Read Navajo EZEKIEL 46 Bible Online

EZEKIEL 46 - Navajo bible

EZEKIEL 46

¹Bóhólníihii Diyin God kóní, Ałníi'gi ahééhool'áhígíí ha'a'aahdę́ę'go dáń'dítį́hígíí hastą́ą́h néílkáahjį' dáń'dítį́įh doo, nidi háá'áyį́į́h jį́į́ góne' índa dah néitį́į́h góne' éí shá bíighah ąą át'ée doo.

²Naat'áanii nilíinii éí yah a'atiin góne' yah adoogáałgo ałts'ą́ą́hjí tsin íí'áhígíí ła' yíighahgi yidoozįįł áádóó nááda'iiłniihii éí didlidgo nááhániihii índa hózhǫ́ǫ́jí nááhániihii há hasht'edeidoolííł; hó t'éí yah a'atiingi nahozhdoołaał áádóó ch'éézhdoodááł; i'íí'ą́ągo índa dáń'didootį́į́ł.

³Háá'áyį́į́h jį́ ná'ádleehgo áádóó dah néitį́įhgo kéyahdóó dine'é díí dáń'dítį́įhgi Bóhólníihii bidáahgi ninádahałaah doo.

⁴Naat'áanii nilíinii éí háá'áyį́į́h jį́ aleeh góne' dibé yázhí hastą́ągo hadaałt'éii índa deenásts'aa' t'ááłá'ígo hadaałt'éii didlidgo nááyiiłnih doo.

⁵Ak'áán éí íífa hadeezbingo índa deenásts'aa' bóóltą'go nááyiiłnih doo áádóó dibé yázhí éí t'áá bízhneel'ánígo ak'áán yił nááyiiłnih doo índa ak'áán íífa hadeezbingo éí áliv ak'ah t'ááłáhídi yikááł bídaóltą'go yił nááyiiłnih doo.

⁶Dah néitį́į́h góne' éí dóola yáázh hadaałt'éii áádóó hastą́ą́h dibé yázhí índa t'ááłá'í deenásts'aa' hadaałt'éii náádayiiłnih doo.

⁷Ak'áán íífa hadeezbingo éí dóola yáázh bóóltą'go áádóó ak'áán íífa hadeezbingo éí deenásts'aa' bóóltą'go áádóó dibé yázhí éí t'áá bízhneel'ánígo ak'áán bóóltą'go nááyiiłnih doo índa ak'áán íífa hadeezbingo éí áliv ak'ah t'ááłáhídi yikááł bídaóltą'go nááyiiłnih doo.

⁸Naat'áanii yah anádáahgo éí yah a'atiin bik'i chaha'ohídę́ę́' yah anádáah doo áádóó t'áá ákóne' ch'ééhédáah doo.

⁹Hodílzingo áłah nída'adleeh bee nidahwiist'ání góne' diné éí Bóhólníihii yidááhdóó nehekáahgo nahodeeshłaał jinízingo éí biniyé náhookǫsdę́ę́' yah adajiikáhígíí shádi'áahjigo ch'éédajiikáah dooleeł, áádóó shádi'ááhdę́ę́' yah adajiikáhígíí éí náhookǫsjigo ch'éédajiikáah dooleeł; yah a'atiindę́ę́' yah ajííyáhígíí doo t'áá áajigo nát'ą́ą́' ch'éézhdoodáał da, nidi t'ááłá'í jinítínígo t'áá náásee ch'íjiikáah doo.

¹⁰Yah áníjíkahgo naat'áanii hoł yah anádáah doo, áádóó ch'ééjiikáahgo naat'áanii ałdó' ch'ínádáah doo.

¹¹Áda'azįįdgo áádóó hodiyingo áłah nída'adleeh bee nidahodeest'ánígíí baa náhwiilzhíishgo dóola yáázh t'ááłá'ígo áádóó íífa bee ak'áán hadeezbingo bóóltą'go áádóó deenásts'aa' t'ááłá'ígo áádóó ak'áán éí íífa bee hadeezbingo bóóltą'go índa dibé yázhí éí t'ááłá'í nítínígo ak'áán t'áá bízhneel'ánígo bik'eh níką́ągo ákwii áliv ak'ah t'ááłáhídi yikááł bíighahgo t'áá ałtso bídaóltą'go nááhániih dooleeł.

¹²Naat'áanii t'áá bí íinízingo Bóhólníihii yich'į' náádi'yoołnihgo éí didlidgo nááhániihii, doodaii' hózhǫ́ǫ́jí nááhániihii át'éego éí ha'a'aahjigo dáń'dítį́hígíí há ąą ánál'įįh doo; t'áá háá'áyį́į́h jį́ náá'iiłnihígi át'éego didlidgo nááhániihii, doodaii' hózhǫ́ǫ́jí nááhániihii nááyiiłnih doo áádóó índa ch'ééjiidáahgo hakéédę́ę́' dáń'dílkał doo.

¹³T'áá ákwíí jį́ dibé yázhí hadaałt'éii nááhániihgo hasht'eiyínísin doo, t'áá ákwíí bíní didlidgo nááhániihii áajį' ahíníiłgo íínísin doo.

¹⁴T'áá ákwíí bíní ak'áán nááhániihii hasht'eiyínísin doo; íífa bee ak'áán hadeezbingo hastą́ągo ahááką́ągo t'ááłáhí haaką́ bíighahgo áádóó áliv ak'ah t'ááłáhídi yikááł ałníí' t'áá bich'į' anéelt'e'go ak'áán t'óó bee niłhinígo ályaago éí nááhániihgo íínísin doo; díí t'áá áłahíjį' ak'áán nááhániihgo éí Bóhólníihii bich'į' bee hoogáałii át'éego ahool'áa doo.

¹⁵Kót'éego dibé yázhí índa ak'áán áádóó áliv ak'ah t'áá áłahjį' didlidgo nááhániih doo biniyé t'áá ákwíí bíní hasht'éédayiil'įįhgo ahool'áa doo.

¹⁶Bóhólníihii Diyin God kóní, Naat'áanii éí bikéyah ła' biye'ké ła' yeidiní'ą́ągo ííshją́ą́ éí kéyah baa deet'ánígíí bíí' dooleeł.

¹⁷Naat'áanii bikéyah ła' binaalte' yeidiní'ą́ągo, naalte' jílíinii kéyah haa deet'ánígíí t'áá jótą'go baa hózhǫ́ǫgo yihahígíí baa hoolzhiizhgo kéyah jótą'ii naat'áanii bíí' nídoodleeł; éí kéyah biye'ké daabíí' dooleeł.

¹⁸Naat'áanii ałdó' diné bíí' danilíinii doo bits'áhizhdoonił da biniyé diné bíí' danilíinii doo ła' bighazhdidoot'áał da; t'áá hóhígíí t'éiyá haye'ké baa hizhdi'aah doo; kót'éego shidine'é ła' bikéyah doo bighadahididoot'áał da.

¹⁹Ákohgo yah a'atiin bibąąhjígo yah i'iildééh góne' shił ch'íní'áazhgo náhookǫs bich'ijígo nááda'iiłniihii kin diyingo bá nahaz'ą́ąjį' shił niní'áázh; éí áádóó e'e'aahjigo nihoneel'ą́ądi łahgo haz'ą́ągo yiiłtsą́, jó'akon.

²⁰Áko áshidííniid, Náá'iiłniihii dajílíinii, tł'óo'di ahééhool'áhíjį' ch'éédajikahgo diné ákwii áłah nilínígíí diyinii doo bíhididoo'náał da biniyé doo ákǫ́ǫ́ ájít'į́į́jí nááhániihii índa ádił ni'iidzííhjí nááhániihii kwe'é dajiłbéezh doo, áádóó kwe'é ak'áán nááhániihii tadajoonihgo bááh ádajił'į́į doo.

²¹Ákohgo tł'óo'di ahééhool'áhíjį' shił ch'ínáánát'áázh áádóó éí naanídaaz'áágóó ákǫ́ǫ́ shił tádíí'áázh, áko naanídaaz'áhígíí t'áá éí bik'eh t'áá ákǫ́ǫ́ ałdó' nahaz'ą́.

²²Dį́į'go nahaz'ánígíí éí t'áá ał tso t'áá aheedaníłtso; nááseego tsosts'idiindóó ba'aan ashdla' ké silá ákódanízah; naaniigo éí ashdladiindóó ba'aan naakidóó ałníí' ké silá ákódaníłtéelgo nahaz'ą́.

²³Dį́į'go bee nídaastł'ahgo nahaz'ání góne' déédadiljahgo ahéédahool'á; ákǫ́ǫ́ hááda'nilgah biniyé nahaz'ą́.

²⁴Ákohgo áshidííniid, Kǫ́ǫ́ ch'iyáán ál'į́ biniyé nahaz'ą́, náádahidoonihii diné nidayiijáhígíí éí kin bii' sohodizingi nidajil'a'ígíí ákwii dajiłbéezh doo.