Read Navajo EZEKIEL 44 Bible Online

EZEKIEL 44 - Navajo bible

EZEKIEL 44

¹Kin bii' sohodizin si'ą́ą́dóó ha'a'aahjigo aláahdi yah a'atiinjį' shił niní'áázh; éí dá'deetą́ą́ lá.

²Áko Bóhólníihii áshidííniid, Díí dáń'dítį́hígíí éí t'áá dá'deetą́ą dooleeł, índa ts'ídá doo ąą ádoolníił da; diné ła'da doo choizhdooł'įįł da, háálá shí Ízrel biDiyin God Bóhólníihii ákóne' ch'íhoníle'; éí bąą náásgóó t'áá dá'deetą́ą doo.

³Éí naat'áanii hoo'áałii ákǫ́ǫ́ nídídáahgo áadi shinááł ná'ádį́įh doo; naat'áanii nilíinii yah a'atiin góne' yah adoogááł áádóó nihééhédáahgo éí chaha'oh haz'ání góne' ch'ééhédáah doo.

⁴Áádóó náhookǫsdę́ę'go yah a'atiin góne' shił yah íí'áázh, áko kin bii' sohodizin si'ánígíí bidááhdóogo shił niní'áázh; déé'į́į́' nít'éé', shoo, Bóhólníihii bee bits'ádi'nílíidii kin bii' sohodizin t'áá át'é bii' hadeezbingo yiiłtsą́ áádóó ni'jį' níshjool.

⁵Áko índa Bóhólníihii áshíłní, Diné nílíinii, kin bii' sohodizin si'ą́ągi bik'ehgo hoogáałii índa bibee haz'áanii t'áá ałtso bee nił hodeeshnihígíí éí t'áá át'é yíní'ínígíí índa dinits'a'ígíí hanisííd; kin bii' sohodizin góne' yah anídaakah dooleełii índa áádę́ę́' ch'éédaakah dooleełii ts'ídá hazhó'ó hadíísił.

⁶Ízrel dine'é naastee'ii kóbididííniił, Bóhólníihii Diyin God kóní, Doo haldinígi ádaoht'ínígíí k'adí.

⁷Jó, doo Jew dine'é danilíinii bijéí doo daalzį́į'ii áádóó doo bąąh nídahineeshgizhii shikin bii' sohodizin góne' yah adahishoo'eezhgo shich'iyą' éí ak'ah áádóó dił náádahołniihgo t'óó baa'ih ádaohłaa, áádóó doo haldinígi ádaoht'ínígíí t'áá ałtso biniinaa nihił aha'dinisht'áanii dayiizti'.

⁸Índa dadólzinii doo shá baa ádahołyą́ą da nít'éé', nidi doo Jew dine'é danilíinii ákwii nidasoonilgo shikin bii' sohodizin yaa ádahalyą́ą́ nít'éé'.

⁹Áko Bóhólníihii Diyin God kóní, Dé'éyóní éí Ízrel dine'é bitahgi kééhojit'íinii hajéí doo daalzį́į'ii índa doo hąąh náhineeshgizhii shikin bii' sohodizin góne' ts'ídá doo yah azhdoogáał da.

¹⁰Ízrel dine'é shits'áhaaskai yę́ędą́ą́' Líívai dine'é nízaadgóó shits'ákaígíí éí ha'eda'alyaii bich'į' nidahojiłáago doo ákwii ádajíít'įįdii biniinaa atídaho'dil'į́į doo.

¹¹Ákondi kin bii' sohodizin bił haz'ą́ągi yah ada'iiztiinígíí baa ádahojilyą́ągo ákwii hondaanish doo, áádóó kin bii' sohodizin góne' naanish danilíinii baa nidajikai doo; didlidgo náádahaniihii áádóó diné bá náádahaniihii nidadziłtseed doo índa diné bá nidajil'a'go ákwii hanaanish danilíinii bindajilnish doo.

¹²Líívai dine'é éí Ízrel dine'é bi'eda'alyaii bidáahjį' bá nidajis'a'go kót'éego Ízrel dine'é nida'iisíihgo ádajiilaaígíí biniinaa Bóhólníihii Diyin God ání, Doo ákwii ádajíít'įįdii bik'é ts'ídá t'áá ti'dahwiizhdoonihí, dishníigo hwee ádee hadeesdzíí'.

¹³Nááda'iiłniihii doo dajílį́į́góó doo shit'áahjį' dazhdookahgo shá nidazhdool'aał da, índa shidiyingo chodao'íinii éí t'áá íiyisí dadiyinígíí doo bit'áahjį' dazhdookah da, nidi t'óó bee haa yádahóósįįdii índa doo yildinígi ádajíít'įįdii bee hohodiit'i'go nidajikai doo.

¹⁴Azhą́ ákót'ée nidi, kin bii' sohodizin t'áá bee hódahólníih doo, índa ákwe'é naanish nidaat'i'ígíí t'áá ałtso baa nidajikai doo, índa wóne'é naanish danilíinii éí t'áá ałtso baa nidajikai doo.

¹⁵Ízrel dine'é shits'ą́ą́dóó yóó'aheeskai yę́ędą́ą́', Líívai dine'é éí Zéídak biye'ké náá'iiłniihii danilíinii shikin bii' sohodizin yaa ádahalyą́ą́ nít'é'ígíí shit'áahjį' ałnáádaakahgo shá nidaal'a' doo; t'áá ákǫ́ǫ́ shinaagóó nidajikaigo ak'ah índa dił shich'į' náádajiiłniih dooleeł, ní Bóhólníihii Diyin God;

¹⁶shikin bii' sohodizin góne' yah anídajikah doo, índa shá nidazhdool'aał biniyé shibikáá' adání bit'áahjį' nídazhdikah doo, áádóó bich'į' dahóół'aadígíí bik'eh dahojíł'į́į doo.

¹⁷Wóne'di haz'ání góne' yah anídajikahgo ninádajil'aahgo kót'ée doo; éé' aghaa' bee ádaalyaii ádąąh dajit'į́įgo éí doo daha'ée' da doo, nidi nidajil'a'go áłts'óózígo yisdizígíí bee na'at'ą́hí łigaii dits'idgo ályaii éí daha'ée' doo.

¹⁸Áłts'óózígo yisdizígíí bee na'at'ą́hí łigaii dits'idgo ályaii hatsii' nídaazt'i'go éí dahach'ah doo áádóó áłts'óózígo yisdizígíí bee na'at'ą́hí łigaii dits'idgo ályaii dahatł'aaji'ée' doo; éé' éí tó ąąh háádeiniłka'ii éí t'áá ałtso ádąąh dajit'į́į doo.

¹⁹Ákohgo náá'iiłniihii dajílíinii tł'óo'di ahééhool'áhídi diné áłah nilínígíí bich'į' ch'éédajiikáahgo áłtsé ha'éé' bee nidajil'a'ii háádazhdii'niłgo hodiyingo nahaz'ání góne' ninádaji'nił doo áádóó náánáła' éé' biih nídajikah doo, áadi índa diné áłah nilínígíí bich'į' ch'éédajikah doo; éí t'áadoo ádadziidzaagóó éí ha'éé' bee nidajil'a'ii bee diné diyingo ádazhdoolííł.

²⁰Náá'iiłniihii dajílíinii éí hatsii' doo nídajishih da doo, áádóó doo t'áá íiyisí nineez nídaadleeh da doo, nidi t'áá áłts'ísígo ádadzósin doo.

²¹Náá'iiłniihii dajílíinii ła'da wóne'di haz'ání góne' yah ajigháahgo wáin ádąąh jit'į́į doo.

²²Índa asdzání bąąh áhásdįįdii, doodaii' asdzání yóó'ábi'doolt'e'ii doo ła' hwe'asdzą́ą́ ázhdoolíił da, nidi Ízrel dine'é bitahdóó ch'ikę́ę́h t'ah doo diné bee haleehii ła' hwe'asdzą́ą́ ázhdoolííł, éí doodaii' náá'iiłniihii ła' daaztsą́ągo éí be'asdzą́ą́ nít'ée'ii hwe'asdzą́ą́ ázhdoolííł.

²³Náá'áłdó' dadiyinii índa doo dadiyinii éí t'áá ał'ąą ádaat'éegi shidine'é bee nidazhnitin doo áádóó doo bí'déédee'ii índa bí'déédee'ii bił béédahózin doo.

²⁴Diné ła' ahinídiiltłi'go shibik'ehgo hoogáałii bik'ehgo ánihwiit'aahjį' bá baa nídajit'į́į doo; hodiyingo áłah nída'adleehii bee nihoní'áanii baa nijikaigo shibee haz'áanii áádóó bee nihoyí'áanii bik'eh dahojíł'į́į doo índa shiháá'áyį́į́h jį́ t'éiyá t'áá sahdii át'éego ádadzósingo ákóne' dahozdósin doo.

²⁵Diné daaztsáanii doo bee ádazhdidoolchxǫǫł da biniyé doo bit'áahjį' nidajikai da doo, nidi hazhé'éda, hamáda, haye'da, hatsi'da índa diné bił hajíí'áazhiida áádóó halahda t'ah doo diné bee haleehii éí t'áá háiida ła' daaztsą́ągo éí t'éiyá bit'áahjį' jidoogáałgo bee ázhdidoolchxǫǫł.

²⁶Hó'díídee'dóó bik'ijį' tsosts'id yidoołkááł.

²⁷Hodiyingo haz'ą́ą́ góne' yah anízhdoodááł bijį́į́ góne' áadi nináájíl'a' dooleeł biniyé ádił ni'iidzííhjí nááhániihii áłtsé ádá nááhizhdoołnih, ní Bóhólníihii Diyin God.

²⁸Náá'iiłniihii ídlínígíí éí daahó, shíyee' hwíí' nishłį́; Ízrel dine'é bitahgi íí' dadooleełii doo ła' baa didíí'áał da, shíyee' hwíí' nishłį́.

²⁹Ak'áán nááhániihii áádóó ádił ni'iidzííhjí nááhániihii índa doo ákǫ́ǫ́ ájít'į́į́jí nááhániihii éí dahach'iyą' doo, áádóó Ízrel dine'é bitahdóó nááhidoonih biniyé t'áá sahdii ats'ádahaas'nilii daahó doo.

³⁰Áłtsé neest'áanii ał'ąą ádaat'éii t'áá ałtso áádóó shich'į' nááhániihii a ł'ąą ádaat'éii t'áá ałtso nááda'iiłniihii baa dah hidoh'aah doo, áádóó diné éí áłtsé ak'áán táádayoo'nihígíí nááda'iiłniihii yaa dayiikaah doo; ákódaoht'į́įgo danihighan bik'idajishdlíi doo.

³¹Náá'iiłniihii dajílíinii éí tsídiida, éí doodaii' naaldlooshiida t'áá bíni' daaztsą́ągo, éí doodaii' náánáła' naaldlooshiida biisxį́įgo éí doo dajilghał da doo.