Read Navajo HOSEA 11 Bible Online

HOSEA 11 - Navajo bible

HOSEA 11

¹Ízrel áłchíní nilį́į́dą́ą́' ayóó'íínísh'níí nít'éé'. Shiye' Ííjip kéyahdę́ę́' wóshdę́ę́' ch'ínínááh, bidííniid.

²Diyin God yá dahalne'ii bíká ádaaníigo t'ah yówehgo t'óó yits'ą́ąjį' dah dahidiikai; Béíyal yich'į' nááda'iisnii' áádóó didlidgo náádahaniihii éí eda'alyaii yich'į' náádayiisnii'.

³Shigaan bee Íífreiyim dine'é ádídeíníshtą'go yikah dooleełgóó bínabiníłtą́ą́'. Hadaałt'é áńdeishdlaa, nidi t'áadoo bił béédahoozin da.

⁴Dinégi át'éego ayóó'ó'ó'ní bee át'ááh hweesh'nil. Ha'deestsoł biniyé hach'į' yaa ásdzaago hazáát'i'í haa diinil.

⁵Ííjip kéyahgóó doo nídookah da, nidi doo shich'į' t'ą́ą́' níjíkáhígíí biniinaa Asíriya dine'é aláahgo hondant'áa doo.

⁶T'áá bí kót'éego daaníinii biniinaa bikin hadaas'áágóó diltłish bee atíbidi'doolnííł áádóó bidáń'da'ditį́įhii bits'ą́ą́' ádooldįįł índa ádabidi'dooldįįł.

⁷Shidine'é shits'ą́ą́' t'ą́ą́' honídoo'nííłjí ahodiyíí'ą́. Azhą́ Diyin God yá dahalne'ii, Aláahgo Ayóó'át'éii bich'į' nináhóhkááh, dahałníi nidi, t'ááłá'í nidi doo ła' haa haniih da.

⁸Íífreiyim nílíinii, haash yit'éego ninándideesh'ááł? Ízrel nílíinii, haash yit'éego t'óó ni'deeshnih? Haash yit'éego Ádmah hoolyéii atílyaa yę́ęgi át'éego atíndeeshłííł? Haash yit'éego Ziibówim hoolyéii atílyaa yę́ęgi át'éego atíndeeshłííł? Shijéí bee nihaa yíníí ł nishłį́įgo nihaa a'áhí néiniisdzįįh.

⁹Yéego hashké néiniisdzįįhígíí doo bee atíhodeeshłíił da. Íífreiyim atíhodeeshłííł biniyé doo nááhodeeshłeeł da, háálá doo diné nishłį́į da, nidi Diyin God nishłį́. T'ááłá'í Diyinii nishłį́įgo nihitahgóó honishłǫ́ áádóó doo atí'deeshłííł biniyé hodeeshłeeł da.

¹⁰Bóhólníihii yikéé' dah didookah. Náshdóítsoh bitsiijį' ditł'ooígíí ání nahalingo yéego áníi doo; t'áá aaníí, yéego áníigo e'e'aahdę́ę́' Ízrel dine'é bitah dahoditłidgo ninádahidookah.

¹¹Tsídii bitah hoditłid nahalingo Ííjip kéyahdę́ę́' nináhidookah áádóó hasbídí bitah hoditłid nahalingo Asíriya kéyahdę́ę́' nináhidookah índa dabighangi nináhideesh'ish, ní Diyin God.

¹²Íífreiyim ayóogo shinó'ááh áádóó Ízrel dine'é doo chohoo'į́į́góó shinda'alo', Júdah éí Diyin God ba'ahódlíii t'ahdii yits'ą́ąjį' yigááł.