Read Navajo DANIEL 4 Bible Online

DANIEL 4 - Navajo bible

DANIEL 4

¹Aláahgo naat'áanii Nébukadnézzar éí diné danilíinii áádóó ał'ąą dine'é danilíinii índa bizaad ał'ąą ádaat'éego yee yádaałti'ii t'áá ałtso éí nahasdzáán bikáá'góó t'áá át'é kéédahat'íinii yich'į' hane' áyiilaago ání, Bee ach'į' hózhóonii nihá k'ee'ąą yilzhish le'.

²Bee éédahózinii áádóó t'óó bik'eda'ayóii éí Diyin God Aláahgo Ayóó'át'éii shich'į' ííshją́ą́ áyiilaii bee nihił hashne'go shił yá'át'ééh.

³Dooládó' bibee éédahózinii ayóó ádaat'ée da áádóó t'óó bik'eda'ayóii ayóó ábóodziil da; aláahgo bee bóhólníihgo bił haz'áanii éí hool'áágóó bee bóhólníihgo bił haz'ą́; éí oochííłdę́ę́' áádóó oochííłgóó hólǫ́.

⁴Shí Nébukadnézzar shikingi shik'i hata'go hanáshyį́į́h áádóó bee shíhólníihgo haz'ą́ągi hasih hoo'a'.

⁵Baa neiseełígíí bik'ee shił hóóyéé'; shitsásk'eh bikáá' sétį́įgo shił áhoodzaago bik'ee shił yéé' hazlį́į́'.

⁶Baa neisíyeelígíí ááhyiłníinii shił bééhodoozįįł biniyé Bábilandóó diné dahóyáanii shidááhdę́ę́' nihidoot'ishgo bee haasdzíí'.

⁷Álílee k'ehgo ída'ooł'įįłii áádóó déest'į́į́' ádeił'íinii áádóó Kaldíya dine'é danilíinii índa álíleego yee nidahałáii nidahaaskaigo baa neisíyeelii bee bił dahweeshne', nidi ááhyiłníinii yee shił dahodoolnihgo doo yídaneel'ą́ą da.

⁸Akée'di índa Daniel shił yah ííyá; éí shidiyin nilíinii bik'ehgo Bélteshazar bee hwííníshí; hó t'éí diyin danilíinii biníłch'i hwii' hólǫ́, áko baa neisíyeelígíí bee hoł hweeshne'go ádíshní,

⁹Bélteshazar yinílyéii, álílee k'ehgo ída'ooł'įįłii binanit'a'í nílį́, háálá diyin danilíinii biníłch'i nii' hólǫ́ǫgo shił bééhózin, áko ts'ídá t'áadoo ná nantł'aaígóó, baa neiseełgo shił ádzaago yiiłtsánígíí áádóó ááhyiłníinii bee shił hólne'.

¹⁰Tsásk'eh bikáá' sétį́įgo neiseełgo díí yiiłtsą́, jó'akon, kéyah ałníi'gi tsin sikaad áádóó ayóó áníłnéezgo íí'á.

¹¹Tsinígíí nooséełgo bidziil silį́į́', áko bílátahdóó yá biní'á áádóó t'áá nahasdzáán bił nidahonees'ą́ąjį' t'áadoo bahat'aadí yit'į́.

¹²Bit'ąą' éí nizhóní áádóó bineest'ą' t'óó ahayóí bąąh hazlį́į́' índa t'áá ałtso deiyą́ą doogo bá át'é; dá'ák'ehgóó naaldlooshii nidaakaígíí yiyaa chaha'oh anídaakah índa tsídii wódahgo nidaat'a'ii tsin bits'ádaoz'a' bąąh bit'oh áńdayiil'įįh áádóó bitsį' dahólóonii t'áá ałtso éí tsin yąąhdóó da'ííyą́ą́' nisin.

¹³Tsásk'eh bikáá' sétį́įgo shił áhoodzaago díí yiiłtsą́, jó'akon, ha'ídées'į́'í léi' diyingo naal'a'í nilį́įgo yá'ąąshdę́ę́' hadahóóle'go yiiłtsą́ nisin.

¹⁴Áko éí ayóó íits'a'go hadoolghaazhgo ání, Tsin sikaadii k'íníłne' índa bits' ádaoz'a' bąąh híłne'; bit'ąą' bąąh hidíłchxįįh áádóó bineest'ą' yóó'ahíłkaad; háni'dii naaldlooshii éí tsin sikaadii yiyaa hahajeeh áádóó tsin bits'ádaoz'a' bąąhdóó tsídii nídahidiit'ááh, ní.

¹⁵Nidi tsehégod t'éí behétł'óól t'áá bił łeeh yí'áago ánílééh; béésh nitł'izii índa béésh łitsoii bináz'áago éí haz'ą́ągi tł'oh dootł'izhgo yíl'áa le', áko bíni' wót'ááhdę́ę́' dahtoo' nínábíłtłoh le' áádóó naaldlooshii bił da'ałchozh le'.

¹⁶Bíni'dii diné bíni' łahgo óone'go naaldlooshii bíni' bił aheełt'éego tsosts'id binídoohah.

¹⁷Hada'ídées'į́'í yee hadaasdzíi'ii binahjį' áádóó diyingo nidaal'a'í bizaad binahjį' yee nihoní'ą́, áko diné dahináanii díí bił béédahózin doo: Aláahgo Ayóó'át'éii éí diné yee bóhólníihgo bił nahaz'ą́ą́góó yinant'á áádóó t'áá bí íinízinígíí bik'ehgo t'áá háiida yeididoo'ááł índa ts'ídá diné a'ohgo át'éii yeidiyii'aah.

¹⁸Shí, Nébukadnézzar aláahgo naat'áanii nishłíinii, díí baa neiseełgo yiiłtsą́. Bélteshazar yinílyéii, díí ááhyiłníinii bee shił ch'íhoní'aah, háálá aláahgo bee shíhólníihgo shił haz' ą́ą́dóó diné dahóyáanii t'áá ałtso díí ááhyiłnínígíí yee shił dahodoolnihgo doo yídaneel'ą́ą da. Nidi ni t'éí bíninil'ą́, háálá diyin danilíinii biníłch'i nii' hólǫ́.

¹⁹Ákohgo Daniel éí Bélteshazar joolyéego t'ááłá'í ahéé'ílkidjį' t'óó hoł ahóóyóí áádóó bik'ee hóyée'go bąąh tsízdeezkééz. Nít'éé' aláahgo naat'áanii áhodííniid, Bélteshazar yinílyéii, baa neisíyeelii ááhyiłníinii t'áadoo bik'ee nił yé'í, áko Bélteshazar ázhdííniid, Shinanit'a'í nílíinii, baa neisíníyeelgo ááhyiłnínígíí éí danjoołáii índa ni'ana'í danilíinii t'éí bá át'é laanaa nisin.

²⁰Tsin sikaadgo yiniłtsánígíí tsin nooséełgo bidziil silį́į'ii áádóó bílátahdóó yá bidii'á silį́'ígíí t'áá nahasdzáán nidanees'ą́ąjį' t'áadoo bahat'aadí yit'į́ silį́į'ii

²¹éí bit'ąą' nizhóní áádóó bineest'ą' t'óó ahayóí bąąh hazlį́į'ii índa t'áá ałtso deiyą́ą doogo bá át'éii éí halgaigóó naaldlooshii nidaakaii yiyaa chaha'oh anídaakahii índa wódahgo tsídii nidaat'a'ii tsin bits'ádaoz'a' bąąh bit'oh áńdayiil'įįhígíí

²²éí ni ánít'į́, aláahgo naat'áanii nílíinii, ayóó ánít'é áádóó nidziil sínílį́į́'; bee ayóó ánít'éii yádiłhiłjį' nininísą́ índa bee níhólníihii ni' nidahonees'ą́ąjį' silį́į́'.

²³Áko aláahgo naat'áanii nilíinii ha'ídées'į́'í éí diyingo naal'a'í yá'ąąshdę́ę́' hadahóóle'go yiniłtsą́ągo áníinii, Tsin sikaadii k'íníłne' áádóó ałtso áníłdįįh, nidi tsehégod t'éí behétł'óól t'áá bił łeeh yí'áago ánílééh; béésh nitł'izii índa béésh łitsoii bináz'áago éí haz'ą́ągi tł'oh dootł'izhgo yíl'áa le', áko bíni' yá'ąąshdę́ę́' dahtoo' nínábíłtłoh le' índa naaldlooshii bił da'jiłchozhgo tsosts'id honídoohah.

²⁴Aláahgo naat'áanii nílíinii, díí ááhyiłnínígíí Aláahgo Ayóó'át'éii yee haadzíi'ii nik'i hwiidooleeł, shinanit'a'í aláahgo naat'áanii nílíinii:

²⁵diné danilíinii yits'ádandínóoyoł áádóó naaldlooshii bitahgóó nanííłka' dooleeł; béégashii nahalingo tł'oh niłchozh doo índa wót'ááhdę́ę́' dahtoo' bee nínáníltłoh dooleeł; tsosts'id nááhaijį' kót'éego hinínáa doo. Aláahgo Ayóó'át'éii éí diné yee bóhólníihgo bił nahaz'ą́ą́góó yinant'á áádóó t'áá bí íinízinígíí bik'ehgo yeidiyii'aahgo nił bééhoozinjį' kónít'ée dooleeł.

²⁶Ákondi tsehégod t'éí behétł'óól t'áá bił íí'áa doogo bee nihoot'ánígíí éí yá'ąąshdę́ę́' bídahólníihii bééhosínísįįdóó bik'ijį' aláahgo bee níhólníihgo bee nił nááhást'ą́ą dooleełgo át'é.

²⁷Éí bąą aláahgo naat'áanii nílíinii, kót'éego nidishnínígíí shá niizįįh: t'áá ákogi ánít'į́įgo binahjį' nibąąhági át'éii nahjį' nidiní'aah, índa jooba' ádaat'éii baa a'ááh nínízinii binahjį' na'át'e' nahjį' nidiní'aah, áko ná yá'át'éeh dooleełgo da'át'é.

²⁸Díí t'áá ałtso aláahgo naat'áanii Nébukadnézzar bik'i hoole'.

²⁹Áko díí naakits'áadah nídeezidgo Bábilangi bee hóhólníihgo hoł haz'ą́ągi nijigháá nít'éé'.

³⁰Áko aláahgo naat'áanii ání, Dooládó' Bábilan haz'ą́ągi ayóó áhoot'ée da. Bee ayóó ánísht'éii shá bééhodoozįįł biniyé ayóó át'éego shibee adziilii bee kin haal'áago íishłaa ni.

³¹Aláahgo naat'áanii t'ahdii yáłti'go, jó, yá'ąąshdę́ę́' iinéé' diists'ą́ą'go ání, Aláahgo naat'áanii Nébukadnézzar yinílyéii, díí bee nich'į' ha'oodzíí', aláahgo bee níhólníihgo bił haz'áanii ga' nits'ą́ą́' dahodiile'.

³²Áko diné danilíinii yits'ádandínóoyoł áádóó naaldlooshii bitahgóó nanííłka' dooleeł; béégashii nahalingo tł'oh niłchozhgo ádandoolííł; tsosts'id nááhaijį' kót'éego hinínáa doo. Aláahgo Ayóó'át'éii éí diné yee bóhólníihgo bił nahaz'ą́ą́góó yinant'á áádóó t'áá bí yinízinígíí bik'ehgo yeidiyii'aahgo nił bééhoozinjį' kónít'ée dooleeł.

³³T'áá áko saad bihoolyaago Nébukadnézzar nilíinii bik'i hoole'. Diné danilíinii bits'á hodi'needzood áádóó béégashii nahalingo tł'oh jiłchozh nít'éé' índa yá'ąąshdę́ę́' dahtoo' bee nínájíltłohgo hatsii' t'éí atsá bits'os nahalingo dínéesą́ áádóó háláshgaan tsídii bíláshgaan nahalin silį́į́'.

³⁴Éí bíighah niiníłką́ągo, shí Nébukadnézzar yinishyéii, yá'ąąshgóó déé'į́į'go sha'áni' shá háádídzaa, índa Aláahgo Ayóó'át'éii baa hózhǫ́ǫgo baa hosénih áádóó hool'áágóó hináanii baa hashniihgo shił yílįįd, háálá bee bóhólníihgo bił haz'áanii éí ahóyéel'áágóó bee bóhólnííh índa bee bóhólníihgo bił haz'áanii éí oochííłdę́ę́' áádóó oochííłgóó bee bóhólnííh.

³⁵Nahasdzáán bikáa'gi kéédahat'íinii t'áá ałtso t'áadoo nídandlínígóó yaa nitsíkees. Áko yá'ąąshdę́ę́' dah deínéehii índa nahasdzáán bikáa'gi kéédahojit'íinii hatahgóó t'áá bí nízinígi áyoolííł; doo ła'da t'ą́ą́' áhósin le' át'ée da, doo nidi kóbidi'doo'niił da, Ha'át'íishą' baa naniná?

³⁶Ts'ídá t'áá ákwii hoolzhishgo sha'áni' shá háádídzaa. Bee ayóó ánísht'éii índa ts'ídá aláahgo ayóó át'éii bee háádiisdzaago ts'ídá aláahgo bee shóhólníihgo haz'áanii bá ayóó át'éii shee náhásdlį́į́'. Kót'éego dashiłníinii índa shá bídahólníihii shaa nináhaaskaigo ts'ídá aláahgo bee óhólníihgo bee shił haz'ą́ągi t'áá íiyisí bee chánah sélį́į́' áádóó t'ah nááyówehgo ts'ídá ayóó át'éii shich'į' ánáánályaa.

³⁷Áko k'ad shí Nébukadnézzar yinishyéii yá'ąąshdi Aláahgo Naat'áanii baa hashniih áádóó agháago baa hashniih índa shił nilį́, háálá t'áá ałtsojį' ts'ídá t'áá ákogi át'éego áánííł índa yaa naagháii doo haada yit'ée da; t'áá háiida ádaa dzódlíigo yigáłígíí akéédę́ę́' niidoołt'eełgo yíneel'ą́.