Read Navajo EZEKIEL 2 Bible Online

EZEKIEL 2 - Navajo bible

EZEKIEL 2

¹Éí shich'į' haadzíi'go áshíłní, Diné nílíinii, yiizįįh, nich'į' hadeesdzih.

²Shich'į' haadzíi'go níłch'i shiih hóóle' áádóó shiisį'go yee shich'į' haadzí'ígíí diséts'ą́ą́'.

³Kóshíłní, Diné nílíinii, Ízrel dine'é nidaalteehii bich'į' nidéł'a'; éí shich'į' nidaalteeh; díí jį́įjį' bí áádóó dabizhé'é yę́ę shich'į' ádił nida'iiszíí'.

⁴Éí dine'é t'áá íiyisí doo dajooba' da áádóó doo nibída'didzil da. Bich'į' nííł'aadgo ábididííniił, Bóhólníihii Diyin God kóní, diníi doo.

⁵Áko da'íists'ą́ą'go, éí doodaléi' doo da'íists'ą́ą́'góó, jó, shich'į' nidaalteeh, Diyin God yá halne'ii bitahgóó tádííyáago bił béédahodoozįįł.

⁶Diné t'éiyá nílį́į nidi, t'áadoo béédanildzidí; ádaanínígíí ałdó' t'áadoo bééníldzidí, azhą́ diné éí hosh áádóó ch'il hooshahii índa séígo' nidahalingo bił kééhót'į́į nidi, ádaanínígíí t'áadoo bééníldzidí índa dadéez'į́į'go ádaalnii'ígíí t'áadoo bééníldzidí; shíyee' shich'į' nidaalteehgo ádaat'į́.

⁷Da'íists'ą́ą'go, éí doodaléi' doo da'íists'ą́ą' da nidi, kodóó bee bich'į' hadíídzih nidishnínígíí bee bich'į' yáníłti', háálá t'áá íiyisí shich'į' nidaalteeh.

⁸Kodóó ándishnínígíí yísíníłts'ą́ą́': Diné shich'į' nidaalteehígíí nahalingo t'áadoo shich'į' nanilteehí; na'astso'ígíí niyą́.

⁹T'áá dísh'į́į́' nít'éé' ála' léi' shich'į' k'ídeelnii'go naaltsoos yisdisgo dah yootį́į́ł, jó'akon;

¹⁰shidáahgi náyoostahgo atínídazhdindleeh dooleełígíí áádóó yínííł dajílį́į dooleełígíí índa ti'dahojooníih dooleełígíí bikáá'dę́ę́' áádóó bine'dę́ę́' bee bik'eda'ashchį́.