Read Navajo DANIEL 8 Bible Online

DANIEL 8 - Navajo bible

DANIEL 8

¹Aláahgo naat'áanii Belsházar nant'áago táá' náhááh góne' shí, Daniel yinishyéii, átsé shił áhoodzaa áádóó shił ánááhoodzaa.

²Áko shił áhoodzaago yiiłtsánígíí éí Íílam nahós'a'gi Shúshan kin haal'áagi naashá nisin; shił áhoodzaago Yúlaii tooh nílínígíí bibąąhgi sézį́ nisin.

³Ákohgo háighal nít'éé', shoo, tooh nílínígíí bibąąhgóó deenásts'aa' léi' sizį́įgo yiiłtsą́. Bidee' naakigo t'áá ałch'ijí nineezgo yaa'á; t'ááłá'í éí atisgo yaa'á, nidi éí akée'di haníísą́.

⁴Deenásts'aa' éí e'e'aahjigo áádóó náhookǫsjigo índa shádi'áahjigo éí adigohgo yiiłtsą́; doo ła'da bidááhdę́ę́' dzoozįįh át'ée da, índa bibee adziilii bits'ą́ąjį' doo yisdájóya' át'ée da, nidi t'áá bí bíniik'ehgo ááníiłgo ts'ídá ayóó át'éii í'diilyaa.

⁵Áko baa nitsískees nít'éé', shoo, tł'ízíchǫǫh léi' e'e'aahdę́ę'go doo ni' nihideeltaałgóó nahashkáá' hooleeł; t'áadoo bahat'aadí bináta'dę́ę́' bidee' deez'á.

⁶Tooh bibąąhgi deenásts'aa' bidee' naakigo yiiłtsánígíí yaa yílwod áádóó t'óó báhádzidgo ádá hoolchįįdgo yich'į' dah diilwod.

⁷Éí deenásts'aa' áhą́díjį' yich'į' yilwołgo yiiłtsą́, áko t'áá íiyisí yee nahodeeshzhǫ'go atíyiilaa, áádóó bidee' naakiígíí k'íiníti'go deenásts'aa' doo bidziil da silį́į'go nihíideestsxisgo yik'i naayá, áádóó yee bidziilii bits'ą́ąjį' t'áadoo deenásts'aa' yisdáyółtéłí da.

⁸Ákohgo tł'ízíchǫǫh ayóó át'éii í'diilyaa, nidi bidziil silį́į'go bidee' ayóó át'éii k'é'éltǫ'go íí'á yę́ęgi adee' dį́į'go t'áadoo bahat'aadí hadaneesą́ągo t'áá dį́į́'góó yádiłhił bich'į'go dadeez'á silį́į́'.

⁹Áko bidee' hadaaz'áii ła' bąąhdóó adee' áłts'íísígo háá'á silį́į́'; éí shádi'áahjigo áádóó ha'a'aahjigo índa kéyah hózhóní bich'į'go t'óó báhádzidgo nídiidzá.

¹⁰Áko yá'ąąshdi dah da'ínéehii áádóó sǫ' yíl'áii yich'į' ayóó át'éego nídiidzá índa sǫ' yíl'á ła' ni'jį' nayííghazgo yik'i naayá.

¹¹T'áá bí ayóó át'éego ádaa ha'niihgo dah da'ínéehii binanit'a'í nilíinii yił aheełt'éego í'diilyaa, áko t'áá áłahíjį' didlidgo nááhániihii yits'áhwiistł'ííd, áádóó hodiyingo haz'áanii yiyííłchxǫ'.

¹²Áko ádił nida'dziilzíihgo biniinaa dah da'ínéehii áádóó t'áá áłahjį' didlidgo nááhániihii baa deet'ą́, áko t'áá aaníinii ni'jį' ayiyííłhan, áádóó t'áá bí nízinígi áát'įįdgo yee náás deeyá.

¹³Ákohgo diyinii ła' yáłti'go diséts'ą́ą́', nít'éé' diyinii náánáła' éí yáłti'ii yich'į' haadzíi'go ání, Haash nízáagi t'áá áłahjį' didlidgo nááhániihii ił ádzaa yę́ę éí ádił ni'iidzííh bik'e'íyée'ii ííł'į́įgo diyingo haz'ánígíí áádóó dah da'ínéehii yik'i nidooldah?

¹⁴Áko áshidííniid, Naakidi mííldóó ba'aan táadi neeznádiin i'íí'ą́ąjį' áádóó hoos'įįdjį' índa hodiyingo haz'áanii hasht'ééhodoolnííł.

¹⁵Ákohgo shí, Daniel yinishyéii, díí shił áhoodzaaígíí ááhyiłníinii bik'idi'deeshtį́į́ł biniyé baa nitsískees nít'éé', shoo, ła' diné nahojílingo shidááhdę́ę́' dziizį'go yit'íní ízh'diilyaa.

¹⁶Áko Yúlaii tooh nílį́ bikáá'dóó diné biinéé' diséts'ą́ą'go ání, Géíbriyel nílíinii, díí diné bił ádzaaígíí ááhyiłníinii bee bił hólne'.

¹⁷Ákohgo sízínígi shit'áahjį' niníyá, áko shaa níyáago t'áá íiyisí shił yéé' hazlį́į'go ni'jį' tsé'yaa néshjoolgo áshidííniid, Diné nílíinii, nił ádzaaígíí éí nihoolzhíshígíí át'éego bik'i'diitįįh.

¹⁸Áko t'ah shich'į' yáłti'go t'áá íiyisí bił niizį́į'go naa'i'ííłhaazh lá, nidi shideelchidgo náshiisį'.

¹⁹Áko áshíłní, Shoo, nihoníyáadi ayóó áhodooníłígíí bee nił hodeesh'nihgo nił bééhonisįįh, háálá nihodoogáłígíí ts'ídá baa hodoolzhish.

²⁰Deenásts'aa' bidee' naakigo yiniłtsáanii éí Míídiya índa Pérzha kéyahdóó aláahgo naat'áanii át'į́.

²¹Áko tł'ízíchǫǫh éí Gríis kéyahdóó aláahgo naat'áanii nilíinii át'į́, áko bináta'dę́ę́' bidee' ayóó át'éii éí alą́ąjį' aláahgo naat'áanii nilíinii át'į́.

²²Áko adee' k'é'éltǫ'ígíí bitsásk'ehgi dį́į'go hanáádaneesánígíí éí dine'é bitahdóó dį́į'go bee óhólníihii nááhodoodleeł nidi, t'áá bí bidziilígíí bee éí dooda.

²³Áko bee óhólníihgo bił haz'áanii bił nihoolzhíishdi ádił nida'iisííh bílátah dahashzhiizhgo aláahgo naat'áanii hashké nídzinii índa t'áá naaki nahwiiláii nídidoodááł.

²⁴Áko bibee adziilii ayóó át'ée doo, nidi t'áá bí bidziilígíí bee éí dooda áádóó t'óó ayóogo ó'oołdįįł doo índa yaa naagháii yee náás yigáałgo dine'é ayóó ádaat'éii índa diyin dine'é íidoołdįįł.

²⁵Áko anó'áahgo yee łé'áchxáazhgo náás doogááł; t'áá bí íinízinígi ayóogo ádaa ha'niihgo nitsíkees doo, hodéezyéelgo kééhojit'íinii t'áadoo kót'é'ílíní t'óó ahojíyóí áhodoołdįįłgo naat'áanii danilíinii yinanit'a'í yich'į' nídidoodááł, nidi t'áadoo bi'deelníhí atíbidi'doolnííł.

²⁶I'íí'ą́ągo índa abínígo nił áhóót'įįdígíí éí t'áá aaníígóó bee nił hóóne', nidi nił áhoodzaaígíí naníł'in, háálá t'óó ahayóí néidoolkááł.

²⁷Áko shí, Daniel yinishyéii, shitah doo hóóts'íídgóó t'óó sétį́įgo díkwíí shį́į́ yiską́, ákohgo nídiish'na'go aláahgo naat'áanii hánídíshnish, nidi shił áhoodzaaígíí t'áá íiyisí bik'ee t'óó shił ahayóigo t'áadoo ła' yik'i'diitání da.