Read Navajo HOSEA 2 Bible Online

HOSEA 2 - Navajo bible

HOSEA 2

¹Nik'isóó, Ámai, kóbidiní, áádóó nilahkéí, Ruhámah, kóbidiní.

²Nihimá nídeinohkąąh, háálá k'ad doo she'asdzą́ą́ jílį́į da áádóó k'ad doo hahastiin nishłį́į da. Bee hwe'ajiłígíí háni'dii yóó'azhdi'aahgo bił ahizhdilyéhígíí habe'astse' bits'ą́ąjį' kójílééh,

³áko doo ákójínééhgóó éí t'áá ho'dizhchínígi át'éego t'áá łichí'ígo áhodeeshłííł áádóó honoojíigi t'áá hóółtseii nahalingo áhodeeshłííł índa dibáá' hodiyoołhééł.

⁴Ha'áłchíní ałdó' doo baa a'áhí dínéesįįł da, háálá ałjiłnii ba'áłchíní danilį́.

⁵Jó, bimá ałjiłgo nibiishchínígíí ałdó' t'óó baa yáhásinígi áhóót'įįd; jó kóní, Bił ałch'į' dah daashwo'ii bikéé' tádíshyeed dooleeł; éí bááh índa tó shaa dayiikaah; aghaa' shí dooígíí áádóó naak'ą' shi'éé' ádeeshłíłígíí índa áliv ak'ah shí dooígíí áádóó yishdlánígíí ałdó' yee shaa dajooba'.

⁶Éí bąągo ch'il deeníní honídeesht'ih áádóó hadádi'deeshtł'į́įłgo t'áadoo ch'íjóya'jį'góó áhodeeshłííł, jó'akon.

⁷Bił ałch'į' dah dajilwo'ii bikéé' náázhdiilwo' nidi, doo ła' bił jididoodił da; házdéez'į́į' nidi, doo bik'ízhdoogáał da; ákohgo ázhdidooniił, Átséédą́ą́' shahastiin nít'ée'ii bich'į' t'óó nihéédeeshdááł, háálá éí aláahgo yá'át'éehgo bił tádísh'aash nít'éé'.

⁸Áko baa hánilígíí doo yaa ákonízin da; éí tł'oh naadą́ą́' áádóó wáin ániidíii áádóó ak'ah ádaat'éii índa béésh łigaii áádóó óola k'ee'ąą yilzhishgo éí bidiyin Béíyal wolyéii yá choyooł'į́į́ nít'éé'.

⁹Éí bąą da'neest'ą́ą́ góne' náádeeshdáałgo shitł'oh naadą́ą́' índa wáin ániidíii bits'ą́ą́' nahjį' kónídeeshdlííł áádóó t'áá łichí'ígo bee háázhdiit'įįh doo biniyé aghaa' índa na'at'ą́hí łigaii dits'idgo yistł'ónígíí baa deet'ą́ nít'ée'ii bits'ą́ą́' nahjį' kónídeeshdlííł.

¹⁰Yił ałch'į' ádaat'íinii binááł t'óó baa yáhásingo jiinánígíí yit'íní ádeeshłííł áádóó ts'ídá doo ła' shílák'eedóó yisdáhółtééł át'ée da dooleeł.

¹¹Baa hoł hózhóonii t'áá át'é éí áda'azįįd nídeit'aahii áádóó dah yiitą́ągo háá'áyį́į́h jį́ áádóó hoháá'áyį́į́h jį́ índa dahozdísingo áłah nída'adleehii t'áá ałtso nahjį' kódeeshłííł.

¹²Hach'il na'atł'o'ii índa hatsin fig naazkaadii hats'ą́ą́' deeshchǫǫł; éí, Bił ałch'į' dah daashwo'ii shich'į' nidayiiléego shaa dayiiznil, jiníigo baa yájííłti', nidi t'áá ałtsoní bee hodíłch'ilgo ádeeshłííł áádóó nidaaldlooshii yaa nahodidookah.

¹³Béíyal wolyéii bich'į' didlidgo nááhániihii náájiisnii'go biniinaa atíhodeeshłííł. Jaatł'óół índa tsé da'ílíinii t'éí bee háázhdiit'įįh áádóó bił ałch'į' dah dajilwo'ii bikéé' yóó'aníjílwo' áádóó shaa jiyooznah, ní Bóhólníihii.

¹⁴Éí bąągo ádích'į'go kóhodeeshłíiłgo honoojíijį' ahodeesłóós, jó'akon; áadi hazhó'ó hach'į' hadeesdzih.

¹⁵Áádę́ę́' nídzídzáago hach'il na'atł'o'ii haa nídideesh'ááł áádóó Éíkor honíteel góyaa chohoo'į́įgo ch' é'étiin há ádeeshłííł, áko ániid nijigháádą́ą́' t'áá Ííjip kéyahdę́ę́' ch'ízhníyáago hoł hózhǫ́ǫgo hojitaałígi át'éego hojitaał doo.

¹⁶Éí bijį́ shahastiin náshididíí'niił, nidi bóhonishníihii doo nááshidí'níi da doo, ní Bóhólníihii.

¹⁷Béíyal bee dawójíii doo náájójíígóó áhodeeshłííł, áko náásgóó dabízhi' doo bééjílniih da dooleeł.

¹⁸Éí bijį́ naaldlooshii áádóó tsídii índa nidaa'na'ii bił bee aha'deet'áanii há ádeeshłííł: Ałtį́į́' índa diltłish ałtso ádeeshdįįł áádóó anaa' baa na'aldeehii nidoot'ih. Ákohgo hasih haz'ą́ągi háádaalyį́įhgo ádeeshłííł.

¹⁹Áádóó hool'áágóó ná'deeshheh; ts'ídá t'áá ákogi át'éii áádóó doo daadeit'éégóó áádóó ayóó'ánósh'níigo índa naa a'ááh nisingo ná'deeshheh.

²⁰Sha'ahódlíigo ná'deeshheh áádóó Bóhólníihii bééhonísin dooleeł.

²¹Éí bijį́ wót'ááh bich'į' t'ą́ą́' háádeesdzih áádóó éí nahasdzáán yich'į' t'ą́ą́' háádoodzih, ní Bóhólníihii.

²²Índa nahasdzáán éí tł'oh naadą́ą́' áádóó wáin ániidíii índa ak'ah yich'į' t'ą́ą́' háádoodzih, áádóó éí Jézriyel yich'į' t'ą́ą́' háádadoodzih.

²³Áko ádá k'ihodideeshłééł; doo haa a'ááh nisin da yę́ę haa a'ááh dínéesįįł, áádóó, Doo shidine'é danohłį́į da, ho'di'níí nít'ée'ii, K'ad shidine'é danohłį́, bidideeshniił, áko, Ni t'éí nihiDiyin God nílį́, dashididooniił.