Read Navajo EZEKIEL 37 Bible Online

EZEKIEL 37 - Navajo bible

EZEKIEL 37

¹Nít'éé' Bóhólníihii shik'i dah deesnii'go Bóhólníihii biNíłch'i Diyinii dah shidiiłtį́įgo honíts'aa' léi'gi ts'in t'óó ahayóí yíl'áago ákwii nishiníłtį́,

²áko yitahgóó táshidíílóóz, áko shoo, honíts'aa' góde t'óó ahayóí eel'á; nít'éé' shoo, t'áá íiyisí nídááltsei lá.

³Áádóó áshíłní, Diné nílíinii, díí ts'in yíl'áhígíísh dahináa dooleełgo bohónéedzą́? Áko ádíshní, Bóhólníihii Diyin God nílíinii, ni nił bééhózin.

⁴Áko ánááshidi'ní, Díí ts'in yíl'áhígíí bich'į' handziihgo ábidiní, Ts'in nááltseii nohłíinii, Bóhólníihii nihich'į' haadzí'ígíí dadoohts'į́į́h.

⁵Bóhólníihii Diyin God díí ts'in haal'áhígíí yich'į' haadzíi'go ání, Jó, bee nídadohdzihii nihiih dahodooleełgo dahinohnáa doo;

⁶nihits'id dahólǫ́ǫgo ádanihideeshłííł, áádóó nihitsį' dahodooleeł, áádóó nihikágí nihik'ídadeeshtihgo bee nídadohdzih dooleełii nihiih dadeeshłééł, áko dahinohnáa doo, áádóó Bóhólníihii nishłį́įgo nihił béédahodoozįįł.

⁷Áádóó t'áá bee shich'į' ha'oodzí'ígíí bik'ehgo haasdzíí', áko haasdzíi'go hodiists'ą́ą'go ajigháadgi íists'ą́ą'go ts'in ahidadiijil; ts'in ahą́ą́h dadí'áii ahéédadiijil.

⁸Nísh'į́į́ nít'éé', jó'akon, éí ts'in bits'id dahazlį́į́', nít'éé' bitsį' náádahasdlį́į́', áádóó bikágí t'áá ałtso bik'ínáádaasti', nidi yee nídadidzihii bii' ádaadin.

⁹Nít'éé' Bóhólníihii áshíłní, Níyol bich'į' handziih, diné nílíinii, níyol bich'į' handziihgo kóbidiní, Bóhólníihii Diyin God kóní, Níyol nílíinii, díí nidaaztseedígíí dahináa dooleeł biniyé t'áá dį́į́'dę́ę́' bich'į' díyóołgo biih daniyooł.

¹⁰T'áá bee shich'į' ha'oodzí'ígíí bik'ehgo haasdzíí', áko dahiná daazlį́į'go deizį' áádóó ayóó ánéelą́ą́' yíl'á.

¹¹Ákohgo áshíłní, Diné nílíinii, díí ts'in haal'áhígíí éí Ízrel dine'é t'áá yíl'áá nít'é'ígíí át'é, áko shoo, ádaaní, Nihits'in nídááltsei, nihá chohoo'íinii ásdįįd áádóó ałtso ánihi'disdįįd.

¹²Éí bąą kódíníigo bich'į' handziih, Bóhólníihii Diyin God kónihiłní, Shoo, shidine'é nohłíinii, danihijishcháá' nihá ąą ádadeeshłííł; áádę́ę́' nánihidideeshjahgo Ízrel dine'é bikéyah biih nánihideesh'nił.

¹³Áko shidine'é nohłíinii, dajishcháá'góó nishoojéé' yę́ę nihá ąą ádaashłaadóó náánihidiiłjée'go Bóhólníihii nishłį́įgo nihił béédahodoozįįł,

¹⁴áko shiNíłch'i nihiih dadeeshłeełgo dahinohnáa doo, áádóó t'áá nihí nihikéyah biih nánihideesh'ish, áko shí Bóhólníihii éí haadzíi'ii áádóó í'iilaii nishłį́įgo nihił béédahodoozįįł.

¹⁵Bóhólníihii shich'į' hanáánáádzíi'go kóní,

¹⁶Náá'ákóne', diné nílíinii, tsin t'ááłá'í nídiitįįhgo Júdah bá, áádóó bik'isóó danilíinii Ízrel dine'é bá bikáa'gi bik'e'íłchí, áádóó Íífreiyim bitsin éí tsin nínáádiitįįhgo Jóseph bá índa bik'isóó danilíinii Ízrel dine'é bá bikáa'gi bik'e'íłchí,

¹⁷áko tsin t'ááłá'í dooleeł biniyé ahidiiníiłgo ahííníłtą'go dahíjih.

¹⁸Áko nidine'é, Díí tsin éí ha'át'íí ááhdiní? daniłníigo kóbididííniił,

¹⁹Bóhólníihii kóní, Jó, Jóseph bitsin éí Íífreiyim áádóó yił ahéédahólzinii Ízrel dine'é yił dah yootį́įłii éí nídideeshtį́įłgo Júdah bitsin bił ahidideeshnił índa t'ááłá'í ádeeshłíiłgo tsin t'ááłá'í dah yishtį́įł doo.

²⁰Áko tsin bik'e'íłchíii binááł dah yíjih doo.

²¹Áko ádabididííniił, Bóhólníihii Diyin God kóní, Shoo, Ízrel dine'é ał'ąą dine'é bitahgóó tajooskai yę́ę éí bitahdę́ę́' nínáhodiyeeshdlah, da'níłch'ishídę́ę́' áłah ánáhodeeshdlíiłgo t'áá hó hakéyah biih náhodeesh'nił,

²²áádóó t'áá hó hakéyahdi Ízrel dine'é bidził naaznilígíí bighą́ą'di t' ááłá'í dine'é dajílį́įgo áhodeeshłííł, áko t'áá jíl'áá nít'éé' t'ááłá'í aláahgo naat'áanii honant'áa dooleeł; naakigo ał'ąą dine'é doo náádajídlį́į da dooleeł áádóó doo naakigo kénáádahojit'į́į da dooleeł índa bee óhólníihii doo naakigo bee hoł nááhást'ą́ą da dooleeł.

²³Áádóó hwe'eda'alyaii áádóó bik'ee dazhdiniihii índa bee haz'áanii doo bik'eh dahojííł'įįdii éí doo ła' bee ánáádazhdidoolchxǫǫł da; kéédahojit'ínígóó ádił nida'dziiszíi'ii éí bits'ą́ąjį' yisdáhodiyeeshniłgo, t'óó badaa'ihii hwee dahólóonii hąąh dadeeshdahgo shidine'é dajílį́į doo áádóó haDiyin God nishłį́į doo.

²⁴Shá naal'a'í David aláahgo honant'áa doo; t'áá ádzíłtso haa áhályáanii t'ááłá'í doo áádóó shibik'ehgo hoogáałii bik'ehgo dajíkáah doo índa bee nihodiish'aahii bik'eh dahojíł'į́į doo.

²⁵Shá naal'a'í Jéíkab kéyah baa diní'ánídi, danihizhé'é yę́ę kéédahat'į́į́ nít'éé' yę́ędi kéédahojit'į́į doo áádóó hada'áłchíní índa banááda'áłchíní áádóó éí bada'áłchíní ákwii hool'áágóó kéédahat'į́į dooleeł; shá naal'a'í David éí hool'áágóó binant'áa doo.

²⁶Bee ach'į' hózhóonii bee hoł ahada'dideesht'ááł; hool'áágóó hoł ahada'dinisht'ą́ą dooleeł; hohoníłdzilgo áádóó t'óó ahojíyóigo áhodeeshłííł índa hool'áágóó shikin bii' sohodizin hatahgi nideesh'áałgo ákwii kééhasht'į́į doo.

²⁷Áko hatahgi kééhasht'į́į doo áádóó haDiyin God nishłį́į doo índa shidine'é dajílį́į doo.

²⁸Shikin bii' sohodizin haníi'gi hool'áágóó hólǫ́ǫgo ał'ąą dine'é éí shí Ízrel dine'é diyingo ádaashłaago bił béédahodoozįįł.