Read Navajo EZEKIEL 20 Bible Online

EZEKIEL 20 - Navajo bible

EZEKIEL 20

¹Tsosts'id náhááh góne', ashdla' nídízííd binih, neeznáágóó yoołkáałgo Ízrel dine'é bitahdóó aląąjį' naazíinii léi' Bóhólníihii nideídídóołkił yiniyé yíkaigo shidááhdóó dineezbin.

²Áádóó Bóhólníihii shich'į' haadzíi'go áshidííniid,

³Diné nílíinii, Ízrel dine'é aląąjį' naazíinii bich'į' handziihgo kóbidiní, Bóhólníihii Diyin God kóní, Nidashidídóołkiłísh biniyé nohkai? Ts'ídá t'áá aaníí hinishná; ákót'éego ts'ídá t'áá aaníí doo nidashidídóołkił da, ní Bóhólníihii Diyin God.

⁴Diné nílíinii, baa nídíit'įįłísh, baa nídíit'įįłísh? Ákónínéehgo dabizhé'é yę́ę doo yildinígi ádáát'įįdii bił béédahonísįįh.

⁵Áko ábidiní, Bóhólníihii Diyin God kóní, Ízrel nídiiłtį́į́dą́ą́', Jéíkab ba'áłchíní náás ahoolchíiłii bich'į' ádee hadeesdzíí' yę́ędą́ą́', Ííjip kéyahdi bich'į' ádééhosiszįįdgo, Bóhólníihii nihiDiyin God nishłį́, dishníigo hach'į' ádee hadeesdzíí' yę́ędą́ą́',

⁶Ííjip kéyahdóó ch'íhodeesh'ishgo kéyah agháadi ayóó áhonoolnindi bikáa'gi abe' índa tsés'ná bitł'izh bee áda'azįįdii há hanítą́ą'go há shóisíłt'e'ii éí biih hodeesh'ish, hodííniidgo hach'į' ádee hadeesdzíí'.

⁷Áádóó áhodishní, Diné t'ááłá'í nootínígo doo daaldinii danół'íinii áts'á dahidoołtł'ił, índa Ííjip kéyahdi eda'alyaii doo bee ádidoołchxǫǫ ł da; shí Bóhólníihii nihiDiyin God nishłį́.

⁸Nidi shich'į' nidaastee', índa doo t'áá k'ad dashidiizts'ą́ą' da; doo daaldinii deiníł'ínę́ę t'áadoo yóó'adeideez'ą́ą da, índa Ííjip kéyahdi eda'alyaii naaznilii t'áadoo yóó'adeideez'ą́ą da. Áko ádííniid, Hach'į' sháhóóchįįdgo Ííjip kéyahdi bohodoolníłígíí biniyé t'óó báhádzidgo shibee atí'él'íinii bee atíhodeeshłííł.

⁹Ííjip kéyahdóó hahóó'eezhgo ał'ąą dine'é bich'į' ádééhosészįįd yę́ędą́ą́' bitah kéédahojit'ínígíí binááł shízhi' hoł danilį́įgo doo dazhdoołchxǫǫł da biniyé ásdzaa.

¹⁰Éí bąą Ííjip kéyahdóó hahóó'eezhgo honoojíijį' ahóó'eezh.

¹¹Bee nihoyí'áanii haa diní'ą́, áádóó shibik'ehgo hoogáałii hoł yit'íní áshłaa; éí diné yik'eh hół'į́įgo hináa dooleeł.

¹²Áádóó shí Bóhólníihii diyingo ádahashłéehgo hoł béédahodoozįįł biniyé shí áádóó hó nihita'gi shiháá'áyį́į́h jį́ bee ééhózin doo biniyé haa diní'ą́.

¹³Nidi honoojíidi Ízrel dine'é shich'į' nidaalteeh nít'éé'; bee nihoyí'áanii doo yik'ehgo dayíkai da áádóó shibik'ehgo hoogáałii doo deiniizį́į' da; éí yee diné yik'eh hół'į́įgo hináa doo, áádóó shiháá'áyį́į́h jį́ t'áá íiyisí dayííłchxǫ'. Áko ádííniid, Ałtso áhodeeshdįįłígíí biniyé t'óó báhádzidgo bee até'ésh'íinii honoojíidi bee atíhodeeshłííł.

¹⁴Ał'ąą dine'é binááł Ííjip kéyahdóó ch'íhoní'eezhígíí éí binááł shízhi' doo dazhdoołchxǫǫł daígíí biniyé baa atíít'įįd.

¹⁵Áádóó kéyah agháadi ayóó áhonoolninii bikáa'gi abe' índa tsés'ná bitł'izh bee áda'azįįdii, Éí kéyahígíí doo biih danihideesh'ish da, hodishníigo honoojíidi bee hach'į' ádee hadeesdzíí',

¹⁶háálá hajéí bee eda'alyaii bídin dajílínígíí biniinaa shibik'ehgo hoogáałii dajíí'įįd, áádóó bee nihoyí'áanii doo bik'ehgo dajíkai da, índa shiháá'áyį́į́h jį́ dajííłchxǫ'.

¹⁷Azhą́ ákót'ée nidi, honoojíidi hak'i dísh'į́į'go bee ááhosésįįd, t'áadoo atíhooshłaa da, índa t'áadoo ałtso áhoséłdįįd da.

¹⁸Honoojíidi ha'áłchíní ábidííniid, Danihizhé'é yę́ę yee nidahwiiz'áanii t'áadoo bik'ehgo deínóhkáhí; bibik'ehgo hoogáałii t'áadoo bida'oł'íní, índa eda' alyaii deidósin nít'éé' yę́ę bee ádadoołchxǫǫł lágo.

¹⁹Shí Bóhólníihii nihiDiyin God nishłį́; bee nihoyí'áanii bik'ehgo deínóhkááh, áádóó shibik'ehgo hoogáałii hazhó'ó bida'oł'į́.

²⁰Shí Bóhólníihii nihiDiyin God nishłį́įgo nihił béédahodoozįįł biniyé shí áádóó nihí nihita'gi bee ééhózinii át'éego shiháá'áyį́į́h jį́ ná'oodleełii hodílzingo ádeínóhsin doo.

²¹Azhą́ ákót'ée nidi, shich'į' nidaalteeh nít'éé'; bee nihoyí'áanii t'áadoo bik'ehgo dajíkai da, áádóó shibik'ehgo hoogáałii bida'jił'į́įgo dajiináa dooleełígíí t'áadoo bik'eh dahojííł'įįd da índa shiháá'áyį́į́h jį́ dajííłchxǫ'. Áko ádííniid, T'óó báhádzidgo bee até'ésh'íinii éí honoojíidi bee atíhodeeshłííł.

²²Azhą́ ákót'ée nidi, t'óó báhádzidgo bee até'ésh'íinii bee atíhodeeshłííł yę́ę t'ą́ą́' kónáshdlaago ał'ąą dine'é binááł ch'íhoní'eezh yę́ę éí dabinááł shízhi' doo ílį́į́góó doo bee hadazdoodzihígíí biniyé baa atíít'įįd.

²³Náá'ákóne' ał'ąą dine'é bitahgóó tanihidínéeshkał áádóó kéyah naaznilgóó tanihidínéeshkał, dishníigo honoojíidi hach'į' ádee hadeesdzíí',

²⁴háálá shibik'ehgo hoogáałii t'áadoo bida'jiilaa da áádóó bee nihoyí'áanii dajíí'įįd áádóó shiháá'áyį́į́h jį́ dajííłchxǫ' índa dahazhé'é yę́ę bi'eda'alyaii dazhdiniilgęęzhgo bich'į' nidahojiłá.

²⁵Éí bąą bee nidahwiist'áanii doo yá'ádaat'éehii índa bik'ehgo hoogáałii iiná bii' ádinígíí baa hodiní'ą́;

²⁶ha'áłchíní áłtsé nidajiiłchíhígíí kǫ' bii'jį' náádajiiłniihgo áhooshłaa, kót'éego aa dahizhdi'aah yę́ę bee t'óó baa'ihgo há áshłaa; Bóhólníihii nishłį́įgo hoł béédahodoozįįł biniyé kóhooshłaa.

²⁷Éí bąą diné nílíinii, Ízrel dine'é danilíinii bich'į' handziihgo ábidiní, Bóhólníihii Diyin God kóní, Danihizhé'é yę́ę shich'į' doo ákǫ́ǫ́ ádáát'įįdígíí bee doo anishłį́į́góó ádashiilaa.

²⁸Kéyah haa dideesh'áałgo hach'į' bee ádee hadeesdzíi'ii biih hóó'eezhgo wódahgo deílk'idii t'áá ałtso índa tsin díłch'ilgo naazkaadii dayiiłtsą́ągo ákwii nááhidoonihii náádayiisnii'; ákwii Bóhólníihii bee bá dahozhdoołchįįłii náádajiisnii'; ákwii tsin bijeeh dilidgo łikání halchinii náádajiisnii' índa yanáadzi'go nááhániihii yadajiinil.

²⁹Dah yisk'id bighą́ą'di ályaaígíí bich'į' ałnáádaahkahígíishą', ha'át'íísh óolyé? hodííniid. Áko dííshjį́įjį' bízhi' éí Bámah hoolyé.

³⁰Éí bąą Ízrel dine'é kóbidiníigo bich'į' handziih, Bóhólníihii Diyin God kóní, Danihizhé'é yę́ę ádáát'įįdígi át'éegoósh ádadoołchxǫ'go doo yildinígi ádaadzaii bikéé' yóó'oohkááh?

³¹Aa dahidoh'aahii náádahołniihgo índa niha'áłchíní ashiikéhígíí kǫ' bee náádahołniihgo dííshjį́įjį' nihi'eda'alyaii t'áá bił nida'ádiyoołchxǫǫh; ákoósh, Ízrel dine'é danohłíinii, nidashídółkid doo? Áko Bóhólníihii Diyin God kóní, Ts'ídá t'áá aaníí hinishná; ákót'éego nihí ts'ídá t'áá aaníí doo nidashídídóołkił da.

³²Ał'ąą dine'é ádaat'éhígíigi át'éego náádaała' kéyah naaznilgóó dine'é kéédahat'ínígíigi át'éego tsin áádóó tsé bich'į' nidahwiidláa dooleeł, danohsingo kót'éego nitsídaohkeesígíí éí ts'ídá doo ádooníił da.

³³Ts'ídá t'áá aaníí hinishná; ákót'éego ts'ídá t'áá aaníí shíla' ayóó ábóodziilii bee nihik'i dah deeshnihgo t'óó báhádzidgo bee até'ésh'íinii bee atínihish'į́įgo aláahgo nihinanisht'áa doo, ní Bóhólníihii Diyin God;

³⁴shíla' ayóó ábóodziilii bee nihik'i dah deeshnihgo t'óó báhádzidgo bee até'ésh'íinii bee atí'ésh'į́įgo kéyah da'níłts'ą́ą́'góó tanihidi'nooskaad yę́ędę́ę́' dadine'é bitahdę́ę́' áłah ánánihideeshdlííł.

³⁵Honoojíidi dadine'é kéédahat'į́įjį' anihideesh'ish; ákwii da'ahiníil'į́įgo nihił ałgha'disht'áah doo.

³⁶Ííjip kéyah honoojíidi danihizhé'é yę́ę bił ałghada'disht'ááh yę́ęgi át'éego nihí nihił ałgha'disht'áah doo, ní Bóhólníihii Diyin God.

³⁷Gish biyaa ch'ínihidiyeeshkahgo nihił ahadadi'deesht'áałgo bínihííníshtą'.

³⁸Nidaalteehii índa shich'į' doo ákǫ́ǫ́ ádaaníiłii nihitahdóó nahjį' hadeeshnił; kéyahgi tádazhdinéhídóó hahodeeshniłgo Ízrel dine'é bikéyah doo biih dazhdookah da, áko índa Bóhólníihii nishłį́įgo nihił béédahodoozįįł.

³⁹Nihí, Ízrel dine'é nohłíinii, doo dashíínółts'ą́ą́'góó k'ad índa hoolzhishgóó t'ááłá'í nootínígo nihi'eda'alyaii bich'į' nidahohłá, nidi aa dahidoh'aahígíí índa nihi'eda'alyaii bee shízhi' diyinii doo náádadoołchxǫǫł da, ní Bóhólníihii Diyin God.

⁴⁰Shidził diyingo si'ą́ąjį' éí bighą́ą'gi Ízrel dine'é agháago dahodísingo kéyah t'áá náhwiist'ą́ą́ nít' éé' Ízrel dine'é kéédahat'íinii ákwii shich'į' nidahałáa doo; ákwii hodínéesįįł; ákwii shich'į' náádahołniihii, áádóó áłtsé neest'áanii aa dahidoh'aahii índa nihee dahólóonii dadiyinii t'áá ałtso shich'į' náádahołniih doo, bidideeshniił, ní Bóhólníihii Diyin God.

⁴¹Kéyahgóó tanihidi'nooskaad yę́ędę́ę́' áłah ánihiishłaago dadine'é bitahdę́ę́' ch'ínihiyí'eezhgo łikání dahonołchingo nihidínéesįįł áádóó ał'ąą dine'é binááł nihitahgóó t'áá íiyisí dinishyinii ííshjání ádeeshłííł.

⁴²Danihizhé'é yę́ę kéyah nihaa dideesh'ááł, bidishníigo bee bich'į' ádee hadeesdzíi'ii biih nihíí'eezhgo Bóhólníihii nishłį́įgo nihił béédahodoozįįł.

⁴³Bee ádanoht'éii índa ádaoht'įįdii bee ádadoołchxǫ' yę́ę, éí t'áá ałtso béédadołnihgo t'áá íiyisí doo yá'áshóonii baa nidasoohkaii t'áá ałtso biniinaa ádił nináda'oht'įįh dooleeł.

⁴⁴Shízhi' bik'ehgo nihainísht'į́įgo Bóhólníihii nishłį́įgo nihił béédahodoozįįł, Ízrel dine'é nohłíinii, t'áá íiyisí doo yá'áshǫ́ǫ́góó ádanoht'éii índa t'óó baa'ihígi ádaot'įįdii bik'ehgo éí dooda, ní Bóhólníihii Diyin God.

⁴⁵Áádóó Bóhólníihii shich'į' haadzíi'go kóshíłní,

⁴⁶Diné nílíinii, shádi'áahjigo dah díníit'aahgo shádi'ááh bik'ijį' yáníłti', áádóó shádi'ááhjí tsin yíl'áhígíí náásgóó kónóht'ée dooleeł, bidiníigo bee bich'į' handziih;

⁴⁷shádi'ááhjí tsin yíl'áhígíí ábidiní, Bóhólníihii bizaad dadoohts'į́į́h; Bóhólníihii Diyin God kóní, Nihihodideeshniłgo nihitahgóó tsin dadootł'izhgo naazkaadii t'áá át'é índa tsin daazgango naazkaadii t'áá át'é adidook'ą́ą́ł; kǫ' shizhóod dooleełígíí doo dínóoltsis da, áádóó náhookǫsdóó shádi'áahjį' diné t'áá ałtso dabinii' dadoodis.

⁴⁸Nihokáá' dine'é t'áá ałtso éí shí Bóhólníihii ihodíínilgo bił béédahodoozįįł; éí doo dínóoltsis da.

⁴⁹Nít'éé' ádíshní, Bóhólníihii Diyin God nílíinii! Hane' bee ak'idi'dootį́įłii yaa nahalne' ya', dashiłní.