Read Navajo EZEKIEL 22 Bible Online

EZEKIEL 22 - Navajo bible

EZEKIEL 22

¹Áádóó ałdó' Bóhólníihii shich'į' haadzíi'go ání,

²Diné nílíinii, kin haal'áhígi diné naatseedgo bidił danílínígíísh baa nídíít'įįł? Éísh baa nídíít'įįł? Ákónínéehgo doo yildinígi ájíít'įįdígíí t'áá ałtso bee hoł hodíílnih.

³Kóbididííniił, Bóhólníihii Diyin God kóní, Kin haal'áagi diné nideiłtseedgo bidił danílį́įgo ádeile'ii índa eda'alyaii ádá ádeile'go yee nida'ádiilchxǫǫhii éí atíhodi'doolníłígíí bik'íhodoolzhishgo át'é.

⁴Dił danílį́įgo ádahwiinilaaígíí bee ádihodinilt' i'; eda'alyaii ádeinilaaígíí bee ádíínílchxǫ'; éí bee bijį́ ándi'doolníłígíí koshídę́ę́' ách'į' nidíínídzį́į́z, nánihoot'áanii éí baa hoolzhiizh; éí bąą ał'ąą dine'é nándahałt'i'go ániishłaa áádóó kéyah naaznildę́ę́' t'áá ałtso naa daadlohgo ániishłaa.

⁵Doo yá'áníshxóonii índa nił hóóląądgo hahwííníł'áii, t'áá áyídígóó kéédahat'íinii índa nízaadi kéédahat'íinii ná nidahałt'i' doo.

⁶Nitahgi Ízrel dine'é binanit'a'í danilíinii t'ááłá'í nítínígo bibee adziilii bik'ehgo diné nidootsiłgo bidił danílį́į dooleełígíí yídadínéelná, jó'akon.

⁷Nihitahgóó azhé'é índa amá dei'į́; tł'óó'dę́ę́' nihaa nídaaldahígíí yinda'alo'go bik'ee ti'dahoonííh; áłchíní bizhé'é ádaadinii índa asdzání bąąh ádahasdįįdii nihitahgóó doo ákǫ́ǫ́ ádayííł'įįd da.

⁸Dadílzinii daashíhígíí dasoo'įįd índa shiháá'áyį́į́h jį́ doo diyingóó ádaohłaa.

⁹Nihitahgóó diné nidootsił biniyé t'áá ádzaagóó yaa dahalne'go bidił danílį́įgo ádeile' áádóó dziłghą́ą'di doo dahodísingóó da'ayánígíí nihitah hólǫ́ índa nihitahgóó na'ageh yaa nidaakai.

¹⁰Nihitahgóó dahazhé'é bida'asdzą́ągo bił da'ahizhdoolyá índa nihitahgóó diné éí asdzání ąądii nilíinii yá nida'azyeh.

¹¹Diné ła' éí diné yił kééhat'íinii be'asdzą́ą́ doo yildinígi áyííł'įįd; náánáła' diné éí bizháá'áád yił ahidoolyá; nihitahgóó náánáła' diné éí bizhé'é bitsi', hadeezhígo bádzízyeh.

¹²Nihitahgóó diné diyoolyééł yiniyé diné yik'é ałch'į' nida'iizlá. Bił kééhót'íinii bits'ą́ą́dóó ínáóltą'í biniyé nááhíníchid; bee bilááh níí' dooleełii ahanihínínil índa nee áchą́hwíídéeni'go bee bilááh dooleełii hasht'e'nihínínil; kwíínít'įįdígíí bee sheisínínah, ní Bóhólníihii Diyin God.

¹³Éí bąą ina'ílo'go shóísíníłt'e'ígíí áádóó nihitahgóó diné nidaaztseedgo bidił dadeezna'ígíí biniinaa yéego ahísíkad, jó'akon.

¹⁴Nihainísht'į́įgo yidiiską́ądi daats'í hada'íínóhníigo bídanoł'ą́ą dooleeł, índa bich'į' daats'í danihidziil dooleeł; ts'ídá bi'deeshłíłí, shí Bóhólníihii haasdzíí'.

¹⁵Kéyah naaznilgóó tanihiidínéeshkałgo ał'ąą dine'é bitahgóó tanihiidínéeshkał, áádóó nichxǫ́'ígíí nihii'di dahólóonii ałtso nihii'dę́ę́' hahidideeshk'ą́ą́ł.

¹⁶Áádóó ał'ąą dine'é bitahgóó nidi'doolchxǫǫł, áko índa Bóhólníihii nishłį́įgo nił bééhodoozįįł.

¹⁷Áádóó Bóhólníihii shich'į' haadzíi'go kóní,

¹⁸Diné nílíinii, Ízrel dine'é éí béésh łigaii bits'ádahideesyį́'ígíí silį́į'go baa nitséskees; t'áá ałtso déédíljah góne' béésh łitsoii áádóó béésh kágí, béésh nitł'izii índa dilyį́hí éí béésh łigaii bits'ádahideesyį́į'ii danilį́.

¹⁹Éí bąą Bóhólníihii Diyin God kóní, T'áá ánółtso ats'ádahideesyį́į'ii dasoolį́į'go bąą Jerúsalem nahaníi'gi áłah ánihideeshłííł, jó'akon.

²⁰Diné éí béésh łigaii áádóó béésh łitsoii áádóó béésh nitł'izii áádóó dilyį́hí índa béésh kágí didoolyįhígíí biniyé déédíljah góne' adayiiniłgo yik'ijį' kǫ' deisołígíigi át'éego sháhóóchįįdígíí índa t'óó báhádzidgo bee atí'ésh'į́įgo áłah ánihideeshłííł, áádóó yah anihideeshniłgo ałtso nihidideeshxįh.

²¹Áko áłah ánihideeshłíiłgo t'óó báhádzidgo bee atí'ésh'íinii bikǫ' nihik'ijį' deesoł, áko éí bitahgi ałtso dadidoołhįh.

²²Déédíljah góne' béésh łigaii doolyį́'ígíigi át'éego nihí ałdó' t'óó báhádzidgo bee atí'ésh'íinii bee nihidi'doolyįh, áko shí Bóhólníihii t'óó báhádzidgo bee atí'ésh'íinii nihik'ijį' áshłaaígíí nihił bééhodoozįįł.

²³Áádóó Bóhólníihii shich'į' haadzíi'go ání,

²⁴Diné nílíinii, kóhodiní, Nich'į' doo shił hóózhǫǫdą́ą́' kéyah doo hasht'ená'néehii índa bikáá' doo nahałtinii nílį́.

²⁵Náshdóítsoh bitsiijį' daditł'ooígíí yidoolghałii yił didiłgo niyiiłdla'ígi át'éego hatahgi áhodooníiłii yaa dahalne'ii hondaha'á; diné dayooldéél; yódí índa da'ílíinii nishódayoost'e'; hatahgi asdzání t'óó ahayóí yąąh ádahasdįįd.

²⁶Hanáá'iiłniihii danilíinii éí shibee haz'áanii doo yik'eh dahóół'įįd da; shá dadílzinii éí doo dadílzingóó ádayiilaa; dadiyinii índa doo dadiyinii éí doo ał'ąą ádayósingóó t'áá ałtso aheełt'éego ádayósin índa, Yá'át'éehii áádóó t'óó baa'ihii éí doo ał'ąą át'ée da, daaníigo yínda'neeztą́ą́'; shiháá'áyį́į́h jį́ doo bił danilį́į da, áko bitahgóó doo anishłį́į da.

²⁷Hatahgóó naat'áanii danilíinii éí mą'iitsoh yidoolghałii yił didiłgo niyiiłdla'ígíí nahalingo diné nideiłtseedgo bidił bits'ádaazlį́įgo ádeile' áádóó binda'adlo'go bada'iideeł doo biniyé diné dahináanii atídeile'.

²⁸Bóhólníihii t'áadoo yee haadzíí'góó, Bóhólníihii Diyin God kóní, daaníigo t'áadoo le'é nazhnił'ingo łigaígíí bee jizhdlézhígi át'éego ił áhát'į́, t'áá ádzaaí índa wooch'ííd éí t'áá aaníí nahalingo áhodooníiłii yaa dahalne'ii yee bił dahalne'.

²⁹Éí kéyahgi diné kééhat'ínígíí ach'į' nidahwiisnáá' áádóó diné yighada'iis'nil, diné badahojoobá'íii índa hojooba' nahas'áanii yaa nahodeeskai; t'áadoo bee haz'ánígi át'éego dé'éyóní yich'į' nidahwiisnáá'.

³⁰Kéyah doo atídeeshłíił da biniyé hatahgóó diné ła' hanítą́ą́'; éí ahéé'ítł'inígíí bidziilgo íidoolííł, áádóó ahéé'ítł'inígíí nídeeshgizhgi shidááhdóó kéyah yá yidoozįįł, nisin, nidi t'áadoo ła' bik'íníyáa da.

³¹Éí bąą hach'į' t'áá íiyisí doo shił hóózhǫǫdgóó, t'óó báhádzidgo bee atí'ésh'ínígíí kǫ' nahalingo bee áhosíłdįįd; tsi'jookah yę́ę t'áá éí bee k'ééhodiishdlaa, ní Bóhólníihii Diyin God.