Read Navajo EZEKIEL 42 Bible Online

EZEKIEL 42 - Navajo bible

EZEKIEL 42

¹Áádóó tł'óo'di ahééhool'áhíjį' shił ch'ínáánát'áazhgo kin bii' sohodizindóó náhookǫsjigo kin si'ą́ą́ léi'jį' shił nináánát'áázh; éí kin bii' sohodizin si'ą́ą́dóó náhookǫsjigo doo nízaadi kin si'ą́ą da.

²Díí kin éí nááseego t'ááłáhídi neeznádiindóó ba'aan tsosts'idiin ké siláádóó náá'áłníí' áhoníłnééz, áádóó náhookǫsjígo ch'é'étiin hólǫ́; naaniigo t'éiyá tseebídiindóó ba'aan ashdla' ké siláádóó náá'áłníí' áhoníłtéél.

³Wóne'di ahééhool'áhígíí tádiindóó ba'aan dį́į́' ké siláhígíí binaagóó áádóó tł'óo'di hótł'izgo ahééhool'áhígíí bíighahjį' táá' ałk'i dahooghan; éí bitsį́į́góó dahonít'i'.

⁴Díí ałk'i dahooghanígíí náhookǫs bich'ijígo bich'é'étiin dahólǫ́ǫgo naaniigo tsosts'idts'áadah ké silá ádaníłtéél. Díí dahooghanígíí bitsį́į́góó t'ááłáhídi neeznádiindóó ba'aan tsosts'idiin ké silá áníłnéezgo honít'i'.

⁵Índída akáa'di dahooghanígíí éí t'ah t'ą́'ídi hidees'nilígíí biniinaa ata'gi dahooghanígíí áádóó atł'áahdi dahooghanígíí éí bi'ohgo ádaníłtso.

⁶Háálá díí táa'go ałk'i dahooghanígíí doo bíyah da'nii'áágóó ádaalyaa; éí bąą akáa'di dahooghanígíí t'ą́ą́' hidees'nilgo ádaalyaa.

⁷Áko ałk'i dahooghanígíí tł'óó'jígo bich'ą́ą́h tsé yítł'inígíí éí tseebídiindóó ba'aan ashdla' ké siláádóó náá'áłníí' ákónízah.

⁸Háálá tł'óo'di ahééhool'áhígíí bíighahjį' ałk'i dahooghango hadiit'i'ígíí éí tseebídiindóó ba'aan ashdla' ké siláádóó náá'áłníí' áhoníłnééz áádóó kin bii' sohodizin bich'ijígo éí t'ááłáhídi neeznádiindóó ba'aan tsosts'idiin ké siláádóó náá'áłníí' áhoníłnééz.

⁹Ałk'i dahooghango hadiit'i'ígíí biyaadi tł'óó'dę́ę'go ła' yah iigháahgo ha'a'aah bich'į'dę́ę'go yah ahóót'i'.

¹⁰Wóne'di ahééhool'áhígíí ha'a'aahjígo t'áá bíni' haz'ánígíí áádóó kin bii' sohodizin si'ánígíí binaashiijí tsé yítł'inígíí bii' dahooghan.

¹¹T'áá náhookǫs bich'ijí át'éhígi át'éego kwe'é ałdó' kin tsį́į́góó honít'i'; bída'néél'ąądígíí t'áá ákódaníłtso índa t'áá ákót'éego ałdó' ályaa índa t'áá ákót'éego yah adahwiizt'i'.

¹²Shádi'ááhjígo ałk'i dahooghanígíí bidáádílkał dahólǫ́ǫgo éí ła' wóne'jį' yah adeeshááł nízingo ha'a'aahjigo kin niní'áhídę́ę'go hahodiit'i'ígíí bidáádílkał hólǫ́.

¹³Áádóó éí diné áshíłní, Náhookǫsjígo ałk'i dahooghanígíí áádóó shádi'ááhjígo ałk'i dahooghanígíí éí t'áá sahdii haz'ánígíí bíighahgóó diyingo sinilii ákwe'é nááda'iiłniihii éí Bóhólníihii yich'į' ninákahígíí agháago dadiyingo náádahaaznii'ii nídeidį́įh doo; biyi' góne' diyingo nahaz'ánígíí biniinaa nááda'iiłniihii éí agháago hodiyingo náádahaaznii'ii ákóne' nidayiiníił doo; ak'áán nááhániihii áádóó ádił ni'iidzííhjí nááhániihii índa ádił oodzíi'go bee k'ééhodoodǫǫłgo nááhániihii éí ákwii nidayiiníił doo.

¹⁴Nááda'iiłniihii níléí tł'óo'jį' ch'ídeeshááł, danízingo éé' dazdósinii Bóhólníihii bá nidajilnishgo daha'éé' éí átsé háádazhdii'niłgo áádóó índa náánáła' daa'éé' éí biih nídajikahgo éí daha'ée'go índa níléí tł'óo'jį' diné áłah náádleełjį' áajį' ch'éédajikah doo.

¹⁵Áádóó kin bii' sohodizin si'ánígíí bik'i dinaago nahaz'ánígíí ałtso yída'nééł'ąądgo ha'a'aahdę́ę'go yah a'atiin góne' shił ch'íní'áázh áádóó tł'óó'dę́ę'go yínááda'nééł'ąąd.

¹⁶Ha'a'aahjí ánízahígíí yínáá'nééł'ąąd nít'éé', lók'aa' bee í'neel'ąąhí ashdladi neeznádiin ahą́ą́h dí'á ákónízah.

¹⁷Náhookǫsdę́ę'go ał dó' t'áá ákónízah.

¹⁸Shádi'ááhdę́ę'go ałdó' t'áá ákónízah.

¹⁹E'e'aahjigo yínáá'nééł'ąądgo ałdó' t'áá ákónízah.

²⁰T'áá dį́į́'dę́ę'go yí'nééł'ąąd. Áko binaa ahéé'ítł'inígíí éí lók'aa' bee í'neel'ąąhí ashdladi neeznádiin ahą́ą́h dí'á áníłnééz áádóó naaniigo ałdó' t'áá ákóníłtéél. Binaa ahéé'ítł'inígíí éí dadílzinii áádóó doo dadílzinii bita' ní'áago ahééní'á.