Read Navajo DANIEL 6 Bible Online

DANIEL 6 - Navajo bible

DANIEL 6

¹Daráíyas éí bee óhólnííh bił haz'áanii t'áá át'éé nít'éé' naat'áanii danilíinii neeznádiindóó ba'aan naadiin ánéelą́ą'go bídahólníih doo biniyé bił hóshǫ́ǫgo niinínil.

²Aláahgo naat'áanii bee bóhólníihgo bił haz'áanii biyi'dóó doo bits'ą́ą́' yóó'adoo'dił da biniyé ts'ídá alą́ąjį' diné bídahólníhígíí táá' niinínil; Daniel éí ajítahgo alą́ąjį' hóhólnííh.

³Nít'éé' diné bídahólníhígíí áádóó náá'ákóne' naat'áanii danilíinii bitahdóó díí Daniel ts'ídá aláahgo bee hojiniihii hwii' hólónígíí bąą t'áadoo bahat'aadígo bee hwéého'dooszįįd, áko aláahgo naat'áanii éí bee bóhólníihgo bił haz'áanii t'áá át'éé nít'éé' bee hóhólníih doogo nihodeeshtééł, niizį́į́'.

⁴Ákohgo alą́ąjį' bóhólníhígíí áádóó náá'ákóne' naat'áanii danilíinii bee óhólníihgo bił haz'áanii bídéét'i'go Daniel bik'i hodoot'ááł danízin, nidi t'áadoo yee hak'ídahó'ahí da índa doo aaníinii ts'ídá bii' ádin, háálá ts'ídá t'áá aaníígóó ba'ahódlíii nilį́, t'áadoo asiih da índa bee bik'í hodoot'ahii ts'ídá t'áadoo bił yiiltsą́ą da.

⁵Ákohgo diné áda'ahidoo'niid, Daniel bee bik'i hodoot'áałii ts'ídá ádin, t'áá hazhó'ó biDiyin God bibee haz'áanii t'éí bee t'áá bik'i dahodidiit'áałgi át'é.

⁶Ákohgo díí bídahólníhígíí índa náá'ákóne' naat'áanii danilíinii éí aláahgo naat'áanii yaa áłah silį́į'go ádeidííniid, Daráíyas aláahgo naat'áanii nílíinii, hool'áágóó hinínáa le'.

⁷Bee óhólníihgo bił haz'ą́ągi alą́ąjį' bídahólníhígíí, náá'ákóne' bídahólníhígíí, naat'áanii danilíinii áádóó kót'éego daaníinii índa aląąjį' naazíinii ahíikaigo aláahgo naat'áanii éí bik'ehgo hoogáałii bidziilgo yee nihodoo'áałii yee hadoodzihgo bee lą́ da'siidlį́į́': aláahgo naat'áanii nílíinii, kodóó tádiin yiską́ąjį' diné t'áá háiida doo nich'į' sozdilzingóó, nidi náánáła' diyin bich'į' sozdilzingo éí náshdóítsoh bitsiijį' daditł'ooígíí shijéé' góyaa ahodi'yoolghą́ą́ł.

⁸Áko k'ad aláahgo naat'áanii nílíinii, bidziilgo handziihgo bee ak'e'ashchínígíí bikáá' nízhi' ánílééh; éí Míídiya dine'é índa Pérzha dine'é bibee haz'áanii bik'ehgo ts'ídá doo łahgo áńdoolníił da.

⁹Éí bąą aláahgo naat'áanii Daráíyas bee haz'áanii bikáá' bízhi' áyiilaa.

¹⁰Nít'éé' Daniel éí bee ak'e'ashchį́įgo ályaaígíí hoł bééhoozingo haghan góne' yah aníjoodzáago t'áá nahdę́ę́' áńjiit'įįhígi át'éego Jerúsalem bich'į'go tsésǫ' ąą át'éego nitséézhdígohgo táadi sonízdílzįįhgo iná'át'áahgo Diyin God bich'į' ahééh názhniidzįįh.

¹¹Ákohgo díí diné danilíinii éí ahíikaigo Daniel yaa niheekai áádóó biDiyin God yich'į' sodilzingo ná'ookąąhgo dayiiłtsą́.

¹²Ákohgo aláahgo naat'áanii yaa yíkaigo ádeidííniid, Aláahgo naat'áanii nílíinii, bee haz'áanii hadinilaii doósh nízhi' bikáá' íinilaa da? Shą́ą́' kodóó tádiin yiską́ąjį' diné t'áá háiida doo nich'į' sozdilzingóó, nidi náánáła' diyin bich'į' sozdilzingo éí náshdóítsoh bitsiijį' daditł'ooígíí shijéé' góyaa ahodi'yoolghą́ą́ł, doósh diníigo bee háínídzíi' da? Aláahgo naat'áanii ánáádoo'niid, Aoo', éí t'áá aaníí; Míídiya dine'é índa Pérzha dine'é bibee haz'áanii bik'ehgo ts'ídá doo łahgo áńdoolníił da.

¹³Ákohgo aláahgo naat'áanii yił dahoolne'go ádadííniid, Judíya kéyahdóó yisnáanii Daniel éí bee nihwííní'áanii bikáá' nízhi' íinilaii doo yik'eh hół'į́į da, nidi táadi sonídílzįįhgo aná'át'ááh.

¹⁴Ákohgo aláahgo naat'áanii kót'éego bił hóóne'go t'áá íiyisí nitseeltłah, áko ha'át'éegoda Daniel yisdádeeshtééł jinízingo shá bíighah ch'ééh baa nitsíjíkeesgo haa'ísh doo nijíłkeedgóó i'íí'ą́.

¹⁵Ákohgo díí diné éí aláahgo naat'áanii yaa áłah silį́į'go ádeidííniid, Aláahgo naat'áanii nílíinii, Míídiya dine'é índa Pérzha dine'é bibee haz'áanii bik'ehgo bee ha'oodzíi'ii, doodaii' bee nihwiist'áanii éí aláahgo naat'áanii haidiilaii ts'ídá doo łahgo áńdoolnííłgóó nił bééhózin le'.

¹⁶Ákohgo aláahgo naat'áanii haadzíi'go éí Daniel nídeizlóozgo náshdóítsoh bitsiijį' daditł'ooígíí shijéé' góyaa adayiisxan. Áko aláahgo naat'áanii éí Daniel áyidííniid, NiDiyin God t'áá áłahjį' bá nanil'a'ígíí yisdánółtééł.

¹⁷Áko náshdóítsoh bitsiijį' daditł'ooígíí shijéé' góyaa ahoodzą́ągi tsé yidádeideez'ą́ągo Daniel doo łahgo ánáábidi'doolníił da biniyé aláahgo naat'áanii t'áá bí biyoostsah áádóó biyaadóó naat'áanii danilíinii dabiyoostsah yee yik'i niyiiz'ą́.

¹⁸Ákohgo aláahgo naat'áanii bighangóó anáádzáago doo ayą́ą da áádóó dilní ał'ąą ádaat'éego yee nidaanéhígíí doo bee bá na'asne' da índa bił bits'áníkį́.

¹⁹Ákohgo aláahgo naat'áanii t'óó hoos'įįdą́ą́' nídii'na'go náshdóítsoh bitsiijį' daditł'ooígíí shijéé'góó haneetehee yílwod.

²⁰Áko náshdóítsoh bitsiijį' daditł'ooígíí shijé'ígíí bit'áahjį' nizhníyáago Daniel bich' į' yéego chayi' hazhdoolghaazhgo ájíní, Daniel, Diyin God Hináanii yá naal'a'í nílíinii, niDiyin God t'áá áłahjį' bá nanil'a'ígíísh náshdóítsoh bits'ą́ąjį' yisdánííłtį́įgo yínéés'ąąd?

²¹Ákohgo Daniel éí aláahgo naat'áanii áyidííniid, Aláahgo naat'áanii nílíinii, hool'áágóó hinínáa le'.

²²ShiDiyin God bidiyingo naal'a'í yiníł'a'go náshdóítsoh bitsiijį' daditł'ooígíí dáádadéesnóodgo áyiilaa, áko t'áadoo atídashiilaa da, háálá Diyin God binááł ts'ídá t'áadoo bee shik'íhót'ahígóó shééhoozin áádóó, aláahgo naat' áanii nílíinii, ninááł ts'ídá t'áadoo íít'įįdí da.

²³Ákohgo aláahgo naat'áanii ayóó át'éego haa bił hóózhǫǫd áádóó éí náshdóítsoh bitsiijį' daditł'ooígíí shijéé'dę́ę́' Daniel háádooltéełgo yee haadzíí'. Ákohgo náshdóítsoh bitsiijį' daditł'ooígíí shijéé'dę́ę́' Daniel hanááltį́įgo ts'ídá t'áadoo ádahoolaaí da lá, háálá haDiyin God beijólíigo joodlą́.

²⁴Áko aláahgo naat'áanii haadzíi'go éí Daniel bik'i dahozhdii'áanii niho'diisht'eezhgo, hada'áłchíní áádóó hweda'asdzą́ą́ t'áá bił, náshdóítsoh bitsiijį' daditł'ooígíí shijéé' góyaa adaho'diistł'íidgo t'ah hadah dazhnéedéehgo náshdóítsoh bitsiijį' daditł'ooígíí hach'į' dah diijée'go ahádahwiizhnizhgo dahats'in nidi ałtso dayíí'aal.

²⁵Ákohgo aláahgo naat'áanii Daráíyas éí diné danilíinii áádóó ał'ąą dine'é danilíinii índa bizaad ał'ąą át'éego yee yádaałti'ii éí nahasdzáán bikáá'góó kéédahat'íinii t'áá ałtso yich'į' ak'e'ashchį́: Bee hasht'ehodít'éii nihich'į' k'ee'ąą yilzhish dooleeł, yidííniid.

²⁶Bee haasdziihii bidziilgo áshłééh; éí bee shóhólníihgo bił nidahaz'áanii t'áá ałtso biyi' diné éí Daniel biDiyin God deidísin doo áádóó nidabiiłnáa doo, háálá Diyin God Hináanii nilį́ áádóó hool'áágóó ha'ólní áádóó bee óhólnííh bił haz'áanii t'áadoo áyółdįįhí da índa hoo'áłígíí doo nidoot'ih da.

²⁷Yisdá'iinííł áádóó bine' na'adzi'; bee éédahózinii ayóó át'éego ádahoonííł; éí yá'ąąshdi áádóó nahasdzáán bikáa'gi áánííł; jó, náshdóítsoh bitsiijį' daditł'ooígíí bits'ą́ąjį' Daniel yisdáyííłtį́.

²⁸Ákohgo Daráíyas nant'á yę́ędą́ą́' áádóó Pérzha kéyahdóó diné Sáíras nant'á yę́ędą́ą́' díí Daniel yá'át'ééh há áhooníiłgo náás jiníyá.