Read Navajo EZEKIEL 19 Bible Online

EZEKIEL 19 - Navajo bible

EZEKIEL 19

¹Áádóó ni, Ízrel dine'é binanit'a'í danilíinii baa yínííł naniná,

²áádóó kódíní, Nimá ha'at'íísh át'éé nít'éé'? Náshdóítsoh bitsiijį' daditł'ooígíí bitahdóó nimá náshdóítsa'ii bitsiijį' ditł'ooígíí nilį́įgo biyázhí néidiiłjéé'.

³Biyázhí ła' yiyaa hooł'a'ii éí nitsxaaz silį́į́'; yidoolghałii yił hidideełgo yíhooł'ą́ą'go diné yooldéél.

⁴Ał'ąą dine'é haa dahodiizts'ą́ą'go a'áán ádayiilaago yee hoł dadeezdéél; béésh da'ahólzha'í yee Ííjip kéyahdi dahazlóóz.

⁵Nít'éé' t'ah jinízinígíí bąą bee hoł chohoo'į́ yę́ę ásdįįdgo hoł bééhoozingo náánáła' hayázhí biyaa nááhojiił'a'go éí nitsxaaz náánásdlį́į́'.

⁶Éí náshdóítsoh bitsiijį' daditł'ooígíí yitahgóó naaghá, áádóó éí nitsxaaz silį́į'go yidoolghałii yił hidideełgo yíhooł'ą́ą'go diné yooldéél.

⁷Bine' nidadzidzi'gi hoo'į́; hakin hadaas'áii naa ayiiskaad; bii' nahodi'ni'go ánínígíí yee kéyah t'áá náhwiist'ą́ą́ nít'éé' doo naagháhí da haazlį́į́'.

⁸Ał'ąą dine'é bił dah nahaz'ą́ą́dę́ę́' t'áá ałtso honázt'ih; bitł'óól naneesdizí hak'ídeisti'; bee a'áán góyaa hoł dadeezdéél.

⁹Béésh da'ahólzha'í yee dahólóosgo yah adahast'e'; Bábilan dine'é aláahgo binanit'a'í yaa dahazlóóz; Ízrel dine'é bikéyahdi dził naaznilígíí dabighą́ą́'góó hwiinéé' doo náádiits'a' da dooleełígíí biniyé yah adahast'e'go hadáda'deeskaal.

¹⁰Tábąąhgóó ch'il na'atł'o'ii k'idoolyáhígi át'éego nimá ch'il na'atł'o'ii nahalingo tó t'óó ahayóígíí bąą bits'áoz'a' t'óó ahayóí nít'éé' áádóó bineest'ą' t'óó ahayóí bąąh náhoodleeł nít'éé'.

¹¹Naat'á gish biniyé bits'áoz'a' t'áá íiyisí dabidziil nít'éé'; t'óó ahayóí ats'áoz'a'ígíí bitah góne' yadiineez nít'éé'; dzíneezgo hats'áoz'a' t'óó ahayóigo ho'doot'į́į́ nít'éé'.

¹²T'áá na'níle'dii hahodi'yoolghan; ni'jį' ahodi'yoolghan; ha'a'aahdę́ę́' deeyolgo haneest'ą' ałtso yisgan; hats'áoz'a' dabidziilii yiyiizti'go daniiłna'go ałtso adahideezk'ą́ą́'.

¹³K'ad éí honoojíidi, tó ádindi, índa hóółtseidi k'iho'doolyá.

¹⁴Bits'áoz'a' ła' biyi'dę́ę́' kǫ' hadíínóodgo bineest'ą' ałtso iidííłk'ą́ą́', áádóó bits'áoz'a' bidziilii doo ła' ánászįįd da, áko naat'á gish doo ła' náhodoodleeł da. Díí lą́ą baa atínáhodindleeh ni, áádóó baa cha hasingo hodeeshzhiizh ni.