Read Navajo EZEKIEL 18 Bible Online

EZEKIEL 18 - Navajo bible

EZEKIEL 18

¹Áádóó Bóhólníihii shich'į' hanáánáádzíi'go ání,

²Azhé'é danilíinii ch'il na'atł'o'ii dadík'ǫ́zhígíí dayooldéél índa áłchíní biwoo' deidínéestseed, diníigo, díí saad nawólta' Ízrel dine'é bikéyah bee háánídzihígíí, ha'át'íí ááhdiní?

³Bóhólníihii Diyin God kóní, Ts'ídá t'áá aaníí hinishná; ákót'éego Ízrel dine'é bitahgi díí saad nawólta' ts'ídá t'áá aaníí doo bee hanáádíídzih da.

⁴Shoo, ii' naazíinii t'áá ałtso shí; azhé'é bii' sizíinii shíí' át'éego aye' bii' sizíinii ałdó' shí; ii' sizíinii ádił ni'iisíihii dadootsaał.

⁵Nidi diné t'áá ákogi át'éii éí bee haz'áanii yik'ehgo ááníiłgo áádóó t'áá ákogi át'éii yik'ehgo hináago,

⁶áádóó dziłdi hodílzingo nahaz'ánígi t'ah doo ayą́ą́góó áádóó Ízrel dine'é bi'eda'alyaii yich'į' nidahałáhígíí doo yich'į' haaghaałgóó áádóó yił kééhat'íinii be'asdzą́ą́ doo yiłchxǫǫhgóó áádóó asdzání ąądii nilíinii doo yit'áahjį' dighááhgóó,

⁷áádóó diné t'áá háiida doo yide áhósingóó, nidi diné bąąh niiníláii t'áádóo nídí t'óó yeidii'aahgo áádóó diné doo ła' yigha'ídláágóó, nidi dichin danilíinii ya'ałtso'go áádóó t'áá łichí'ígo nidaakaii éé' yitainiihii kót'éego haidósingo,

⁸áádóó ínáóltą'í, doodaii' t'áá aláahgo doo yókeedgóó, áádóó doo ákwii át'éii yits'ąą ná'ádiiltéégóó, áádóó doo haada yit'éii yee ainít'į́įgo, áádóó diné doo ał'ohgo yaa nitsíkeesgóó kót'éego doo haada yit'éii t'áá aaníígóó ááníił dooleeł nízingo,

⁹áádóó bee nihoyí'áanii yik'ehgo níyáago índa shibik'ehgo hoogáałii ye'eł'į́įgo éí t'áá ákogi ájít'é áádóó éí t'áá aaníí jiináa dooleeł, ní Bóhólníihii Diyin God.

¹⁰Áko biye' bá yizhchíinii éí diné yigha'ii'níiłii, doodaii' diné neiłtseedii nilį́įgo, éí doodaii' díí kódaat'éii bik'is yee atííł'íinii nilį́įgo,

¹¹(nidi azhé'é nilíinii kódaat'éii t'áadoo áyiilaa da) éí biye' dziłghą́ą'di hodílzingo haz'ánígi ayáanii índa yił kééhat'íinii be'asdzą́ą́ yił ahidoolyáii,

¹²diné badahojooba'íii índa hojooba' nahas'áanii yide áhósinii, agha'ii'níiłgo yaa naagháii, diné niidooléełgo yee nihoní'áanii doo yá hasht'enéídléehii, eda'alyaii yich'į' aheeghaałii, doo yildinii yaa naagháii,

¹³béeso a'ii'níłígíí yee ínáóltą'í yókeedii, bee bilááh neheleehígíí áłah áyoolíiłii, éí dinéésh hináa doo? Éí doo jiináa da doo; díí doo daaldinii ts'ídá t'áá ałtso baa nijiyá; ts'ídá t'áá aaníí dazdootsaał; t'áá hó hadił hak'éidoot'ih.

¹⁴Ákondi, éí diné biye' hazlį́į'go éí biye'ígíí bizhé'é ádił ni'iisíí' yę́ę t'áá ałtso yiyiiłtsą́ągo yaa nitsízkééz, áko doo yikék'eh deeyáágóó,

¹⁵dziłghą́ą'di hodílzingo haz'ánígi doo ayáanii, Ízrel dine'é bi'eda'alyaii doo yich'į' ahighaałii, yił kééhat'íinii be'asdzą́ą́ doo yił ahidoolyáii,

¹⁶doo ła' yide áhósinii, diné béeso beidiní'áanii, Tsį́įłgo shaa nínííł, doo yiłníinii, diné doo yigha' ii'níiłii t'áá bí bich'iyą' diné dichin danilínígíí ya'ałtso'ii, t'áá łichí'ígo nidaakaii éé' yitainiihii,

¹⁷badahojoobá'íii doo atííł'íinii, ínáóltą'í índa bee alááh náádleełii doo yinízinii, shibik'ehgo hoogáałii yi'iilaii índa bee nihoyí'áanii yik'ehgo yigáałii éí hazhé'é doo ákwii áát'įįdii biniinaa doo dazhdootsaał da, nidi t'áá aaníí jiináa dooleeł.

¹⁸Nidi hazhé'é doo yits'íídgóó diné yich'į' nahwiisnáa'go áádóó bik'is t'áá na'níle'dii yigha'ídláago índa bidine'é yitahgóó doo yá'át'éehii yaa naayáago biniinaa doo ákwii áát'įįdii bąą dadootsaał, jó'akon.

¹⁹Nidi ádadohní, Doo haniih haye'go bizhé'é doo ákwii áát'įįdii yá yik'é ti'hooníih da? Haye' éí bee bá haz'áanii índa t'áá ákogi é'ét'éii yik'ehgo ádzaa áádóó bee nihwiish'aahii t'áá ałtso yi'iilaago éí yee t'áá aaníí hináa doo.

²⁰Ii' sizíinii ádił ni'iisíihii dadootsaał. Azhé'é jílíinii éí doo ákwii ájíít'įįdígíí haye' doo yik'é ti'hwiidoonih da, índa haye' doo ákwii áát'įįdígíí doo bik'é ti'hwiizhdoonih da; t'áá ákogi ájooníi łii éí hat'áá ákogi é'ét'éii hoł hólǫ́ǫ doo; doo yá'áshǫ́ǫ́góó ájooníiłii éí hadoo yá'áshǫ' hoł hólǫ́ǫ doo.

²¹Nidi diné t'áá íiyisí doo yá'áshóonii ádił ni'iisíi'ii t'áá ałtso yóó'iidíí'ą́ągo áádóó bee nihwiish'aahii t'áá ałtso yik'eh hół'į́įgo áádóó bee bá haz'áanii índa t'áá ákogi é'ét'éii yaa naagháago éí doo dadootsaał da; ts'ídá t'áá aaníí hináa dooleeł.

²²T'áá ákogi ádziidzaaígíí bąą jiináa doo; doo ákwii ájíít'įįdii t'áá ałtso doo há bééhodoonih da.

²³Diné doo yá'áshóonii daaztsą́ągoósh bąą shił hózhǫ́ǫ doo? ní Bóhólníihii Diyin God. Nidi éí diné yee át'éii yóó'iidíí'ą́ągo hinánígíí baa shił hózhǫ́.

²⁴Diné t'áá ákogi át'éii t'áá ákogi ájít'éhígíí yóó'azhdíí'ą́ągo, áko doo ákwii é'ét'éii baa nijigháago, índa diné t'áá íiyisí doo yá'áshóonii doo daaldinii yaa naakaígíí baa nijiyáago, da' éísh diné jiináa doo? T'áá ákogi ádaat'éii baa nijiyáhígíí doo há bééhodoonih da, háálá hoł nilíinii bik'ijį' dzizlį́į'go índa ádił adzisiihgo ízhdiilyaaígíí t'áá éí biniinaa dazdootsaał.

²⁵Nidi Bóhólníihii yee át'éii éí doo ákǫ́ǫ́ át'ée da, dadohní. Ízrel dine'é danohłíinii, ge', bee ánísht'éiísh doo ákǫ́ǫ́ át'ée da? Nihí bee ádanoht'éii ts'ídá doo ákǫ́ǫ́ ádaat'ée da.

²⁶Diné t'áá ákogi át'éii t'áá ákogi ájít'éhígíí yóó'azhdíí'ą́ągo, áko doo ákwii é'ét'éii baa nijigháago, éí bik'ee dazhdootsaał; doo ákwii ájíít'įįdii bik'ee dazhdootsaał.

²⁷Náá'áłdó', diné t'áá íiyisí doo yá'áshóonii éí doo yá'áshǫ' yaa naagháhígíí yóó'iidíí'ą́ągo áádóó bee bá haz'áanii índa t'áá ákogi át'éii yaa naagháago éí diné yisdá'ádidooltééł.

²⁸Háálá doo ákwii ájooníiłii nabik'ítsídzízkéezgo ałtso yóó'azhdíí'ą́ągo doo dazhdootsaał da; ts'ídá t'áá aaníí jiináa doo.

²⁹Nidi Ízrel dine'é ádaaní, Bóhólníihii yee át'éii éí doo ákǫ́ǫ́ át'ée da. Ízrel dine'é danohł íinii, bee ánísht'éiísh doo ákǫ́ǫ́ át'ée da? Nihí bee ádanoht'éii ts'ídá doo ákǫ́ǫ́ ádaat'ée da.

³⁰Éí bąą Ízrel dine'é danohłíinii, t'ááłá'í nootínígo baa nidaahkaígíí bik'ehgo nihaa nídéesht'įįł, ní Bóhólníihii Diyin God. Doo ákwii ádanoht'éhígíí bąą doo atínihidi'doolníłígíí biniyé bee haz'áanii dahohtíihii ałtso yóó'adahidoh'aahgo łahgo át'éego Diyin God bich'į' tsíńdadohkees.

³¹Bee haz'áanii dahohtíihii ałtso yóó'adahidoh'aah ajéí ániidíii índa nitsáhákees ániidíii nihaa dideesh'ááł. Ha'át'íísh biniyé dadínóohnééł, Ízrel dine'é danohłíinii?

³²T'áá háiida bizéé' hazlį́į'ii éí doo baa shił hózhǫ́ǫ da, ní Bóhólníihii Diyin God, áko łahgo át'éego tsídahidohkeesgo dahinohnáa doo.