Read Navajo EZEKIEL 47 Bible Online

EZEKIEL 47 - Navajo bible

EZEKIEL 47

¹Áádóó kin bii' sohodizin bich'é'étiinjį' shił ninát'áázh, nít'éé' shoo, ch'é'étiin biyaadę́ę'go tó ła' ch'ínílį́ áádóó ha'a'aahjigo íílį́; kin bii' sohodizin éí ha'a'aahjigo ch'é'étiingo si'ą́; t'áá éí nish'náájígo biyaadę́ę́' tó ch'ínílį́įgo bikáá' náá'iiniihí si'ánígíí shádi'ááhjígo ahéénílį́.

²Náá'ákóne' náhookǫsjigo dáń'dítį́hígíí ákóne' shił ch'ínáánát'áazhgo ha'a'aahjigo tł'óo'di dáń'dítį́hígíí áajį' shił nináánát'áázh, áko dáń'dítį́hígíí biyaadi nish'náájígo tó ch'ínílį́.

³Éí áádóó tł'óół bee í' neel'ąąhí t'áá yoozǫ́ǫsgo ha'a'aahjigo t'áá tó íílį́į́góó naadiindi mííldóó ba'aan tsosts'idi neeznádiindóó ba'aan hastą́diin ké silá ákónízahjį' shił niní'áázh; náá'ákóne' tó nílínígíí tsé'naa shił niní'áázh nít'éé' shikétsį́įgo tó néés'ąąd.

⁴Éí áádóó tł'óół bee í'neel'ąąhí t'áá náás nááyoozǫ́ǫsgo shił dah náádiit'áázh, áko naadiindi mííldóó ba'aan tsosts'idi neeznádiindóó ba'aan hastą́diin ké silá ákónízáágóó shił nináánát'áázh; áadi shił tsé'naa nináánát'áázh nít'éé' shigodta'go tó néés'ąąd. Éí áádóó shił dah náádiit'áazhgo tł'óół bee í'neel'ąąhí t'áá nááyoołt'ihgo, áko naadiindi mííldóó ba'aan tsosts'idi neeznádiindóó ba'aan hastą́diin ké silá ákónízáágóó shił nináánát'áázh, áádóó tsé'naa shił nináánát'áázh nít'éé' shiníi'go tó néés'ąąd.

⁵Áádóó shił dah náádiit'áazhgo naadiindi mííldóó ba'aan tsosts'idi neeznádiindóó ba'aan hastą́diin ké silá ákónízáágóó shił nináánát'áázh nít'éé' áadi tooh nílį́į́ lá; doo ha'naa noosha' át'ée da; tó de adínées'ąąd; t'áá bii' ni'jółkǫ'ígi íídéetą́ą́'; doo ha'naa nijóya' át'ée da.

⁶Áádóó áadi áshíłní, Diné nílíinii, díísh k'ad yiniłtsą́? Áadi índa t'áá tooh nílínígíí bibąąhgóó nát'ą́ą́' shił nát'áázh.

⁷Nát'ą́ą́' nánísdzáago tooh nílínígíí ałts'ą́ą́hjígo tsin t'óó ahayóí yíl'áago yiiłtsą́.

⁸Áádóó áshíłní, Tó nílínígíí éí ha'a'aahjigo nahós'a'góó íílį́įgo honoojí biih yílį́į́dóó tónteel biih yílį́, áko tónteel dík'ǫ́ǫzhii łikango ánéidoodlííł.

⁹T'áá tooh nílį́į́góó dahináanii dah nida'asołgo kéédahat'į́į́góó éí dahináa doo áádóó łóó' t'óó ahayóí nídínóot'į́į́ł, háálá díí tooh áajį' íílį́ índa éí tónteel łikan dooleeł, áko tooh t'áá nílį́į́góó t'áá ałtsoní dahináa doo.

¹⁰Engíídai Enégleiyimjį' tónteel bibąąhgóó łóó' hadayiileehígíí áádóó łóó' hadayiiłtsósígíí nízį́į doo; ákwe'é łóó' hadahaltsóós biniyé haz'ą́ą doo, Ayóó'át'é Tónteel hoolyéii éí bii' łóó' yíl'áhígi át'éego ákwii łóó' ał'ąą ádaat'éii ayóó ánéelą́ą́' bee áda'azįįd doo.

¹¹Nidi tónteel bibąąhgóó tó hashtł'ishgo t'áá sahdii naazkánígíí éí yá'át'éehgo doo ádadoolníił da; éí t'áá dadók'ǫ́ǫzhgo naazyį́įgo áshįįh biniyé doo baa náhódóot'įįł da.

¹²Tooh nílínígíí ałts'ą́ą́hjígo bibąąhgóó tsin ał'ąą ádaat'éii ch'iyáán biniyé nidanise' doo; bit'ąą' éí doo dadínóołnah da, bineest'ą' ałdó' t'áá dahólóní dahólǫ́ǫ doo; t'ááłá'í nínádízi' bik'eh nínádanit'į́įh doo, háálá hodiyingo haz'ánídóó bito' háálį́; bineest'ą' éí yidą́ą doo, áádóó bit'ąą' éí ná'áłdziih doo.

¹³Bóhólníihii Diyin God kóní, Ízrel naakits'áadah dine'é bitahgóó kéyah daabíí' dooleeł biniyé bá nidahodíízohígíí díí éí át'é: Jóseph dine'é éí naakigo bá náhodíízoh.

¹⁴T'áá aheedaníłtsogo bá da'didíízoh: danihizhé'é yę́ę bich'į' bee ádee hadeesdzíí'; díí kéyahígíí nihíí' dooleełgo nihaa didoot'ááł.

¹⁵Kót'éego náhookǫsjigo kéyah bá hoodzo doo: Ayóó'át'é Tónteel nihiníyį́į́dóó Héthlan haz'ánígóó áádóó Zíídad kin haal'áajį' yah e'etiingóó

¹⁶áádóó Héímath kin haal'áágóó, Biiróthah kin shijaa'góó índa Sibráyim haz'ánígóó, díí Sibráyim hoolyéii Damáskas kin haal'áii áádóó Héímath bita' gónaa haz'ą́ índa Héízar-hátikan, éí kéyah Háoran baa níhánígóó kin sinilgóó,

¹⁷áádóó tónteel bibąąhdóó Héízar-íínan kin shijaa'góó hoodzo doo; éí Damáskas hoolyéédóó náhookǫsjigo kéyah si'ánígíí bibąąhdi áadi áhoolyé áádóó t'áá náhookǫs bich'ijígo Héímath kin haal'áajį' hoodzo doo. Áko díí náhookǫsjigo kéyah bá hoodzo doo.

¹⁸Ha'a'aahjígo éí Háoran hoolyéégóó áádóó Damáskas kin haal'áágóó áádóó Gíliyad hoolyéégóó áádóó Ízrel dine'é bikéyahgóó éí tooh Jórdan bibąąhgóó ha'a'aahjí tónteel siyį́įjį' hoodzo doo. Díí éí ha'a'aahjigo kéyah bá hoodzo doo.

¹⁹Shádi'ááhjígo éí Téímar hoolyéédóó Kéídesh hoolyéejį' áádóó Ííjip kéyah si'ánígíí bibąąhgóó tooh nílíníjį' índa níléí Ayóó'át'é Tónteel hoolyéejį' hoodzo doo. Díí éí shádi'ááhjígo hoodzo doo.

²⁰Héímath hoolyéii éí bik'ą́ąhgo éiyá e'e'aahjigo Ayóó'át'é Tónteel hoolyéhígíí bibąąhgóó bee hoodzo doo. Díí éí e'e'aahjígo hoodzo doo.

²¹Áko nihí Ízrel dine'é nohłíinii, ał'ąą ádóone'é nohłínígíí bik'ehgo díí kéyah ałtaa doohdzoh.

²²Kéyahígíí nihíí' dooleeł biniyé ałtaa doohdzoh, índa doo Ízrel dine'é danilíinii nihitahjį' adahaaskaigo ba'áłchíní dahazlį́'ígíí éí ałdó' kéyah ła' bá dadi'doosoh; éí áłchíní t'áá Ízrel dine'é bá nidahaazhchį́įgo baa nitsídaohkees doo; éí kéyahígíí t'áá aheedaníłtsogo bíí' dadooleełgo bił ałts'ą́ą́' da'nołk'iiz doo.

²³Áádóó háí dine'é shį́į́ bitahgi dé'éyóní kééhat'į́įgo t'áá éí bitahgi kéyah bíí' dooleełii baa dahididoo'ááł, ní Bóhólníihii Diyin God.