Read Navajo EZEKIEL 28 Bible Online

EZEKIEL 28 - Navajo bible

EZEKIEL 28

¹Bóhólníihii shich'į' haadzíi'go kóní,

²Diné nílíinii, Táir dine'é binanit'a'í nilíinii ábidiní, Bóhólníihii Diyin God kóní, T'óó báhádzidígi át'éego ádaa hó'niihígíí biniinaa, Diyin nishłį́įgo tónteel ałníi'di diyin danilíinii dah naháaztánídi atah dah sédá, dííníniid nidi, azhą́ diyin nahalingo honisą́ nínízin nidi, diné yee' t'éiyá nílį́; doo diyin nílį́į da.

³Jó, Daniel biláahgo honíyą́; nidanil'inii t'áá ałtso nił bééhózin.

⁴Honíyánígíí áádóó át'é ninizį́'ígíí bee daat'íinii nishóhwiisíníłt'e'; yit'íinii siyį́įjį' óola índa béésh łigaii áłah íinilaa.

⁵T'áá íiyisí baa honíyą́ągo naalyéhé diné bił ałgháá' da'iyí'níłígíí bee nit'íinii bíhiniidee', áko nit'íinii t'óó báhádzidígi át'éego bee ádaa hó'niih sínílį́į́';

⁶éí bąą Bóhólníihii Diyin God kóní, Diyin hóyánígíí nahalingo ádaa nitsíníkeesígíí biniinaa,

⁷a ł'ąą dine'é bitahdę́ę́' dé'éyóní danilíinii ts'ídá agháago t'óó báádahadzidii nik'ijį' bi'deeshnihgo nibee hódzą' ayóó ánoolninii atídeidoolííł biniyé bidiltłish hadeidiyoodzį́į́s, jó'akon, áádóó ayóó áhonóolninii deidoołchxǫǫł.

⁸A'áán góyaa adanihidiyoołtł'i ł; tónteel ałníi'di diné nidaaztseedígi át'éego dadínóohnééł.

⁹Áko daats'í diné t'éiyá nílį́įgo doo diyin nílį́į́góó diné ni'niiłhínígíí binááł, Diyin nishłį́, t'ahdiísh diníi doo?

¹⁰Dé'éyóní nidanihiłtseedgo diné doo bąąh nídahineeshgizhii daninéhígi át'éego dadínóohnééł. Shí díí bee haasdzíí', ní Bóhólníihii Diyin God.

¹¹Náá'áłdó' Bóhólníihii shich'į' hanáánáádzíi'go kóní,

¹²Diné nílíinii, Táir dine'é aláahgo binanit'a'í baa yínííł nanináago baa nichago ábidiní, Bóhólníihii Diyin God kóní, T'áá ałtsojį' ayóó áníínílningo bee hódzáanii nii' hadeezbingo nee ééhózin nít'éé'.

¹³Diyin God bidá'ák'ehgi Ííden hoolyéegi sárdiyas áádóó tópaz índa dáíman, tsé béril áádóó ániks índa jásper, áádóó sáfair áádóó émerald índa kárbankal tsé da'ílíinii nik'ésti' nít'éé'; óola bina'azhnishgo áádóó tsé da'ílíinii binídaha'nííł áádóó óola bik'i nijishk'aazhgo áni'diilyaa nít'éé'; áni'diilyaa bijį́ yę́ędą́ą́' éí hasht'edaalyaa.

¹⁴Diyingo naal'a'í chérab ats'ániníłtį́įgo aa áhályáanii nílį́į doogo nininíłtį́; tsékǫ' bitahgóó háádiidáahgo Diyin God bidził diyinii bikáa'gi honílǫ́ǫ́ nít'éé'.

¹⁵Áni'diilyaa yoołkááłdóó doo ákwii é'ét'éii niyi' yiiltsą́ yoołkáałjį' t'áadoo bee nik'íhót'ahígóó yíníyá.

¹⁶T'áá íiyisí t'óó bee ne'ádíláahgo ninaalyéhé t'óó ahayóígíí dadine'é bił ałgháá' da'ayí'níiłgo asínísiih; éí bąą Diyin God bidził bits'ą́ąjį' doo nildingóó nahjį' haninííłchą́ą́' áádóó diyingo naal'a'í chérab aa áhályáanii nílíinii tsékǫ' dadéek'ą́ąhii bits'ą́ą́dóó nahjį' haninííyood.

¹⁷Ayóó áníínílninígíí bąą t'áá íiyisí ádaa hó'niih nít'éé'; naa ha'niihígíí biniinaa bee honíyáanii ałtso yíníłchxǫ'. Aláahgo naat'áanii danilíinii daniníł'į́į doo biniyé ni' bikáa'jį' hadaniyííłhan.

¹⁸Daashíínéelą́ą́'góó doo ákwii íínít'įįdígíí bee diné bina'ílo'go naalyéhé bił ałgháá' da'iyí'níiłgo nisodizin biniyé nahaz'ą́ą́góó doo ílį́į́góó íinilaa; éí bąą nihitahdóó kǫ' hadíínóodgo ałtso andííłk'ą́ą́' áádóó diné binááł nihokáa'gi łeeshch'iih t'éiyá nísínídlį́į'go ániishłaa.

¹⁹Dadine'é dabitahdę́ę́' néédahósinii nik'ee t'óó bił adahayói doo; bik'e'íyé'ígi át'éego t'áá kódíjį' honílǫ́ǫgo nihodoolzhish; k'ad éí hool'áágóó doo nááhonídlǫ́ǫ da doo.

²⁰Áádóó Bóhólníihii shich'į' hanáánáádzíi'go kóní,

²¹Diné nílíinii, Sáídan bich'į'go dah díníit'aahgo, Kónihidi'doolnííł, bidiníigo bich'į' handziihgo

²²ábidiní, Bóhólníihii Diyin God kóní, Sáídan nílíinii, nik'ijį' nishłį́, jó'akon; nihitahgi bee ayóó ánísht'éii yit'íní ádeeshłííł, áko haa nísíst'įįdgo áádóó dinishyinígíí hach'į' yit'íní áshłaago Bóhólníihii nishłį́įgo hoł béédahodoozįįł.

²³Áko naałniih hak'ijį' bideeshnihgo t'áá ałtsodę́ę́' diltłish bee atího'dil'į́įgo diné naatseedígíí éí hatahgóó naa'ahindéeh doo áádóó bidił éí kintaa da'aztiingóó danílį́į doo; áadi índa Bóhólníihii nishłį́įgo hoł béédahodoozįįł.

²⁴Ízrel dine'é binaagóó diné kéédahat'į́įgo hak'ee dadiniihii éí bitahdę́ę́' hosh doo ła' haa anáádadoojił da, índa doo ła' hanáábidooshah da; áadi índa Bóhólníihii Diyin God nishłį́įgo hoł béédahodoozįįł.

²⁵Bóhólníihii Diyin God kóní, Ízrel dine'é éí ał'ąą dine'é dabitahgóó tabidi'nooskaadii bitahdę́ę́' áłah ánáshdlaago éí binahjį' dinishyinígíí ał'ąą dine'é binááł yit'íní ádeeshłííł, áko shá naal'a'í Jéíkab kéyah baa diní'áanii áadi índa éí bii' kéédahojit'į́į doo.

²⁶Diné hanaagóó kéédahat'į́įgo hak'ee dadiniihii éí t'áá ałtso há beinísht'į́įgo ákwii t'áadoo hainít'ínígóó kéédahojit'į́į doo; ákwii kin nidazhdoonił, áádóó ch'il na'atł'o'ii deíl'áago ádazhdoolííł; ákwii t'áadoo hainít'ínígóó kéédahojit'į́į doo, áko índa haDiyin God Bóhólníihii nishłį́įgo bił béédahodoozįįł.