Read Navajo EZEKIEL 36 Bible Online

EZEKIEL 36 - Navajo bible

EZEKIEL 36

¹Áko ni, diné nílíinii, Ízrel dine'é bidził naaznilígíí bich'į' handziihgo ábidiní, Ízrel dine'é bidził nohłíinii, Bóhólníihii áníinii dadoohts'į́į́h:

²Bóhólníihii Diyin God kóní, Ana'í danilíinii, Heeyéii', t'áá nááshiinídą́'ídi aghánídahaz'áago nahaz'ánígóó nihíí' daazlį́į́', danihidííniidígíí biniinaa

³kódíníigo hólne', Bóhólníihii Diyin God kóní, Ał'ąą dine'é daadziihígíí bíí' dadoohłeeł biniyé ałtso nihąąh da'ííbį́į'go da'níłch'ishídę́ę́' danihishjizh áádóó nihaa yádaałti' índa doo yá'át'ééhgóó nihaa aseezį́ dandzin;

⁴éí bąą Ízrel dine'é bidzi ł soonilígíí Bóhólníihii Diyin God áníinii dadoohts'į́į́h; dził soonilii índa dah daask'idii, dayíldzisii áádóó dabikoohii t'áadoo siláhígóó t'óó dah nídadzilbáago ádahoolyaii índa kin hadaas'áágóó bik'i dahoneesdzoodii éí diné t'óó bąąh da'ííbį́į'go náánáła' ał'ąą dine'é danilíinii t'óó bá nidahałt'i'go baa daadloohii, Bóhólníihii kóbíłní;

⁵jó, éí bąą Bóhólníihii Diyin God kóní, T'áá íiyisí shił halchíi'go łe'nisingo ał'ąą dine'é dajílíinii dadzidziihii hak'ijį' áádóó Íídam dine'é t'áá át'é hak'ijį' nishłį́įgo yáshti', háálá hó shikéyah hwíí' dadooleeł áádóó t'óó bik'i nizhdookah biniyé t'áá íiyisí baa hoł dahózhǫ́ǫgo índa ak'ee dazhdiniihgo ádá shódadzoost'e'.

⁶Éí bąą Ízrel dine'é bikéyah baa handziihgo dził naaznilígíí áádóó dah daask'idígíí, deíldzisígíí áádóó dahoníts'aa'ígíí ábidiní, Bóhólníihii Diyin God kóní, Shoo, ał'ąą dine'é t'óó nidahałt'i'go bik'ee ti'dahwiisoonii'ígíí biniinaa łe'nisingo t'óó báhádzidgo sháháchį'go haasdzíí';

⁷éí bąą ał'ąą dine'é nihinaagóó kéédahat'ínígíí bá nidahat'i'go yik'ee ti'dahwiidoonih; kót'éego ádee haasdzíí', ní Bóhólníihii Diyin God.

⁸Shidine'é k'adę́ę nákahígíí bąą, nihí Ízrel bidził danohłíinii, nihits'áoz'a' dahodooleełgo shidine'é Ízrel bá nihineest'ą' dahodooleeł.

⁹Háálá nihich'ijí nishłį́įgo nihich'į' nídeesxis; nihikáá' hasht'ééhodoolníiłgo k'idi'doolyééł, jó'akon;

¹⁰nihikáa'gi Ízrel dine'é nilíinii t'óó ahayóigo ádeeshłííł áádóó kin hadaas'áágóó kénáádahojit'į́į doo índa kin hadaas'áii dááchǫ'ígíí ninádadoo'nił,

¹¹áádóó nihikáa'gi diné índa naaldlooshii t'óó ahayóigo k'ee'ąą noot'į́įłgo ádeeshłííł, áko éí biyázhí nídahoodleełgo k'ee'ąą noot'į́įł doo; t'áá átséedi ádanoht'é yę́ęgi át'éego nihikáá'góó diné kéédahat'į́į doo; átséédą́ą́' nihaa jooshba' nít'éé' yę́ę bilááh át'éego nihaa jooshba' doo, áko índa Bóhólníihii nishłį́įgo nihił béédahodoozįįł.

¹²T'áá aaníí, shidine'é Ízrel éí dine'é lą́ą nihikáá' naaldeeh doo; danihótą' doo áádóó bíí' danohłį́į doo; áłchíní éí doo bąąh náádaoh'į́į da doo.

¹³Bóhólníihii Diyin God kóní, Diné daołdeeł áádóó nihidine'é t'áá kééhat'į́į́ nít'éé' áłchíní bąąh daoh'į́, diné danihiłnínígíí biniinaa;

¹⁴diné doo náádaołdeeł da doo, áádóó nihidine'é t'áá kééhat'į́į́ nít'éé' áłchíní doo bąąh náádaoh'į́į da dooleeł, ní Bóhólníihii Diyin God.

¹⁵Ał'ąą dine'é doo da'nohłį́į́góó ádanihííł'įįdii yee nihá nidahałt'i'ii doo náádadidoots'į́į́łgóó ádeeshłííł, dadine'é doo nihá nináádahałt'i' da dooleeł áádóó nidine'é ádił nida'iilzíihgo doo ánáádadoohdlíił da, ní Bóhólníihii Diyin God.

¹⁶Bóhólníihii shich'į' hanáánáádzíi'go kóní,

¹⁷Diné nílíinii, Ízrel dine'é t'áá bí bikéyahdi kééhat'į́ yę́ędą́ą́' yee ádaat'éii áádóó yaa nidaakaígíí éí yee bikéyah dayííłchxǫ'; asdzání ąądii nídaadleehígíí nahalingo shinááł yee ádaat'éhígíí t'óó badaa'ih nít'éé'.

¹⁸Áko éí kéyah biyi' diné nidadziłtseedgo bidił daneezna'ígíí áádóó hwe'eda'alyaii bee kéyah dajííłchxǫ'ígíí biniinaa t'óó báhádzidgo sháháchį'ígíí bee atíhooshłaa;

¹⁹ał'ąą dine'é bitahgóó ahonííłkaad áádóó kédaayahgóó tadahodi'nooskaad; bee ádajít'éii índa ádajíít'įįdígíí bik'ehgo haa nídasist'įįd.

²⁰T'áá adadziiskaigóó ał'ąą dine'é baa dadziiskaidi shízhi' doo ílį́į́góó ádajiilaago diné ádaaní, Díí dine'é Bóhólníihii bidine'é ádaat'į́, ákondi Bóhólníihii bikéyahdóó nahjį' hadadziizná, dahałní.

²¹Ízrel dine'é da'níłts'ą́ą́'góó ał'ąą dine'é bitahgóó tadzooskaígíí baa dadziiskaidi shízhi' doo ílį́į́góó ádajiilaaígíí éí shízhi' diyinii t'áá íiyisí bik'édí nishłį́į́ nít'éé'.

²²Éí bąą Ízrel dine'é ábidiní, Bóhólníihii Diyin God kóní, Ízrel dine'é nohłíinii, nihí éí doo nihiniinaa da, nidi ał'ąą dine'é baa dahisoonáago shízhi' diyinii doo ílį́į́góó ádaołaaígíí biniinaa k'adę́ę kóshnééh.

²³Áádóó ał'ąą dine'é bitahgóó shízhi' doo ílį́į́góó ályaa yę́ę éí ał'ąą dine'é bitahgóó shízhi' doo ílį́į́góó ádaohłaa yę́ę éí shízhi' ayóó át'éii diyingo yit'į́įgo áńdeeshdlííł, áko dinishyinígíí nihitahgóó ał'ąą dine'é dabinááł t'áá sahdii át'éego ánáshdlaago Bóhólníihii nishłį́įgo ał'ąą dine'é bił béédahodoozįįł, ní Bóhólníihii Diyin God.

²⁴Kédaayah naaznilígíí t'áá ałtso bii'dę́ę́' áádóó ał'ąą dine'é bitahdóó nínánihidiyeeshdlahgo t'áá nihí nihikéyah biih nánihideeshnił.

²⁵Ákohgo tó niłtólígo nihik'ídadeeshtahgo, t'óó baa'ihii nihąąh dahólóonii t'áá ałtso índa eda'alyaii bich'į' nidahohłáii t'áá ałtso nihąąh táádadeesgis.

²⁶Ajéí ániidíii índa áhwiindzin ániidíii nihiih náhideesh'nił; nihijéí daatséhígíí nihii'dóó hahideeshniłgo, ajéí yilzhólíii nihiih náhideesh'nił.

²⁷Áádóó shiNíłch'i Diyinii nihii' dahólǫ́ǫgo, adanihideeshłíiłgo shibik'eh ó'oo'níiłii bik'ehgo deínóhkáahgo áádóó shibik'ehgo hoogáałii bik'eh dahonoł'į́įgo ádanihideeshłííł.

²⁸Danihizhé'é kéyah baa diní'áanii bii' kéédahoht'į́į doo, áádóó shidine'é danohłį́įgo nihiDiyin God nishłį́į doo.

²⁹Ninihiiłchxǫǫhii t'áá ałtso bits'ánihideeshnił; doo nááhodidoochįįłígíí biniyé tł'oh naadą́ą́' ał'ąą ádaat'éii nidant' ą' dooleełgo bá hadeesdzih.

³⁰Doo nááhodidoochįįłgóó ał'ąą dine'é bitahgóó doo nihaa yánááhodoosįįłígíí biniyé nihitsin bineest'ą' deíl'áágóó, áádóó nihidáda'ak'ehgóó ts'ídá t'áá íiyisí hózhǫ́ łą́ągo nida'nt'ą'go ádeeshłííł.

³¹T'áá íiyisí doo yá'áshǫ́ǫ́góó ádanoht'éé nít'éé' yę́ę, áádóó ádaot'įįd nít'éé' yę́ę béédadoołnih, áko ádił nida'ayoosíí' nít'éé' yę́ę índa doo ákwii ádaot'įįd nít'éé' yę́ę biniinaa ádił nináda'oht'įįh doo.

³²Ízrel dine'é nohłíinii, díí t'áá ałtso baa naasháhígíí éí doo nihí nihá baa naasháa da; bee ádanoht'éii t'óó bee ádaa yádanohdzin le' áádóó bee nihił dahalą́ą le', shí Bóhólníihii kót'éego haasdzíí'.

³³Bóhólníihii Diyin God kóní, Doo ákwii ádaot'įįdii t'áá ałtso nihąąh deíłdee'go nihikin hadaas'áágóó kénáádahoht'į́į dooleeł, áádóó kin dááchxǫ'ígóó ninádadoo'nił.

³⁴Nihidáda'ak'eh yę́ęgóó yíighah ch'ídahaaskaígíí t'áá ałtso nihidáda'ak'ehgóó nídahodíítł'ohgo áádóó doo siláhígóó dayiiłtsánígi k'éédadidoolyééł.

³⁵Áko, Díí kéyah honoojíigo haz'ą́ą́ nít'éé' yę́ę Íídendi dá'ák'eh nahalin silį́į́', daaníigo yaa yádaałti' doo, áádóó kin hadaas'áágóó daakin naa'adayiiskaadgo ałtso yąąh da'ííbį́į'go kints'iil t'éí dah naazhjaa'go ádayiilaa yę́ęgóó bidahoníłdzilgo nináádaas'nil áádóó ákǫ́ǫ́ diné kénáádahat'į́.

³⁶Áko índa ał'ąą dine'é t'áá bą́ą́h níhą́dígóó kéédahat'į́įgo daadziihii éí shí Bóhólníihii kin hadaas'áago dááchxǫ' yę́ę ninádasénilgo áádóó doo siláhígóó ádahoolyaa yę́ęgóó k'ééda'díshdla'go bił béédahózin doo, shí Bóhólníihii díí kódeeshnííł, dííniid, áko ákódeeshnííł.

³⁷Bóhólníihii Diyin God kóní, Ízrel dine'é kódashiłníigo díí shí deídóokił: dibé nahalingo diné nihá nízhdínóołt'į́į́ł.

³⁸Hodílzingo áłah nída'adleeh góne' łah Jerúsalem kin haal'áagi dibé náádahidoonihii ałts'áá'nilgo yíl'áhígi át'éego kin hadaas'áágóó kints'iil ádaalyaa yę́ę ákǫ́ǫ́ diné náádeíl'áa dooleeł, áko índa Bóhólníihii nishłį́įgo hoł béédahodoozįįł.