Read Navajo HOSEA 10 Bible Online

HOSEA 10 - Navajo bible

HOSEA 10

¹Ízrel éí ch'il na'atł'o'ii bit'ąą' t'óó ahayóígíí nahojílin. T'áá hó honeest'ą' ádá nishójíyoołt'eehígíí k'ee'ąą deeshzhiizhgo bikáá' náá'iiniihí ałdó' bilááh yileehgo áyiilaa, áko hakéyahgi yá'át'éehgo haz'ánígíí bik'ehgo e'elyaii bich'į' nidahadláii danizhónígo áyiilaa.

²T'áá naaki nahwiiláago nitsídaakees. K'ad lą́ą ba'át'e' bikáá' habidoonił. Bikáá' nááda'jiiłniihii Bóhólníihii éí naa'iidiyoołtł'ił, áádóó eda'alyaii ałtso íidoołdįįł.

³Áko ádadidooniił, Bóhólníihii doo dadíníilzingóó biniinaa aláahgo naat'áanii nihee ádin; aláahgo naat'áaniishą', ha'át'íí nihá baa nizhdoogáałgo bízhneel'ą́?

⁴T'óó ádaaníigo ahada'deet'aahgo dabiyooch'íidgo ádee hadahididziih. Éí bąągo nihwiisdládígóó ch' il aghánii hááhinoot'į́łígi át'éego ándahwiit'aah doo.

⁵Samériya kéyahgi kéédahat'ínígíí éí Beth-éíven kin shijaa'gi béégashii yáázh be'elyaii yaa nitsinákah doo. Diné índa nááda'iiłniihii éí yaa bił dahoneeni yę́ę yaa yínííł danilį́įgo daacha doo, háálá ayóó át'é dayó'ní yę́ę bił ahóóyáa doo.

⁶Béégashii yáázh be'elyaii ałdó' aláahgo naat'áanii ayóó át'éii baa dooltééł biniyé Asíriya kéyahgóó eeltį́į doo, áko Íífreiyim t'óó ádaa yánídzin doo, índa Ízrel t'áá bí kót'éego daaníinii bił baa yáhodoosįįł?

⁷Tó bitáláwosh yóó'ahi'eełígi át'éego Samériyadóó aláahgo naat'áanii ábidi'dooldįįł.

⁸Éíven hoolyéegi ninádahałaah doo biniyé wódah nahaz'ą́ągo ádaalyaaígíí bee Ízrel dine'é ádił nida'dziiszí'ígíí ádooldįįł. Bikáá' nááda'iiniihí bikáa'gi ch'il biwosh hólóonii índa ch'il deeníní hadahidínóosééł, áko diné éí dził ádeididooniił, Nihik'i dadoołkǫǫh, áádóó dah daask'idígíí ádeididooniił, Nihik'i daołdaas.

⁹Ízrel nílíinii, Gíbiyah kin haal'áagi ádił asínílziih yę́ędóó wóshdę́ę́' t'ahdii t'áá ákónít'į́; Gíbiyahgi ts'ídá doo ákwii ádáát'įįdii t'áadoo ałtso anaa' bił anoodaa' da.

¹⁰T'áá shí íiniizį́į'go atíhodeeshłííł áádóó naakidi ahą́ą́h nániiláago ádihodiilt'i'ígíí háni' dadineesdlį́į'go biniinaa atíhodeeshłíiłgo ał'ąą dine'é hak'ijį' danilį́į doo.

¹¹Íífreiyim éí béégashiitsa'ii yízhǫǫdígíí nahojílingo oolch'ííh hoł ayóó áhoot'éego bąą hazéédí'déeshtį́į́ł. Íífreiyim azaatł'óól bee nahashło' doo; Júdah éí nihozhdiyoołdlał; Jéíkab t'áá bí ádá ak'i ni'dooshoł.

¹²T'áá ákogi át'éii álástsii' nilíinii t'áá nihí k'idadohłé áádóó aa a'ááh hasin áłah áńdadoohdlííł; nihił nídahóótł'isgo nidahwiyołdlaad, háálá Bóhólníihii hádaaht'į́į dooleełjį' ahoolzhiizh, áko honíle'go t'áá ákogi át'éii nihik'ijį' neidoołtį́į́ł.

¹³Doo yá'áshóonii bił nidahoyoołdláadgo doo ákwii ádaat'éii áłah áńdaohdlaa índa wooch'ííd bee nídanoochaad, háálá t'áá nihí ádanoht'éii éí diné ayóó ádaat'éii t'óó ahayóígíí baa dadzíínóhłíí nít'éé'.

¹⁴Éí bąą t'áá Shálman joolyéii Beth-árbel kin shijaa'gi anaa' hasłį́į'go é'ésdįįdgo amá danilíinii bada'áłchíní t'áá yił nihídeideestsis yę́ęgi át'éego nidine'é bitahgóó anaa' bik'ee t'óó da'ayóii dahodooleełgo bine' nidaahdzi'ii a łtso ádeidoołdįįł.

¹⁵Béthel kin haal'áagi ts'ídá doo yá'áshónígi ádaaht'ínígíí bąą nihich'į' ákódahodoonííł, T'ah abínígo Ízrel dine'é aláahgo binanit'a'í ts'ídá ałtso ábi'didooldįįł.