Read Navajo EZEKIEL 8 Bible Online

EZEKIEL 8 - Navajo bible

EZEKIEL 8

¹Ákohgo hastą́ą́h náhááh góne' hastą́ą́h nídízííd binih éí ashdla'góó yoołkáałgo shighan góne' sédáago Júdah dine'é aląąjį' naazíinii shidááhgóó naháaztą́ągo Bóhólníihii Diyin God shideelchidgo baa ákoniizį́į́'.

²Déé'į́į́' nít'éé', shoo, ha'át'íí shį́į́ bits'ádi'nílíidgo sizį́įgo yiiłtsą́: ánoolninígíí biníí'dóó yaago éí kǫ' nahalin, áádóó biníí'dóó dego éí bits'áhojilgishii nahalin.

³Áádóó yílá nahalingo k'ídeelchidgo shitsii' ła' yisił, áko Diyin God bits'ą́ą́dę́ę́' shił áhát'į́įgo nahasdzáán áádóó yádiłhił bita'gi Níłch'i Diyinii dah shidiiłtį́įgo Jerúsalem kin haal'áadi nishiníłtį́; hodílzingo haz'ánígíí náhookǫsdę́ę'go ch'é'étiingi dáádílkał náwóne'dę́ę'go e'elyaii łe'hasingo áda'ale'ii dah sidáhíjį' nishiníłtį́.

⁴Shoo, t'áá níléí halgaidi shił ádzaa yę́ęgi át'éego Ízrel dine'é biDiyin God ayóó ánóolninii ákwii náánéi łtsą́.

⁵Ákohgo áshidííniid, Diné nílíinii, k'ad náhookǫsjigo anaghaał. Áko náhookǫsjigo ííghal, nít'éé' shoo, bikáá' náá'iiniihí si'ánígíí náhookǫsjigo dáń'dítį́hígi díí e'elyaii łe'hasingo áda'ale'ii sizį́į́ lá.

⁶Áádóó ánááshidi'ní, Diné nílíinii, Ízrel dine'é ayóó át'éego doo yildinígi át'éego yaa nidaakaigo biniinaa shikin bii' sohodizin doo deeghánígóó bits'ádeesháłígíísh yíní'į́? Nidi náánáłahjigo náádínít'į́į́'. Díí biláahgo t'áá íiyisí doo daaldinii yaa nidaakaigo néidííłtsééł.

⁷Ákohgo hodílzingo haz'ánígíí yah a'atiin bíighahjį' nishiníłtį́; nít'éé' déé'į́į'go, shoo, tsé ahénátł'ingo ní'áhígíí biih hoodzą́ągo yiiłtsą́.

⁸Áádóó áshíłní, Diné nílíinii, tsé ahénátł'ingo ní'áhígíí bii' ígééd, áko bii' íígeed nít'éé' dáádílkał léi' bik'í'nígeed.

⁹Áko áshíłní, Nílááh, yah anináahgo diné doo yá'ádaashóonii kwe'é t'áá íiyisí doo daaldinii yaa nidaakaígíí níníł'į́.

¹⁰Yah ííyáá nít'éé'; nidaa'na'ii índa nidaaldlooshii doo daaldinii ts'ídá t'áá ałtso ał'ąą ádaat'éii áádóó Ízrel dine'é bi'eda'alyaii ts'ídá t'áá ałtso tsé ahénátł'ingo ní'áhígíí bikáa'jį' bééda'alyaago ahééhool'á.

¹¹Nít'éé' bééda'alyaago dabiká'ígíí bidááhdóó Ízrel dine'é bitahdóó aląąjį' naazíinii tsosts'idiin yilt'éhígíí ákwii naazį́. Shéífan biye' Jeiyazanáíyah ákwii atah sizį́. T'áá ałtso łeets'aa' biyi'dóó tsin bijeeh dilidgo łikání halchingo nááhániihii dah deíjááh, áko éí dabilid dego ada'iijooł.

¹²Ákohgo áshíłní, Diné nílíinii, Ízrel dine'é bitahdóó aląąjį' naazíinii t'ááłá'í nítínígo t'áá sahdii bi'eda'alyaii bá nahaz'ánígi chahałheeł góne' yaa nidaakaígíísh yiniłtsą́? éí ádaaní, Bóhólníihii doo nihoo'į́į da; Bóhólníihii kéyah yóó'iidíí'ą́.

¹³Áádóó ánááshidoo'niid, Náánáłahjigo náádínít'į́į́'. Díí biláahgo t'áá íiyisí doo daaldinii yaa nidaakaigo néidííłtsééł.

¹⁴Áko nít'éé' Bóhólníihii bikin bii' sohodizin si'ánígíí náhookǫsdę́ę'go dáń'dítį́įhgi ninááshiníłtį́; nít'éé' shoo, ákwii sáanii ła' éí diyin bidi'níinii Támaz yaa daachago naháaztą́.

¹⁵Áádóó áshidííniid, Diné nílíinii, díísh yiniłtsą́? Díí deiniłtsánígíí t'ah bilááh át'éhígo t'áá íiyisí doo daaldinii yaa nidaakaigo néidííłtsééł.

¹⁶Áádóó shił dah dii'áazhgo Bóhólníihii bikin bii' sohodizin si'ánígíí binaa haz'ą́ąjį' shił niní'áázh, nít'éé' shoo, Bóhólníihii bikin bii' sohodizin bich'éédą́ą'gi chaha'oh áádóó bikáá' náá'iiniihí bita'gi diné naadiin ashdla' yilt'éego kin bii' sohodizin yits'ą́ąjį' dadéez'į́į'go ha'a'aahjigo jį́honaa'éí yich'į' nidahałáago yiiłtsą́.

¹⁷Áádóó áshíłní, Diné nílíinii, díísh yiniłtsą́? Júdah dine'é kwe'é t'áá íiyisí doo daaldinii baa nidajikaígíí da' t'įįhdígo át'éhígíísh biniinaa yaa nidaakaígíí yee kéyah bikáá'góó t'áá át'é t'áá na'níle'dii nilíinii nihinéést'e' áádóó shá náádahóółchįįd? Áko shoo, bíchį́įhjį' tsin bits'áoz'a' dah nídeidiiłjoł.

¹⁸Éí bąą t'óó báhádzidgo atíhásh'į́įgo haa nídéesht'įįł; doo haa a'ááh dínéesįįł da índa doo hak'édí deeshłeeł da; azhą́ ayóó íits'a'go dajicha nidi, doo dahodideests'į́įł da.