Read Navajo EZEKIEL 3 Bible Online

EZEKIEL 3 - Navajo bible

EZEKIEL 3

¹Náá'áłdó' áshíłní, Diné nílíinii, naaltsoos yisdisgo nidááhgóó sitánígíí niyą́, áádóó Ízrel dine'é bich'į' dínáahgo bich'į' hadíídzih.

²Áko diich'ee'go naaltsoos yisdisígíí shiyíísą́ą́'.

³Áadi áshíłní, Diné nílíinii, naaltsoos yisdisgo nizáátánígíí niyą́ągo bee hwiih nileeh. Áko yíyą́ą'go tsés'ná bitł'izhgi át'éego łikan.

⁴Ánááshidi'ní, Diné nílíinii, Ízrel dine'é bich'į' dínáahgo ádíshnínígíí bee bich'į' hadíídzih.

⁵Ał'ąą dine'é bizaad nidantł'aii doo bich'į' nidíł'a' da, nidi t'áá ni nidine'é, Ízrel dine'é bich'į' nidíł'a'.

⁶Ał'ąą dine'é bizaad doo bik'izhdootą́ą́' át'éii nidantł'aii doo bich'į' nidíł'a' da. T'áá aaníí, ákódaat'éii bich'į' anííł'a'go t'éí dandidoots'į́į́ł.

⁷Nidi Ízrel dine'é doo dashíists'ą́'ígíí bąą doo daníists'ą́ą' da doo; Ízrel dine'é t'áá ałtso shich'į' nidaalteeh áádóó shich'į' bijéí dantł'iz.

⁸Shoo, ádahodineestł'isii bik'ijį' t'ah biláhígo áhodíníltł'isgo áádóó doo ła' nijóle' át'éégóó ániishłaa.

⁹Nítáá' tsé nitł'izii bilááh át'éego nitł'izgo áshłaa; t'áadoo bééníldzidí áádóó ádanoolninii t'áadoo bik'ee nił yé'í, háálá nidaalteehii danilį́.

¹⁰Áádóó áshíłní, Diné nílíinii, bee nich'į' hahideesdzihígíí éí t'áá ałtso didííts'į́įłgo nijéí biyi'di hasht'e'ninihidíínił.

¹¹Bił yisnááh danilíinii bich'į' dínááh, áko daníists'ą́ą'go, éí doodaléi' doo daníists'ą́ą́'góó ábidiní, Bóhólníihii Diyin God kóní, diníi doo.

¹²Ákohgo níłch'i de dashidiiłtį́į́ nít'éé', shikéédę́ę́' iinéé' ayóó át'éego diists'ą́ą'go ání, Bóhólníihii bił haz'ą́ą́dóó bits'ádi'nílíidii éí baa ha'niih le'.

¹³Hodiists'ą́'ígíí éí dahináanii bit'a' ahidadii'áago deít'áhígíí éí íits'a' lá áádóó bąąs bíighah dah dadiit'a'ígíí éí ayóó át'éego dadiits'a' lá.

¹⁴Áko níłch'i éí dashidiiłtį́įgo yóó'ashííłtį́; Bóhólníihii t'áá íiyisí shik'i déesnii'go shitah nahwiiłnáago índa shináháshch'íi'go shił nahonchiihgo dah diiyá.

¹⁵Áko Kííbar tooh nílínígíí bibąąhgi Tel-éíbib hoolyéhídi yisnááh kéédahat'į́įdi níyá; ákwii naháaztánígi nédá t'áadoo ánáánáoshne'égóó bitahgi tsosts'id shiiską́.

¹⁶Tsosts'id yiskánígíí éí bíighah azlį́į'go Bóhólníihii shich'į' haadzíi'go ání,

¹⁷Diné nílíinii, Ízrel dine'é bá ha'asíidii dííleeł biniyé nininíłtį́; bee nił hashne'ígíí dinits'a'go yíiyá łáani' hodishnínígíí ałdó' bee bił dahólne'.

¹⁸Diné t'áá íiyisí doo yá'áshóonii, T'áá aaníí dadíítsaał, bidííniidgo t'áadoo bee bi'ííníłnii'góó diné t'áá íiyisí doo yá'áshóonii bidoo yá'áshǫ' bits'ą́ą́dóó yisdádoogááł biniyé t'áadoo bee bił hwíínílne'góó t'áá éí diné doo yá'ájíshǫ́ǫ́góó ádił ni'dziisíi'ii éí t'áá bił dazdootsaał, áko ni bidił bee nihodiit'i' doo.

¹⁹Nidi diné t'áá íiyisí doo yá'áshóonii díí bee bił hwíínílne'go bidoo yá'áshǫ' t'áadoo yóó'iidíí'ą́ą́góogo doo ákwii áát'įįdii t'áá yił dadootsaał, nidi ni éí doo bee nihodiit'i' da doo.

²⁰Náá'ákóne', Diné t'áá ákogi át'éii éí t'áá ákogi át'éego hináanii yits'ą́ąjį' kódzaago áádóó doo ákwii áánííłgóó deeyáago áádóó bidínóołtł'ahii bidáahgi hólǫ́ǫgo áshłaago éí diné bibąąhági át'éii t'áá yił dadootsaał; t'áadoo bee bił hwíínílne'ígíí biniinaa dadootsaał índa t'áá ákogi ááníiłii hináá nít'éé' yę́ę éí doo bééhániih da doo, áko ni bidił bee nihodiit'i' doo.

²¹Ákondi diné t'áá ákogi ááníiłii t'áadoo ádił ni'iyísíhí bidííníniidgo, áko doo ádił ni'iisííhgóó hináago, éí diné t'áá aaníí hináa doo, háálá bee bił hwíínílne'ígíí yi'iilaa, áádóó ni éí doo bee nihodiit'i' da doo.

²²Ákwii Bóhólníihii shideelchidgo áshidííniid, Nídiidáahgo halgaigóó dínááh; áadi nił hodeeshnih.

²³Áko dah diiyáago halgaigóó níyá; nít'éé' Kííbar tooh bibąąhgóó Bóhólníihii bee bits'ádi'nílíidii yiiłtsáanii ákwii sizį́įgo náánéiłtsą́, jó'akon, áko tsé'yaa níshjool.

²⁴Áko nít'éé' Níłch'i Diyinii shiih hóóle'go shiisį', áko shich'į' haadzíi'go áshidííniid, Nílááh, nighan góne' ádá di'níłkaał.

²⁵Nidi ni, diné nílíinii, shoo, tł'óół niniyé nideidooniłgo éí yee nida'dootł'óołgo doo bitaa nináa da doo.

²⁶Áádóó nitsoo' nizahat'áagi bídoołjahgo ádeeshłííł, áko doo yáníłti'góó doo dahodíteh da doo, háálá nidaalteehii danilį́.

²⁷Nich'į' yáshti'go handiyeesdzihgo kóbididííniił, Bóhólníihii Diyin God kóní, diníi doo. T'áá háiida shíists'ą́ą'ii háni'dii shíists'ą́ą́' índa t'áá háiida doo t'áá k'ad shidiizts'ą́ą'ii éí háni'dii ákójít'é, háálá nidaalteehii danilį́.