Read Navajo EZEKIEL 39 Bible Online

EZEKIEL 39 - Navajo bible

EZEKIEL 39

¹Diné nílíinii, Gag bik'ijį' nílį́įgo handziihgo kóbidiní, Gag yinílyéii, Mííshek dine'é índa Túbal dine'é agháago binanít'áii, Bóhólníihii Diyin God kóní, Nik'ijį' nishłį́, jó'akon;

²nándeesxisgo náhookǫsjigo nihoneel'ą́ą́dę́ę́' handínéesoł, áko t'áá náás nineesołgo Ízrel dine'é dabidził bik'iidoohjah,

³áádóó ałtį́į́' nishtł'ajígo bee dah yítį́įłii nílák'ee habízhdeeshhałgo nish'náájí k'aa' dah yíjihii nílák'ee hadoołdas.

⁴Áko índa ni áádóó nisiláo dah deínéehgo bił yínínáanii t'áá ałtso índa diné t'óó ahayóí nóóltą'ígíí éí t'áá bił Ízrel dine'é bidził naaznilgóó nidanihidi'dootsił, índa tsídii da'alghałii t'áá ałtso índa naaldlooshii dahashkéii t'áá ałtso danihidoolghał biniyé baa nihidideesh'ááł.

⁵Halgaigi nidanihidi'dootsił, háálá shí haasdzíí', ní Bóhólníihii Diyin God.

⁶Méígag dine'é áádóó tónteel bibąąhgóó bohoníłdzilgo kéédahojit'íinii kǫ' hak'ijį' yeideeshnił, áádóó índa Bóhólníihii nishłį́įgo hoł béédahodoozįįł.

⁷Shidine'é Ízrel bitahgi éí shízhi' diyinii bééhózingo ádeeshłííł, áádóó shízhi' diyinii doo ílį́į́góó ts'ídá doo bee hanáá'doodzih da, áko índa Ízrel dine'é bitahgi Bóhólníihii Diyinii nishłį́įgo ał'ąą dine'é bił béédahodoozįįł.

⁸Bóhólníihii Diyin God ání, Shoo, bich'į' hoolzhish áádóó bohodoolnííł, éí t'áá íídą́ą́' bee haasdzíí'.

⁹Áadi índa Ízrel dine'é bikin hadaas'áágóó kéédahojit'ínígíí áádę́ę́' ch'íhizhdookahgo naagé ádaat'éii, béésh téél ách'ą́ą́h dah yit'áałii áádóó ałtį́į́' índa k'aa', tsihał áádóó tsiidétáán éí bee anadahat'íinii yee déédeidiłjahgo dabikǫ' doo; t'áá ákódaat'į́įgo tsosts'id nídoohah,

¹⁰áko chizh dahólǫ́ǫ́góó doo nídazhdikah da doo, índa tsintahdi doo da'dzitseełgóó áádę́ę́' doo chizh nidajiiyeeh da doo, háálá bee anada'al'íinii éí dahachizh dooleeł; nidahałtseedgo honaalye'é náádayíizhchid yę́ę nidadziłtseedgo binaalye'é náádahízhdóochił, áádóó nidahałtseedgo hayéél adayiizyíinii nidadziłtseedgo biyéél adahizhdooyééł, ní Bóhólníihii Diyin God.

¹¹Éí bijį́ Ízrel dine'é bikéyahgi tónteel hiníyínígíí ha'a'aah bich'ijígo honíts'aa'go diné bideetiingi Gag índa hasiláo t'áá yinééł nít'éé' bił łeeh hodi'doo'nił; Gag dine'é t'óó ahayóí dah yinéełii ákwii yóó'ádaalyaaígíí biniinaa atiingóó nidadikahii t'áá ádíjį' nidahakáah doo; ákwii Héíman-gag honíts'aa' hoolyée doo.

¹²Tsosts'id nídeezidjį' kéyah t'áá náhwiist'ą́ą́ nít'éé' hasht'ééhálnééh biniyé Ízrel dine'é yóó'ádahale' doo.

¹³Éí hoolzhishdi ayóó ánísht'éhígíí ííshją́ą́ áshłaago éí kéyahdóó diné t'áá yíl'áá nít'éé' yóó'ádahodoolíiłgo bee béédaho'dílzingo baa ha'niih doo, ní Bóhólníihii Diyin God.

¹⁴Tsosts'id nídeezidóó bik'ijį' diné ła' yits'ádeidooniłgo kéyah t'áá nidahashjizhígi nidantáago éí kéyahgóó háádiikahgo, áko diné nidaaztseedgo t'ah doo yóó'ádaalnéehii ahandayiijáahgo yóó'adeidoolííł; kót'éego kéyah t'áá náhwiist'ą́ą́ nít'éé' hasht'éédahodoodlííł.

¹⁵Éí kéyahgi díí diné bits'á'nilígíí yikahgóó ła' t'áá háiida diné bits'in shijaa'go yiyiiłtsą́ągo diné yóó'ada'ał'ínígíí Héíman-gag honíts'aa'di yóó'ádayiilaajį' ts'in naazhjaa'ígíí bíighahgóó bee ééhózinii yadahizhniishį́įh doo.

¹⁶Hamónah kin haal'áhígíí ałdó' ákwe'é doo. Kót'éego kéyah t'áá náhwiist'ą́ą́ nít'éé' hasht'éédahozhdoodlííł.

¹⁷Áko ni, diné nílíinii, tsídii ałtah ádaat'éii t'áá ałtso índa naaldlooshii ałtah ádaat'éii t'áá ałtso bich'į' handziihgo ábidiní, Bóhólníihii Diyin God kóní, Ízrel bidził naaznilii bighą́ą'di náádahaniihiigi át'éego bee áda'azįįdii ayóó ánéelą́ą́', áko náádahaniihiigi át'éego bee áda'azįįdii nihiba' hasht'eeshłéhígíí biniyé ahíhohkáahgo hágo áłah hohłeeh áádóó da'doo łghał índa dił dadoohdlį́į́ł.

¹⁸Béíshan nahós'a'dóó daneesk'ahii t'áá ałtso diné ayóó ádaat'éii éí deenásts'aa' nidahalinii, dibé yázhí nidahalinii, tł'ízí nidahalinii, dóola nidahalinii dadoołghał áádóó nihokáá'góó naat'áanii danilíinii bidił dadoohdlį́į́ł.

¹⁹Náádahaniihiigi át'éego bee áda'doozįįłii nihá hasht'eeshłéhídi hwiih dasoolį́į'jį' neesk'ahii dadoołghał áádóó nihił dahoniidoijį' dił dadoohdlį́į́ł.

²⁰Łį́į́' índa tsindaabąąs bijáád naakiígíí yee nidaabaahii áádóó diné ayóó ádaat'éii índa t'áá ałtah át'éego nidaabaahii éí shibikáá' adání bikáá'dóó daołghałgo bee hwiih dadoohłeeł, ní Bóhólníihii Diyin God.

²¹Áko bee ayóó ánísht'éii ał'ąą dine'é bitahgóó bééhózingo ádeeshłííł, áádóó hánihoní'ánígíí índa k'ídinishnii'go atíhooshłaaígíí ał'ąą dine'é t'áá ałtso bił béédahodoozįįł.

²²Éí bijį́ áádóó náás hoolzhishgóó Ízrel dine'é biDiyin God yídahółníihii nishłį́įgo bił béédahodoozįįł.

²³Áádóó ał'ąą dine'é éí Ízrel dine'é doo ákwii ádáát'įįdígíí biniinaa bi'disnáago bił béédahodoozįįł; ádił nida'iisíi'go biniinaa doo bik'i dínísh'į́į' da sélį́į́', áko hwe'ana'í danilíinii baa hodiní'ą́ągo t'áá ádzíłtso diltłish bee ho'doogą́ą́'.

²⁴T'óó badaa'ihígi ádajit'ínígíí áádóó bee haz'áanii dajiitíihii biniinaa haa nísíst'įįd áádóó doo honísh'į́į da sélį́į́'.

²⁵Éí bąą Bóhólníihii Diyin God kóní, K'ad lą́ą índa Jéíkab bits'ą́ą́dóó oochíiłii yisnááh danilíinii nahjį' kódeeshłíiłgo daabíí' nít'éé' yę́ę bíi'go áńdeeshdlííł, áádóó Ízrel dine'é t'áá ałtso baa a'ááh dínéesįįł áádóó shízhi' Diyinii baa łe'nisingo hánígo baa áháshyą́ą doo.

²⁶Ízrel dine'é t'áá bí bikéyahdi t'áadoo bił yéé' áhóle'í kééhat'į́įgo baa yádaznízin nít'éé' yę́ę áádóó na'adlo' shindajiisdéél nít'éé' yę́ę ałtso baa deizhdiyoonah.

²⁷Dadine'é bitahdę́ę́' náhoní'eezhgo áádóó hweda'ana'í danilíinii bikédaayahdę́ę́' áłah ánáhooshdlaago, áko índa ał'ąą dine'é t'óó ahayóí binááł Ízrel dine'é bitahgi dinishyin doo,

²⁸áko índa bídahojíłníihii nishłį́įgo áádóó biDiyin God nishłį́įgo hoł béédahodoozįįł, háálá ał'ąą dine'é bitahgóó yisnááh dazhdooleełgo ahonííł kaad áádóó t'áá ádzíłtso t'áá hó hakéyahjį' áłah ánáhodeeshdlííł, áko ał'ąą dine'é bitahdi doo ła' t'áá áánináádajikai da dooleeł.

²⁹Ts'ídá doo hats'ą́ąjį' hanáádínéeshniił da, háálá Ízrel dine'é shiNíłch'i Diyinii baa diní'ą́, ní Bóhólníihii Diyin God.