Read Navajo EZEKIEL 33 Bible Online

EZEKIEL 33 - Navajo bible

EZEKIEL 33

¹Náá'áłdó' Bóhólníihii shich'į' haadzíi'go ání,

²Diné nílíinii, nidine'é bich'į' handziihgo ábidiní, Bóhólníihii ání, Łahgo kéyah si'ą́ągi diltłish nítą́ągo áádóó ákwii diné kéédahat'ínígíí bitahdóó diné ła' bá ha'ídées'į́į' dooleełii nideistį́įgo

³hakéyahjį' diltłish bił oonéełgo éí diné há haideel'į́į'go deenásts'aa' bidee' bee í'dílzoołí yee ádidooniiłgo diné yi'doołnih,

⁴áko t'áá háiida deenásts'aa' bidee' bee í'dílzoołí ánínígíí yidiizts'ą́ą'go nidi bee bi'ílnii'ígíí éí t'áadoo yaa ná'áhodéest'į́į́'góogo diltłish bee ho'diisyį́įgo t'áá hó hadił bee hohodiit'i' doo.

⁵Deenásts'aa' bidee' bee í'dílzoołí áníigo jidiizts'ą́ą́' bee ho'ílnii'ígíí éí t'áadoo bi'jiilaa da, áko ho'diisyínígíí t'áá hó hadił bee hohodiit'i' doo. Nidi bee ho'ílnii'ígíí bi'jiilaago éí jidoodzih nít'éé'.

⁶Nidi ha'ídées'į́'í aadę́ę́' diltłish bił da'ínéehgo yiyiiłtsą́ągo áádóó deenásts'aa' bidee' bee í'dílzoołí t'áadoo yee ádííniidgóogo diné t'áadoo bida'asnii' da dooleeł. Áko diltłish bił anínáago diné t'áá háiida ła' seesyį́įgo éí diné seesyínígíí doo ákwii áát'įįdii t'áá bił seesyį́į dooleeł, nidi ha'ídées'į́'í éí diné seesyínígíí bidił bee hohodiit'i' doo.

⁷Áko ni, diné nílíinii, Ízrel dine'é bá ha'ídées'į́į'ii ániishłaa; t'áá ooleełee nich'į' yáshti'go nídiits'į́įhgo shá bee i'iyíłníih doo.

⁸T'áá íiyisí doo yá'áshóonii nílíinii, Ts'ídá t'áá aaníí dadíítsaał, bidishníigo áádóó diné t'áá íiyisí doo yá'áshóonii yee át'éii yits'ádoogááł biniyé t'áadoo bi'ííníłnii'góó, áko diné t'áá íiyisí doo yá'áshóonii doo ákwii áát'įįdii t'áá yił dadootsaał, áádóó éí diné bi'diisyínígíí bidił bee nihodiit'i' doo.

⁹Nidi diné t'áá íiyisí doo yá'áshóonii, Na'át'e' yóó'adí'aah, bidiníigo bee bi'ííníłnii'go, nidi ba'át'e'ígíí t'áadoo yóó'iidíí'ą́ą́góogo éí doo ákwii áát'įįdii t'áá yił dadootsaał, nidi ni éí doo bee nik'íhodoot'ah da.

¹⁰Áko ni, diné nílíinii, Ízrel dine'é kóbidiní, Kódadohníi ni', Bee haz'áanii k'idahiitíhígíí áádóó ádił nida'ayiilzíhígíí bik'ee doo asohdadeel'įįd da; ákoshą' haa yit'éego dahinii'náa dooleeł?

¹¹Kóbidiní, Ts'ídá t'áá aaníí hinishná; ákót'éego diné t'áá íiyisí doo yá'áshóonii daaztsą́ągo ts'ídá doo baa shił hózhǫ́ǫ da, ní Bóhólníihii Diyin God; nidi diné t'áá íiyisí doo yá'ájíshóonii ha'át'e'ígíí yóó'azhdidoo'áałgo jiináago baa shił hózhǫ́. T'áá íiyisí doo yá'áshǫ' baa naahkaígíí yóó'adahidoh'aahgo bits'ánóhkááh, bits'ánóhkááh, Ízrel dine'é nohłíinii; ha'át'íísh biniyé dadínóohnééł?

¹²Áko ni, diné nílíinii, nidine'é ábidiní, Diné t'áá ákogi át'éii bee haz'áanii doo yik'eh hół'į́į da silį́į'go t'áá ákogi ájoonííł nít'éé' yę́ę doo yisdáhodoołtéeł da, áádóó diné doo yá'áshóonii bidoo yá'áshǫ' yits'áníyáago bidoo yá'áshǫ' yee doo ádił náá'doolzih da, índa diné t'áá ákogi ájít'éii ádił ni'dziilzíihgo t'áá ákogi ájoonííł nít'éé' yę́ę bee jiináago doo bízhneel'ą́ą da doo.

¹³Diné t'áá ákogi át'éii, T'áá aaníí hinínáa doo, bidííniidgo, nidi t'áá ákogi ááníłígíí yaa dzólíigo áádóó t'áá náábíláahjį' doo ákwii áát'įįdgóogo t'áá ákwii ádziidzaa yę́ę éí doo há bééhodoonih da, nidi doo ákwii ájíít'įįdii biniinaa dazdootsaał.

¹⁴Náá'áłdó' diné t'áá íiyisí doo yá'áshóonii, T'áá aaníí dadíítsaał, bidííniidgo, nidi ádił ni'dziisíi'ii yóó'azhdíí'ą́ągo áádóó bee há haz'áanii baa nijigháago t'áá ákǫ́ǫ́ ájooníiłgo,

¹⁵áádóó diné t'áá íiyisí doo yá'áshóonii bąąh niilyáii aa néídláago índa diné yigha'ídláii yaa néídláago, áádóó bee nihwiist'áanii yik'ehgo hináago índa doo ádił ni'iilzííhgóó éí diné doo dadootsaał da, nidi t'áá aaníí hináa doo.

¹⁶Ádił ni'dziisíi'ii t'ááłá'í nidi doo bee hach'į' ha'doodzih da; t'áá áho'di'nínígi ájít'éé nít'éé' áádóó t'áá ákwii ájít'éé nít'éé', áko éí t'áá aaníí jiináa dooleeł.

¹⁷Nidi nidine'é bits' ą́ą́dóó oochíiłii éí, Bóhólníihii yee át'éii doo ákǫ́ǫ́ át'ée da, daaní. Nidi t'áá bí yee ádaat'éii doo ákǫ́ǫ́ ádaat'ée da.

¹⁸Diné t'áá ákogi át'éii t'áá ákǫ́ǫ́ ájooníiłii yóó'azhdíí'ą́ągo áádóó doo ákwii ádziidzaagóogo éí bik'é dazdootsaał.

¹⁹Áádóó diné t'áá íiyisí doo yá'áshóonii bidoo yá'áshǫ' yóó'iidíí'ą́ągo áádóó bee bá haz'áanii yaa naagháago t'áá ákǫ́ǫ́ ááníiłgo éí diné hináa dooleeł.

²⁰Nidi Bóhólníihii yee át'éii éí doo ákǫ́ǫ́ át'ée da, dadohní. Ízrel dine'é nohłíinii, t'ááłá'í nootínígo ádanoht'éii bik'ehgo nihaa nídadéesht'įįł.

²¹Yisnááh daniidlį́įgo naakits'áadah náhááh góne', neeznáá nídízííd binih, ashdla'góó yoołkáałgo Jerúsalemdę́ę́' diné léi' ła' yisdááyáá lágo shaa níyáago Jerúsalem kin haal'áii ts' ídá ałtso bi'disná, shiłníigo shił hoolne'.

²²Hoos'įįdgo diné yisdáákaii dookah lágo éí t'áá bítséedi i'íí'ą́ągo Bóhólníihii shik'i dah déesnii'go yáshti' ánáshiidlaa, áko éí diné abínígo yíkaigo doo yáshti' yę́ę yáshti'go ánáshi'diilyaa.

²³Áádóó Bóhólníihii shich'į' hanáánáádzíi'go kóní,

²⁴Diné nílíinii, Ízrel bikéyahdi doo nidaagháhígóó nahaz'ą́ą́góó ákǫ́ǫ́ diné kéédahat'ínígíí ádaaní, Éíbraham éí t'áá łah dilt'éhí nít'éé', áko kéyah bíí' silį́į́', nidi nihí éí t'óó ahonii'yóí, áko t'áá aaníí kéyah nihíí' dooleełgo nihaa deet'ą́.

²⁵Éí bąą kóbidiní, Bóhólníihii Diyin God kóní, Dił t'áá bił da'ołghał áádóó nihi'eda'alyaii bich'į' adahohaał índa diné nidaołtseedgo dił bits'ádaazlį́įgo ádaohłe'. Ákót'éegoósh kéyah nihíí' dadooleeł?

²⁶Diltłish éí baa dadzíínóhłí áádóó doo daaldinii baa nidaahkai índa t'ááłá'í nootínígo bił kééhoht'íinii be'asdzą́ą́ bił da'ahidołyé; kót'éegoósh kéyah shóideesht'eeł danohsin?

²⁷Kóbidiní, Bóhólníihii Diyin God kóní, Ts'ídá t'áá aaníí hinishná; ákót'éego doo naagháhídi kéédahojit'íinii ts'ídá diltłish bee nidahodi'dootsił, índa halgaigóó kéédahojit'íinii éí naaldlooshii dahodooldił biniyé ts'ídá baa hodideesh' ááł, índa bine' nida'adzi'góó áádóó tsé daa'áángóó kéédahojit'íinii éí ts'ídá naałniih hodadidoolnahgo dazhdínóonééł.

²⁸Áko éí kéyah honoojíigo áádóó doo naagháhígóó ádeeshłííł áádóó bee hadziilgo bee ádaa hoji'niihii ninít'i' dooleeł índa Ízrel dine'é dabidziilii éí doo bikáá' siláhí da doo, áko doo ła' yąąh híidoogáał da.

²⁹Doo daaldinii baa nidadziskaígíí biniinaa éí kéyah honoojíigo áádóó doo naagháhígóó áhooshłaago, áko índa Bóhólníihii nishłį́įgo hoł béédahodoozįįł.

³⁰Áko diné nílíinii, ni éí nidine'é naa nídaat'į́įgo tsé ahénástł'ingo ní'áhígíí bitsį́į́góó índa t'áá dabighangóó ch'é'étiingi naa yádaałti'go ahił dahalne'go bik'is danilíinii yił ałch'į' yádaałti'go, Haa'íyee' ahíídiikahgo Bóhólníihii nihich'į' haadzí'ígíí dadidiits'į́į́ł, da'ahidi'ní.

³¹Ni'iildéhígíigi át'éego naa nídaakah, shidine'é danilį́įgo nidááhdóó nídinibįįh, bee bich'į' yáníłti'ígíí deidiits'a', nidi ts'ídá doo yida'óle' át'ée da; Diyin God ayóó'ádayó'níigo yádaałti' nidi t'áá bizábąąhídóó t'éiyá yee ádaaní, nidi dabijéí yee yidádanoolníinii deinízin.

³²Áko shoo, ni éí bizhí ayóó ánóolningo áádóó ayóó'ahijo'nííjí sin yee hataałii índa sin yee dahataałgo bee na'a'néii yá'át'éehgo yee naanéhígíí áníínílnin, háálá bee bich'į' yáníłti'ígíí deidiits'a', nidi ts'ídá doo yida'óle' ádaat'ée da.

³³Áko baa hoolzhiizhgo, jó, t'áá aaníí baa honíyáa doo, áadi índa, Diyin God yá halne'ii nihitah naagháá nít'éé' lá, danízingo bił béédahodoozįįł.