Read Navajo EZEKIEL 27 Bible Online

EZEKIEL 27 - Navajo bible

EZEKIEL 27

¹Bóhólníihii shich'į' haadzíi'go kóní,

²K'ad lą́ą, diné nílíinii, Táir baa nichago yínííł naniná,

³tónteel nihiníyį́į́dóó kéyah si'áanii Táir t'óó ahayóigo tónteel bibąąhgóó kéyah nahaz'ą́ą́góó dadine'é yił ahaa nida'iilniihii ábidiní, Bóhólníihii Diyin God kóní, Kéyah Táir yinílyéii, t'áá ałtsojį' hadanisht'éego shaa dzólní, diníi ni'.

⁴Ts'ídá t'áá íiyisí ahaa nida'iiniihígi taah yíní'á; hadandiilaii t'áá ałtsojį' ayóó áníínílningo ádaniilaa.

⁵Dził Sííner hoolyéédę́ę́' ch'ó bits'ą́ą́dóó tsin neheeshjíí' danteelgo daditánígíí t'áá ałtso ádayiilaa; Dził Lébanan hoolyéédę́ę́' dilk'is ła' nídeizhjaa'go éí bee tsinaa'eeł bit'a' bá íí'áhígíí ná ádayiilaa.

⁶Béíshan hoolyéédę́ę́' chéch'il bee tsinaa'eeł bee naal'eełígíí ná ádayiilaa, Sáípras kéyahdóó éí tónteel bibąąhgóó nídíshchíí' deíl'áhígíí tsin neheeshjíí' ádaalyaago nitsinaa'eeł bikáá'dę́ę́' dah náhást'ą́ągi nideiskaad, áádóó éí áívori wolyéii yee nideizhch'ąą'.

⁷Niníbaal biníyolgo na'a'eełii Ííjip kéyahdę́ę́' áłts'óózígo yisdizígíí bee na'at'ą́hí łigaii dits'idgo bee ályaii bibąąhgóó naashch'ąą'go éí nitsinaa'eeł bit'a' nít'éé'; Iiláísha hoolyéedi tónteel bibąąhgóó kéyah hadaaz'áádę́ę́' na'at'ą́hí yá nahalingo dootł'izh áádóó tsídídééh nahalingo łichí'ígíí bee nichaha'oh nít'éé'.

⁸Sáídan índa Árvad kin haal'áádóó diné kéédahat'íinii éí oo'ołgo tsin bee na'al'eełí ná nideilo' nít'éé'; Táir nílíinii, dine'é dahóyáanii nee hólǫ́ǫgo éí ná nida'ał'eeł nít'éé'.

⁹Gííbal kin haal'áádę́ę́' hastóí danilíinii áádóó bidine'é naanish dayiichįįhii niyi'di tó tsinaa'eeł bighá daazlį́į́góó yidanída'di'a'go nee hólǫ́ǫ́ nít'éé'; tsinaa'eeł t'áá ałtso nideił'eełii t'áá bóóltą'go ninaalyéhé yił ałgháá' da'ii'níiłgo nee hólǫ́ǫ́ nít'éé'.

¹⁰Pérzha kéyahdę́ę́' áádóó Lud kéyahdę́ę́' índa Put kéyahdę́ę́' siláo éí nisiláo dah yinéełii yił nidaabaah dooleeł biniyé da'atah nít'éé': niyi'dę́ę'go binaage' áádóó bibéésh ch'ah dah nídeidiyii'nił nít'éé', ts'ídá t'áadoo bee níínílninígóó ádanóhsin nít'éé'.

¹¹Árvad dine'é éí nisiláo bił ninaa ahééda'astł'inígíí yikáá'dóó dah naazį́įgo naa ádahalyą́ą́ nít'éé'. Nidiné dahayóii Gámadim daolyéii ha'alzííd biniyé yada'niiltł'ónígíí biyi'dę́ę́' binaage' dah nídeidiyii'nił nít'éé'; t'áá ałtsojį' ayóó áníínílningo ádaniilaa.

¹²Ts'ídá t'áá ałtsojį' ít'ínígíí biniyé Társhish nił ahaa na'iilniih nít'éé', ninaalyéhé biniyé béésh łigaii áádóó béésh nitł'izii áádóó béésh kágí índa dilyį́hí nił ałgháá' da'ii'nííł nít'éé'.

¹³Jéívan dine'é áádóó Túbal dine'é índa Mííshek dine'é nił ahaa nida'iilniih nít'éé': ninaalyéhé biniyé diné danilíinii áádóó łeets'aa' béésh łitsoii bee ádaalyaii diné baa nida'iiniihígíí yił ałgháá' da'ii'nííł nít'éé'.

¹⁴Togármah dine'é éí łį́į́' áádóó łį́į́' nidabiyéii índa dzaanééz nee hólóonii biniyé diné baa nida'iiniihii yił ałgháá' da'ii'nííł nít'éé'.

¹⁵Díídan dine'é naalyéhé nił ałgháá' da'ii'nííł nít'éé'; tónteel bibąąhgóó kéyah t'óó ahayóígíí naa nida'iiłniih nít'éé': áívori áádóó tsin ébonii nidayiijáahgo naa dayiinííł nít'éé'.

¹⁶Síriya dine'é naalyéhé t'óó ahayóí nee hólónígíí bąą nił ahaa nida'iilniih nít'éé'; tsé ílíinii émerald wolyéii áádóó na'at'ą́hí tsídídééh nahalingo łichí'ígíí índa na'at'ą́hí bibąąhgóó nidaashch'ąą'ii áádóó áłts'óózígo yisdizígíí bee na'at'ą́hí łigaii dits'idgo ályaii índa yoo' łichí'í índa tsé ílíinii ágat wolyéii nidayiijáahgo ninaalyéhé yił ałgháá' da'ii'nííł nít'éé'.

¹⁷Júdah dine'é áádóó Ízrel dine'é bikéyahdę́ę́' nił ahaa nida'iilniih nít'éé'; Mínith kin haal'áádę́ę́' tł'oh naadą́ą́' áádóó łikání halniihii pánag wolyéii áádóó tsés'ná bitł'izh áádóó ak'ah índa tłah łikání dahalchinii éí ninaalyéhé yił ałgháá' da'ii'nííł nít'éé'.

¹⁸Naalyéhé ts'ídá t'áá ał'ąą ádaat'éego ayóó ánéelą́ą'go dah yíléłígíí bąą, ninaalyéhé ayóó ánéelą́'ígíí Damáskas dine'é nił ahaa na'iilniih nít'éé', Hélban kéyahdę́ę́' wáin áádóó aghaałgaii éí ninaalyéhé yił ałgháá' da'ii'nííł nít'éé'.

¹⁹Víídan dine'é áádóó Jéívan dine'é ninaalyéhé biniyé nił ałgháá' da'ii'nííł nít'éé'; béésh nitł'izii áádóó káshiya ch'iyáán bił ál'ínígíí índa akaz łikání kálamas wolyéii éí ninaalyéhé biniyé nił ałgháá' da'ii'nííł nít'éé'.

²⁰Díídan dine'é éí ak'i dahi'niłí ninaalyéhé biniyé nił ałgháá' da'ii'nííł nít'éé'.

²¹Aréíbiya dine'é áádóó Kíídar dine'é binanit'a'í danilíinii t'áá ałtso nił ahaa nida'iilniihgo ayóó át'éego nił yá'át'ééh nít'éé'; dibé yázhí áádóó deenásts'aa' índa tł'ízí éí ninaalyéhé biniyé nił ałgháá' da'ii'nííł nít'éé'.

²²Shííba dine'é áádóó Réíyamah dine'é na'iiłniihí danilíinii nił ahaa nida'iilniih nít'éé'; ch'iyáán bił ál'íní spáis wolyéii t'áá ał'ąą ádaat'éii ts'ídá t'áá ałtso índa tsé da'ílíinii ał'ąą ádaat'éii áádóó óola éí ninaalyéhé biniyé nił ałgháá' da'ii'nííł nít'éé'.

²³Héíran áádóó Kánii áádóó Ííden áádóó Ásher índa Kílmad dahoolyéédę́ę́' dine'é éí ninaalyéhé biniyé nił ahaa nida'iilniih nít'éé'.

²⁴Díí kódahoolyéédę́ę́' lą́ą éé' da'ílíinii áádóó éé' tsídídééh nahalingo łichí'ígíí áádóó na'at'ą́hí bibąąhgóó nidaashch'ąą'go ádaalyaii áádóó éé' biih ná'niłí dilk'is bee ályaii índa tł'óół ts'ósí bee daastł'óonii éí ninaalyéhé biniyé nił ałgháá' da'a'nil nít'éé'.

²⁵Társhishdóó tsinaa'eełgi ádaat'éii éí bii' naalyéhé ná háádadilbį́įhgo tsinaa'eeł hééł bii' ayóó áníłdáasgo ná dah da'íyeeh łeh nít'éé', áko éí tsinaa'eeł ná nídadi'oł nít'éé'.

²⁶Diné éí tsin yee nida'ał'eełii tónteel dahiníyį́ bii'góó nił da'íł'eeł; ha'a'aahdę́ę́' deeyolgo tónteel ałníi'gi níyol éí tsinaa'eeł niyiizti'.

²⁷Nit'íinii áádóó ninaalyéhé áádóó lą'ígo naalyéhé yíyéełii áádóó diné nida'ał'eełii áádóó bik'ehgo nida'a'eełii áádóó tsinaa'eeł tó biih daazlį́į́dę́ę́' yidánída'di'a'ii áádóó diné naalyéhé baa dahéenííhdóó deiyéełníihii áádóó diné nidaabaahii índa siláo dah naazhjaa'go dah deínéehii t'áá bóóltą'go ałtso atíni'diilyaa bijį́į́ góne' éí t'áá át'é taah doołdas.

²⁸Diné ná nida'ał'eełii hadadeeshghaazhgo ninaagóó kéyah ditłid doo.

²⁹Tsin bee na'al'eełí yee nida'ał'eełii t'áá ałtso áádóó bik'ehgo nida'a'eełii ałdó' t'áá ałtso tsinaa'eeł yii'dę́ę́' haakaigo tábąąhgóó naazį́;

³⁰ayóó íits'a'go daachxa doo áádóó atínídadindleeh áádóó łeezh dibahí bitsiits'iin yik'ídayiighaas doo índa łeeshch'iih tahgóó nidaamaas dooleeł;

³¹niniinaa bitsii' ałtso deidooshih áádóó tł'oh azis biníí' gónaa nídeidoołt'ih, t'áá íiyisí nąąh dabíni'go naa atínídadindleeh doo.

³²Niniinaa ák'idadiit'aahgo naa yínííł danilį́įgo naa daachxago ádaaníi doo, Tónteel ałníi'di Táir ábi'disdįįdígi át'éegoshą' háí déesxéél?

³³Tónteel wónanídę́ę́' ninaalyéhé bił ha'naa ni'ii'eeł yę́ędą́ą́' diné t'óó ahayóí bił t'áá da'áko nít'éé'; niyódí áádóó ninaalyéhé t'óó ahayóígíí bee nihokáá'góó aláahgo naat'áanii danilíinii yee da'ast'įįd.

³⁴K'ad éí tónteel bee nihíníltǫ'go táłtł'ááh góyaa íínílts'id; ninaalyéhé áádóó diné nii' yíl'áá nít'éé' yę́ę t'áá ałtso nił taah yíłdááz.

³⁵Tónteel bibąąhgóó diné eel'áii éí t'áá ałtso nik'ee t'óó bił adahayóí; aláahgo naat'áanii hondant'áii éí t'áá ałtso nídaaldzid áádóó binii'jį' yee doo ákódanoolnin da.

³⁶Diné bitahgóó diné baa nida'iiniihii éí ałjeeh nídanilniih; t'óó hóyé'ígi át'éego nihoníníł'ąąd; hool'áágóó doo nááhonídlǫ́ǫ da doo.