Read Navajo EZEKIEL 16 Bible Online

EZEKIEL 16 - Navajo bible

EZEKIEL 16

¹Náá'áłdó' Bóhólníihii kóshíłníigo náádiséts'ą́ą́',

²Diné nílíinii, Jerúsalemgi kéédahat'ínígíí doo daaldinígi ádajit'ínígíí hoł béédahózingo áhólééh,

³áko ábidiní, Jerúsalemgi kéédahoht'ínígíí, Bóhólníihii Diyin God kónihiłní, Kéínan dine'é bikéyahgi nidanihi'diizhchį́įgo áádóó haodéél; nihizhé'é éí Ámor dine'é nilį́į́ nít'éé'; nihimá éí Het dine'é nilį́į́ nít'éé'.

⁴Ni'dizhchį́ yę́ędą́ą́' éí bijį́ nits'éé' t'áadoo k'égizh da, índa t'áadoo tááni'disgiz da; doo nidi áshįįh nąąh ályaago na'at'ą́hí t'áadoo nił neeshjoł da.

⁵Naa a'ááh hwiindzingo índa nik'édí nilį́įgo díí ła' ná yaa nidoogaałgo t'áadoo ninééł'į́į' da, háálá ni'dizhchį́ yę́ędą́ą́' éí bijį́į́dóó t'óó naa'ihgo nąąh tsíhodeeskéezgo biniinaa t'áá ádzaajį' andi'yoolghan.

⁶Níighah dah diiyá yę́ędą́ą́' nidił t'ah bii' dí'is yę́ędą́ą́', Hiníná, nidííniid; t'áá aaníí, nidił t'ah bii' dí'is yę́ędą́ą́', Hiníná, nidííniid.

⁷Ch'il hanoot'ánígíigi át'éego náás níít'į́įłgo ániishłaa, áko dínínísą́ągo níneez sínílį́į́' áádóó asdzání ániid naagháago baa dzólníinii sínílį́į́'; nibe' hadzíí'á silį́į́' índa nitsii' nineez silį́į́', nidi t'áá łiníchí'í áádóó t'áadoo nik'ésti'ígóó nanináá nít'éé'.

⁸Níighahgóó náánááshdáałgo náániiłtsą́ą́ nít'éé' ayóó áni'dó'níijį' aníínísą́ą́ lágo niiłtsą́, áko t'áá łiníchí'ígo nanináago shi'éé' nik'íséłti'. T'áá aaníí, ádee haasdzíi'go ahadi'niit'ą́, áko shíí' sínílį́į́', ní Bóhólníihii Diyin God.

⁹Áádóó tó bee táániségiz; t'áá aaníí, nidił ts'ídá ałtso nąąh táásígizgo ak'ah nik'i yanáásdzi'go bee nisíłtłah.

¹⁰Náá'áłdó' na'at'ą́hí naashch'ąą'go bik'i tá'doolkadii biih nííłtį́įgo akał nitł'izii ké ályaago biih nidííł'eez áádóó áłts'óózígo yisdizígíí bee na'at'ą́hí łigaii dits'idgo ályaii bee áká niséłzaaz índa na'at'ą́hí da'dijihígíí nik'íséłti'.

¹¹Áádóó dootł'izhii nąąh dah dasínilgo bee nanishích'ąą'; látsíní nílátsíín t'áá ałch'ijí bąąh sinilgo ániishłaa índa béésh da'ahólzha'í yoo' nizéénázt'i'go ániishłaa.

¹²Yoostsah éí níchį́į́h bąąh niní'ą́ áádóó nijaatł'óól ná áshłaa índa naat'á ch'ah ayóó ánóolninii nich'ahgo ániishłaa.

¹³Ákót'éego óola índa béésh łigaii bee nishíních'ąą'go áni'diilyaa nít' éé'; áłts'óózígo yisdizígíí bee na'at'ą́hí łigaii dits'idgo ályaii áádóó na'at'ą́hí da'dijihígíí índa na'at'ą́hí naashch'ąą'go bik'i tá'doolkadii ni'éé' nít'éé'; ak'áán dibahí áádóó tsés'ná bitł'izh índa ak'ah t'áá bił niyą́ą́ nít'éé', t'áá íiyisí ayóó áníínílnin nít'éé' índa t'áá náás iiyííłdiłgo asdzą́ą́ naat'ááh nílį́įjį' nííníyáá nít'éé'.

¹⁴Bee nízhóníii bee nanishích'ąą'go bee ayóó áníínílninígíí ał'ąą dine'é bitahgóó bee néého'dooszįįd nít'éé', ní Bóhólníihii Diyin God.

¹⁵Nidi ayóó áníínílninígíí baa dziisínílíi'go áádóó t'áá íiyisí néého'dílzinígíí binahjį' ałjiłnii sínílį́į́'; níighahgóó dahidikáahii t'ááłá'í nítínígo bich'į' ne'ajiłgo bíí' dasínílį́į́'.

¹⁶Ni'éé' ła' nídininilgo dah daask'id bighą́ą'di ádeinilaaígi bee dahózhóní dooleeł biniyé bee nidashíních'ąą'go ákwe'é ałjiłnii sínílį́į́'; ts'ídá doo ákóhodooníił da nít'éé' áádóó kodóó doo ákónááhodoo'níił da.

¹⁷Shi'óola áádóó shibéésh łigaii bee hadinít'ée doo biniyé naa diní'áanii éí t'áá ni ádá dinéshchíín ádeinilaago bich'į' íłjił nít'éé';

¹⁸ni'éé' nidaashch'ąą'go bik'i táda'doolkadii nídininilgo bik'ídasíníłti' áádóó she'ak'ah índa shitsin bijeeh dilidgo łikání halchinii bich'į' níínínil.

¹⁹Shich'iyą', éí ak'áán áádóó áliv bik'ah índa tsés'ná bitł'izh éí naa hidish'aahgo na'iistsóodii łikání halchin biniyé bidááhdóó nidasíníką́; ts'ídá ákwíindzaa, ní Bóhólníihii Diyin God.

²⁰Náá'áłdó' niyáázhké índa nich'é'éké shá nihíníłchíinii éí dadoodił biniyé eda'alyaii bich'į' náádahííníłnii'. Ałjiłnii nílínígíísh t' įįhdígo át'éego baa nitsíníkees?

²¹Eda'alyaii bich'į' kǫ' bii'góó ch'éhékáahgo íinilaaígíí bee kót'éego lą́ą sha'áłchíní nisíníłtseedgo ninádííní'ą́.

²²Áádóó bee doo ni'díldinii índa íłjiłii t'áá ałtso baa nanináago níyoołkááłdą́ą́' ániid nanináago ni'éé' ádingo t'áá łiníchí'ígo nidił t'ah bii' dí'is yę́ę doo béénílniih da.

²³Bóhólníihii Diyin God ání, Doo hojooba' ájíníi da, doo hojooba' ájíníi da! Háálá t'áá íiyisí doo yá'áshónígi íínít'įįdii ałtso bibahodooshzhiizhdóó bik'ijį'

²⁴hodílzingo nahaz'ánígíí ádá íinilaa índa kintaa da'nítiingóó t'áá ałtso wódahgo nahaz'ánígíí ádá íinilaa.

²⁵Kintahgóó dah da'diitiindóó t'áá ałtso wódahgo nahaz'ánígíí íinilaago áádóó níighahgóó dahidiikáhígíí bich'į' ádí'iinilkąąhígíí bee índa íłjiłgo t'óó tsé'édinda í'diinilyaaígíí bee ayóó áníínílnin yę́ę doo ni'dóldingóó í'diinilyaa.

²⁶T'áá íiyisí íłjił sínílį́į'go adáninilníigo bił kééhót'íinii Ííjip dine'é ałdó' bił ahíníldah nít'éé', áko sháhwííníłchįįd.

²⁷Éí bąą shoo, nik'ijį' k'ídíshnii'go ch'iyáán naa hidish'aahii áłch'į́į́dígo áshłaa áádóó Filístiya dine'é bitsi'ké t'óó baa'ihgo hinínánígíí yaa yá danízinii, éí nik'ee dadiniihígíí baa nidiní'ą́.

²⁸Doo hwiih nileehígíí biniinaa Asíriya dine'é ałdó' bich'į' íłjił nít'éé'; t'áá aaníí bich'į' íłjił nidi, t'áadoo hwiih sínílį́į' da.

²⁹Áádóó ałdó' nida'iiłniihí bikéyahdi Kaldíya dine'é bich'į' íłjił nít'éé'; azhą́ kónít'į́į́ nít'éé' nidi, t'áadoo hwiih sínílį́į' da.

³⁰Ałjiłnii doo nánílyéesii áát'įįdígi át'éego díí t'áá ałtso baa nisíníyáago, dooládó' yówéé át'éego ats'íís yidánoolníinii doo bich'į' ha'íínílníi da!

³¹Kintaa hada'iiztiingóó t'áá ałtso hodílzingo nahaz'ánígíí íinilaago índa kintaa da'nítiingóó t'áá ałtso wódahgo nahaz'ánígíí íinilaago bik'é nich'į' ni'doolyéłígíí doo nínízinígíí beego doo ałjiłniigi ánít'ée da nít'éé'.

³²E'asdzą́ą́ adiléii bahastiin doo yinízingóó diné doo bééhózingóó nidaakaii át'ayii'nííł!

³³Diné éí ałjiłnii t'áá ałtso t'áadoo le'é yaa dayiinííł, nidi ni éí bił ałch'į' ádant'íinii t'áá ałtso t'áadoo le'é baa dahíínínil; bich'į' da'íłjił doolee ł biniyé t'áadoo le'é bee níhíkąąhgo t'áá ałtsodę́ę́' nąąh hakáahgo íinilaa.

³⁴Áko ni t'éí ałjiłnii nílį́įgo náánáła' asdzání ádaat'éhígi doo ákónít'ée da: diné ła' díníitish doo nidííniid da áádóó doo bik'é na'ílyáa da, nidi ni bich'į' na'ayínílá; ákót'éego ni łahgo ánít'é.

³⁵Éí bąą ałjiłnii nílíinii, Bóhólníihii bizaad diits'į́į́h:

³⁶Bóhólníihii Diyin God kóní, Diné bił ałch'į' ádant'į́ yę́ę bił ahidadílyéego bee baa yánínízin yę́ę t'áadoo bahat'aadí íinilaago t'áá łiníchí'í sínílį́'ígíí biniinaa áádóó eda'alyaii t'áá ałtso bił doo ni'dóldin yę́ę biniinaa índa eda'alyaii bich'į' na'áłchíní náádahíłniihgo bidił dadeezna' yę́ę biniinaa,

³⁷shoo, diné bił ałch'į' ádant'íinii bił ádee nídasíníldįįdgo ayóó'ádeíní'ní yę́ę t'áá ałtso índa bik'ee dadiníniih yę́ę t'áá ałtsodę́ę́' nik'ijį' áłah ádeeshłíiłgo t'áá łiníchí'ígo daniidoołtséłígíí biniyé ni'éé' ałtso naa dideeshnił.

³⁸Áádóó asdzání da'diléii índa áłchíní nideiłtseedgo bidił bits'ádaazlį́įgo ádeile'ii baa nídahat'ínígíigi át'éego naa nídéesht'įįł, áádóó łe'nisingo t'óó báhádzidgo shibee atí'él'íinii bee nidił nits'ánílį́įgo ádeeshłííł.

³⁹Áádóó ałdó' baa nidideesh'áałgo hodílzingo nahaz'ánígíí nits'ą́ą́' nahjį' adeidoogoł índa ninádahałaah doo biniyé wódahgo nahaz'ą́ągo ádeinilaaígíí nits'ą́ą́' nideidiyootih; ałtso naa dadi' doojihgo bee hadinít'éii danizhóní yę́ę nąąh deídóobeeł, áko t'áá łiníchí'ígo doo nik'ésti'ígóó ádandoolííł.

⁴⁰Áádóó ałdó' diné t'óó ahayóí yił naa doonéełgo tsé yee nídandínóołniił índa bidiltłish yee nidandiyoołgish.

⁴¹Nighan ałtso adeididoołk'ą́ą́ł índa asdzání t'óó ahayóí binááł t'áá ándi'doolnííł góne' ádandoolííł; ałjiłnii doo nílį́į́góó ándeeshłíiłgo diné bich'į' doo nináá'ayílée da doo.

⁴²Kót'éego t'óó báhádzidgo shibee atí'él'íinii bee atíniishłaago hwiih deeshłeeł; áadi índa doo łe'nisin da doo, áko hasht'edíínísht'éego ts'ídá doo shá nááhodoochįįł da.

⁴³Ániid nanináádą́ą́' níyoołkáałii doo béénílniihígíí biniinaa éí t'áá ałtso bee sháhwííníłchįįd; éí bąą íínít'įįdígíí t'áá éí bee k'ééndideeshdlííł, ní Bóhólníihii Diyin God, áko díí t'óó baa'ihígíí éí doo ni'dóldinii doo béédi'díítsih da.

⁴⁴Jó, saad bik'eh náhodiit'éehii yee yádaałti'ii t'áá ałtso díí saad yee naa yádaałti' doo, Ach'é'é t'áá bimá át'éhígi át'é.

⁴⁵Nimá bahastiin índa ba'áłchíní doo yił ni'íłdįįhii éí bich'é'é nílį́; nádí áádóó nideezhí badahastiin índa bada'áłchíní doo yił nida'íłdįįhii éí t'áá ła' bił háíníjéé'; nimá Het dine'é nilį́į́ nít'éé'; nizhé'é éí Ámor dine'é nilį́į́ nít'éé'.

⁴⁶Nádí Samériya dine'é nilį́įgo kééhót'į́į́dóó náhookǫsjígo bich'é'éké yił dabighan nít'éé'; nideezhí éí bich'é'éké yił Sádam dine'é danilį́įgo shádi'ááhjígo dabighan nít'éé'.

⁴⁷Nidi ádaat'éii bikék'eh yíníyá índa bee doo dabi'dildinii íinilaa, nidi t'įįhdígo át'éii baa nitsííníkéezgo t'ah biláhídi át'éego íinidzaaígíí ałtso dííłdzid.

⁴⁸Bóhólníihii Diyin God ání, Ts'ídá t'áá aaníí hinishná; ákót'éego ts'ídá t'áá aaníí ni áádóó nich'é'éké ádaot'įįdii nideezhí Sádam áádóó bich'é'éké ts'ídá t'áadoo ákódaadzaa da.

⁴⁹Jó, nideezhí Sádam díí yee ádąąh dahast'ą́ą́ nít'éé': bí áádóó bich'é'éké bee ádaa dahodzódli' áádóó ch'iyáán t'áá bilááh neel'ą́ą́ nít'éé' índa t'áadoo ádayóle'ígóó kéédahat'į́į́ nít'éé', nidi diné bahojoobá'íii índa hojooba' nahas'áanii t'áadoo ła'da yíká ííjée' da.

⁵⁰Bee ádaa dahodzódli'go doo daaldinii shinááł yaa nidaaskai; éí bąą dahoołtsą́ągo nahgóó kóhooshłaa.

⁵¹Bee ádił ni'iyínílzíi'ii ałníí'dóó nidi, Samériya t'áadoo yee ádił ni'iisíi' da; bí doo daaldinígi ádaadzaaígíí biláahgo doo yildinígi íínít'įįd; doo yildinígi íínít'įįdígíí t'áá ałtso bee nádí áádóó nideezhí t'áá ákogi át'é nahalingo íinilaa.

⁵²Niláahdi nádí áádóó nideezhí t'áá bich'oho'níigo baa hwiiníst'įįdígíí bąą ádaa yánínídzingo nanináa doo; doo daaldinii yaa naazh'ázhígíí t'ah bilááh át'éhígo doo yildinii baa nisíníyáhígíí bee t'áá íiyisí ádił ni'iyínílzí'ígíí bił ahąąh naa'nilgo doo hózhǫ́ ádił ni'iisíi' da, áko ádaa yánínídzingo bee naa yáhóósįįdii hólǫ́ǫgo naniná, háálá nádí áádóó nideezhí t'áá ákogi át'é nahalingo íinilaa.

⁵³Sádam áádóó bich'é'éké índa Samériya áádóó bich'é'éké éí t'áá áłah bi'disnáádę́ę́' ch'éédeesh'niłgo yá'át'éehgo iiná hólǫ́ǫjį' anídeesh'nił, áádóó éí bitahjį' yá'át'éehgo iiná hólǫ́ǫjį' ni ałdó' ni'disnáádę́ę́' atah ch'ééndeesht'eeł,

⁵⁴áko nee ha'ólníi doogo íínít'įįdígíí t'áá ałtso biniinaa ádaa yánínídzingo bee naa yáhósįįdii hólǫ́ǫgo nanináa doo.

⁵⁵Nideezhí Sádam áádóó bich'é'éké éí dahináá nít'éé' yę́ęgi át'éego náádahi'náa doo áádóó nádí Samériya áádóó bich'é'éké éí dahináá nít'éé' yę́ęgi át'éego náádahi'náa doo índa ni áádóó nich'é'éké éí t'áá dahinohnáá nít'éé' yę́ęgi át'éego náádahinohnáa doo.

⁵⁶Ádaa hó'niihgo yoołkááł yę́ędą́ą́' nideezhí Sádam t'áadoo bee háínídzíi' da.

⁵⁷Doo yá'áníshónígíí t'ah doo báá'díltsóósdą́ą́' bígi át'éego ni k'ad Síriya bich'é'éké índa bił kéédahat'íinii t'áá ałtso Filístiya bich'é'éké danilíinii éí ninaagóó kéédahat'ínígíí t'áá ałtso ná nidahałt'i'ii sínílį́į́'.

⁵⁸T'óó naa'ihgo hinínáá nít'éé' yę́ę índa doo yildinígi áánííł nít'éé' yę́ę bik'é atíndiilyaaígíí tádíłjiid, ní Bóhólníihii Diyin God.

⁵⁹Jó, Bóhólníihii Diyin God kóní, Bee ádee ha'oodzíi'ii yíní'įįdgo bee aha'deet'áanii k'ííníti'ígíí, t'áá éí bik'ehgo ts'ídá íínít'įįdígíí bee naa nídéesht'įįł.

⁶⁰Azhą́ ákót'ée nidi, ániid nanináago níyoołkááł yę́ędą́ą́' nił aha'dinisht'áanii bénáshniih doo áádóó hool'áágóó aha'deet'áanii ná ádeeshłííł.

⁶¹Áko nádí índa nideezhí éí t'áá áłah bił háíníjé'ígíí yiiłtsood áádóó nich'é'é nilį́į doogo naa deeshnił, áko índa íínít'įįdii béédíílnihgo baa yánínízin doo, nidi shił aha'díínít'áanii éí bee dooda.

⁶²Áádóó nił ahadi'deesht'áałgo Bóhólníihii nishłį́įgo nił bééhodoozįįł.

⁶³Áko íínít'įįdii t'áá ałtso nits' ánídiní'ą́ągo íínít'įįdii béédíílnihgo índa t'óó bik'ee nił ahayói doo áádóó biniinaa ádaa yánínídzinígíí doo bee hanáádíídzih da, ní Bóhólníihii Diyin God.