Read Navajo EZEKIEL 29 Bible Online

EZEKIEL 29 - Navajo bible

EZEKIEL 29

¹Neeznáá náhááh góne', neeznáá yiziłígíí binih, naakits'áadah yoołkáałgo Bóhólníihii shich'į' haadzíi'go kóní,

²Diné nílíinii, Ííjip dine'é aláahgo binanit'a'í Féro bik'ijį' nílį́įgo, Kónít'ée dooleeł, bidiníigo áádóó Ííjip kéyah t'áá náhwiist'ą́ą́ nít'éé', Kót'ée dooleeł, diníigo bich'į' handziih.

³Bóhólníihii Diyin God kóní, diníigo handziih, Ííjip dine'é binanit'a'í nílíinii, Féro nik'ijį' nishłį́, jó'akon; na'ashǫ́'ii łibáhítsoh táyi' sínítíinii, Náil tooh nílínígíí éí t'áá shí ádá áshłaa, diní.

⁴Łóó' bee hahadleehí béésh nídaazhahígíí niyaats'iin bee deeshahgo nitooh nílį́įgo bii' łóó' hólónígíí nikágí dich'ízhígíí bídaashjéé' ádeeshłíiłgo, éí t'áá át'é t'áá bił handeeshłoh.

⁵Áádóó ni lá índa nitooh biih daazlínígíí biyi'dóó łó'ígíí t'áá át'é t'áá bił honoojíígóó t'áá áhoodzaajį' anihidi'yoolkał; doo nánihidi'yoodlahgo yóó'ádanihi'didoolníił da; naaldlooshii danihidooldił áádóó tsídii danihidoolghałgo baa nihidiní'ą́.

⁶Ákohgo Ííjip kéyahdi kéédahojit'ínígíí ts'ídá t'áá ádzíłtso Ízrel dine'é bilók'aa' gish dajílį́į́ nít'é'ígíí bąą Bóhólníihii nishłį́įgo hoł béédahodoozįįł.

⁷Danisiłgo nihíníltǫ' áádóó t'áá biwosjį' baa adashínízhoozh; nik'ijį' híniijéé' silį́į'go nihíníltǫ'go t'áá ałtso nida'nt'i'go íinilaa.

⁸Éí bąą Bóhólníihii Diyin God kóní, Diltłish nihiniyé deeshtį́įłgo diné áádóó naaldlooshii nihits'ą́ą́dóó nideestsił, jó'akon.

⁹Ííjip kéyahgi doo naagháhí da doo; t'ááníí' t'éí hadaasgai doo, áadi índa Bóhólníihii nishłį́įgo bił béédahodoozįįł. Náil tooh nílínígíí áshłaa, áádóó éí shí, dííníniidígíí bąą

¹⁰nik'ijį' nishłį́, jó'akon, áádóó nitooh danílínígíí bik'ijį' nishłį́, áádóó t'áá níléí Mígdal hoolyéédóó Saiyíínii hoolyéejį', t'áá éí Iithiyópiya kéyah bibąąhjį' Ííjip kéyahgi t'áadoo biniyéhígóó haz'ą́ągo t'áadoo bikáá' siláhígóó áhodeeshłííł.

¹¹Éí kéyah bii'góó diné doo ła' ch'ídoogáał da, índa naaldlooshii doo ła' ákǫ́ǫ́ ch'ídooldlosh da, índa ákwii diné doo ła' kééhat'į́į́góó dízdiin nídoohah.

¹²Kédaayah t'áadoo bikáá' siláhígóó nahaz'ánígíí bitahgi Ííjip kéyah t'áadoo bikáá' siláhígóó áhodeeshłííł; kin hadaas'áago ahiih nídahaasdáazgo áhoolyaa yę́ę bitahgi hakin hadaas'á yę́ęgóó doo siláhígóó dízdiin nídoohah; Ííjip dine'é éí ał'ąą dine'é bitahgóó tahwiidínéeshkał áádóó kédaayahgóó tahwiidínéeshkał.

¹³Nidi Bóhólníihii Diyin God kóní, Dízdiin nááhaidóó bik'ijį' Ííjip dine'é, dadine'é dabitahgóó tabidi'nooskaadii áádę́ę́' áłah ánáhodeeshdlííł,

¹⁴áádóó Ííjip dine'é daasnáanii nináhideesh'ishgo kéyah bii' kééhojit'į́į́ nít'éé' yę́ęjį' Páthras kéyah áajį' anídahizhdoo'nééł, áko ákwii bee óhólnííh doo bidziilgóó kééhojit'į́į doo.

¹⁵Bee óhólnííh ádabóodziilígíí ts'ídá bi'ohgo hadziil doo, áádóó ał'ąą dine'é bitisdi ts'ídá doo hadziil náázhdoodleeł da, áko ts'ídá t'áá íiyisí doo dadzísihgóó áhodeeshłíiłgo ał'ąą dine'é ts'ídá doo binináázhnít'áa da doo.

¹⁶Áádóó Ízrel dine'é éí Ííjip dine'é nihíká oohjeeh nídabizhdi'niihgo doo ákwii ádajoonííł nít'éé' yę́ę bénínádajilnihgo ts'ídá doo banááda'íízhdóodliił da; áadi índa shí Bóhólníihii Diyin God nishłį́įgo hoł béédahodoozįįł.

¹⁷Naadiin tsosts'id yihah góne', áłtsé nídízííd binih, ła'a jį́į́ góne' Bóhólníihii shich'į' haadzíi'go kóní,

¹⁸Diné nílíinii, Bábilan dine'é aláahgo binanit'a'í Nébukadnézzar bisiláo dah yinéłígíí éí Táir kin haal'á yik'ijį' t'áá íiyisí nayiishnishgo t'áá ałtso bitsiits'iin dadiwolgo ádaalyaa áádóó dabiwos éí bídáát'óodgo ádaalyaa; azhą́ ákót'éego Táir hoolyéegi siláo há nidaashnish lá nidi, bik'é nidajishnishígíí t'áadoo ła' shódajoost'e' da.

¹⁹Éí bąą Bóhólníihii Diyin God kóní, Bábilan dine'é aláahgo binanit'a'í Nébukadnézzar éí Ííjip kéyah baa dideesh'áałgo ákwii t'óó ahayóí hanaalye'é áádóó bąąh da'oogą́ą'ii índa t'áadoo le'é atídeile'go nishódayoost'e'ii dah yididooyééł; éí dah yidiiyínígíí bisiláo yik'éndaashnishii át'ée doo.

²⁰Naashnishígíí bąą Ííjip kéyah baa dideesh'ááł, háálá shá nidajishnish, ní Bóhólníihii Diyin God.

²¹Áko éí bijį́ Ízrel dine'é bitahgi adee' ła' habidínéeséełgo éí dine'é bitahgóó yáníłti'go ándeeshłííł, áko índa Bóhólníihii nishłį́įgo hoł béédahodoozįįł.