Read Navajo EZEKIEL 34 Bible Online

EZEKIEL 34 - Navajo bible

EZEKIEL 34

¹Bóhólníihii shich'į' hanáánáádzíi'go kóní,

²Diné nílíinii, Ízrel dine'é yaa ádahalyáanii bik'ijį' nílį́įgo handziih; aa ádahojilyáanii t'áá hó hach'į' handziihgo áhodiní, Bóhólníihii Diyin God kóní, Ízrel dine'é yaa ádahalyáanii t'áá bí t'éiyá t'áá ádíighahígo t'áá bí t'éí da'ayą́ą́ nít'é'ígíí doo hojooba' ájíníi da! Dibé yaa áhályáanii yee' dibé ya'ałtso' dooleeł.

³Neesk'ahii yee' daołghał; aghaa' éí danihi'éé'; dabinołk'ahii éí nidaołtseed, nidi dibé éí doo bada'iyołtsóod da.

⁴Doo dabidziilii éí dabidziilgo t'áadoo áńdaohdlaa da; ka deíkáahii éí t'áadoo hadaałt'é áńdaohdlaa da; nida'niłhodígíí éí azee' yee nídoodzihii t'áadoo bąąh ádaohłaago bá bik'ída'doodiz da; yóó'adabidi'niiskaadii t'áadoo ninádahishoo'eezh da; yóó'adahaaskaii éí t'áadoo hadasinootą́ą' da, nidi bída'nołkadgo índa t'áá na'níle'dii bindanoht'áá nít'éé'.

⁵Áko baa áhodoolyąąłígíí ádingo biniinaa t'óó taoskai áádóó naaldlooshii dahashkéii t'áá ałtso yich'iyą' daazlį́į́'.

⁶Dził t'áá ałtso naaznilgóó áádóó t'áá ałtso dawók'ą́ą́góó índa nihokáa'gi t'áá ałtsogóó shidibé taoskai, áko shidibé haidínóotaałii índa háidídóo'įįłii ádingo biniinaa nahasdzáán t'áá náhaaz'ą́ą́ nít'éé' bikáá'góó ałtso taoskai.

⁷Éí bąą nihí diné baa ádahołyáanii, Bóhólníihii áníinii deísółts'ą́ą́':

⁸Bóhólníihii Diyin God kóní, Ts'ídá t'áá aaníí hinishná; ákót'éego shidibé nidínóolcheełgo bił di'doodił daazlį́'ígíí áádóó dibé yaa áhályáanii ádinígíí biniinaa naaldlooshii dahashkéii t'áá ałtso dabidoolghał daazlį́į́' áádóó shá aa ádahalyáanii shidibé t'áadoo hadeineeztą́ą' da, nidi dibé yaa ádahalyáanii t'áá bí t'éí da'ííyą́ą́' áádóó dibé éí t'áadoo yada'iistsood da,

⁹éí bąą dibé baa ádahołyáanii, Bóhólníihii áníinii dadoohts'į́į́h,

¹⁰Bóhólníihii Diyin God kóní, Jó, dibé yaa ádahalyáanii ts'ídá bik'ijį' nishłį́ áádóó shidibé shaa nídazhdoo'nił índa dibé doo bada'dziiłtsóódgóó áhodeeshłííł. Áko dibé baa ádahojilyáanii doo t'óó ách'į' nidazditsih da doo; shidibé doo hach'iyą' da dooleełígíí biniyé hazéé'dóó hááhideesh'nił.

¹¹Háálá Bóhólníihii Diyin God kóní, T'áá shí shidibé hadinéeshtaałgo bitah dídéesh'įįł, jó'akon.

¹²T'áá dibé yaa áhályáanii bidibé taoskaigo háidéez'į́'ígi át'éego ákót'éego shidibé hádídéesh'įįł, áko k'os diilkǫ'go chahóółhéél yę́ędą́ą́' éí bijį́ t'áá ałtsogóó taoskai yę́ędę́ę́' yisdánáhideeshnił.

¹³Índa dadine'é bitahdę́ę́' áádóó kédaayahdę́ę́' áłah áńdeeshdlíiłgo t'áá bí bikéyah biih nídeeshnił áádóó Ízrel dine'é bidził naaznilgóó tó hadaazlínígóó índa diné kéédahat'į́į́góó t'áá át'é banída'astso' doo.

¹⁴Ch'il yíl'áagi da'ałchozh doo; dziłghą́ą' di ch'il yíl'áago éí daabígo ákwii da'ałchozh doo; ákwii ch'il yíl'áagi náhinoojah doo; Ízrel dine'é bidził daní'áii bighą́ą́'góó ch'il deíl'áágóó da'ałchozh doo.

¹⁵T'áá shí shidibé baa áháshyą́ą doo; t'áá shí nábinishjah doo, ní Bóhólníihii Diyin God.

¹⁶Yóó'ádahaaskaii hadínéeshtaał; t'ą́ą́' anáhaazhjée'ii nináhideesh'ish, nida'niłhodii dadiniihgóó bá bik'ída'dideesdis, doo bitah dahwiináanii bitah dahółdzilgo áńdadeeshdlííł, nidi daneesk'ahii áádóó dabidziilii áhodeeshdįįł; hainísht'ínígíí bee ha'deestsoł.

¹⁷Bóhólníihii Diyin God kóní, Nihí shilį́į́' nohłį́įgo dah wohkahii éí alį́į́' ał'ąą át'éii bił ałts'ánihideeshniłgo nihainísht'į́į doo: deenásts'aa' áádóó tł'ízíchǫǫh éí ał'ąą át'éego beinísht'į́į doo.

¹⁸Yá'áhoot'éehgi da'ołchozhgo t'įįhdígo át'é danohsingóósh łahjį' t'óó bik'i naahkaigo áádóó łahjį' éí daołchozhgo ch'il yíl'áagi naohkai áádóó tó niłtólígíí daohdlą́ągo índa łahjį' éí t'óó bii' naahkaigo tááchxąą'go ádaohłaa?

¹⁹Ch'il t'óó bik'i nisoohkaii shidibé deiłchozh, áádóó tó tááchxąą'go ádaohłaii shidibé deidlą́.

²⁰Éí bąą Bóhólníihii Diyin God kóhodííniid, Shoo, t'áá shí alį́į́' neesk'ahii áádóó alį́į́' bits'iinígíí baa nídéesht'įįł.

²¹Háálá nooshk'iizh áádóó niwos bee doo bitah dahółdzilii t'áá ałtso nahjį' abíhíníyilii biniinaa áádóó doo bitah dahółdzilii t'áá ałtso nidee' bee nahjį' abídziyínígo'go naa taozhjée'ii biniinaa

²²shidibé naakaígíí yisdádeeshnił; bił di'doodiłgo dooghałígíí doo náádandlį́į da doo, áko alį́į́' t'áá ał'ąą ádaat'éii beinísht'į́į doo.

²³Áádóó shá naal'a'í David éí t'ááłá'í dibé yaa áhályáanii nilį́įgo baa áhályą́ągo ádeeshłííł; éí ba'ałtso'go baa áhályą́ą doo.

²⁴Shí Bóhólníihii nishłíinii éí biDiyin God nishłį́į doo; shá naal'a'í David éí hatahgi naat'áanii nilį́į doo; shí Bóhólníihii nishłį́įgo kót' éego haasdzíí'.

²⁵Áádóó bee ach'į' hózhǫ́ǫ́jí bee aha'deet'áanii éí hoł hasht'edeeshłííł áádóó honoojíígóó t'áadoo beinít'íní kéédahat'į́į doo índa tsiyi'góó hasht'edadít'éego da'ałhosh dooleełígíí biniyé naaldlooshii dahashkéii t'áá ałtso nahgóó hadínéeshkał.

²⁶Áádóó shidah yisk'id binaagóó t'áá bił hak'izhdeeshdliił; baa náhwiilzhíishgo hwee nináháłtį́įhgo íínísin doo; éí bee hak'ihojidlíigo nahałtinígíí át'ée doo.

²⁷Tsin deíl'áhígíí éí bineest'ą' bąąh nídahoodleeł doo, nahasdzáán éí bits'ą́ą́dóó nínáda'nt'į́įh doo áádóó bikéyahgi háádę́ę'da doo baa hwiinít'į́į́góó nida'nt'ą' doo; hazéédadéetání há nidaháti'go índa ana'í dahasnáago binaa'nil dajílíinii bighááhonish'nilgo, áko índa Bóhólníihii nishłį́įgo hoł béédahodoozįįł.

²⁸Ał'ąą dine'é doo hoł nináádahadeeł da doo; naaldlooshii dahashkéii doo náádahaldeeł da doo; t'áadoo hainít'ínígóó ts'ídá yá'át'éehgo kééhojit'į́į doo áádóó háádę́ę'da doo ła' hayahodidoołyis da.

²⁹Éí kéyahdi doo dichin náádahodoogą́ął daígíí biniyé kéyah bikáá'góó nida'nt'ą'go bee hwééhodílzingo ádeeshłííł áádóó ał'ąą dine'é hándahałt'i'ii doo bik'ee ti'náádahojoo'níih da dooleeł.

³⁰Áko shí Bóhólníihii Diyin God nishłíinii hoł honishłǫ́ǫgo áádóó hó Ízrel dine'é dajílíinii shidine'é dajílį́įgo hoł béédahózin doo, ní Bóhólníihii Diyin God.

³¹Shich'il yíl'áagi dibé naakaígíí shidibé danohłínígíí éí diné danohłį́, áko nihiDiyin God nishłį́, ní Bóhólníihii Diyin God.