Read Navajo HOSEA 12 Bible Online

HOSEA 12 - Navajo bible

HOSEA 12

¹Íífreiyim éí bizááyol; ha'a'aahdę́ę́' níyolígíí yikéé' naaghá; t'áá ákwíí jį́ t'óó báhádzidgo biyooch'ííd áádóó t'áá na'níle'dii naagháago ni'iiłchxǫǫh. Asíriya dine'é yił aha'deet'ą́ índa Ííjip kéyahgóó ak'ah ayiiyeeh.

²Diyin God éí Júdah yił ałgha'dit'ááh. Jéíkab ájít'éii bik'ehgo atíhodi'doolnííł; baa nijigháii bik'ehgo k'ééhodi'doolnííł.

³T'ah iishch'id bii' hojílǫ́ǫgo hánaaí bikétal dziiłtsood áádóó hastiin dzizlį́į'go Diyin God bich'į' nidzisdzil.

⁴T'áá aaníí, diyingo naal'a'í hoł na'ahíneeztą́ą'go bik'eshdidlį́įgo ahoolzhiizh; jichago yee ak'ijidlíii baa níjooskan. Béthelgi Diyin God baazhníyáago áadi Diyin God nihich'į' hahaasdzíí'.

⁵T'áá ałtsoní bee Bóhólníihii Diyin God bízhi' bee bééhániihii éí Bóhólníihii wolyé.

⁶Éí bąą niDiyin God bich'į' dah nídoohkááh; t'áá áłahjį' jiinohba'go t'áá ákóne' ádaaht'į́ índa t'áá áłahjį' nihiDiyin God biba' ádanoht'é.

⁷Na'iiłniihii bee i'doodlohii dah yoojih nahalingo diné yide áhósingo bił ayóó áhoot'é.

⁸Íífreiyim ání, T'áá aaníí, at'íinii sélį́į́', t'áá aaníí, asést'įįd. Yisht'íinii t'áá ałtso binaashnishgo t'áadoo doo ákwii áát'įįdí da.

⁹Nidi Ííjip kéyahgi kééhoht'į́ yę́ędóó wóshdę́ę́' shí Bóhólníihii nihiDiyin God nishłį́. Hodílzingo áłah ná'ádleeh bá hoo'a' góne' níbaal bii' kééhoht'į́ yę́ęgi át'éego ánáánihideeshdlííł.

¹⁰Diyin God yá dahalne'ii bich'į' hahásdzíí' áádóó lą'ígóó bił ádahooníiłgo íishłaa índa Diyin God yá dahalne'ii biniit'aa hane' bee ak'idi'dootį́įłii bee hashne' nít'éé'.

¹¹Gíliyad kéyahgi doo ákwii é'ét'éiísh hólǫ́? T'áá aaníí, ákwii kéédahojit'íinii t'áadoo dajílíní da. Gílgal kin shijaa'gi dóola náádayiiłniihgo bibikáá' nááda'iiniihí éí dá'ák'eh nihwiisdládígóó tsé yáádaa'áhígíí nidahalin.

¹²Áko Jéíkab éí Síriya kéyahgóó yóó'anííchą́ą́' índa Ízrel be'asdzą́ą́ dooleełii yik'é naalnishgo be'asdzą́ą́ dooleełii yik'é na'neeskaad.

¹³Diyin God yá halne'ii biniit'aa Ííjip kéyahdę́ę́' Ízrel dine'é yił ch'íiní'eezh, áko halne'ii biniit'aa dadzoodzíí'.

¹⁴Íífreiyim éí ayóó át'éego Diyin God bá hojííłchįįd; éí bąą haBóhólníihii éí ni'dzistseedgo dił deezna'ii bee hohodiit'i'go áhodoolííł áádóó ha'át'e' hak'ijį' nídoodleełgo yá nináhodoołt'eeł.