Read Navajo DANIEL 3 Bible Online

DANIEL 3 - Navajo bible

DANIEL 3

¹Aláahgo naat'áanii Nébukadnézzar éí Bábilan nahós'a'gi honíteel Dúra hoolyéegi óola e'elyaago áyiilaa; náhást'édiin ké silá áníłnééz índa náhást'éí ké silá áníldíilgo áyiilaa.

²Ákohgo aláahgo naat'áanii Nébukadnézzar éí aláahgo bídahólníihii, aląąjį' naazíinii, naat'áanii danilíinii, ándahwii'aahii, yódí yaa ádahalyáanii, kót'éego daaníinii, yah ada'iiníiłii índa Bábilan kéyahdóó bídahólníihii nináneel'ą́ąjį' ts'ídá t'áá ałtso nidahidookahgo e'elyaii áyiilaago yiyiisį'ígíí doolzįhgi yaa áłah dooleeł biniyé bich'į' hane' ájiilaa.

³Ákohgo aláahgo bídahólníihii, aląąjį' naazíinii, naat'áanii danilíinii, ándahwii'aahii, yódí yaa ádahalyáanii, kót'éego daaníinii, yah ada'iiníiłii índa bídahólníihii nináneel'ą́ąjį' ts'ídá t'áá ałtso nidahaaskaigo aláahgo naat'áanii Nébukadnézzar e'elyaii áyiilaago yiyiisį'ígíí doolzįh biniyé hoo'a'ígíí yidááhdę́ę́' deizį'.

⁴Baa nida'dooldahii yaa ch'ídahwii'aahii yéego ádadííniid, Nihí diné danohłíinii, ał'ąą dine'é danohłíinii áádóó nihizaad ał'ąą át'éego bee yádaałti'ii, díí bee nihá ha'oodzíí':

⁵Béésh dilní bee í'dílzoołí áádóó tsin bee í'dílzoołí áádóó tsin tł'óół naakits'áadah bąąh daneelzhee'go bee nida'a'néii áádóó tsin tł'óół bąąh daaltązhígíí áádóó tsin tł'óół neeznáá bąąh daneelzhee'go bee nida'a'néii áádóó azis bii' ná'álzołii bee nida'a'néii índa sįįł ał'ąą íits'a'go bee hááhodidla'ii t'áá ałtso dasidoots'ą́ą'go nitsidadidoohgohgo aláahgo naat'áanii Nébukadnézzar éí óola e'elyaii yiyiisį'ígíí bich'į' nidahodoohłaał.

⁶Áko t'áá háiida e'elyaii doo bich'į' nitsizhdinígo'ígíí índa doo bich'į' nahojisáhígíí éí déédíljah góne' kǫ' bit'ááh dahalchxíí' góne' ahodi'yooltł'ił.

⁷Éí bąą diné t'áá ałtso éí béésh dilní bee í'dílzoołí, tsin bee í'dílzoołí, tsin tł'óół naakits'áadah bąąh daneelzhee'go bee nida'a'néii, tsin tł'óół bąąh daaltązhígíí, tsin tł'óół neeznáá bąąh daneelzhee'go bee nida'a'néii índa sįįł ał'ąą íits'a'ii t'áá ałtso bee hahodíídláadgo deidiizts'ą́ą'go diné t'áá ałtso, ał'ąą dine'é índa bizaad ał'ąą át'éego yee yádaałti'ii t'áá ałtso yaa ádaadzaago óola e'elyaii aláahgo naat'áanii Nébukadnézzar yiyiisį'ígíí yich'į' nidahasá.

⁸Éí bąą t'áá ákwii hoolzhishgo Kaldíya dine'é ła' daaskaigo Jew dine'é yik'ídahaz'ah.

⁹Áko aláahgo naat'áanii Nébukadnézzar ádeidííniid, Aláahgo naat'áanii nílíinii, hool'áágóó hinínáa le'.

¹⁰Aláahgo naat'áanii nílíinii, bee haz'áanii íinilaii bik'ehgo béésh dilní bee í'dílzoołí, tsin bee í'dílzoołí, tsin tł'óół naakits'áadah bąąh daneelzhee'go bee nida'a'néii, tsin tł'óół bąąh daaltązhígíí, tsin tł'óół neeznáá bąąh daneelzhee'go bee nida'a'néii, azis bii' ná'álzołii bee nida'a'néii índa sįįł ał'ąą íits'a'go t'áá ałtso bee hááhodidla'go éí diné t'áá ałtso deidiits'į́įhgo nitsidadidoogohgo óola e'elyaii yich'į' nidahodoołaał.

¹¹Áko t'áá háiida e'elyaii t'áadoo bich'į' nitsizhdinígo'ígíí índa doo bich'į' nahojisáhígíí éí déédíljah góne' kǫ' bit'ááh dahalchxíi'jį' ahodi'yooltł'ił, diníi ni'.

¹²Bábilan nahós'a'gi diné yindant'áa doo biniyé Jew dine'é éí Shéídrak áádóó Mííshak índa Abédniigo níínínil; aláahgo naat'áanii nílíinii, bee háínídzí'ígíí díí diné doo dayíists'ą́ą' da, nidiyin danilíinii doo yá nidaal'a' da índa óola e'elyaii biinisį'ii doo yich'į' nidahałáa da.

¹³Ákohgo Nébukadnézzar t'áá íiyisí bił hazhchxihgo éí Shéídrak áádóó Mííshak índa Abédniigo nídoot'ishgo yee haadzíí' áádóó éí diné nídeizh'eezhgo aláahgo naat'áanii bidááhdóó nideizh'eezh.

¹⁴Nébukadnézzar áhodííniid, Shéídrak, Mííshak áádóó Abédniigo, t'áásh aaníí shidiyin danilíinii doo bá nidaał'a' da índa óola e'elyaii biisį'ii doo bich'į' nidahohłáa da?

¹⁵K'ad béésh dilní bee í'dílzoołí, tsin bee í'dílzoołí, tsin tł'óół naakits'áadah bąąh daneelzhee'go bee nida'a'néii, tsin tł'óół bąąh daaltązhígíí, tsin tł'óół neeznáá bąąh daneelzhee'go bee nida'a'néii, azis bii' ná'álzołii bee nida'a'néii índa sįįł ał'ąą íits'a'go t'áá ałtso bee hááhodidla'ii dasidoots'ą́ą'go yaa ádadooh'nííł biniyé hasht'e'adadoołyaago e'elyaii biisį'ii bich'į' nidahodoohłaałgo éí yá'át'éeh doo, nidi doo bich'į' nidahosoosáágóó t'áá áko déédíljah góne' kǫ' bit'ááh dahalchxíí' góne' anihidi'yoolt ł'ił, áko háí diyin shį́įshą' shílák'eedóó yisdánihidoonił?

¹⁶Shéídrak áádóó Mííshak índa Abédniigo éí aláahgo naat'áanii ádeidííniid, Nébukadnézzar yinílyéii, ákóhodooníłígíí biniinaa t'áadoo adandoo'ne'gi da.

¹⁷Déédíljah góne' kǫ' bit'ááh dahalchxíí' góne' adanihisoołtł'íidgo nihiDiyin God bá nideiil'a'ígíí kǫ' bits'ą́ąjį' yisdánihidooniłgo yíneel'ą́. Áko aláahgo naat'áanii nílíinii, ni nidi nílák'eedóó yisdánihidooniłgo yíneel'ą́.

¹⁸Azhą́ doo yisdánihíínil da nidi, aláahgo naat'áanii nílíinii, nidiyin danilíinii doo bá nidadiil'aał da áádóó óola e'elyaii biinisį'ii doo bich'į' nidahodiidlaałgóó nił bééhodoozįįł.

¹⁹Ákohgo Nébukadnézzar t'áá íiyisí báhóóchįįdgo Shéídrak áádóó Mííshak índa Abédniigo yich'į' doo ákódzaa da. Éí bąą déédíljah góyaa tsosts'idi ahą́ą́h nániilá bíighahgo hodínóolchxih, níigo yee haadzíí'.

²⁰Áko bisiláo bitahdę́ę́' diné ayóó ádabóodziilii éí Shéídrak áádóó Mííshak índa Abédniigo yida'dootł'óołgo déédíljah góne' kǫ' bit'ááh dahalchxíí' góne' adeidiyoołtł'ił biniyé yich'į' haadzíí'.

²¹Ákohgo díí diné daha'éénééz áádóó ayaajį' éé' áádóó dahach'ahda índa náánáła' daha'éé' t'áá bii' nijizhjée'go hwee da'aztł'ǫ́ǫgo déédíljah góne' kǫ' bit'ááh dahalchxíí' góne' aho'diistł'ííd.

²²Aláahgo naat'áanii tsxį́įłgo níigo yee haadzíi'go áádóó déédíljah góne' kǫ' t'áá íiyisí bit'ááh dahalchxíi'go biniinaa Shéídrak, Mííshak índa Abédniigo déédíljah góyaa adahwiistł'íidii kǫ' bííghą́ą́'.

²³Áko díí diné tált'éego éí Shéídrak, Mííshak índa Abédniigo hwee da'astł'ǫ́ǫgo déédíljah góne' kǫ' bit'ááh dahalchxíi'ii biyi' góne' aho'diistł'ííd.

²⁴Ákohgo aláahgo naat'áanii Nébukadnézzar t'óó bił ahóóyóigo tsxį́įłgo náhidiitahgo kót'éego dabiłníinii áyidííniid, Da' diné tált'éegoósh doo kǫ' biyi' góne' adahaaltł'íid da? Nít'éé' aláahgo naat'áanii ádeidííniid, Aoo', aláahgo naat'áanii nílíinii, t'áá aaníí ákódzaa.

²⁵Áko ánááhodoo'niid, Shoo, diné dį́lt'éego doo bida'astł'ǫ́ǫ́góó kǫ' ałníi'gi doo ádaat'éhígóó tádíkááh. Shoo, dį́į́' góne'ígíí éí diyin danilíinii biye' nahalin.

²⁶Ákohgo Nébukadnézzar éí déédíljah bich'é'étiinjį' niníyáago ádííniid, Shéídrak, Mííshak áádóó Abédniigo, Diyin God Aláahgo Ayóó'át'éii binaal'a'í danohłíinii, hágo wóshdę́ę́', ch'ínóhkááh. Áádóó Shéídrak, Mííshak índa Abédniigo kǫ' biyi'dę́ę́' ch'ékai.

²⁷Áko aláahgo bídahólníihii, aląąjį' naazíinii, naat'áanii danilíinii índa aláahgo naat'áanii kót'éego dabiłníinii áłah silį́į'go éí kǫ'ígíí diné dabits'íís t'áadoo iidííłk'ą́ą' daígíí, dabitsii' doo daadeez daígíí, dabi'éé' doo dadiniitsoi daígíí índa łid doo dahalchin daígíí dayiiłtsą́.

²⁸Áko Nébukadnézzar ádííniid, Shéídrak, Mííshak áádóó Abédniigo biDiyin God baa ha'niih le', háálá bidiyingo naal'a'í yiníł'a'go binaal'a'í baa dadzólíii yisdáyíínil, áko aláahgo naat'áanii yee haadzíi'ii łahgo ánáyiidlaa, áádóó diyin t'áá bóhólníhígíí bá na'al'a'go bich'į' nahadláhígíí biláahgo díí diné tált'éego bits'íís atídoolnííł biniyé t'áá bí biDiyin God yich'į' nidahałáhígíí yaa ádadeest'ą́.

²⁹Éí bąągo bee haz'áanii ła' áshłééh: Diné danilíinii, ał'ąą dine'é danilíinii índa bizaad ał'ąą át'éego yee yádaałti'ii éí Shéídrak áádóó Mííshak índa Abédniigo biDiyin God bidazhdiilkaalgo bik'ijį' yádajiłti'ii nidahodii'nish doo índa dahaghan kints'iil t'éí ádeidoolííł, háálá kót'éego Diyin God yisdá'iinííł dooleełii doo ła' nááhódlǫ́ǫ da.

³⁰Ákohgo aláahgo naat'áanii éí Shéídrak áádóó Mííshak índa Abédniigo Bábilan nahós'a'gi náás yideeznil.