Read Navajo EZEKIEL 17 Bible Online

EZEKIEL 17 - Navajo bible

EZEKIEL 17

¹Áádóó Bóhólníihii shich'į' haadzíi'go kóní,

²Diné nílíinii, saad nanil'ingo béédi'dootį́įłii ła' bee handziih, áádóó Ízrel dine'é hane' bee ak'idi'dootį́įłii ła' bee bich'į' handziih;

³kóbidiní, Bóhólníihii Diyin God kóní, Atsá ayóó át'éé léi' bit'a' ayóida át'éego, bits'os ayóida ání łnéezgo ahineestihgo bits'os hólǫ́; éí bits'os t'áá ał'ąą ádaat'éego łikizh, áko kéyah Lébanandi yít'a'go gad bílátahí ła' k'íiníti'go dah yidiitą́;

⁴gad bílátahí ániid náádadínéesánígíí ła' k'íiníti'go kéyah ayóo biyi' nida'iiniihgóó ayíítą́ągo naalyéhé baa nidahaniihgo kin haal'áá léi'gi ayíítsih.

⁵Éí kéyahdę́ę́' ałdó' álástsii' ła' néiníjaa'go łeezh yá'át'éehii hólǫ́ǫgi k'iidíílá; tó bee áda'azįįdgo bíighahjį' niiníjaa', k'ai' k'izhdilé nahalingo k'iidíílá.

⁶Áko dínéesą́ągo bits'áoz'a' naaniigo da'ítł'óohgo bich'į'go dadínéesą́; behétł'óól éí biyaa góne' dínéesą́, áko á'íí'áii silį́į'go bits'áoz'a' hazlį́į́' índa bit'ąą' háájéé'.

⁷Nít'éé' náánáła' atsá ayóida ánáánát'éé léi', bit'a' ayóida át'éédóó bits'os ahineestihgo hólǫ́ǫ́ léi' náánát'a'go; éí á'íí'áhídóó behétł'óól índa bits'áoz'a' tó yił niyiikaah doo biniyé bich'į'go dínéesą́.

⁸Bits'áoz'a' hodooleeł biniyé índa bineest'ą' hodooleełgo yá'át'éehgo á'íí'áii dooleeł biniyé tó bee áda'azįįd bíighahgi łeezh yá'át'éehii bii' k'idoolyáá nít'éé'.

⁹Diné kóbidiní, Bóhólníihii Diyin God kóní, T'áá daats'í ąą kwáaniił doo? Dínóołnah biniyé bineest'ą' k'íidoogish índa behétł'óól haidoołts'ǫł. Bit'ąą' ániid háájé'ígíí t'áá át'é dínóołnahgo behétł'óól éí doo adziil bee áádóó doo diné lą'í bee hadoolts'ǫł da.

¹⁰Shoo, t'áá aaníí, k'idoolyá, ákoósh dínóosééł? Ha'a'aahdę́ę́' bich'į' deeyolgo ałtso dínóołnah. K'ídoolyáago nooséłígi t'áá ákǫ́ǫ́ dínóołnah.

¹¹Náá'áłdó' Bóhólníihii shich'į' hanáánáádzíi'go ání,

¹²Nidaalteehii dine'é kóbidiní, Díí ááhyiłnínígíísh doo nihił béédahózin da? Díí bee bił hólne', Shoo, Bábilan dine'é aláahgo binanit'a'í Jerúsalem kin haal'áadi níbaa'go ákwii aláahgo naat'áanii nilíinii índa naat'áanii danilíinii Bábilan kéyahgóó dah yidii'eezh.

¹³Áádóó aláahgo naat'áanii bibízhí yits'áiníłtį́įgo, Shich'į' ádee hadídziih, yidííniid índa yił aha'deet'ą́, áádóó ałdó' diné dabíiyisii éí kéyahdóó dah yidii'eezh,

¹⁴áko ákwii bee óhólníihgo haz'ánígíí t'áá yaa kóolzingo doo bidziilgo háádoolwoł da, nidi bee aha'deet'ánígíí bik'eh dahojíł'į́įgo doo nidoot'ih da biniyé diné dah yidii'eezh.

¹⁵Nidi Ííjip kéyahdę́ę́' łį́į́' bee nida'abaahii índa siláo t'óó ahayóí yinéełgo haa didoot'ááł biniyé ákóyaa há nidaal'a'í jííł'aadgo éí bee aláahgo naat'áanii bich'į' nidzistee'. Ákódziidzaaígíí daats'í t'áá háká adoolwoł? Diné ákót'íinii daats'í yisdádoogááł? Bee aha'deet'áanii doo yik'eh hóół'įįdgóósh t'áá yisdádoogááł?

¹⁶Bóhólníihii Diyin God ání, Ts'ídá t'áá aaníí hinishná; ákót'éego aláahgo naat'áanii bich'į' bee ádee hadzoodzíi'ii jíí'įįdii, áádóó hoł aha'deet'áanii doo bik'eh hojííł'įįdii éí aláahgo naat'áanii jílį́įgo áhoolaii kééhat'į́įgi ts'ídá t'áá aaníí Bábilandi dazhdootsaał.

¹⁷Diné t'óó ahayóí nidootsił biniyé deílk'idgo ádaalyaa índa hashtł'ish tsé bił deítł'ingo ádaalyaago anaa' hazlį́į'go Féro índa bisiláo dah deínéehii dahayóii éí ákónéelą́ą' nidi, doo yee háká adoolwoł da;

¹⁸bee ádee hadzoodzíi'ii jíí'įįd índa bee aha'deet'áanii doo bik'eh hojííł'įįd da; álák'ezhdoolnii'go bee lą́ adzisłį́į' nidi, díí t'áá ałtso baa nijiyáhígíí biniinaa doo yisdázhdoogáał da.

¹⁹Éí bąą Bóhólníihii Diyin God kóní, Ts'ídá t'áá aaníí hinishná; ákót'éego shich'į' ádee hadzoodzíi'ii jíí'įįdgo áádóó shił ahazhdeet'áanii doo bik'eh hojííł'įįdgóó bee doo ákǫ́ǫ́ ájíít'įįdígíí ts'ídá t'áá aaníí hak'ijį' nídoodleełgo ádeeshłííł.

²⁰Shitł'óól naneesdizí hak'ídeeshtihgo dahizhdidoogáałgo Bábilan kéyahdi hodeesłóós; shich'į' nát'ą́ą́' ninájílwodgo náshíízhníibaa'ígíí biniinaa áadi haa nídéesht'įįł.

²¹Hasiláo dah deínéehii t'áá ałtso bitahdóó aláahgo dahayóii t'áá ałtso diltłish bee nidadootsił índa daadziihígíí éí t'áá ałtso da'níłts'ą́ą'gi tabidí'nóolkał, áko shí Bóhólníihii haasdzíi'go nihił béédahodoozįįł.

²²Bóhólníihii Diyin God kóní, T'áá shí gad yaa'áhígíí bílátahdóó ła' k'ídeeshtihgo k'idideeshłééł; bílátahdi ániid náádeitsooígíí éí ła' k'ídeeshtihgo dził agháá'áhígíí bighą́ą'gi k'idideeshłééł;

²³bits'áoz'a' índa bineest'ą' dahodooleełgo gad baa dzólníinii dooleełígíí biniyé Ízrel dine'é bidził wót'ááh yí'áhígíí bighą́ą'gi k'idideeshłééł; éí gad biyaagóó tsídii t'áá ałtso ał'ąą ádaat'éii ła' kéédahat'į́į doo; bits'áoz'a' bee chaha'ohígíí ákǫ́ǫ́ kéédahat'į́į doo.

²⁴Shí Bóhólníihii nishłíinii, tsin sikaadii agháá'áníłnézígíí áłts'ísígo áshłééh áádóó tsin sikaadii áłts'ísígíí éí ayóó áníłnéezgo áshłééh; tsin dootł'izhii éí yishgan áádóó tsin siganii éí náás nooséełgo dootł'izhgo ánáshdléehgo tsin yíl'áhígíí t'áá ałtso bił béédahózin doo. Shí Bóhólníihii nishłíinii haasdzíí' áádóó bi'deeshłiił.