Read Navajo EZEKIEL 43 Bible Online

EZEKIEL 43 - Navajo bible

EZEKIEL 43

¹Áádóó bik'ijį' ha'a'aahjigo yah a'atiinjį' shił niní'áázh,

²áádóó ákwii Ízrel dine' é biDiyin God bee bits'ádi'nílíidii ha'a'aahdę́ę'go áajį' yildohgo yiiłtsą́; tó ayóó ánéelą́ą́' dzoołhał nahalingo Diyin God biinéé' diists'ą́ą́' áádóó bee bits'ádi'nílíidii nahasdzáán bikáá'góó bee ni'deezlííd.

³Díí shił ádzaaígíí Jerúsalem atíidoolííł biniyé Diyin God honíle' yę́ędą́ą́' nahalin índa Kííbar tooh nílínígíí bibąąhdi shił ádzaa yę́ę nahalin áádóó ni'jį' níshjool.

⁴Bóhólníihii bits'ádi'nílídígíí ha'a'aahdę́ę'go yah a'atiindę́ę'go kin bii' sohodizin góne' yah aaldoh.

⁵Áko Bóhólníihii biNíłch'i Diyinii náshidiiłtį́įgo wóne'di haz'ání góne' yah ashííłtį́ áádóó, shoo, ákwii Bóhólníihii bee bits'ádi'nílíidii kin bii' sohodizin bii' hadéébįįd.

⁶Ákwii diné shíighahdóó sizį́įgo kin bii' sohodizin bii'dę́ę́' ła' shich'į' hadzoodzíi'go diséts'ą́ą́'.

⁷Áko áshíłní, Diné nílíinii, kwe'é shibikáá'dóó nahat'áii si'ą́ą doo áádóó ákwii dínís'eez doo. Ákwii Ízrel dine'é hool'áágóó bitah honishłǫ́ǫ doo, índa Ízrel dine'é áádóó aláahgo honanit'a'í nídaadleełii shízhi' doo ílį́į́góó doo ánáádazhdoodlíił da biniyé hwe'eda'alyaii doo ánáádazhdoodlíił da, índa aláahgo naat'áanii danilį́į́ nít'ée'ii bee bééhániihígíí dah daask'id bighą́ą'di ádayiilaaígi doo nináádazhdoo'nił da.

⁸Shikin bii' sohodizin bich'é' étiin siláii áádóó bá íí'áii bíighahdóó aláahgo naat'áanii danilíinii bighandóó ch'é'étiin siláii índa bá íí'áii ádayiilaa, áko t'áá hazhó'ó ítł'inígíí t'éiyá nihita'gi naní'á; doo daaldinígi ádáát'įįdígíí bee shízhi' diyinii t'áá íiyisí doo ílį́į́góó ádayiilaa, áko sháhóóchįįdgo áhoséłdįįd.

⁹K'ad éí doo nááda'jiłjił da doo, índa aláahgo naat'áanii danilį́į́ nít'ée'ii bee bééhániihígíí nahjį' kódazhdoolííł; ákódadziidzaago hool'áágóó hatahgi honishłǫ́ǫ doo.

¹⁰Diné nílíinii, Ízrel dine'é doo ákwii ádáát'įįdii yaa yádadínóozįįł biniyé kin bii' sohodizin bich'į' ííshją́ą́ ánílééh áádóó bik'ehgo ályaaígíí yídadí'nóoł'ąął.

¹¹Áko doo ákwii ádáát'įįdii t'áá át'é yaa yádaniizį́į'go kin bii' sohodizin ályaaígíí éí hazhó'ó bee bił hodíílnih: bik'ehgo ályaaígíí áádóó yah ada'iiztiinígíí índa ch'ída'iiztiinígíí ts'ídá hazhó'ó bee bił hodíílnih; biyi'di áhoot'éhígíí áádóó binaagóó áhoot'éhígíí éí hazhó'ó hasht'e'nidaas'nilígíí áádóó bik'ehgo hoogáałii áádóó bee haz'áanii t'áá ałtso bee bił hodíílnih; díí t'áá ałtso binááł bee bá ak'e'dííłchííł, áko hazhó'ó nidaas'nilígíí yik'ehgo áda'ał'į́į dooleełii t'áá ałtso yik'eh dahół'į́į doo.

¹²Díí kin bii' sohodizin bibee haz'áanii át'é. Dziłghą́ą'gi kin bii' sohodizin si'ánígíí éí t'áá bił áádóó bik'i dinaago haz'ánígíí t'áá sahdii ats'ádeet'ą́, áádóó t'áá íiyisí hodiyingo haz'ą́ą doo. Díí lą́ą kin bii' sohodizin bibee haz'áanii át'é, jó'akon.

¹³Kin bii' sohodizin si'ą́ągi kúbit bee í'neel'ąąhí bik'ehgo bída'néél'ąądígi át'éego t'áá ákót'éego kwe'é ałdó' bikáá' náá'iiniihí bí'néél'ąąd; kúbit éí ach'oozhlaa'dóó yílá aníi'giígíí bílátahjį' áádóó dį́į́' bik'eh áníłtsogo óolyé. Bikáá' náá'iiniihí bá si'ánígíí k'asdą́ą́' naakidi ké silá ánízah doo áádóó k'asídą́ą́' naakidi ké silá áníłtéel doo áádóó éí bibąąhgóó t'ááłáhídi yílá deests'ǫ́ǫdgo ahéé'ní'áa doo.

¹⁴Bikáá' náá'iiniihí bá si'ánídóó áłtsé dah náhást'áníjį' táá' ké siláádóó náá'áłníí' ánízah doo; éí dah náhást'ánígíí k'asdą́ą́' naakidi ké silá bíighahgo ákóhoníłtéelgo ahééhool'áa doo. Áádóó dah náhást'ą́ą́dóó dego éí hastą́ą́h ké siláádóó náá'áłníí' ákónízah doo áádóó áadi k'asdą́ą́' naakidi ké silá ákóhoníłtéelgo ahéénínááhool'áa doo.

¹⁵Éí dah náhást'ą́ą́dóó hastą́ądi ké siláádóó náá'áłníí' ánízahdi bikáá' náá'iiniihí dah si'ą́ą doo; éí bikáá'dóó dadeekį́į́góó adee' yadaa'áa doo.

¹⁶Bikáá' náá'iiniihí bikáa'di éí łahdę́ę'go naadiindi ké siláádóó náá'áłníí' bíighahgo áníłtéel doo, áko t'áá dį́į́'dę́ę'go aheedaníłtéel doo.

¹⁷Biyaadi dah náhást'ą́ągo ahééhool'áhígíí, éí łahdę́ę'go naadiin dį́į́' ké silá bíighahgo áníłtéel doo, áko t'áá dį́į́'dę́ę'go aheedaníłtéel doo, áádóó bibąąhgóó ahééní'áhígíí éí neeznáá dah alzhin bíighahgo ánízah doo; biyaadi éí k'asdą́ą́' naakidi ké silá bíighah áníłtéelgo ahéénáání'áa doo; bikáá' náá'iiniihí dah si'áníjį' ha'a'aahdę́ę'go ałk'i hoo'niłí bich'į' haaz'áa doo.

¹⁸Áádóó Bóhólníihii ánááshidoo'niid, Diné nílíinii, Bóhólníihii Diyin God kóní, Éí bijį́įdi bikáá' náá'iiniihí ályaago bikáá'dóó bik'ehgo hoogáałii bik'ehgo didlidgo náádahaniihii deididoołił, áádóó naaldlooshii náádahaaznii'ii bidił yikáa'gi tádeididoosas.

¹⁹Bóhólníihii Diyin God ání, Líívai dine'é bits'ą́ą́dóó nááda'iiłniihii ahoolchíiłii, éí Zéídak ba'áłchíní ahoolchíiłii, honishłóníjį' yah anídaakahgo shá nidaal'a'í éí dóola yáázh ádił oodzíí'jí nááhidoonihii baa dííłtééł.

²⁰Dóola yáázh bidiłígíí ła' nídidííkáałgo bikáá' náá'iiniihí akáa'di dah si'ánígíí éí naanídaaz'áhídóó adee' dadeez'áhígíí bee dah daalchíi'go ádadííliił áádóó ałdó' bikáá'dę́ę́' naanídaaz'áhígi dił bee dah daalchíi'go ádadííliił índa dah náhást'ą́ągo ahééhool'áhígíí bibąąhgóó dił bee ahééjíchii'go ádíílííł; kót'éego bikáá' náá'iiniihí éí bí'díídee'go áádóó diyingo ádíílííł.

²¹Índa dóola yáázh ádił oodzíí'jí nááhaaznii'ii kin bii' sohodizin si'ą́ą́dóó, nílááh, tł'óo'di biniyé nihoot'áníjį' ch'ídííłtéełgo áadi didoodlił.

²²Biiskání t'áá ákót'éego tł'ízíchǫǫh ádił ni'iidzííhjí nááhániihii doo bąąh dah haz'áanii nínááhidííłnih, áádóó bikáá' náá'iiniihí bí'díídee'go ádíílíłígíí biniyé bidił t'áá dóola bidił nisínísas yę́ęgi át'éego nináádíísas.

²³Díí bí'díídee'go íinilaago, áko índa dóola yáázh doo bąąh dah haz'áanii índa deenásts'aa' naakaídę́ę́' ła' doo bąąh dah haz'áanii Bóhólníihii baa didíí'ááł.

²⁴Dóola yáázh áádóó deenásts'aa' éí Bóhólníihii baa didíí'ááł áádóó nááda'iiłniihii éí áshįįh yik'ídeidooniłgo deidiłidgo Bóhólníihii yich'į' náádeidiyoołnih.

²⁵Áko tł'ízí t'ááłá'í índa dóola t'ááłá'í áádóó deenásts'aa' t'ááłá'í naakaídę́ę́' ła' doo bąąh dah nahaz'áanii ła'a jį́įjį' ádił oodzíí'jí shich'į' náádahołniihgo tsosts'id jį́ adooleeł.

²⁶Nááda'iiłniihii éí tsosts'id jį́įjį' bikáá' náá'iiniihí yikáá' bee k'ééhoodǫǫłii náádayiiłniihgo bi'didéehgo ádeidoolííł. Kót'éego bikáá' náá'iiniihí diyingo ats'ádeet'ą́ągo ádeidoolííł.

²⁷Tsosts'id yiską́ą́dóó bik'ijį' bikáá' náá'iiniihí bikáa'jį' nihá didlidgo nááhániihii índa hózhǫ́ǫ́jí nááhániihii éí nááda'iiłniihii náádayiiłniihgo yaa nídidookah, áko índa nihidínéesįįłgo náánihidideesh' nił, ní Bóhólníihii Diyin God.