Read Navajo HOSEA 13 Bible Online

HOSEA 13 - Navajo bible

HOSEA 13

¹Íífreiyim yájíłti'go diné bitah dahoditłid nít'éé'; Ízrel dine'é bitahgi t'áá bí ayóó át'éii í'díl'į́, nidi Béíyal bich'į' nahojiłáago ádił adzisiihgo dadziztsą́.

²Áko k'ad t'óó tsé'édin ádił nááda'ílzíihgo béésh łigaii deidiłhį́į'go eda'alyaii ádá ádayiilaa. T'áá bí yik'ida'diitáanii bik'ehgo diné da'iichįįhii eda'alyaii t'áá ałtso ádayiilaa. Áko ádaaní, Diné nááda'iiłniihii éí béégashii yáázh bida'alyaii nídeints'ǫs doo.

³Éí bąą áhí ałtso ádįįhígi át'éego, doodaii' dahtoo' ádįįhígi át'éego, doodaii' azhool bił yóó'ahiyółígi át'éego índa ch'íláyi'dóó łid bił yóó'ahiyółígi át'éego ádazhdoodįįł.

⁴Nidi t'áá Ííjip kéyahgi kééhoht'į́ yę́ędóó wóshdę́ę́' nihiDiyin God Bóhólníihii nishłį́. T'ááká náánáła' diyin ánádaohdle' lágo, háálá yisdá'iiníiłii doo ła' nááhódlǫ́ǫ da.

⁵Honoojíidi t'áá íiyisí hóółtseiigi kééhoht'į́įgo nihééhasin nít'éé'.

⁶Bikéyah hootsoígíí bik'ehgo hwiih daazlį́į́' áádóó bijéí yee ayóó át'éego ádaa dadzoosdli'; éí bąą t'óó shaa dayooznah.

⁷Áko bich'į' náshdóítsoh bitsiijį' ditł'ooígíí nahonishłin doo; náshdóítsoh łikizhii nahonishłingo atiin bąąhgi baa hííníshtį́į doo.

⁸Shash biyázhí bee jini'įįh nahonishłingo hak'i hwiideeshłeeł; náshdóítsoh nahonishłingo hajéíts'iin ałk'ídadínéesǫ́ǫ́s; naaldlooshii báhádzidii ni'iiníshígi át'éego ałtso dahodeeshdił.

⁹Ízrel nílíinii, níká anáshwo'go shik'ijį' nílį́įgo t'áá ni ádini'nildįįdgo át'é.

¹⁰Aláahgo ninanit'a'í yisdánídoołtéełiishą' háájí? Áádóó nikin hadaas'áágóó ná dahwée'aahiishą' t'áá ałtso háájí adahaaskai? Shą́ą́', Aláahgo naat'áanii áádóó naat'áanii danilíinii shá ninínííł, dííníniid.

¹¹Sháhóóchįįdgo aláahgo naat'áanii ná niníłtį́ índa hashké niisdzį́į'go nahjį' kóshłaa.

¹²Íífreiyim doo ákwii áát'įįdii áłah ályaa; yee ádił ni'iiszíi'ii hasht'e'nii'nil.

¹³Asdzání awéé' bídii'na' nahalingo yínííł hak'i hwiidooleeł; aye' doo hóyáanii nilį́; bidi'doochíiłjį' ahoolzhiizhgo doo habíni' da.

¹⁴Jishcháá' bibee adziildę́ę́' nááhodiyeeshnih. Aninéédę́ę́' nááhodiyeeshnih. Aniné nílíinii, bee nik'e'íyée'ii yę́ęshą' éí háájí? Jishcháá' nílíinii, bee í'ííłdįįłii yę́ęshą' éí háájí? Doo naa a'ááh nisin da.

¹⁵Azhą́ bik'isóó bitahgóó t'óó ahayóí bineest'ą' nidi, ha'a'aahdę́ę́' dooyoł; éí honoojíídę́ę́' Bóhólníihii níyolgo íidoolííł áádóó tó háálíinii náhodooltsih índa tó ha'niłhoshii náhooltseii doo áádóó naalye'é da'ílíinii ałtso hats'ą́ą́' néididoolééł.

¹⁶Samériya ba'át'e' bee bohodidoot'ih, háálá biDiyin God yich'į' naalteeh nít'éé'. Bidine'é éí diltłish bee nidabidi'dootsił; be'awéé' bits'ą́ą́' nihídahidiiltsxisgo kódaníshéhígo nihidadíl'áa dooleeł; sáanii daaltsáanii yighá deidoogish.