá ákogi ádaaníiłii doo bíni' deił'a'ígíí éí nihí danóh'áahgo bíni' daoł'a'ígíí biniinaa áádóó diné t'áá íiyisí doo yá'áshóonii yisdádoogáłígíí biniyé t'áá íiyisí doo yá'áshǫ' náás yoołt'ihígíí bits'áoya' lágo, dabidooniid;

²³éí bąą t'áadoo biniyéhígóó ił áhát'į́ áádóó t'óó nabídanoołyęęshii doo náádeidoołtséeł da; shidine'é nihigháádeeshnił, áko Bóhólníihii nishłį́įgo nihił béédahodoozįįł.