Read Navajo EZEKIEL 41 Bible Online

EZEKIEL 41 - Navajo bible

EZEKIEL 41

¹Áádóó índa hodiyingo haz'áníjį' shił niní'áázh, áádóó ákwii tsin naaki dego yaa'áhígíí yí'nééł'ąąd, nít'éé' t'áá áłah neeznáadi ké silá íídéetą́ą́', áko níbaal bii' hodílzinii naaniigo ákóníłtéél nít'éé'.

²Áádóó ch'é'étiin éí tsosts'idts'áadah ké silá ákóhoníłtéél áádóó ch'é'étiingi ni'dóó níléí wódahjį' nineel'áníjį' tseebíidi ké siláádóó náá'áłníí' ánízah; t'áá ałch'ijí ákót'é áádóó hodiyingo haz'ání góne' nááseego yí'nééł'ąąd, nít'éé' hastą́diindóó ba'aan tseebíí ké silá ákónízah, naaniigo éí tádiindóó ba'aan dį́į́' ké silá ákóhoníłtéél.

³Ákohgo hodiyingo haz'ání góne' yah ííyáago ch'é'étiin siláii t'áá ałch'ijí yí'nééł'ąąd, nít'éé' t'áá áłah naaniigo táadi ké siláádóó náá'áłníí' íídéetą́ą́'; ch'é'étiin éí neeznáadi ké silá ánízah índa naaniigo éí naakits'áadahdi ké silá áhoníłtéél.

⁴Áádóó hodiyingo haz'ánígíí biláahdi ła' nááhást'ą́; éí yínáá'nééł'ąąd, nít'éé' nááseego tádiindóó ba'aan dį́į́' ké silá ánízah áádóó naaniigo tádiindóó ba'aan dį́į́' ké silá ákóhoníłtéél; ákóhoníłtsogo haz'ą́, áko áshíłní, Díí kwe'é haz'ánígíí éí ts'ídá agháago hodiyingo haz'ą́.

⁵Índa kin bii' sohodizin bá ahénátł'inígíí yínáá'nééł'ąąd nít'éé' éí neeznáadi ké silá íídéetą́ą́'; díí kin bá nástł'inígíí binahjį' hooghan éí hastą́ądi ké siláádóó náá'áłníí' ákódaníłtsogo ádaalyaago ahéénínil.

⁶Áko díí hooghan ahéénínilígíí t'áá ałtso táa'go ałk'i dahooghan; ni'di hooghan ahéénínilígíí t'áá ałtso bikáa'gi dahooghango t'áá át'égo tádiingo náádahooghan; éí náábíkáa'gi tádiin náádahooghan kót'éego tádiin ałk'i dahooghan; ałk'i dahooghanígíí beego kin bii' sohodizin bá nástł'inígíí áłt'ą́ą́'í silį́į́', áko bá nástł'inígíí bikáá'góó dah náhást'ą́ągo ádahoolyaaígíí éí bee hooghan ałk'iih naaznilígíí de ádayósin; kin bii' sohodizin bá nástł'inígíí binahjį' hooghan ałk'iih naaznilgo bá nástł'inígíí tł'óó'dę́ę'go níl'į́įgo bitsį́į́dóó níléí bikáa'jį' aheedéetą́ą'go hahodiil'á.

⁷Táa'go ałk'i dahooghanígíí ałtis ádaníłtéelgo ádaalyaa, áko ayaadi hooghanídóó éí bikáa'di hooghanígíí áajį' atisgo niteel áádóó éí bikáá'dóó nááhooghanígíí áajį' hózhǫ́ niteel. Wóne'é ałníí'dóó níléí akáa'di hooghaníjį' hahazt'i'.

⁸Kin bii' sohodizin biyaadi ahéé'ítł'ingo ałdó' yiiłtsą́. Kin ayaadi sinilígíí éí bikáa'gi hooghan ałk'iih naaznilgo bee niłdzilígíí éí lók'aa' bee í'neel'ąąhí bíneel'ą́ągo dah náhást'ą́.

⁹Díí kin ałk'iih naaznilígíí bá nástł'inígíí éí tseebíí ké siláádóó náá'áłníi'gi ákwíídéetą́ą́', áádóó kin bii' sohodizin bá nástł'inígíí áádóó tł'óo'di ahééníná'ítł'ingo bita'gi yidziihígíí éí hooghan ałk'iih naaznilígíí bá haz'ą́.

¹⁰Éí kin bii' sohodizin binaagóó kin ałk'iih naaznilgo nineel'ánídóó tádiindóó ba'aan dį́į́' ké silá áhoníłtéelgo ahééhool'á.

¹¹Náhookǫsjígo kin ałk'iih naaznilígíí éí t'ááłá'í ch'é'étiinígíí bee bich'į' yah ahóót'i', shádi'ááhjí ałdó' kin ałk'iih naaznilígíí ałdó' t'ááłá'í ch'é'étiin bee bich'į' yah ahóót'i'; kin bii' sohodizin binaagóó dah náhást'ą́ągo bináz'áhígíí éí tseebíí ké siláádóó náá'áłníí' ákóníłtéél.

¹²E'e'aahjí kin bii' sohodizin bich'į'go kin ła' náánást'ą́; éí kin si'ánígíí naaniigo t'ááłáhídi neeznádiindóó ba'aan náhást'éíts'áadah ké siláádóó náá'áłníí' ákóníłtéél, nááseego éí t'ááłáhídi neeznádiindóó ba'aan ashdladiindóó ba'aan táá' ké siláádóó náá'áłníí' ákóhonízah; kin bá nástł'inígíí t'áá dį́į́'dę́ę'go tseebíí ké siláádóó náá'áłníí' ákódeidéetą́ą́'.

¹³Áádóó kin bii' sohodizin si'ánígíí ha'a'aahdóó e'e'aahjį' áníłtsooígíí yínáá'nééł'ąąd nít'éé', t'ááłáhídi neeznádiindóó ba'aan tsosts'idiin ké siláádóó náá'áłníí' ákónízah; éí bighą́ąhjį' t'áá bíni' haz'ánídóó kin e'e'aahjigo niní'áhíjį' yínáá'nééł'ąąd nít'éé', t'ááłáhídi neeznádiindóó ba'aan tsosts'idiin ké siláádóó náá'áłníí' ákónáánízah,

¹⁴áádóó kin bii' sohodizin bidááh gónaa t'áá bíni' haz'ánígíí t'áá bóóltą'go éí t'áá át'égo t'ááłáhídi neeznádiindóó ba'aan tsosts'idiin ké siláádóó náá'áłníí' ákóhoníłtéél.

¹⁵Kin bii' sohodizin si'ánígíí éí áádóó e'e'aahjigo t'áá sahdii náánást'ánígíí ałts'ą́ą́hjí bik'i chaha'ohgo ahééhool'áhígíí t'áá bił yínáá'nééł'ąąd nít'éé', t'áá át'égo t'ááłáhídi neeznádiindóó ba'aan tsosts'idiin ké siláádóó náá'áłníí' ákóhonízah.

¹⁶Kin bii' sohodizin bich'é'étiingi naa dah sitánígíí áádóó tsésǫ' ádaałts'óózí índa chaha'ohgo ahééhool'áhígíí éí t'áá bóóltą'go ni'dóó tsésǫ'íjį' t'áá át'é tsin neheeshjíí' t'éiyá ahééhiníkaadgo bee ályaa; tsésǫ'ígíí éí dáń'dadilbał dooleełgo át'é.

¹⁷Kin bii' sohodizin si'ánígíí biyi'dę́ę'go áádóó tł'óó'dę́ę'go éí níléí dáádílkał dego niní'áhíjį' ákónízahgo éí tsin neheeshjíí' ahééhiníkaadii t'áá át'é yínááda'nééł'ąąd.

¹⁸Nidaask'ęę' áádóó nidaashch'ąą'go éí páam sikaadii áádóó diyingo naal'a'í chérab wolyéii bił ałta' nínilgo ádaalyaago ahééhool'á; chérab wolyéii t'ááłá'í nítínígo ałts'ą́ąhjį' binii' dahólǫ́;

¹⁹ła' binii'ígíí éí diné binii', áko páam sikaadii yich'į'go binii', łahjígo binii'ígíí éí náshdóítsoh bitsiijį' ditł'ooígíí binii', éí łahjí páam sikaadii deiníł'į́įgo kót'éego dabikáa'go t'áá át'éé nít'éé' ahééhool'á.

²⁰Hodiyingo haz'ánígi ni'dóó dáádílkał de niní'áhíjį' áádóó ahééniníkaadígíí kót'éego dabikáa'go ahééhool'á.

²¹Hodiyingo haz'ánígi bich'į' yah e'etiinígi ch'é'étiin siláii ánoolninígíí índa agháago hodiyingo haz'ání ánoolninígíí t'áá áłah dik'ą́ągo ádaalyaa.

²²Bikáá' náá'iiniihí éí tsin bee ályaa booshk'iizhjí naanídaaz'áhígóó níléí ni'jį' nihidadii'áajį' áádóó bááłk'iisdóó níléí ni'di éí t'áá át'é tsin bee ádaalyaa, áko dego ashdla' ké silá ákónízah; naaniigo éí táá' ké siláádóó náá'áłníí' áníłtéél áádóó áshíłní, Díí éí Bóhólníihii bidááhdóó bikáá' náá'iiniihí si'ánígíí át'é.

²³Áádóó hodiyingo haz'ánígíí índa agháago hodiyingo haz'ánígíí éí t'áá áłah ákwe'é ałts'ą́ą́hjí dáádílkał naaki dahidínil.

²⁴Áádóó éí dáádílkał t'áá áłah ałníi'gi ąą ánáht'įįh.

²⁵Áádóó hodiyingo haz'ánígíí bich'į' dáádílkał ąą ánál'įįhígíí wóne'dę́ę́' ahééhool'áhígíigi át'éego dáádílkał bikáá'dę́ę'go páam sikaadii índa diyingo naal'a'í chérab wolyéii bééda'alyaago nidaask'ęę', áádóó tł'óó'dę́ę́' yah ahóót'i'ídę́ę́' bidáádílkał dah hidínilíjį' tsin neheeshjíí' ditánígíí bik'i niilkaad.

²⁶Áádóó kin bii' sohodizin si'ánígíí bichaha'oh ałts'ą́ą́hjígo índa booshk'iizhjí hooghan biniyé nahaz'ánígíí éí tsésǫ' ádaałts'óózígo ádaalyaa índa páam sikaadii bééda'alyaago bikáá' nidaask'ęę' áádóó áajį' tsin neheeshjíí' ditánígíí bik'i niilkaad.