Read Navajo EZEKIEL 38 Bible Online

EZEKIEL 38 - Navajo bible

EZEKIEL 38

¹Bóhólníihii shich'į' hanáánáádzíi'go kóní,

²Diné nílíinii, Méígag dine'é bikéyahdi Mííshek dine'é áádóó Túbal dine'é binanit'a'í Gag wolyéii bich'į' dah diníit'aahgo bik'ijį' nílį́įgo handziih,

³áádóó, Shoo, Gag yinílyéii, Mííshek dine'é índa Túbal dine'é binanit'a'í nílíinii, nik'ijį' nishłį́, ní Bóhólníihii Diyin God,

⁴áko nándeesxis áádóó nizéé' góne' béésh názhahígíí adeeshniłgo bee niyaats'iin deeshah áádóó łį́į́' índa łį́į́' yee nidaabaahii t'áá át'éé nít'éé' béésh éé' yii' naazhjée'go nisiláo t'áá dah yinééł nít'éé'; t'áá bił ayóó ánéelą́ą́' oonéełgo áádóó béésh téél ách'ą́ą́h dah yit'áałii índa naagé deíjáahgo áádóó diltłish deíjáahgo éí t'áá bił ch'índeesłóós:

⁵Pérzha dine'é áádóó Iithiyópiya dine'é índa Líbiya dine'é éí hódaóltą'go éí t'áá át'é béésh ch'ah dabich'ahgo áádóó naagé deíjáahgo

⁶Gómar dine'é áádóó bisiláo t'áá át'éé nít'éé' bił índa náhookǫs biyaadę́ę'go Togármah dine'é áádóó bisiláo t'áá át'éé nít'éé' yił yinéełgo diné t'óó ahayóí nił hólónígíí bił ch'índeesłóós.

⁷Ni áádóó ayóó ádanéelą́ą'go ninaagóó dah da'ínéehii bił hasht'e'ádadołnééh áádóó hasht'e'ádíínílzingo bá ha'ísííd.

⁸Lą'í yiską́ą́dóó bik'ijį' níká áhodidoo'niił áádóó lą'í nááhaidóó bik'ijį' éí Ízrel dine'é bikéyahgi dził naaznilgo t'áá áłahjį' doo naagháhí yę́ęgóó ał'ąą dine'é bits'ą́ą́dę́ę́' diné áłah danilínę́ę, éí kéyah anaa' biniinaa yíchxǫ' yę́ę háádílyaii biih dahidoohnééł, nidi Ízrel dine'é éí ał'ąą dine'é bitahdę́ę́' nínádahaasdláa'go ákwii t'áadoo beinít'ínígóó bohoníłdzilgo kénáádahat'į́į doo.

⁹Ayóó át'éego deeyolígíí nahalingo náás doohnééł; k'os diłhił yilzhołígíí nahalingo kéyah t'áá níłtéél nít'éé' bikáá' nikidínóołt'eeł áádóó nisiláo t'áá yinééł nít'éé' bił índa diné t'óó ahayóigo éí bił kódoohnííł.

¹⁰Bóhólníihii Diyin God kóní, Éí bijį́ doo yá'át'ééhgóó tsídííkosgo nahodíí'aałgo

¹¹ádidííniił, Kin dah naazhjaa'go doo binaa ahééda'astł'inii bich'į' hideeshdáałgo diné bohoníłdzilgo doo íits'a'ígóó kéédahat'íinii éí doo binaa ahééda'astł'inii áádóó doo bidáń'da'ditį́įhii índa doo bich'ą́ą́h dáń'da'dilkałii bik'iidiijah,

¹²áko bąąh da'oogą́ą'ii nídahidííchił áádóó hééł t'óó ahayóí ch'ídahidííyééł; doo nidaagháhí yę́ęgóó k'ad ákǫ́ǫ́ diné kéédahat'íinii áádóó ał'ąą dine'é bitahdę́ę́' áłah ánályaii éí bił anaa' da'ahidííl'įįł; éí béégashii índa naalye'é nishódayoost'e'go kédaayah ałníi'gi kéédahat'į́.

¹³Shííba dine'é áádóó Díídan dine'é índa Társhish dine'é bikin dah naazhjaa'ígíí áádóó baa nida'iiniihii kódaaníigo nidanídídóołkił, Hééł índa béésh łigaii áádóó óola áádóó naalye'é índa bąąh da'oogą́ą'ii ayóó ánéelą́ą'go náádahídóohchiłgo nihidahidoohxéełgo béégashii t'áá bił nihidahidínóołkałígíísh biniyé nisiláo áłah íinilaa?

¹⁴Éí bąą diné nílíinii, Gag bich'į' handziihgo kóbidiní, Bóhólníihii Diyin God kóní, Éí bijį́ Ízrel shidine'é bohoníłdzilgo kééhat'į́įgo ts'ídá nił bééhózin doo.

¹⁵Náhookǫs nidahonees'ą́ądi kééhót'į́į́dę́ę́' díínááł; ni áádóó diné ayóó ánéelą́ą'go, éí t'áá ałtso łį́į́' bił deíjeehgo, ayóó ánéelą́ą́' siláo yinéełgo siláo ayóó ánéelą́ą́' bił díínééł.

¹⁶K'os éí kéyah ałtso bik'i diilkǫ' nahonílingo shidine'é Ízrel baatįįh díínééł áádóó akée'di yoołkáałdi, Gag yinílyéii, ał'ąą dine'é dabinááł dinishyinígíí bééhoozįįhgo ał'ąą dine'é bił béédahózin dooleełígíí biniyé shikéyahdi anadíníídzįįł.

¹⁷Bóhólníihii Diyin God kóní, T'ah nigháídę́ę́' Ízrel dine'é bitahgi diné shá nidaal'a'í t'áá éí binahjį' naa hashne'go hahásdzíi'ii ánít'į́; éí shá dahalne'ii danilį́į́ nít'ée'ii éí yoołkááł yę́ędą́ą́' shidine'é bik'i niideeshjahgo kót'éego shá yaa dahalne'go lą'í nááhai.

¹⁸Bóhólníihii Diyin God ání, Baa hoolzhiizhdi Gag éí Ízrel bikéyahdi kéédahat'íinii yik'iidoojah yiniyé nínáago t'óó báhádzidgo bee atí'ésh'íinii bááhodoodzííł.

¹⁹Jó, łe'nisingo áádóó t'óó báhádzidgo atí'ésh'ínígíí hadíínóód bijį́ Ízrel dine'é bikéyahdi ayóó át'éego ni' naha'náa doo, dishníigo bee haasdzíí';

²⁰łóó' éí tónteel biyi' yíl'áhígíí, tsídii wót'áahdi nidaat'a'ii, naaldlooshii halgaigóó naaldeehii áádóó nihokáá' nidaa'na'ii t'áá ałtso áádóó nihokáá' dine'é t'áá ałtso honishłónígíí bik'ee bitah dahoditłid doo áádóó dził éí naa'ahidoo'nił áádóó tsé danít'i'ii éí nidahidoołdas áádóó kin bá nídaastł'inii éí t'áá ałtso nidahidoołdas.

²¹Áádóó shidził naaznilgóó t'áá át'é honiyé diltłish yíídéeshkił índa diné t'áá ałtso diltłish yee bik'is anaa' néidooł'įįł, ní Bóhólníihii Diyin God.

²²Naałniih áádóó diné naatseedgo dił danílį́įgo ádaalne'ígíí t'áá bił bee hainísht'į́į doo áádóó hó índa hasiláo dah deínéehii áádóó diné t'óó ahayóí hóóltą'ígíí t'áá bił tó yajiiłį́ nahalingo nahałtinígíí áádóó nílótsoh áádóó kǫ' índa tsékǫ' hak'ijį' naałtingo ádeeshłííł.

²³Kót'éego ayóó át'éii nishłínígíí áádóó t'áá íiyisí dinishyinígíí ííshją́ą́ ádeeshłííł índa ał'ąą dine'é t'óó ahayóí binááł ííshją́ą́ ídi'deeshnííł, áko índa Bóhólníihii nishłį́įgo hoł béédahodoozįįł.