Read Navajo EZEKIEL 25 Bible Online

EZEKIEL 25 - Navajo bible

EZEKIEL 25

¹Bóhólníihii shich'į' hanáánáádzíi'go kóní,

²Diné nílíinii, Áman dine'é bich'į'go dah díníit'aahgo, bik'ijį' nílį́įgo handziih,

³áko Áman dine'é ábidiní, Bóhólníihii Diyin God bizaad deísółts'ą́ą́', Bóhólníihii Diyin God kóní, Shikin bii' sohodizin doo ílį́į́góó áál'įįd yę́ędą́ą́', índa Ízrel dine'é bikéyahgi doo yiila'í yę́ędą́ą́', áádóó Júdah dine'é yisnááhgóó abi'doojaa' yę́ędą́ą́', Ts'íigo lą́ą, dadooniidígíí biniinaa,

⁴ha'a'aahjígo diné kééhat'ínígíí bíí' danohłį́į dooleeł biniyé baa nihidideesh'áałgo nihitahgóó nidahidoonéełgo ákǫ́ǫ́ kéédahat'į́į dooleeł, jó'akon, áádóó nínáda'noołt'į́įhii nihits'ą́ą́' deiyą́ą doo, índa nihe'abe' nihits'ą́ą́' deidlą́ą doo.

⁵Rábah kin haal'áagi éí ghą́ą́'ask'idii nida'ałchozhgo áhodeeshłííł, áádóó Áman dine'é bikéyahdi dibé bighan naaznilgo ádeeshłííł, áko índa Bóhólníihii nishłį́įgo nihił bééhodoozįįł.

⁶Háálá Bóhólníihii Diyin God kóní, Ízrel dine'é bik'ijį' danohłį́įgo áádóó bik'ee dadinohniihii t'áá ałtso bee baa nihił dahóózhǫǫd áádóó ahínídaohka'go nihídadołtał nít'é'ígíí biniinaa,

⁷nihik'ijį' nishłį́įgo nihich'į' k'ídinishnii'go bąąh oogą́ą'ii danohłį́įgo ał'ąą dine'é baa nihidideesh'ááł, jó'akon; dadine'é bits'ą́ąjį' kónihideeshłíiłgo kédaayahgi ánihideeshdįįł, áko atínihiishłaago áadi índa Bóhólníihii nishłį́įgo nihił béédahodoozįįł.

⁸Bóhólníihii Diyin God kóní, Júdah dine'é éí ał'ąą dine'é ádaat'éhígi ádajít'é, Mó'ab dine'é áádóó Síyer dine'é dadííniid;

⁹éí bąą Mó'ab dine'é bikéyah bibąąhgóó yee ádaa daha'niihgo kin hadaas'áii Beth-jéshimath áádóó Béíyal-míyan índa Kíriyathéíyim éí Mó'ab kéyahgi bááłk'iisdę́ę'go bich'į' ąą ádeeshłííł, jó'akon.

¹⁰Éí Áman dine'é bił ha'a'aahjígo kéédahat'íinii baa hodideesh'ááł, áko ał'ąą dine'é doo hwénínáádadoolnih da.

¹¹Kót'éego Mó'ab dine'é bee há nihodeesh'áałii bee haa nídéesht'įįł; áadi índa Bóhólníihii nishłį́įgo hoł béédahodoozįįł.

¹²Bóhólníihii Diyin God kóní, Íídam dine'é éí Júdah dine'é k'éédeidiidlaago biniinaa t'áá íiyisí ádidahodiilt'i';

¹³éí bąą Bóhólníihii Diyin God kóní, Íídam dine'é hak'ijigo k'ídideeshnihgo diné áádóó naaldlooshii nideestsiłgo doo naagháhígóó haz'ą́ągo ádeeshłííł; Tííman hoolyéédóó níléí Díídan hoolyéejį' diltłish bee dazhdínóonééł.

¹⁴Shidine'é Ízrel éí bee Íídam dine'é k'ééhodideeshdlííł; Íídam kéyahgi sháhóóchįįdígíí áádóó t'óó báhádzidgo até'ésh'ínígíí bik'ehgo nidadoobah, áko Bóhólníihii Diyin God kóní, K'éédiisdzaaígíí hoł béédahodoozįįł.

¹⁵Bóhólníihii Diyin God kóní, Filístiya dine'é ałk'idą́ą́' hak'ee dadeeznih yę́ę bee bijéí yee doo yá'áshǫ́ǫ́góó haa nitsídaakeesgo k'éédahodiidlaa;

¹⁶éí bąą Bóhólníihii Diyin God kóní, Filístiya dine'é dajílíinii hach'į' k'ídideeshnihgo, Kéreth dine'é ádeeshdįįłgo áádóó tónteel bibąąhgóó kéédahojit'íinii ałtso áhodeeshdįį ł.

¹⁷T'óó báhádzidgo bee atí'ésh'íinii bee hainísht'į́įgo k'ééhodideeshdlííł, áko k'ééhodiishdlaago, Bóhólníihii nishłį́įgo hoł béédahodoozįįł.