Read Navajo EZEKIEL 24 Bible Online

EZEKIEL 24 - Navajo bible

EZEKIEL 24

¹Náhást'éí náhááh góne', neeznáá nídízííd binih, neeznáágóó yoołkáałgo Bóhólníihii shich'į' haadzíi'go kóní,

²Diné nílíinii, díí oo'áłígíí, díí jínígíí bízhi' bikáá' ánílééh; díí jį́ Bábilan dine'é aláahgo binanit'a'í bisiláo Jerúsalem yináshzhiizh.

³Ízrel dine'é nidaalteehii, hane' bee ak'idi'dootį́įłii bee bich'į' handziihgo ábidiní, Bóhólníihii Diyin God kóní, Bii' abézhí dedí'aah, dedí'aah áádóó ałdó' tó biih nikaah;

⁴atsį' yá'ádaat'éehii t'áá ałtso éí ásaah niłjeeh; ajáád lá áádóó awos lá, ts'in yá'ádaat'éehii bii' hadíłbin.

⁵Dibé naakaidóó dibé agháago yá'át'éehii bits'ádííłtéełgo ásaah díínił, áko biyaagi ts'in éí chizh bił dididííłjah, áádóó ts'in ła'ígíí ásaah dííniłgo nizhónígo dííł bish.

⁶Éí bąą Bóhólníihii Diyin God kóní, Kintahgóó dił danílį́įgo kin haal'áii doo hojooba' ájíníi da; bii' abézhí bii' náhodiniichii'ii, t'áá éí bii' abézhí bii' náhodiniichii'go doo nahjį' kónéehii! Áko biniyé t'áadoo yáá'iilt'e'í t'ááłá'í ní'ánígo bii'dę́ę́' hahidíínił.

⁷Háálá dił danílį́įgo áyiilaii bitahgi naashchii'; tsé'éłkáa'gi doo siláhígi naashchii'go áyiilaa; łeezh yik'iidooził biniyé t'áadoo łeeshtahjį' yayiinil da.

⁸Dił danílį́įgo áyiilaii doo bik'i hwiidoodziłígíí biniyé tsé'éłkáa'gi t'áadoo siláhígi naashchii'go áshłaa, áko t'óó báhádzidgo bee atí'ésh'íinii yá hodoołchįįłgo k'éédideeshnííł.

⁹Éí bąą Bóhólníihii Diyin God kóní, Diné nidaaztseedgo bidił kin taazlį́įgo kin haal'áii doo hojooba' ájíníi da! Ákwii ałdó' bee dididooljah biniyé t'óó ahayóí yanáa'áago ádeeshłííł.

¹⁰Chizh hózhǫ́ bik'ijį' adahohnííł, áádóó bohodohnííł; atsį' yá'át'éehgo wołbéézh; bitoo' éí bąąh haołbéézh; ts'in éí ałtso dadohłid.

¹¹Hózhǫ́ dínóolgahgo yidoochih áádóó béésh łitsoii bídiilidígíí bąąh hadidoolk'ą́ą́ł áádóó nídiniichxii'ii adidook'ą́ą́ł biniyé t'áadoo bii' siláhí tsííkáá' dah sí'aah.

¹²T'áadoo biniyéhígóó ch'ééh áát'įįd; ditą́ągo bídiilidgo bik'i sitáanii doo hadik'ą́ą́hgóó dook'ą́ą́ł.

¹³T'áá ałtso bił ahaa nanildeehgo adáninilníigo t'óó naa'ihígíí át'é; t'óó baa'ihii nąąh ásíłdįįd nít'éé', nidi t'óó baa'ihii t'áadoo nąąh yildee' da; t'óó báhádzidígi át'éego atínísh'ínígíí bee hwiih sélį́į'jį' ts'ídá doo hasht'enándeeshdlíił da.

¹⁴Shí Bóhólníihii haasdzíí'; ts'ídá bohodoolníłí, ts'ídá bi'deeshłíłí; doo t'ą́ą́' kónídeeshníił da; doo áándeesįįł da; doo łahgo át'éego tsínáádeeskos da; hinínáá nít'é'ígíí áádóó baa nisíníyáhígíí bik'ehgo naa nídadóot'įįł, ní Bóhólníihii Diyin God.

¹⁵Náá'áłdó' Bóhólníihii shich'į' hanáánáádzíi'go kóní,

¹⁶Diné nílíinii, nináá' yídin nilíinii k'adę́ę t'áá hahoo'neehee k'adę́ę nits'ą́ą́' nahjį' kóshłééh, jó'akon, nidi doo yínííł nidíínaał da áádóó doo atídíníídleeł da índa ninák'eeshto' doo yaa nidadoonah da.

¹⁷T'áadoo íits'a'í ádił handzooł; daneeznáanii t'áadoo baa yínííł nanináhí; nitsii' biná'íłt'ih áádóó kééh ni'éés; nizéé' doo bich'ą́ą́h ni'dííłbał da índa yínííł danilíinii bibááh doo dííyį́įł da.

¹⁸Áko abínígo diné bich'į' yéíłti', áádóó i'íí'ą́ągo she'asdzą́ą́ daaztsą́ áádóó, Baa nidíínaał, shi'di'níigo bee shich'į' ha'oodzíi'ii hoos'įįdgo baa niséyá.

¹⁹Nít'éé' diné ádashidííniid, Díí baa nanináhígíishą' ha'át'íí nihiłní? Da' éísh doo bee nihił hodíílnih da?

²⁰Áko índa ábidííniid, Bóhólníihii shich'į' haadzíi'go kóní,

²¹Ízrel dine'é kóbidiní, Bóhólníihii Diyin God kóní, Shikin bii' sohodizin, nihibee adziil bee nihi'áshodahódli'ii daołtse'go baa nihił dahózhóonii áádóó nihii' sizíinii yídin nilíinii doo ílį́į́góó ádadeeshłííł, jó'akon, índa nihiye'ké áádóó nihitsi'ké daadziihígíí doo ílį́į́góó ádadeeshłíiłgo diltłish bee nidadootsił.

²²Áko nihí t'áá baa niséyáhígi ádadoohnííł: nihizéé' doo bik'ída'doołtih da, índa yínííł danilíinii bibááh doo dadoohsį́įł da.

²³Nihich'ah éí nihitsiinídaazt'i' doo, áádóó kéé' nisoo'eez doo; doo yínííł naahkai da doo, áádóó doo atíńdadinohdleeh da doo, nidi doo ákwii ádaot'įįdii bił nidadínóołnah áádóó ałch'į' dadinoh'níi doo.

²⁴Kót'éego Iizííkiyel nihich'į' bee ééhózinii át'ée doo: t' áá ałtso nihinááł yaa naayáhígíí bik'ehgo nihí ałdó' ákódanoht'ée doo; díí baa hoolzhiizhgo Bóhólníihii Diyin God nishłį́įgo nihił béédahodoozįįł.

²⁵Diné nílíinii, bine' nidadzidzi'ii áádóó bee ádaa deijódlíigo baa hoł dahózhóonii áádóó hanáá' yidádanoolníinii índa haye'ké índa hatsi'ké hajéí bee baa hoł dahózhóonii haghanish'nil bijį́į́ góne' ts'ídá ákóhodoonííł:

²⁶éí yoołkáałdi yisdááyáii naa doolwołgo hane' neidoo'ááł.

²⁷Éí bijį́įdi yisdááyáii bich'į' hadíídzih áádóó doo yáłti'í doo náánídlį́į da doo. Áko éí bich'į'go ni nee ééhózin doo, áko Bóhólníihii nishłį́įgo hoł béédahodoozįįł.