Read Navajo DANIEL 12 Bible Online

DANIEL 12 - Navajo bible

DANIEL 12

¹Éí hoolzhishdi Máíkel diyingo naal'a'í nilíinii éí naat'áanii ayóó át'éii nidine'é yaa áhályáanii yik'i dooldził. Áko ach'į' nahwii'náago hodidoolzhish; éí hádą́ą'da ał'ąą dine'é hazlį́į́'dóó t'ah doo ákóhánéeh da nít'éé', éí hoolzhishdi nidine'é t'ááłá'í nítínígo naaltsoos biyi' bízhi' ádaalyaii yisdádoo'nił.

²Áko t'óó ahayóí nahasdzáán yii' da'ałhoshígíí nááhididoojahgo ła' hool'áágóó iiná baa dahididoot'ááł, nidi ła' t'óó ádaa yádadínóodzįįłgo hool'áágóó ti'hoo'níihjį' nááhididoojah.

³Áko dahóyáanii éí yádiłhiłdę́ę́' da'diníłdíinii nahalingo da'diníłdíin doo áádóó t'óó ahayóí t'áá ákogi át'éejį' nináda'iizh'eezhii sǫ'ígi ádaat'éego bits'áda'deezlíidgo hool'áágóó ahóyéel'áa doo.

⁴Nidi ni, Daniel yinílyéii, nihoolzhíishjį' saad ałch'į' ánánídléehgo naaltsoos bidadi'níłjeeh. T'óó ahayóí tsį́įłgo naaldeeh doo áádóó ił ééhózin k'ee'ąą yilzhish dooleeł.

⁵Ákohgo shí, Daniel yinishyéii, déé'į́į́' nít'éé', shoo, nizhdilt'éego dzizį́įgo yiiłtsą́; ła' kojí tábąąhgi sizį́ índa ła'ígíí éí łahjí tábąąhgi náánásdzį́.

⁶Áko diné ła' éí áłts'óózígo yisdizígíí bee na'at'ą́hí łigaii dits'idgo ályaii yee hadít'éego tooh yik'igi dah sizínígíí ííłní, T'óó ayóogo k'ad ádahooníiłii hahgoshą' índa bił nihodoogáá ł?

⁷Diné éí áłts'óózígo yisdizígíí bee na'at'ą́hí łigaii dits'idgo ályaii yee hadít'éego tooh yikáá' dah sizíinii bíla' t'áá ałch'ijí yee yá'ąąshgóó dah didiilnii'. Áko hool'áágóó hináago ahool'áii yee ádee hadoodzíi'go ła' hahodoolzhish áádóó naakidóó náá'áłníi'jį' anááhodoolzhish. Áko diné dadiyinii bibee adziilii dayiisdláadgo ałtso bił nihoníyáa doo.

⁸Áko diséts'ą́ą' nidi, t'áadoo bik'idiitą́ą da, ákohgo ádíshní, ShiBóhólníihii nílíinii, díishą' hait'éego nihodoogááł?

⁹Nidi áshidííniid, Daniel yinílyéii, nílááh yínááł. Shą́ą́', nihodoogáałjį' saad ałch'į' ánályaago bidá'deeljée' ni'.

¹⁰T'óó ahayóí éí biyi' chin bąąh ádingo áádóó daalgaigo ádahodi'doolníiłgo hodahodínóotah, nidi ts'ídá doo yá'ádaashóonii éí ts'ídá doo yá'áshónígi ádaat'į́į dooleeł áádóó ts'ídá doo yá'ádaashóonii doo ak'idadi'dootį́įł da, nidi dahóyáanii éí ááhyiłníinii yik'idadi'dootį́į́ł.

¹¹Áko t'áá áłahíjį' didlidgo nááhániihii nahjį' nideet'ą́ą́dóó índa doo yildingóó ni'iiłchǫǫhii dayiisį'dóó bik'ijį' t'ááłáhídi mííldóó ba'aan naakidi neeznádiindóó ba'aan náhást'édiin yidoołkááł.

¹²Áko t'ááłáhídi mííldóó ba'aan táadi neeznádiindóó ba'aan tádiindóó ba'aan ashdla' yidoołkáałjį' yiba' ádaat'éii éí bik'idahojidlíi doo.

¹³Nidi nihoníyáajį' nílááh yínááł, háánílyį́įh doo; níí' dooleełii nihoolzhiizhdi naa didoot'ááł.