Read Navajo EZEKIEL 7 Bible Online

EZEKIEL 7 - Navajo bible

EZEKIEL 7

¹Áádóó ałdó' Bóhólníihii kóshíłníigo náádiséts'ą́ą́',

²Diné nílíinii, Bóhólníihii Diyin God éí Ízrel dine'é bikéyah kwííłní, Nihá nihonít'i'; kéyah t'áá dį́į́'góó bá nihodoot'ihígíí baa hoolzhiizh.

³K'ad lą́ą nihá nihodoot'ihígíí baa hoolzhiizh ni. Nihich'į' sháhodoochįįłgo ádanoht'éii bee nihaa nídéesht'įįłgo doo yildinígi ádaot'įįdígíí t'áá ałtso bik'é k'éénihidideeshdlííł.

⁴Doo nihik'édí nishłį́įgo nihidínéesh'įįł da, áko doo yildinígi ádaot'įįdii t'ahdii nihitah hólǫ́ǫgo ádanoht'éii bik'é k'éénihidideeshdlííł; áadi índa Bóhólníihii nishłį́įgo nihił béédahodoozįįł.

⁵Bóhólníihii Diyin God kóní, T'áá íiyisí doo yá'áshóonii t'áá éí t'éiyá ákót'éhígíí nihik'i hwiidooleeł, jó'akon.

⁶Nihá nihonít'i', nihá nihodoot'ihígíí baa hoolzhiizh; nihik'ijį' ídlį́įgo hanihidilzíidgo nihik'i hwiidooleeł, jó'akon.

⁷Kéyah bikáá'góó kéédahoht'íinii, nihá nihonít'i'ígíí baa hoolzhiizh; baa hoolzhiizh lą́ą koshídę́ę́' hadziih: ach'į' nahwii'ná baa hoolzhiizh, dziłghą́ą́'góó diné bił dahózhǫ́ yę́ę doo dadilwosh da doo.

⁸T'óó hodíína'ígo t'óó báhádzidgo nihich'į' hashké dínéesdzįįłgo atínihideeshłííł áádóó nihich'į' sháhóóchįįdígíí bi'deeshłíiłgo ádanoht'éii bee nihaa nídadéesht'įįł índa doo yildinígi ádaot'įįdígíí bik'ehgo k'éédanihidideeshdlííł.

⁹Doo nihik'édí nishłį́įgo nihidínéesh'įįł da; doo yildinígi ádaot'įįdii t'ahdii nihitah hólǫ́ǫgo ádanoht'éii bik'ehgo k'éédanihidideeshdlííł, áko shí Bóhólníihii nihik'í'ołhaałgo nihił béédahodoozįįł.

¹⁰Beidoołkááł, beidoołkááł, jó'akon: nihonít'i'ígíí baa hoolzhiizh; tsihał bílátah iichii', ádaa hodzódlí yiitsoi.

¹¹T'áá na'níle'dii áhát'íinii éí tsihał t'áá íiyisí doo yá'áshóonii násdlį́į́'; daahó lá áádóó t'óó ahayóí haa áłah daazlį́į'ii doo ła' yidziih da doo áádóó hayódí t'áá ałtso ádin doo índa doo ła' haicha da doo.

¹²Baa hoolzhiizh, koshídę́ę́' hadziih; na'iiłniihii t'áadoo bił nihoozhǫǫhí índa baa na'iiniihii t'áadoo yínííł naagháhí, háálá t'áá kééhojit'į́į́ nít'éé' t'óó báhádzidígi át'éego bee atí'él'íinii bee atíhodi'doolnííł.

¹³Baa na'iiznii'ii áádóó na'iisnii'ii éí t'ah hináa nidi, haa nahaznii'ígíí doo bich'į' t'ą́ą́' nízhdoodáał da, háálá t'áá kééhojit'į́į́ nít'éé' t'óó báhádzidígi át'éego bee atí'él'íinii doo t'ą́ą́' kónídoolníił da; doo ákǫ́ǫ́ ájíít'įįdígíí doo ła' beezhdoodzih da.

¹⁴Dilní yee ádadííniidgo t'áá ałtso hasht'e'ádadiilyaa, nidi doo ła' dazhdoobah da, háálá diné t'áá yíl'áá nít'éé' t'óó báhádzidgo atíháshłééh.

¹⁵Diltłish éí tł'óó'dę́ę́' dadeez'á; kin haal'áagi éí nahałniih áádóó dahodííchįįd; dá'ák'ehdi nijigháii éí diltłish haghá doolzihgo dazdootsaał; kin haal'áagi nijigháhígíí éí dichin áádóó naałniihii hodidoolnahgo hodiyoołhééł.

¹⁶Ła'da yisdádahineezhchą́ą'go éí honíts'aa'gi hasbídí nidahojílingo doo ákǫ́ǫ́ ádajíít'įįdii baa chadazhdilwą́ą'go dziłghą́ą́'góó adahizhdoolwoł.

¹⁷Dahála' t'áá ałtso doo bitah dahwiináa da doo índa t'áá ádzíłtso hagodta' gónaa t'óó nidanil'eeł doo.

¹⁸T'áá ádzíłtso tł'oh azis bee áká dazdoolzisgo dah nídajiltǫǫh doo; t'áá ádzíłtso t'óó ádaa yádaznidzin dazhnoolnin doo áádóó hatsii' daalzhée' doo.

¹⁹Habéésh łigaii yę́ę kintaa da'aztiingóó adahizhdoołkał; ha'óola yę́ę éí t'óó baa'ihgo baa nitsídadzikees doo; Bóhólníihii t'óó báhádzidgo atíhálééh baa hoolzhiizhdi habéésh łigaii índa ha'óola ts'ídá doo yisdáhodoonił da áádóó doo hwiih dajílį́į́góó ádahodoolííł índa doo nídahodínóołchał da, háálá doo ákǫ́ǫ́ ádajíít'įįdígíí bik'ee dazhdidoogohgo ádił dazdoosih.

²⁰Yee nida'ach'ąąhii yee eda'alyaii ádayiilaago t'áadoo biniyéhígóó yee ádaa dahas'nihgo doo daaldinii índa dajoodláii ádá ádayiilaa; éí bąą t'óó baa'ihgo baa nitsídadzikeesgo áhodeeshłííł.

²¹Naalye'é éí dé'éyóní baa dideesh'ááł; ał'ąą dine'é t'áá íiyisí doo yá'ádaashóonii éí daasnáanii baa dideesh'áałgo deidoołchxǫǫł.

²²Áádóó ałdó' hats'ą́ąjį' hadínéeshniiłgo shinahont'ingo haz'ání góne' dahodoołchxǫǫł, áko aghada'ii'níiłii yah ahidookahgo dahodoołchxǫǫł.

²³Álátsíín ninádaa'niłí ánílééh; kéyah t'áá náhwiist'ą́ą́ nít'éé' diné bidił yee ádidahodiilt'i'ii áádóó kin haal'áagi t'áá na'níle'dii áda'oolíłígíí nihinéést'e'.

²⁴Éí bąą ał'ąą dine'é agháago doo yá'ádaashóonii dahaghan haghadeidiyoo'niłgo ákǫ́ǫ́ bighan ádahodoolííł; ayóó át'éego hwee ádaa dadzódli'ígíí éí doo ádajít'éégóó ádahodeeshłííł índa dahozdósingo nahaz'ánígóó hats'ą́ą́' dahodoołchxǫǫł.

²⁵Yéé' bił haa hoolzhiizhgo bee ach'į' hózhóonii há dajit'į́į doo, nidi doo ła' bik'ídazhdookah da.

²⁶T'óó báhádzidígi áhooníiłii ałkéé' ahooníił doo. T'óó jiní jiní, ha'níigo dahane'ígíí t'áá ałkéé' nidadidlaad doo; náásgóó ádahodooníiłii yaa halne'ii, Náásgóoshą' haa hodoonííł, deiłníigo nideídíłkid doo, nidi náá'iiłniihii éí bee haz'áanii yee hadoodzihii nidi t'óó bił hodijool doo áádóó aląąjį' naazíinii éí kót'é daaníinii ałdó' ákódaat'ée doo.

²⁷Aláahgo naat'áanii éí yínííł nilį́į doo; naat'áanii éí t'áá íiyisí bąąh nahóókaad doo; éí kéyah bii' diné kéédahat'íinii yéé' bitah dahóóghą́ą' doo; ádajíít'įįdígíí bik'ehgo k'éédahodideeshdlííł; t'áá hó aa nídajit'íinii bik'ehgo haa nídadéesht'įįł; áadi índa Bóhólníihii nishłį́įgo hoł béédahodoozįįł.