Read Navajo EZEKIEL 5 Bible Online

EZEKIEL 5 - Navajo bible

EZEKIEL 5

¹Shoo, diné nílíinii, tsiighá yishéehii dághá bee yilzhéhí deenínígi át'éego diltłish deeníinii nídidíítį́įłgo nitsii' áádóó nidághaa' bee dííshihgo ahiih dííłjoł. Náá'ákóne' tsiighá aheenéelt'e'go táa'go ałts'ádííłjołgo biniyé bee dah adiidleehí nídidíí'ááł.

²Ak'i dah adishjé'ígíí ałtso bohoolyaago tsiighá t'ááłá'í shijoolígíí kin haal'áhígíí ałníi'gi adidííłk'ą́ą́ł; náá'ákóne' tsiighá shijoolígíí éí kin haal'áhígíí bitahgóó ts'ídá ałtso diltłish bee nihidííłgish; táá' góne' tsiighá shijoolígíí éí níyol biyi'góó taidííghas; shí éí shidiltłish bizis t'áágééd bikéé' yishtį́įł doo.

³Akée'diígíí t'ah doo ákónílééhgóó éí t'áá díkwíí yee' bits'ádííłjołgo yaago ni'é'ígíí biyi'dę́ę'go bídííłtł'óół.

⁴Áko ła' éí nínáádidííłjołgo tsédzadííłkałgo adidííłk'ą́ą́ł; éí bits'ą́ą́dóó kǫ' hadidoonołgo Ízrel dine'é ts'ídá t'áá ałtso bitahgóó adidoonoł.

⁵Bóhólníihii Diyin God kóní, Díí Jerúsalem át'é; ał'ąą dine'é kéédahat'ínígíí ałníi'gi hojílǫ́ǫgo áhooshłaa; hanaagóó éí kéyah ahéénínil.

⁶Shibik'ehgo hoogáałii doo dazniizį́į' da, bee nihoyí'áanii doo bik'ehgo dajíkai da. Áko ał'ąą dine'é hanaagóó kéédahat'ínígíí índa kéyah hanaagóó ahéénínilígíí biláahgo shibik'ehgo hoogáałii índa bee nihoyí'áanii doo bik'eh dahojíł'į́į́góó t'áá íiyisí doo yá'áshónígi ádajíít'įįd.

⁷Ákohgo Bóhólníihii Diyin God kónihiłní, Nihinaagóó ał'ąą dine'é kéédahat'ínígíí biláahgo t'áá íiyisí doo yá'áshónígi ádaot'įįd, áádóó bee nihoyí'áanii doo bik'ehgo danoohkai da, áádóó shibik'eh hoogáałii doo bik'eh dahonoł'į́į da nít'éé' índa ał'ąą dine'é nihinaagóó kéédahat'ínígíí bibik'ehgo hoogáałii doo bik'eh dahonoł'į́į da nít'éé';

⁸éí bąą Bóhólníihii Diyin God kóní, T'áá shí nidi nihik'ijį' nishłį́įgo ał'ąą dine'é dabinááł nihiníi'gi atídanihish'į́į doo, jó'akon.

⁹Ts'ídá t'óó baa'ihii baa naahkaígíí biniinaa ts'ídá t'ah doo ánihishłééh yę́ęgi ánihideeshłííł índa kodóó ts'ídá doo ákónáánihideeshdlíił da.

¹⁰Éí bąą nihiníi'gi dabiye'ké nídeidooldił índa aye'ké danilíinii dabizhé'é nídeidooldił; ts'ídá t'áá íiyisí atínihideeshłííł, áko daohdzí'ígíí t'áá ánółtso éí t'áá ałtsogóó tanihidínéeshkał.

¹¹Bóhólníihii Diyin God kóní, Ts'ídá t'áá aaníí hinishná; ákót'éego nichǫ́'ígíí índa t'óó baa'ihii baa naohkaígíí bee shikin bii' sohodizin daołchǫ'ígíí biniinaa ts'ídá t'áá aaníí nahjį' ánihideeshłííł áádóó doo nihaa jooshba' da doo índa doo nihik'édí deeshłeeł da.

¹²T'ááłá'í góne' dah wohkahígíí éí nihitahgi naałniihii índa dichin ánihidoołdįįł; náá'ákóne' dah wohkahígíí diltłish bee nidanihidi'dootsił; táá' góne' dah wohkahígíí t'áá ałtsogóó tanihidínéeshkałgo diltłish nihikéé' tádíshtįįh doo.

¹³Kót'éego lą́ą hach'į' sháhóóchįįdígíí bohodoolníił ni, áko hach'į' sháhóóchįįdígíí bee atíhooshłaago shii' hááhodiyooldoh; t'óó báhádzidgo hach'į' hashké niisdzį́į'go atíhooshłaaígíí éí ałtso bohoolyaago Bóhólníihii nishłíinii hóneeshdlį́įgo haasdzí'ígíí hoł béédahodoozįįł.

¹⁴Áádóó ał'ąą dine'é ninaagóó kéédahat'ínígíí bitahgóó ałtso nąąh da'ííbį́į'go índa ná nahat'i'go ną́ą́h dahidikáahii ákót'éego daniníł'į́į doo. Kónít'éego ándeeshłííł.

¹⁵Áko nich'į' hashké niisdzį́į'go áádóó t'áá íiyisí nandishteehgo atínísh'į́įgo ał'ąą dine'é ninaagóó kéédahat'ínígíí binááł t'óó ná nahat'i'ii áádóó nee adlohodichíii, áádóó bee i'ílnii'ii índa t'óó bik'e'ayóii nílį́į doo. Bóhólníihii nishłíinii kót'éego haasdzíí'.

¹⁶T'áá íiyisí k'aa' bik'ediniihígi át'éego hodidoochįįłgo ándoołdįįł biniyé nik'ijį' dichin bi'níłnii'ígíí t'óó tsé'édinda ádeeshłíiłgo bááh bee hinínáanii bídin hóyée'go ádeeshłííł.

¹⁷Áko t'áá íiyisí hodichinii índa naaldlooshii báádahadzidii nik'ijį' bi'níłnii'go na'áłchíní nits'ą́ą́' deidooldił; naałniih naa doołnih índa dandiyoołhéełgo nidił nits'ánílį́į dooleełígíí bohodoolnííł; kót'éego diltłish bee atíndeeshłííł. Bóhólníihii nishłíinii kót'éego haasdzíí'.